Ti Biag ken Ministerio ni Jesus
Nangted Leksion ni Jesus iti Kinapakumbaba
KALPASAN ti pannakapaimbag ti baro a nagunggan ti demonio idiay disso a dumna iti Cesarea Filipos, tinarigagayan ni Jesus ti agsubli idiay Capernaum. Nupay kasta, kayat ni Jesus ti agmaymaysa a kadua dagiti adalanna iti dayta a panagdaliasat tapno maisaganana ida a maipaay iti ipapatayna ken kadagiti responsabilidadda kalpasanna. “Ti Anak ti tao maiyawatto kadagiti im-ima dagiti tattao,” inlawlawagna kadakuada, “ket isu papatayendanto, ngem, nupay mapapatayda, iti maikatlo nga aldaw agungarto.”
Nupay nagsao a nasapsapa ni Jesus iti daytoyen, ken aktualmente a tallo nga apostol ti nakakita ti panagbaliw ti langa kabayatan a napagsasaritaan ti “ipapanawna,” dagiti paspasurotna ti kaskasdi nga awanan ti pannakaawat maipapan iti dayta a banag. Nupay awan kadakuada ti nangpadpadas a nangilibak nga isunto ti mapapatay, kas inaramid a nasapsapa ni Pedro, agbutengda nga agsaludsod kenkuana nga ad-adda pay maipapan iti dayta.
Idi agangay nakagtengda idiay Capernaum, nga isut’ kasla pagaw-awidan a pagtaenganda bayat ti ministerio ni Jesus. Isu met dayta ti ili ni Pedro ken sumagmamano kadagiti dadduma nga apostol. Sadiay, dagiti lallaki nga agkolkolekta ti buis iti templo immasidegda ken ni Pedro. Nalabit inrantada nga iraman ni Jesus iti kasla panangdadael iti nakaiyugalianen a kustombre, insaludsodda: “Ti mannursuroyo saanna aya a bayadan ti dua a dracma a buis iti [templo]?”
“Wen,” insungbat ni Pedro.
Ni Jesus, a nalabit dimteng iti balay di nabayag kalpasanna, pagaammona ti adda a napasamak. Gapuna sakbay ti panangiyeg ni Pedro iti dayta a banag, insaludsod ni Jesus: “Ania ti pagarupem, Simon? Asino ti pagsingiran dagiti ar-ari iti daga ti impuesto wenno buis? Kadagiti annakda wenno kadagiti ganggannaet?”
“Kadagiti ganggannaet,” insungbat ni Pedro.
“No kasta, ngarud, dagiti annak dida agbayad,” kinuna ni Jesus. Yantangay ti ama ni Jesus isu ti Ari ti uniberso, Daydiay adda a pagdaydayawan idiay templo, kinapudnona saan a legal a pagannurotan para iti Anak ti Dios a bayadan ti buis iti templo. “Ngem tapno ditay agbalin a pakaitibkolanda,” kuna ni Jesus, “inka agbanniit idiay baybay, ket ti umuna nga ikan a maalam intono maluktam ti ngiwatna, makasarakkanto ti maysa a siklo [uppat a dracma]. Alaem ket itedmo kadakuada gapu kaniak ken gapu kenka.”
Idi nagtataripnong dagiti adalan kalpasan ti panagsublida idiay Capernaum, nalabit idiay balay da Pedro, insaludsodna: “Asino ti kadakkelan idiay pagarian ti langit?” Ammo ni Jesus no aniat’ nangtignay iti saludsodda, ta pagaammona no ania ti mapaspasamak kadakuada bayat a sumursurotda kenkuana iti panagawidda manipud Cesarea Filipos. Gapuna insaludsodna: “Ania ti pagsusuppiatanyo idi addakay idiay dalan?” Mababainanda, nagulimek dagiti adalan, ta pagsusuppiatanda no asino ti kadakkelan kadakuada.
Kalpasan ti ngangngani tallo a tawen a panangisursuro ni Jesus, saan kadi a kasla di nakapappapati a dagiti ad-adalan ket maaddaanda ti kasta a panagsusuppiat? Impanayag a pudno dayta ti napigsa nga impluensia ti natauan a kinaimperpekto, agraman iti narelihiusuan a nalikudanda. Ti relihion a Judio nga isu ti dimmakkelan dagiti ad-adalan ipagpaganetgetda ti posision wenno ranggo iti isuamin a pannakilangenda. Mainayon pay, nalabit ni Pedro, gapu iti kari ni Jesus nga umawatto kadagiti “tulbek” iti Pagarian, mariknana ti kinatan-okna. Uray met da Santiago ken ni Juan, nalabit addaanda ti umas-asping a kapanunotan gapu ta naparaburanda a nakakita ti panagbaliw ti langa ni Jesus.
Aniaman ti kaso, nangiparang ni Jesus ti makatignay a demostrasion iti panagreggetna a palintegen ti kababalinda. Nangayab iti maysa nga ubing, pinatakderna iti nagtetengngaanda, insallabayna dagiti im-imana kenkuana, ket kunana: “No dikayto agsubli ken agbalin a kasla ub-ubbing, dikayto sumrek iti pagarian ti langit. Iti kasta, uray siasino nga agemmanto a kas itoy nga ubing daytoy isunto ti kadakkelan idiay pagarian ti langit; ket uray siasino nga umawatto iti maysa a kasta nga ubing iti naganko awatennak met.”
Anian a nakaskasdaaw a pamay-an a panangkorehir kadagiti adalanna! Saan a nagunget ni Jesus kadakuada ket inawaganna ida a natangsit, naagum, wenno ambisioso. Saan, ngem inyilustrarna ti makakorehir a sursurona babaen ti panangusarna kadagiti ubbing, a gagangay a naemma, awanan ambision, ken kaaduanna dida pampanunoten ti ranggo iti nagbabaetanda. Gapuna impakita ni Jesus a kasapulan dagiti adalanna a patanoren dagitoy met laeng a kualidad nga isut’ kababalin dagiti naemma nga ub-ubbing. Kas ti panagpatingga ni Jesus: “Ta ti kanunummuan kadakay amin isu met laeng ti kangatuan.” Mateo 17:22-27; 18:1-5; Marcos 9:30-37; Lucas 9:43-48.
◆ Iti panagsublida idiay Capernaum, ania a sursuro ti inulit ni Jesus, ket kasanot’ pannakaawatna?
◆ Apay a di obligado nga agbayad ni Jesus iti buis ngem apay a binayadanna dayta?
◆ Nalabit ania ti nakagapu ti panagsusuppiat dagiti adalan, ket kasanot’ panangkorehir ni Jesus kadakuada?