Nupay kasta, kinabkabil ken pinapatay dagiti “makitaltalon” dagiti “adipen” nga imbaonna kadakuada. Inlawlawag ni Jesus: “Maysa laengen ti nabati nga ibaon [ti makinkukua iti kaubasan], ti dungdungnguenna nga anak. Isu ti naudi nga imbaonna ta kinunana, ‘Raemendanto ti anakko.’ Ngem imbaga dagiti makitaltalon iti maysa ken maysa: ‘Daytoy ti agtawid. Umaykayo ket patayentayo tapno kukuatayton ti tawidna.’ Isu a tiniliw ken pinatayda.”​—Marcos 12:​6-8.

Idi imbaga ni Jesus daytoy nga ilustrasion, nabigbig dagiti eskriba ken dagiti panguluen a papadi nga “isuda ti pampanunotenna.” (Lucas 20:19) Nabayagen a kayatda a papatayen ni Jesus, ti maikari nga “agtawid.” Ngem mabutengda kadagiti tattao, a mangibilang ken Jesus kas maysa a propeta, isu a saanda a pinapatay idi.