Natalged a Namnama

DANDANI 2,000 a tawenen ti napalabas, awanan hustisia a nasentensiaan a matay ni Jesus, ti masansan a maaw-awagan a katan-okan pay laeng a tao a nagbiag. Bayat a nakabitin iti pagtutuokan a kayo, sibabassawang a kinuna ti maysa a managdakdakes a nakabitin iti abayna: “Saan kadi a sika ti Kristo? Isalakanmo ti bagim ken dakami.”

Ngem ti lalaki ket binabalaw ti maysa pay a managdakdakes a nailansa met: “Dika aya pulos kabuteng ti Dios, ita ta addaka iti isu met laeng a pannakaukom? Ket data, kinapudnona, nainkalintegan a kasta, ta aw-awatenta a naan-anay ti maikari kadata maipaay kadagiti bambanag nga inaramidta; ngem daytoy a tao awan inaramidna a di umiso.” Kalpasanna, tinaliawna ni Jesus ket impakpakaasina: “Laglagipennak inton makagtengka iti pagariam.”

Simmungbat ni Jesus: “Pudno ibagak kenka ita nga aldaw, Makikaduakanto kaniak idiay Paraiso.”​—Lucas 23:39-43.

Adda nakaskasdaaw a namnama ni Jesus. Insurat ni apostol Pablo ti epekto daytoy a namnama ken Jesus, babaen ti panagkunana: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain.”​—Hebreo 12:2.

Karaman iti ninamnama ni Jesus a “rag-o” ti pannakikaduana manen ken ni Amana idiay langit ken agserbi inton agangay kas Agturay ti Pagarian ti Dios. Kanayonanna, agrag-onto met a mangabrasa idiay langit kadagiti napaneknekan ken mapagtalkan a pasurotna a makipagturay kenkuana kas ar-ari iti daga. (Juan 14:2, 3; Filipos 2:7-11; Apocalipsis 20:5, 6) Ania ngarud ti kayat a sawen ni Jesus idi inkarina iti agbabbabawi a managdakdakes a makikaduanto kenkuana idiay Paraiso?

Ania ti Namnama ti Managdakdakes?

Saan a kualipikado daydi a lalaki a makipagturay ken Jesus idiay langit. Saan a nairaman kadagidiay nangibagaan ni Jesus: “Dakayo dagidiay nagtalinaed kaniak kadagiti pannakasusuotko; ket mangaramidak iti maysa a tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian.” (Lucas 22:28, 29) Ngem inkari ni Jesus iti daydi a managdakdakes a makikaduanto kenkuana idiay Paraiso. Kasanonto a matungpal dayta a kari?

Insaad ni Jehova a Dios ti immuna a lalaki ken babai a da Adan ken Eva iti Paraiso, maysa a makaay-ayo a minuyongan a naawagan iti Eden. (Genesis 2:8, 15) Ditoy daga ti ayan ti Eden, ket panggep ti Dios nga agbalin a paraiso ti intero a daga. Nupay kasta, sinukir da Adan ken Eva ti Dios isu a napagtalawda iti napintas a pagtaenganda. (Genesis 3:23, 24) Ngem impalgak ni Jesus a maisublinto ti Paraiso ket agbalinton a kasta ti intero a daga.

Idi inyimtuod ni apostol Pedro ken Jesus no ania ti magunggonana ken dagiti padana nga apostol iti panangsurotda kenkuana, inkari ni Jesus: “Iti pannakaparsua manen, inton ti Anak ti tao agtugaw iti nadayag a tronona, dakayo a simmurot kaniak agtugawkayto met a mismo kadagiti sangapulo ket dua a trono.” (Mateo 19:27, 28) Makapainteres ta iti salaysay ni Lucas maipapan iti daytoy a saritaan, imbes nga imbagana ti “pannakaparsua manen,” naadaw a kinuna ni Jesus, ti “um-umay a sistema ti bambanag.”​—Lucas 18:28-30.

No kasta, inton agtugaw ni Jesu-Kristo iti nadayag a tronona sadi langit, a kadua dagiti makipagturay kenkuana, ipasdeknanton ti nalinteg a baro a sistema ti bambanag. (2 Timoteo 2:11, 12; Apocalipsis 5:10; 14:1, 3) Babaen ti nailangitan a panagturay ni Kristo, matungpalton ti orihinal a panggep ti Dios nga agbalin a paraiso ti intero a daga!

Kabayatan daytoy a panagturay ni Jesus iti Pagarian, tungpalennanton ti karina iti kaabayna a kriminal a kaduana a natay. Pagungarennanto, ket agbalinto dayta a lalaki a naindagaan nga iturayan ni Jesus. Kalpasanna, maaddaanto iti gundaway ti managdakdakes a mangtungpal kadagiti ipakalikagum ti Dios ken agbiag nga agnanayon iti sidong ti panangituray ti Pagarian. Talaga a mabalintayo ti agrag-o iti naibasar-Biblia a namnama a panagbiag nga agnanayon iti Paraiso a daga!

Adda Kaipapanan ti Biag

Iladawanyo ti mabalin a kaipapanan ti kasta a nadayag a namnama iti biagtayo. Makatulong dayta a mangsalaknib iti panunottayo kadagiti makadangran nga epekto ti negatibo a panagpampanunot. Inyasping ni apostol Pablo dayta a namnama iti napateg a paset ti naespirituan a kabal. Kinunana a masapul nga isuottayo “ti namnama ti pannakaisalakan” kas “kabal ti ulo.”​—1 Tesalonica 5:8; Salmo 37:29; Apocalipsis 21:3, 4.

Makapabileg ti kasta a namnama. Iti sumungsungad a Paraiso, lulua gapu iti rag-o ti mangsukatton iti kinaladingit bayat a pagungaren ‘ti Dios a mangpagungar kadagiti natay’ dagiti ing-ingungotentayo. (2 Corinto 1:9) Iti kasta, ditayton maupay gapu iti pisikal nga an-annayen, ut-ot, ken kinabaldado, ta “aglagtonto ti pilay a kas maysa nga ugsa.” ‘Ti lasag [ti tao] agbalinto a nasalsalibukag ngem iti lasag ti maysa nga ubing’ ket ‘isu agsubli kadagiti al-aldaw ti kinaubingna.’​—Isaias 35:6; Job 33:25.

Iti dayta a tiempo, inton “ti agtaeng dinanto kunaen: ‘Masakitak,’” ditayton malagip ti maupay gapu iti agkarasubli a sakit. (Isaias 33:24) Ti pannakarikna iti kinaawan serserbi gapu iti nakaro a panagleddaang ket agbalinton nga “agnanayon a rag-o.” (Isaias 35:10) Mapukawton ti kinaawan namnama gapu iti makapapatay a sakit agraman ti ipapatay a mismo, ti nabayagen a kabusor ti sangatauan.​—1 Corinto 15:26.

[Dagiti ladawan iti panid 8, 9]

Kanayon a laglagipenyo ti nakaskasdaaw a namnama a baro a lubong ti Dios