Ti Bendision ni Jehova ti Mangpabaknang
“Ti baknang sumrekto a narigat iti pagarian ti langit.”—MATEO 19:23.
1, 2. Ania a panaggiddiat ti maadaw kadagiti nagduduma a kita ti kinabaknang?
ANIA ngata no adda ti nagkuna kadakayo, “Bimmaknangkan”? Adu dagiti maragsakan a mapagkunaan iti daytoy, no kaipapanan dayta a nabaknangda iti kuarta, daga, wenno kadagiti naluho a sanikua. Ngem usigenyo ti banag maipapan iti kinabaknang manipud iti daytoy a panangmatmat: “Ti bendision ni Jehova—ti mangpabaknang, ket saanna nga anayan ti ladingit.”—Proverbio 10:22.
2 Kas ti panangtaming ti Dios kadagiti kadaanan a patriarka ken ti nasion ti Israel, binendisionanna ti kinamatalekda iti irarang-ay. (Genesis 13:2; Deuteronomio 28:11, 12; Job 42:10-12) Ni Ari Salomon maysa met kadagiti nabendisionan. Isu bimmaknang iti kasta unay. Kaskasdi naadalna babaen iti kapadasan a ti biag a naisentro kadagiti material a kinabaknang, isuda amin “barengbarengda ken maysa a panagagawa iti angin.” (Eclesiastes 2:4-11; 1 Ar-ari 3:11-13; 9:14, 28; 10:10) Gapuna idi nagsurat ni Salomon, “Ti bendision ni Jehova—ti mangpabaknang,” saanna nga ipagpaganetget dagiti material a kinabaknang. Inyebkasna laeng ti kinapudno a no addaanka iti pammendision ti Dios, ti biagmo awan pakayaspinganna a nabakbaknang ngem kadagidiay saan nga agserserbi kenkuana. Kasano a kasta?
3. Kadagiti ania a pamay-an a dakayo ti pudpudno a nabaknang, no addaankay ti bendision ti Dios?
3 No maysakay a Kristiano, mabalinyo a tagiragsaken ti anamong ni Jehova itan ken umawat kenkuana kadagiti pammendision kas iti nadiosan a sirib. Mabalin a maawatkayo iti maysa a kasla pamilia a kongregasion dagiti Kristiano a ti kangrunaanna naragsakda, managtalekda, ken interesadoda kadakayo. Dagiti linlinteg ti Dios agbalinda a kalasag kadakayo manipud kadagiti adu a saksakit ken peggad. Addaankayo met ti rason a manginanama iti nadiosan a pannalaknib a makalasat iti “dakkel a rigat” nga adda iti masanguanan para iti daytoy dakes a sistema—ken, kalpasanna maipaay iti biag iti awan inggana a Paraiso a daga a sumaruno ditoy daga. Gapuna, makitayo, babaen kadagita a nakaskasdaaw a pammendision ken panginanamaan, mabalin a pudpudno a maikunayo, “Nabaknangak!”—Mateo 24:21, 22.
4. Kasanoyo a pagpeggaden ti naespirituan a kinabaknangyo? (Apocalipsis 3:17, 18)
4 Ti panagbalinyo a “nabaknang” kadagiti pammendision ni Jehova, nupay kasta, ti mabalin a pagpeggaden dagiti dadduma a kinabaknang—ti kuarta wenno material a kinabaknang. Mammano kadatayo (agpapan pay isu ti natalged iti pinansial wenno limitado ti kinabaknangna) ti sidadaan a mangamin, ‘Agpegpeggadak iti pannakaiyaw-awan iti panagayat iti kuarta.’ Laglagipenyo, nupay kasta, ti pammakdaar: “Ti ayat ti pirak isu ti maysa a ramut ti isuamin a kita ti kinadakes, isu nga idi inaguman dagiti dadduma naiyaw-awanda iti pammati ket nasalputda kadagiti adu a ladladingit.” (1 Timoteo 6:10) Daytat’ naisurat idi panawen a dagiti amin a naanamongan a Kristiano ket napulotanda iti espiritu ti Dios kas tanda a mabalindanto ti agbalin a nailangitan nga agtuturay a kadua ni Kristo. Mabalbalin nga adu dagiti personal a makaam-ammo kadagiti apostol ken kadagiti dadduma a nakipagna ken Jesus. No ti kuarta “inyaw-awanna” ti dadduma kadakuada, anian a nagdakkel dayta a peggad kadatayo!—2 Corinto 5:5; Roma 8:17, 23.
Ti Tao a Baknang ken ti Kamelio
5. Ania ti panangmatmat ni Jesus iti kinabaknang?
5 Masansan nga ipasango ni Jesus dagiti peggad ti kinabaknang, ta daytat’ maysa a peggad a naipasango iti uray siasino, dagidiay babaknang ken dagidiay saan. (Mateo 6:24-32; Lucas 6:24; 12:15-21) Kas pangibatayan iti personal a panangsukimat, usigenyo ti kinuna ni Jesus iti naminsan nga okasion, kas naisalaysay idiay Mateo 19:16-24; Marcos 10:17-30; ken Lucas 18:18-30. Kinapudnona, apay a dikay agsardeng ita tapno basaen ti maysa wenno amin dagidiay a salaysay?
6, 7. (a) Ania a panagpapatang ti napasamak iti nagbaetan ni Jesus ken ti maysa nga agtutubo a lalaki? (b) Kalpasanna, ania a balakad ti intukon ni Jesus?
6 Maysa nga agtutubo nga agturay ti immay ken Jesus ket nagsaludsod: “Ania ti rebbengko nga aramiden tapno matawidko ti biag nga agnanayon?” Isut’ inturong ni Jesus iti Linteg, a mangipakpakita a saan a nagliway ni Jehova a mangipamatmat no ania ti kasapulan. Simmungbat ti lalaki a sinalimetmetannan dagiti bilbilin ti Dios ‘nanipud pay iti kinaubingna.’ Kaiyariganna a kasla isut’ addan iti ruangan nga agturong iti biag, ngem mariknana nga adda pay pagkurkuranganna. Nalabit impagarupna nga adda dadduma a nainayon a kinaimbag, dadduma naar-aramid kas maysa a bannuar, nga isu ti kamaudian nga addang a lumasat iti ruangan nga agturong iti biag nga awan inggana. Ti sungbat ni Jesus addaan nalawa a kaipapanan: “Ilakom ti isuamin a kukuam ket itedmo kadagiti napanglaw, ket addanto gamengmo sadi langit; ket umayka surotennak.” Aniat’ napasamak? “Idi nangngegna dagitoy a banag, nagladingit a napalalo, ta nabaknang unay [wenno, adu a sanikua ti ik-ikutanna].” Gapuna ti lalaki pimmanaw.—Lucas 18:18, 21-23; Marcos 10:22.
7 Kalpasanna kinuna ni Jesus: “Ania a nagrigaten ti iseserrekdanto iti pagarian ti Dios dagiti addaan kinabaknang! Ta nalaklaka a lumsot ti maysa a kamelio iti abut ti maysa a dagum, ngem ti maysa a baknang a sumrek iti pagarian ti Dios.” (Lucas 18:24, 25) Dayta kadi a balakad agpaay laeng iti nabaknang nga agturay? Wenno nairamankayo, nabaknang man wenno napanglawkayo? Kitaentayo.
8. (a) Ania ti kasasaad ti agtutubo nga agturay a Judio? (b) Ania a biddut ti adda kenkuana, ken apay a daytat’ pakaseknantayo?
8 Mabalin a matulongankayo a mangtarus iti kasasaad dayta agtutubo nga agturay no pampanunotenyo ti maysa a moderno a katupagna—maysa a nadalus nga agtutubo a Kristiano nga addaan naimbag a pannakaammo iti Biblia, nasayaat a moral, ken naggapu iti maysa a nabaknang a pamilia. Mabalin nga ap-apalanyo ti kasta a tao ita. Ngem nakakita ni Jesus ti maysa a dakkel a pagkurangan iti agtutubo a lalaki a Judio: Dagiti kinabaknangna wenno sansanikuana napalalo ti kinapategda iti biagna. Gapuna namalakad ni Jesus kas iti kinunana. Makitayo no apay a daytoy a salaysay ti Biblia ket agpaay kadatay amin, nabaknang man wenno napanglaw. Dagiti kuarta ken sansanikua ti mabalin a nakapatpateg unay iti siasinoman kadatayo, addaantay man kadagita itan wenno tartarigagayantayo ti maaddaan pay kadagiti kakasta.
9. Kasanotay nga ammo a saan a konkondenaren ni Jesus ti kinabaknang a kasta?
9 Saan nga ibagbaga ni Jesus a ti maysa a tao nga addaan kadagiti material a kinabaknang ket saanda a makapagserbi iti Dios. Adu ti nangaramiden kasta. Dayta agtutubo a lalaki a Judio inaramidna metten ti kasta iti kalalainganna. Adda met dita ni Zaqueo nga agsingsingir ti buis “a nabaknang.” (Lucas 19:2-10) Dadduma kadagiti napulotan a Kristiano idi umuna a siglo ti babaknang ket ngarud addaan iti naisangsangayan a karit a “managparanudda, nalakada a mannakipagrikna.” (1 Timoteo 6:17, 18; Santiago 1:9, 10) Ket addada met sumagmamano a nababaknang a Kristiano itatta. Ket masansan mangmangtedda a sipaparabur a mangsuportar iti trabaho iti Pagarian, iluklukatda dagiti pagtaenganda a paggigimongan, ken us-usaren dagiti kotseda iti ministerio. Ngem, apay ngarud, a kasta ti kinuna ni Jesus maipapan iti tao a baknang ken ti kamelio? Aniat’ maadaltayo iti dayta?
10. Ania ti maawatantayo manipud iti balakad ni Jesus iti dayta nga okasion?
10 Kas ti maapresiaryo, maysa a banag ti mangrugi nga agdaydayaw iti Dios, ket sabali met a banag ti mangpaneknek a matalekkayo aginggana iti panungpalan. (Mateo 24:13; Filipos 3:12-14) Mabalin a silalagip ni Jesus iti daytoy idi a kinunana: “Ta nalaklaka a lumsot ti maysa a kamelio iti abut ti maysa a dagum ngem ti iseserrek ti maysa a baknang iti pagarian ti Dios.” (Marcos 10:25) Awan ti kamelio a makalsot iti nagbassitan a mata ti pagdait a dagum, gapuna nalawag nga agus-usar ni Jesus ti maysa nga hyperbole, maysa a nakalablabes a panagsasao a di nairanta nga awaten a literal. Ipakpakitana, nupay kasta, no kasano karigat para iti maysa a baknang ti panagaramid iti maysa a banag. Ania? Saan laeng a ti mangrugi nga agserbi iti Dios, saan, no di ket “ti sumrek iti pagarian,” ti aktual a pananggun-od ti biag nga agnanayon. Aniaman ti takderyo a pinansial, makatulong ti balakad ni Jesus iti panagpampanunotyo, iti naespirituan nga irarang-ayo, ken ti pananggun-odyo iti biag nga awan inggana.
Apay a Narigat Para kadagiti Baknang?
11. Kasano a ti napanglaw ken ti nabaknang apektadoda iti panangasaba ni Jesus?
11 Babaen iti panangasaba a naaramidan ni Jesus ken dagiti apostolna, ‘dagiti napanglaw a nakaskasabaanda iti naimbag a damag.’ (Mateo 11:5) Awan ti panangidumduma a maibusor kadagiti baknang. Kaskasdi agparang nga ad-adu kadagiti napanglaw ti nangbigbig iti naespirituan a kasapulanda ken nangabrasa iti mensahe ti namnama. (Mateo 5:3, 6; 9:35, 36) Dagiti nabaknang a Judio ad-adda a mapmapnekdan no kasano ti panagandar dagiti bambanag. (Idiligyo ti Lucas 6:20, 24, 25.) Kaskasdi, addada met dagiti naidumduma idi, ken addada met naidumduma ita. Dadduma kadagiti tattao a babaknang ti nangawat iti mensahe ti Biblia ket agserserbida iti Dios. Ti naibungana kadakuada ti mabalin a nakaskasdaaw. Kasta ti kaso ni Pablo, a dina pinalubosan ti kasasaadna iti biag a nangpasardeng kenkuana. (Filipos 3:4-8) Nupay kasta, kuna ni Jesus nga ad-adda a narigrigat dayta para kadagiti babaknang.
“Mangallilaw a Pannakabalin ti Kinabaknang”
12, 13. (a) Iti maysa a pangngarig, ania a punto ti inaramid ni Jesus maipapan kadagiti panagagawa? (b) Apay a ti nabaknang naipasango kadagiti kanayonan a lapped?
12 Iti pangngarigna maipapan kadagiti bin-i a nagdisso kadagiti nagduduma a kita ti daga, kuna ni Jesus a dadduma “nagdissoda kadagiti kasisiitan, ket dagiti sisiit dimmakkelda ket lineppesda ida.” Inlawlawagna: “Ket ti naimula iti kasisiitan, isu daytoy ti dumngeg ti sao, ngem ti agawa itoy a sistema dagiti bambanag ken ti panangallilaw ti kinabaknang leppesenda ti sao, ket saan a makapagbunga.” (Mateo 13:7, 22) Ngangngani amin a tao “ti makapadpadas iti panagagawa itoy a sistema dagiti bambanag.” Naglaka a makita dayta no apay a kasta maipapan iti tao a napanglaw, awan panggedanna, wenno adda dagiti pagkapuyanna. Ti tao a natalged iti pinansial mabalin a saan a naaddaan kadagiti isu met laeng a panagagawa, ngem uray pay isu ket mabalin nga addaan iti panagdanag gapu iti epekto ti implasion, ti panagbalbaliw ti panagbuis, wenno ti peggad dagiti mannanakaw. Gapuna agpadpada a dagiti nabaknang ken napanglaw ti addaan kadagiti panagagawa.—Mateo 6:19-21.
13 Impakita ni Jesus a dadduma ti malapdan met babaen “ti panangallilaw ti kinabaknang.” Ti panagbalin a naballigi iti pinansial ti makadadael. Ti milionario nga Aristotle Onassis naminsan nagkomento: “Kalpasan a makagtengka iti maysa a punto, ti kuarta agbalinen a di napateg. Ti napateg isu ti balligi. Ti nainsiriban a banag para kaniak isu ti panagsardengen. Ngem diak makasardeng. Masapul nga itultuloyko ti panangpuntiria ti nangatngato—a maipaay laeng iti panagragsak iti dayta.” Umas-asping met, mabalin a makita ti maysa a Kristiano ti kinaragsak ti panagreggetda a ngumato iti agdan ti korporasion wenno isu ti magargari a mangpalawa iti negosiona kalpasan a nabayagen a nagtenganna ti matmatmatanna iti nasapsap iti panagbiagna kas “umdasen.” Imbes a kissayanna ti trabahona (wenno agretiro) tapno agbalin nga amin-tiempo a ministro, ‘rakrakenna ketdi dagiti kamaligna [wenno pagtaenganna] ket agbangon kadagiti daddadakkel.’ (Kitaenyo ti Lucas 12:15-21.) Mabalin kadi a mapasamak dayta kadakayo? Pagarupenyo aya a ti Dios ipatona ti siasinoman nga adda iti dayta a kasasaad nga agserserbi kenkuana iti amin-kararua?—Mateo 22:37.
14. Kasanot’ pannakaiyilustrarna a ti kinabaknang mabalinna a lapdan ti maysa a Kristiano? (Proverbio 28:20)
14 Adda pay met dagiti dadduma a pamay-an a ti kinabaknang (wenno ti aglablabes a panagtarigagay kadakuada) ti makalapped iti maysa a Kristiano manipud ‘panagtawidna iti biag nga agnanayon.’ Ti maysa a ta ti panagayat iti kinabaknang ti mabalin a manggargari kenkuana a mangtulad kadagiti nailubongan a taktika, kas iti nababa a panangireportna kadagiti ganansiana wenno panangusar kadagiti dadduma a sinisiutik ngem nasaknapen a taktika. Wenno no isu ti mangimpleo kadagiti padana a Kristiano a mapagpiaran ken nagagaget, mabalin nga ad-adda nga ipangpangrunana dagiti kabukbukodanna a personal a pagimbagan a nangnangruna ngem ti espiritualidadda. Kas pangarigan, tapno maipirmina ida kadagiti trabahoda, mabalin a paregtaenna ida a mangpataud iti ad-adda a nagasgastos nga estilo ti panagbiag (wenno matnagda pay iti panagutang a maipaay kadagiti kinaluho). Ket gapu ta isu ti amoda, daytoy a relasion ti mabalin nga agturong pay uray kadagiti pannakilangenlangen iti kongregasion.
15. Kasano a marikna dagiti sumagmamano a Kristiano dagiti makadangran nga epekto ti kinabaknang? (Salmo 73:3-8, 12, 27, 28)
15 Dadduma kadagiti nabaknang a Kristiano idi umuna a siglo ti mabalin a nairaman kadagiti nagbalin a biktima “iti panangallilaw ti kinabaknang.” Nagsurat ni Santiago maipapan ‘kadagiti rigrigat nga umayto kadagiti nabaknang.’ Addaanda kadagiti nangingina a pagan-anay, nagurnongda kadagiti balbalitok ken pirak babaen iti nababa a panangsueldoda kadagiti empleadoda, ket limukmegda iti kinaluho. (Santiago 5:1-5) Daytat’ umas-asping met itatta. Ti kinabaknang masansan palubosanna ti maysa a tao a maaddaan kadagiti naiimas a taraon ken inumen a makadadael iti bagina. Dayta met ti mangipalubos iti masansan a panagbiahe a mangisina kenkuana manipud iti lokal a kongregasionna. Saan a panangibaga daytoy a dagiti napipintas a kawes, alahas, taraon, ken panagdaliasat ket makadangranda a mismo. Nupay kasta, dagiti “babaknang” nga insurat ni Santiago saanda a matultulongan babaen kadagita; gapu iti nababa nga espiritualidadda ken takderda iti imatang ti Dios, adda rasonda nga ‘agsangit, aganug-og gapu kadagiti rigrigat nga umayto kadakuada.’
16. Apay a nangitukon ni Jesus ti kasta a naglawag a balakad maipapan iti kinabaknang, ken aniat’ rebbeng a saludsodenyo iti bagiyo?
16 Pagaammo a nalawag ni Jesus ti ut-ot ken dagiti lappedna iti espiritualidad a masansan a laklak-amen dagiti nabaknang. Ammona met dagiti kinabaknang a mabalin nga agrunot a literal wenno agbalin nga awan patpategna, a pulos dinto mapasamak kadagiti Nakristianuan a kinabaknang. (Proverbio 11:28; Marcos 10:29, 30) Gapuna, mangipapaay ti pudpudno a serbisio kadatay amin ni Jesus babaen ti pammakdaarna: “Anian a nagrigaten ti iseserrekdanto iti pagarian ti Dios dagiti addaan kinabaknang!” (Lucas 18:24) Ti pakdaarna ti makagunggona kadatayo uray pay no limitado ti kinabaknangtayo. Kasano? Babaen ti pananglappedna iti aniaman nga ambision a panagbalintayo a nabaknang. Patien dagiti Kristiano nga agsasao ni Jesus ti kinapudno. Mamatitayo ken agbibiagtayo babaen iti kinuna ni Jesus maipapan ken Amana, maipapan iti panungpalan daytoy a sistema, ken maipapan iti panangsukay iti ayat. Daytoy a Managsao ti Kinapudno kinunana met: “Nalaklaka a lumsot ti maysa a kamelio iti abut ti maysa a dagum ngem ti maysa a baknang a sumrek iti pagarian ti Dios.” (Mateo 19:24) Talaga aya a patpatienyo dayta? Dagiti aya tigtignayyo, estilo ti panagbiagyo ken dagiti kababalinyo paneknekanda a kastakayo?
Itultuloyyo ti Panagbalin a Nabaknang—Iti Pamay-an ti Dios
17. Kasano nga ikabkabil dagiti adu a Kristiano ti bagbagida a nailinea iti panagpabaknang ni Jehova?
17 Ti pammaneknek nga aggapgapu iti amin a paset ti lubong ipakpakitana a kaaduanna kadagiti ad-adipen ti Dios ipapusona ti balakad kas iti adda a masarakan idiay Mateo 19:16-24. Adu kadagiti agtutubo a Kristiano ti nangikeddengen nga apaman a mairingpasda ti normal a kawadwad ti publiko a panageskuelada, surotendanton ti amin-tiempo a ministerio. Dagiti assawa a babbai a mangmangged iti sekular tapno mapangatoda ti pamastrekan ti pamilia ti, imbes ketdi, ipapaayda ti ad-adu a tiempoda kadagiti Nakristianuan nga ar-aramid, a pagbalbalinen ti bagida ken dagiti dadduma a nabakbaknang iti naespirituan. Uray pay dadduma kadagiti lallaki nga addaan kadagiti Nainkasuratan a responsabilidad a mangipaay iti material iti pamiliada agsapsapulda iti pamay-an a maaddaan iti dakdakkel a pannakiraman iti ministerio.
18, 19. Ania nga addang ti innala dagiti dadduma nga agbirbirok iti pammendision ni Jehova?
18 Maysa a panglakayen nga agtawen iti 35 ti nangamin a ti “panagbalin nga amin-tiempo a ministro ket sasao laeng nga agtultulid manipud kadagiti bibigna.” Isut’ agsapsapul iti nasurok a $25,000 iti tinawen, malaksid pay ti kadda ti kuenta a gasgastosenna ken ti panagusar ti kotse ti kompania. Kalpasanna naikalikagum ti panangibitlana iti palawag iti kumbension idi 1983 a “Panangikeddeng ken Panangragpat kadagiti Umiso a Kalat.” Impudnona: “Idi sigagagar a basbasaek ti material, madmadleg ken mababainanak pay a kasla patpatayenak pay ti konsiensiak.” Sakbay a dimteng ti kumbension, nagsaritaanda nga agassawa ti kasasaadna. Di nagbayag isut’ nakaala iti paset-tiempo a trabaho ket kimmuyogen ken baketna kas maysa a payunir. Kaskasdi agpaypayunirda pay, a tagtagiragsakenda dagiti adu a naespirituan a bendision.
19 Dadduma ti immalis manipud kadagiti luglugar a sadiay aglaplapusanan dagiti pinansial a posibilidad kadagiti luglugar a sadiay mapalawada dagiti naespirituan nga ar-aramidda. Maysa a pagassawaan a taga Canada ti nagsurat maipapan iti panagpaypayunirda idiay Latin America: “Nupay aglaplapusanan unay ti kinapanglaw kadagiti kakabsat, nakaskasdaaw ti regtada iti kinapudno. Mabalin a napanglawda iti nailubongan a pamay-an, ngem iti naespirituan milionarioda. Addaankam ti 38 nga agibumbunannag, 10 kadakuada ti regular a payunir. Kasapulan ti mamindua a panaggigimong agsipud ta nakaad-adu dagiti tumabtabuno—manipud 110 agingga iti 140 iti promediona. Dagiti dua a panglakayen ken dagiti tallo a ministerial nga ad-adipen ti mangay-aywan kadagitoy amin a panaggigimong. Maad-adalmi manen manipud kadagiti napakumbaba a kakabsattay ditoy ti kaipapanan ti pudpudno a panangipangpangruna ken ni Jehova iti panagbiagmi. Ipakpakitada kadakami a mabalin a mapagserbian ni Jehova iti amin a kararua aniaman dagiti kasasaadtayo.”
20. Kasano ti rebbeng a panagriknatayo iti puspusotayo maipapan iti panagbalin a nabaknang iti namaterialan?
20 Dagita a Kristiano awananda ti pudpudno wenno nabileg a rason nga apalanda ti tao a baknang, adda man iti ruar wenno uneg ti kongregasion, wenno agbalin nga okupado unay kadagiti materialistiko nga ambision. Bigbigenda a kasapulan ti bassit a kuarta a maipaay iti normal a panagbiag. (Eclesiastes 5:3; 7:12) Ngem apresiarenda met nga imbaga ni Jesus ti kinapudno—a dagiti nabaknang ket maipasangoda kadagiti adu a naespirituan a lapped, karit, ken peggad. Maysa kadagiti narigat a karit isu ti “dagidiay nabaknang itoy agdama a sistema dagiti bambanag dida agtangtangsit, ket dida met imaldit ti inanamada kadagiti kinabaknang a pagduaduaan, no di ket iti Dios.”—1 Timoteo 6:17.
21. Aniat’ gasat dagidiay mangsursurot kadagiti naespirituan a kinabaknang?
21 Nakalkaldaang, a daydiay agtutubo nga agturay a nakisao ken ni Jesus napaay iti dayta a karit. Ti dadduma a kas kenkuana nagserbida iti Dios iti apagbiit ngem iti kamaudiananna nagsagabada iti ut-ot ken naespirituan a pannakapaay gapu iti kinabaknangda. Maisupadi iti dayta isu dagiti minilion a nasungdo a Kristiano nga agtultuloy a mangpampaneknek a “ti bendision ni Jehova—ti mangpabaknang, ket saanna nga anayan ti ladingit.” (Proverbio 10:22) Ti panagbiagda addaan kaipapanan; addaanda kadagiti napateg a kalat ken panagrikna nga addaanda ti nagappuanan. Dagiti naimbag nga ar-aramidda manayondanto, a mangipaay kadakuada iti kasta unay a ragsak itan ken iti masanguanan. Tunggal maysa pagreggetantay koma ti agbalin a nabaknang iti dayta a pamay-an.—Filipos 4:1; 1 Tesalonica 2:19, 20.
Kapampanunotan nga Usigen
◻ Ania a kita dagiti kinabaknang ti matuktukoy idiay Proverbio 10:22?
◻ Ania ti punto ti komento ni Jesus maipapan iti tao a baknang ken ti kamelio?
◻ Apay a ti biag masansan a narigrigat para iti nabaknang?
◻ Kasanotay a pagreggetan ti agbalin a nabaknang iti pamay-an ti Dios?
[Kahon iti panid 10]
Ti Kinabaknang ken ti Pamilia
NO PAMPANUNOTEN ti maipapan kadagiti manamnama nga epekto ti kinabaknang, dikay koma liplipatan ti pamiliayo. Usigenyo dagitoy a bambanag:
Manipud Canada immay ti maysa a report manipud kadagiti sikiatrista a nangadal kadagiti annak dagiti sobra a babaknang: “Ti biag makapasikor kadakuada. Awan ti kalatda malaksid iti panangparagsakda ti bagbagida ket dida mapalubosan uray pay ti sangkabassit a pannakapaay. Sumagmamano laeng nga emosion iti aniaman a kita ti marikriknada. Dagiti kangrunaan a kalatda isu ti panaggatang kadagiti bambanag, panagdaliasat, ken panagsapsapul kadagiti baro a gubuayan ti ragragsak.”
Nagkomento ti The New York Times maipapan iti maysa a dati a milionario: “Bayat nga isu ti ad-adda nga agballigi iti negosio ken makagun-od ti kinabaknang, kunana a nakitana a nagbalbaliw ti pamiliana. ‘Ni baketko ken ti balasangko rukodenda dagiti tattao babaen iti kuarta nga adda kadakuada, ket no ikkak ti maysa kadagiti balasangko ti $300,000 a balay masapul nga ikkak met daydiay maysa a balasangko ti $300,000 a kuarta.’” Kalpasan ti pannakaatake ti pusona, “agraman ti pannakakita ti naaramidan ti kinabaknang iti asawana ken kadagiti annakna,” binalbaliwanna ti wagas ti panagbiagna.
Maipapan iti maysa a daga a nabaknang iti asete idiay Makintengnga a Daya, kinuna ni Arnold Hottinger: ‘Ti kinabaknang kas maysa a patolohia ket maysa a banag a pagaammo met kadagiti adu a ganggannaet a mangngagas nga immay ditoy tapno maaddaan iti nangato a sueldo. Awanen ti sadinoman a lugar, kunada, a dagiti sikosomatiko a saksakit ti ad-adda a gagangay ngem ditoy—dagiti saksakit a mangpataud kadagiti pudpudno a panagsagaba ngem saan a patpatauden ti aniaman a makita a panagkapuy iti pisikal nga organismo. Addada, kas kunada, agtutubo a tattao a mangipakpakita iti amin a pagilasinan iti panagbalinda a natataenganen, ken dagiti natataenganen a tattao nga agtigtignay a kas ubbing.’