Ti Biag ken Ministerio ni Jesus

Agsususik dagiti Adalan Bayat nga Umasideg ti Ipapatay ni Jesus

NI Jesus ken dagiti adalanna asidegda idiay Karayan Jordan, a ballasiwanda manipud distrito ti Perea nga agturong Judea. Adu pay a sabsabali ti agdaldaliasat a kaduada nga agturong iti Paskua ti 33 K.P., a maysa laengen a lawas wenno nabaybayag pay bassit ti kaadayona.

Magmagna nga umun-una ni Jesus kadagiti adalanna, ket masmasdaawda iti natured a determinasionna. Lagipenyo a sumagmamano lawas nga immun-una idi natay ni Lazaro ket ngangngani agturong ni Jesus manipud Perea a mapan Judea, pinaregta ni Tomas dagiti dadduma: “Intayo met, tapno mataytayo a maikanunong kenkuana.” Lagipenyo pay met a kalpasan ti panangpagungar ni Jesus ken ni Lazaro, isiksikat ti Sanhedrin ti panangpapatay kenkuana. Isu met laeng a sibubuteng dagiti adalan itan ta sumsumrekda manen idiay Judea.

Tapno maisaganada iti addat’ masanguananda, impusing ni Jesus dagiti 12 a sililimed ket kunana kadakuada: “Adtoy, sumang-attayo sadi Jerusalem, ket ti Anak ti tao maiyawatto kadagiti panguluen dagiti papadi ken dagiti eskriba, ket ipataydanto kenkuana ti ipapatay ket isu iyawatdanto kadagiti Gentil ket marabrabngisto ket mauy-uyawto ken matupraan ket papatayendanto, ket iti maikatlo nga aldaw agungarto.”

Maikatlo daytoyen a daras kadagiti nabiit pay a bulbulan nga imbaga ni Jesus kadagiti adalanna maipapan ti ipapatayna ken panagungarna. Ket nupay dumdumngegda kenkuana, saanda a matartarusan. Nalabit gapu ta mamatida iti pannakaisubli ditoy daga ti pagarian ti Israel, ket ur-urayenda ti panangtagiragsakda ti dayag ken dayaw iti naindagaan a pagarian a kadua ni Kristo.

Naikuyog kadagiti agdaldaliasat nga agturong iti Paskua isu ni Salome, ina da apostol Santiago ken Juan. Inawagan ni Jesus dagitoy a lallaki kas “Annak ti Dulloog,” awan duadua gapu iti nabara a panagrikriknada. Iti nawadwad a panawenen ing-ingpen dagitoy a dua ti ambision nga agbalin a prominente idiay Pagarian ni Kristo, ket impakpakaammodat’ tarigagayda ken inada. Itan ti inada inasitganna ni Jesus gapu kadakuada, nagkurno iti sanguananna, ket dumawdawat ti pabor.

“Ania ti kayatmo?” insaludsod ni Jesus.

“Ibilinmo a dagitoy dua nga annakko agtugawda koma, ti maysa iti makanawanmo ket ti maysa iti makatigidmo, idiay pagariam.”

Idi maawatanna ti naggapuan daytoy a dawat, kuna ni Jesus kada Santiago ken Juan: “Dikay ammo ti dawdawatenyo. Mabalinyo aya ti uminum iti kopa a dandani inumak?”

“Wen, mabalinmi,” insungbatda. Uray pay kaibagbaga ni Jesus kadakuada a sangsanguenna ti nasaem a pannakaidadanes ken ipapatay iti kamaudiananna, kaawatan a saanda a matartarusan nga isu daytoy ti kayatna a sawen babaen “ti kopa” a dandaninan inuman.

Nupay kasta, imbaga ni Jesus kadakuada: “Pudno nga uminumkayto iti kopak, ngem ti panagtugawyo iti makanawanko ken ti makatigidko saan a siak ti akinrebbeng a mangted, no di ket ni Amak kadagidiay nakaisaganaanna.”

Idi agangay naammuan dagiti dadduma a sangapulo nga apostoles ti indawat da Santiago ken Juan, ket nagrurodda. Nalabit prominente da Santiago ken Juan iti immun-una a panagsususik kadagiti apostoles maipapan ti no asinot’ kadakkelan kadakuada. Ti agdama a dawatda iparangarangna a saanda nga inyaplikar ti balakad nga inted ni Jesus maipapan itoy a banag. Nakalkaldaang ta, ti tarigagayda iti kinatan-ok ket napigsa pay laeng.

Ngarud tapno tamingenna daytoy kaudian a susik ken ti pinataudna a sakit ti naknakem, inawagan a sangsangkamaysa ni Jesus dagiti 12. Binalbalakadanna ida a siaayat, kunana: “Ammoyo a dagiti panguluen dagiti nasnasion agturayda kadakuada ket dagiti natan-ok agbilinda a situturay kadakuada. Ngem kadakayo saanto a kasta; no di ket ti siasinoman nga agtarigagayto nga isu ti kadakkelan kadakayo, isunto ti agserbi kadakayo, ket ti siasinoman nga agayatto nga isu ti umuna kadakayo isunto ti adipenyo.”

Nangted ulidan ni Jesus a rebbeng a tuladenda, kas inlawlawagna: “A kas met ti Anak ti tao, saan nga immay tapno pagserbian, no di ket tapno agserbi ken itedna ti biagna a maysa a subbot kadagiti adu.” Saan laeng a nagserbi ni Jesus a maipaay kadagiti dadduma ngem aramidenna daytoy agingga nga isut’ matay agpaay iti sangatauan! Kasapulan dagiti adalanna ti kasta met laeng a kas ken Kristo a kananakem a tarigagayanda komat’ agserbi imbes a pagserbian ken agbalinda a nanumnumo imbes nga iti saad ti kinatan-ok. Mateo 20:17-28; Marcos 3:17; 9:33-37; 10:32-45; Lucas 18:31-34; Juan 11:16.

◆ Apay nga agbutbuteng itan dagiti adalan?

◆ Kasanot’ panangisagana ni Jesus kadagiti adalanna no aniat’ adda iti masanguanan?

◆ Ania a dawat ti inaramidda ken Jesus, ket kasano a naapektaran dagiti dadduma nga apostol?

◆ Kasanot’ panangtaming ni Jesus iti problema kadagiti apostolesna?