KINAAWAN ASAWA
Idi punganay, kalpasan ti panangparsuana iti tao a ni Adan, “kinuna ni Jehova a Dios: ‘Saan a nasayaat iti tao nga agtultuloy nga is-isuna. Mangaramidak iti katulongan maipaay kenkuana, kas maysa a komplimentona.’” (Ge 2:18, 21-24) Kalpasan dayta, ti panagasawa ket kadawyanen a wagas ti panagbiag dagiti tattao, ket no adda dagiti naiduma a kasasaad, manmano dagita ken nagpaayda kadagiti naisangsangayan a rason.—Kitaenyo ti PANAGASAWA.
Ti maysa a kasta a naisangsangayan a kasasaad isu ti kasasaad ni Jeremias. Binilin ti Dios nga agtalinaed a di naasawaan ken saan nga agputot iti annak, yantangay adda dagiti nakaay-ay-ay a kasasaad nga um-umay iti dayta a nasion. Kadagita a kasasaad, siuulpit a magudas dagiti ubbing babaen iti nadangkok a manangparmek. (Jer 16:1-4) Ti anak a babai ni Jefte ket sabali pay a naiduma a kasasaad. Maigapu iti panagraemna iti kari ni amana, situtulok a nagtalinaed a di naasawaan iti amin-tiempo a panagserbi iti balay ni Jehova.—Uk 11:34-40.
Imbinsabinsa ni apostol Pablo dagiti pagsayaatan ti kinaawan asawa, no la ket ta awan napalalo a pakapilitan ti maysa a tao, ken saan a “sumged iti derrep” iti kasta agpeggad iti pannakiabig. “Naim-imbag” ti kasasaad a di naasawaan ta ipaayanna ti maysa a tao iti gundaway nga agserbi iti Dios nga “awan ti makasinga.” (1Co 7:1, 2, 8, 9, 29-38; 9:5) Saan a naibaga no ti uppat nga annak a babbai ni Felipe a managebanghelio nakiasawada idi kamaudiananna, ngem idi tiempo nga insurat ni Lucas ti salaysayna, nadakamatda kas “birhen, a nagipadpadto.”—Ara 21:8, 9.
Kas ken Jeremias, nagtalinaed nga awanan asawa ni Kristo Jesus. Iti pannakisaritana kadagiti adalanna maipapan iti saludsod no nasaysayaat ti di naasawaan ngem iti kasasaad a naasawaan, kinuna ni Jesus, “Saan nga amin a tattao maiwayaanda daytoy a sao, no di laeng dagidiay addaan iti sagut . . . ket adda dagiti eunuko a namagbalin iti bagbagida a eunuko maigapu iti pagarian ti langlangit. Ti makaiwaya iti dayta iwayaanna koma dayta.”—Mt 19:10-12.
No kasta, ti kinaawan asawa ket sagut a ti kangrunaan a pagimbaganna isu ti wayawaya nga ipaayna iti agik-ikut iti dayta. Piguratibo a pagsasao ti inusar ditoy ni Jesus. Dagiti lallaki ‘iwayaanda dayta,’ saan a babaen iti literal a panagpakapon, no di ket iti puspusoda, babaen iti situtulok a panangikeddeng nga agtalinaedda iti kasasaad a di naasawaan no iti pisikal, uray no bayat ti panagbiagda wenno iti nakedngan laeng a kapaut ti tiempo, a taginayonenda daytoy a kasasaad babaen ti panagteppel.
Nupay kasta, ti sursuro ken alagaden ti sumagmamano a relihioso a sekta maipapan iti selibasia ket saan a suportaran ti Kasuratan. Maisupadi iti dayta, naisurat, “Kadagiti maud-udi a periodo ti tiempo umikayto ti sumagmamano manipud iti pammati, . . . nga iparitda ti pannakiasawa.” (1Ti 4:1-3) Mapaliiw nga adu wenno kaaduan kadagiti apostol ket naasawaan. (1Co 9:5) Saan a ti kari ti selibasia ti mangigawid kadagidiay addaan iti sagut kas di naasawaan tapno saanda a makiasawa, no di ket ti tarigagay ken pannakabaelda a mangigaed iti bagbagida iti panagserbi iti Dios iti kasasaad a di naasawaan.