Sursuro Kadi ti Biblia ti Doktrina a Trinidad?

▪ Kastoy ti maysa kadagiti adu a pannakailawlawag ti doktrina a Trinidad: “Tallo a nadibinuan a Persona (ti Ama, ti Anak, ken ti Espiritu Santo), nga agpapada nga agnanayon, agpapada a mannakabalin-amin, awan ti nangatngato wenno nababbaba, agpapada a Dios, ngem maymaysada a Dios.” Sursuro kadi dayta ti Biblia?

Masansan a mausar ti Mateo 28:19 kas pammaneknek iti dayta a doktrina. Kastoy ti kuna ni Jesus a mabasa iti Ti Baro a Naimbag a Damag Biblia: “Inkay ngarud kadagiti amin a tattao iti amin a lugar, ket pagbalinenyo ida nga adalak: buniaganyo [wenno, bautisaranyo] ida iti nagan ti Ama, ti Anak ken ti Espiritu Santo.” Agpayso a nadakamat iti ditoy a teksto ti Ama, ti Anak, ken ti espiritu santo. Ngem saan a naibaga a maymaysada a persona. Bilbilinen idi ni Jesus dagiti Judio a pasurotna nga isuro ken bautisaranda dagiti tattao iti nagan ti Ama, ti Anak, ken ti nasantuan nga espiritu. Ania ngata ti pammati dagiti Judio kas maysa a nasion?

Idi naited iti nasion ti Israel ti Linteg ti tulag, a nagbalin a paset ti Biblia, naibilin kadakuada: “Dika pulos maaddaan iti aniaman a sabali a didios maibusor iti rupak.” (Deuteronomio 5:7) Mano a persona ti agsasao ditoy? Nalawag ti sungbat iti Deuteronomio 6:4: “Imdengam, O Israel: Ni Jehova a Diostayo ket maymaysa a Jehova”​—saan ketdi a tallo a napagmaymaysa. Nabiit pay idi a nawayawayaan ti Israel manipud iti Egipto, a sadiay a napagdaydayawan da Osiris, Isis, ken Horus (makita iti kannigid)​—maysa laeng kadagiti adu a tinallo a dios. Gapuna, naibilin kadagiti Israelita a maysa laeng a Dios ti pagdayawanda. Apay a napateg a maawatan dagiti tattao daytoy a bilin? Kuna ti rabbi a ni Dr. J. H. Hertz: “Daytoy a natan-ok a bilin a panagdayaw laeng iti maymaysa a Dios ket deklarasion ti naan-anay a panangbusor iti amin a panagdayaw iti adu a didiosen . . . Awan iti Shema ti sursuro a trinidad dagiti Kristiano ta saan a maitunos dayta iti Kinamaymaysa ti Dios.”a

Yantangay naipasngay ni Jesus kas Judio, naisuro met a tungpalenna daytoy a bilin. Kalpasan ti bautismona, insungbatna idi sulisogen ti Diablo: “Pumanawka, Satanas! Ta adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’” (Mateo 4:10; Deuteronomio 6:13) Dua a punto ti masursurotayo iti daytoy a pasamak. Umuna, ti Diablo sulsulisogenna idi ni Jesus nga agdayaw iti sabali malaksid ken Jehova. Minamaag dayta a gandat no karaman ni Jesus iti dayta a Dios. Maikadua, pinagminar ni Jesus a maymaysa laeng ti Dios a masapul a pagdayawan idi kinunana “kenkuana laeng.” No talaga a paset ni Jesus iti Trinidad, “kadakami” koma ti insungbatna.

No naammuanen dagiti tattao ti umiso a pannakaammo iti Dios ken kayatdan ti agserbi kenkuana, mabautisaranda “iti nagan ti Ama ken ti Anak ken ti nasantuan nga espiritu.” (Mateo 28:19) Maawatan ken akseptarenda ti autoridad ni Jehova ken ti akem ni Jesu-Kristo iti pannakatungpal ti panggep ti Dios. (Salmo 83:18; Mateo 28:18) Matarusanda met ti akem ken ar-aramiden ti nasantuan nga espiritu ti Dios, a dayta ti aktibo a puersana.​—Genesis 1:2; Galacia 5:22, 23; 2 Pedro 1:21.

Nabayagen a naallilaw dagiti tattao iti doktrina a Trinidad. Iti sabali a bangir, insuro ni Jesus ti kinapudno kadagiti pasurotna ken inturongna ida iti “maymaysa a pudno a Dios,” ni Jehova.​—Juan 17:3.

[Footnote]

[Picture Credit Line iti panid 23]

Musée du Louvre, Paris