Ti Biag ken Ministerio ni Jesus
Ni Jesus ken ti Nabaknang a Baro nga Agturay
IDI a lumablabas ni Jesus idiay distrito ti Perea nga agturong idiay Jerusalem, maysa nga agtutubo a lalaki ti timmaray a napan ken nagparintumeng iti sanguananna. Ti lalaki ket maaw-awagan maysa nga agturay, a nalabit kayatna a sawen isut’ mangig-iggem ti prominente a saad iti lokal a sinagoga wenno mabalin pay ketdi a miembro ti Sanhedrin. Kasta met, isut’ nakabakbaknang. “Naimbag a Mannursuro,” inyimtuodna, “ania ti naimbag nga aramidekto tapno maaddaanak ti biag nga agnanayon?”
“Apay-apay nga awagannak ti naimbag?” insungbat ni Jesus. “Maymaysa ti adda a naimbag, isu ti Dios.” Mabalin nga us-usaren ti agtutubo a lalaki ti “naimbag” kas maysa a titulo, gapuna impakaammo ni Jesus kenkuana a ti kasta a titulo ket kukua laeng ti Dios.
“Ngem no,” intuloy ni Jesus, “kalikagumam ti sumrek iti biag, salimetmetam dagiti bilbilin.”
“Aniada?” inyimtuod ti lalaki.
Iti panangisitarna ti lima kadagiti Sangapulo a Bilbilin, simmungbat ni Jesus: “Dika mamapatay, Dika makiabig iti saanmo nga asawa, Dika agtakaw, Dika agsao ti natiri a pangpaneknek, Dayawem da amam ken inam.” Ken nanginayon pay ti nakapatpateg a bilin, kuna ni Jesus: “Ayatem ti kaarrubam a kas met iti bagim.”
“Amin dagitoy tinungpalkon manipud pay idi ubingak,” insungbat di lalaki a buyogen ti amin a kinapasnek. “Ania pay ti pagkurangak?”
Iti panagimdengna iti nabara, napasnek a dawat ti lalaki, narikna ni Jesus ti panagayat kenkuana. Ngem naawatan ni Jesus ti pannakaisinggalutna kadagiti namaterialan a sanikua, gapuna intudona ti kasapulanna: “No kayatmo a naan-anayka: Inka, ilakom ti amin nga adda kenka ket itedmo kadagiti napanglaw, ket maaddaankanto ti kinabaknang idiay langit, ket umayka agbalinka a pasurotko.”
Siimatang ni Jesus, awan duadua a buyogen ti panangay-ay, idi a ti lalaki timmakder ket pimmanaw a sililiday. Ti kinabaknangna ti nangbulsek kenkuana iti pateg ti pudpudno a gameng. “Anian a nagrigat,” insennaay ni Jesus, “para kadagidiay addaan ti kuarta a sumrek iti pagarian ti Dios!”
Ti sasao ni Jesus kinellaatna dagiti adalan. Ngem ad-adda manen a nakellaatda idi nga imbagana ti pangkaaduan a pagalagadan: “Nalaklaka a lumsot ti maysa a kamelio iti abut ti maysa a dagum ngem ti maysa a baknang a sumrek iti pagarian ti Dios.”
“Asino, ngarud, ti maisalakanen?” kayat a maammuan dagiti adalan.
Simamatmat a diretso kadakuada, simmungbat ni Jesus: “Kadagiti tao daytoy saan a mabalin, ngem iti Dios isuamin mabalin.”
Gapu ta pagaammona a nagaramidda ti panagpili a naiduma iti nabaknang a baro nga agturay, kuna ni Pedro: “Adtoy! Dakami pinanawanmi ti isuamin ket sinurotdaka.” Gapuna insaludsodna: “Anianto ngarud ti kukuami?”
“Inton baro a pannakaparsua,” inkari ni Jesus, “inton ti Anak ti tao agtugawto iti trono ti gloriana, agtugawkayto met kadagiti sangapulo ket dua a trono a mangukom kadagiti sangapulo ket dua a tribo ti Israel.” Wen, ipakpakita ni Jesus nga addanto ti baro a pannakaparsua dagiti kasasaad ditoy daga tapno dagiti bambanag agsublidanto kas ti kasasaadda idi idiay minuyongan ti Eden. Ket ni Pedro ken dagiti dadduma nga adalan umawatdanto ti gunggona a makipagturay a kadua ni Kristo iti daytoy kas kalawa ti daga a Paraiso. Pudno unay, ti kasta a naindaklan a gunggona ket maikari iti aniaman a panagsakripisio!
Nupay kasta, uray pay itattan addadan gunggona, kas sititibker a kinuna ni Jesus: “Awan ti tao a nangpanaw ti balay wenno kakabsat a lallaki wenno babbai wenno ama wenno ina wenno annak wenno dagdaga gapu kaniak ken gapu iti naimbag a damag a dinto umawat ita itoy nga aldaw, ti maminsangagasut a balbalay ken kakabsat a lallaki ken babbai ken inna ken annak ken dagdaga, agraman kadagiti pannakaidadanes, ket iti um-umayen a sistema dagiti bambanag biag nga agnanayon.”
Kas inkari ni Jesus, sadinoman ditoy lubong a papanan dagiti adalanna, tagiragsakendanto ti pannakirelasion kadagiti padada a Kristiano a nasingsinged ken nasudsudi ngem ti tagtagiragsakenda iti natural a kamkameng ti pamiliada. Ti baro a baknang nga agturay kaawatan naikapis agpadpada iti daytoy a gunggona ken ti biag nga agnanayon idiay nailangitan a Pagarian ti Dios.
Kalpasanna innayon ni Jesus: “Ngem adu dagiti umuna a maud-udidanto, ken dagiti maudi nga umun-unadanto.” Aniat’ kayatna a sawen?
Kayatna a sawen nga adu a tattao nga “umuna” iti panangtagiragsak kadagiti narelihiusuan a pribilehio, kas iti daydiay baro a baknang nga agturay, a saandanto a sumrek iti Pagarian. “Maud-udidanto.” Ngem adu, agraman dagiti napakumbaba nga adalan ni Jesus, a lalaisen dagiti managinsisingpet a Fariseo a kas “maud-udinto”—kas tattao iti daga, wenno ‛am ha·’aʹrets—isudanto ti “umuna.” Ti panagbalinda nga “umuna” kaipapananna nga awatendanto ti pribilehio nga agbalin a kakadua nga agturay ni Kristo iti Pagarian. Marcos 10:17-31; Mateo 19:16-30; Lucas 18:18-30.
◆ Nalawag, ania a kita ti agturay daydiay nabaknang a baro?
◆ Apay madi a paawagan ni Jesus a naimbag?
◆ Kasano a ti kapadasan ti agtutubo nga agturay iyilustrarna ti kinapeggad ti panagbalin a nabaknang?
◆ Ania dagiti gunggona nga inkari ni Jesus kadagiti pasurotna?
◆ Kasano a ti umuna agbalin a maudi, ken ti maudi umun-una?