Ministerio ni Jesus Ditoy Daga

TI MINISTERIO ni Jesu-Kristo ket dakkel unay ti nagbalin nga impluensiana iti biag dagiti tattao iti isuamin a paset ti lubong. Saan nga impalubos ni Jesus a maisiasi ti atensionna iti panggepna. Kas kinunana: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.”​—Lu 4:43.

Kas ipakita dagiti mapa a makita ditoy, nalawa a teritoria ti nakasabaanna​—kaaduanna a nagnagna laeng. Bayat ti ministeriona, saanna a linanganan ti napan idiay Jerusalem no piesta dagiti Judio. Dagiti panagdaliasat nga espesipiko a nadakamat kadagiti Ebanghelio ket makita kadagiti mapa. Manipud Jerusalem winanasna ti teritoria ti Judea. Ngem binusbosna ti kaaduan a panawenna idiay Galilea, a naan-anay a nangasaba iti intero a probinsia. Intultuloyna met ti ministeriona kadagiti tattao nga adda iti rehion ti Tiro ken Sidon, nga agturong iti Decapolis, nga agingga iti Perea. Naan-anay a sinaksianna ti kinapudno, a nangibati iti nagsayaat nga ulidan agpaay kadagiti pasurotna.​—Jn 18:37; Ara 1:8; Mt 28:19, 20.