Dagiti Saludsod Manipud Kadagiti Managbasa

◼ Nainsiriban kadi para iti maysa a Kristiano a natayen ti asawana ti agtalinaed nga agsolsolo iti pananginanama nga agtipondanto manen iti masanguanan?

Anian a nagsayaat a ti maysa a Kristiano makarikna iti panagayat iti asawana uray pay no dayta ti natayen! Dadduma nga adda iti daytoy a kasasaad ti nagtalinaed nga agsolsolo, saan a gapu ta kontentoda iti kinaagsolsolo, no di ket manginanamada nga agtultuloyto ti panagasawada kalpasan ti panagungar. Nupay no makipagriknatayo kadagiti natauan a rikrikna nga adda iti likudan dagidiay a namnama, paregtaentayo dagiti kakasta a mangusig kadagiti dadduma a punto iti Biblia.

Kas pangarigan, adda pakainaigan dagiti sasao ni Pablo maipapan iti banag: “Ti babai nga asawa naisinggalut iti bayat ti panagbiag ni asawana. Ngem no natay ti asawa, adda a siwayawaya a makiasawa iti kayatna, isuna laeng a maaramid koma a mayalubog iti Apo. Ngem pagarupek a naragragsakto no mataginayon kas iti kasasaadna.” (1 Corinto 7:39, 40) Daytoy ipakitana a ti singgalut ti panagasawa agpatingga no matay ti asawa ti maysa. Kinamanangngaasi iti Dios ti panangipakaammo kadagiti Kristiano iti daytoy, iti kasta dagiti balo mabalinda a tingitingen ti emosional ken dadduma a kasapulanda iti panangikeddeng no mangasawada wenno makiasawada manen; saandan a naisinggalut iti pimmusay.​—1 Corinto 7:8, 9.

Ti Biblia kadi, nupay kasta, ipamatmatna no dagiti napagungar mabalindanto manen ti mangasawa wenno itultuloy ti dati a panagasawa a naipatinggan iti ipapatay? Maysa a salaysay ti mainaig iti daytoy a saludsod. Dayta ramanenna dagiti Saduseo a, nupay no dida pay mamati iti panagungar, immayda ken Jesus a padpadasenda ti mangsilo kenkuana. Imparangda daytoy a parikut a mainaig iti pannakiasawa iti bayawna: “Ngarud adda pitoda nga agkakabsat; ket ti inauna nangala ti asawa a babai, ket natay nga awanan putot. Ket inasawa ti maikadua ket natay met nga awanan putot. Ket inasawa manen ti maikatlo.a Ket kasta a nagsasaganad dagiti pito, ket natayda nga awanan putot. Ket iti kalpasanna natay met di babai. Ngarud inton panagungar, asinonto kadakuada ti makin-asawa iti babai?”​—Lucas 20:27-33; Mateo 22:23-28.

Dagiti Kristiano awanda iti sidong ti Linteg, ngem ti umasping a parikut ti mabalin a bumangon maipapan kadakuada. Kas pangarigan: Da Brother ken Sister C​—​— ket agassawada ken addaanda iti dua nga annak. Kalpasanna natay ti lalaki. Isut’ inay-ayat unay ni Kabsat C​—​— ket mail-iliw kenkuana, ngem mariknana a kasapulanna ti kadua, pinansial a suportar, seksual a tarigagay, ken tulong a maipaay kadagiti annakna. Gapuna nakiasawa ken Kabsat M​—​—, a dayta a panagtipon ket Nainkasuratan a kas idi damo. Kalpasanna ti lalaki nagsakit ket natay. No dagiti dati nga assawana mapagungarda ket maipalubos ti panangasawa, asinonto ti pakiasawaanna?

Usigenyo ti sungbat ni Jesus kadagiti Saduseo: “Dagiti annak daytoy a lubong mangasawada ken mayasawada, ngem dagiti maipatonto a maikari iti lubong nga umayto ken ti panagungar dagiti natay saanda a mangasawa ket dida met mayasawa. Ta didanto matayen ta kapadpada ida dagiti anghel, ket annak ida ti Dios ta annak ida ti panagungar. Ngem dayta panagungar dagiti natay ni Moises imparangarangna . . . idi inawaganna ni Jehova ‘ti Dios ni Abraham, ken Dios ni Isaac, ken Dios ni Jacob.’ Ta isu saan a Dios dagiti natay no di ket dagiti sibibiag, ta agbiagda amin a maipaay kenkuana.”​—Lucas 20:34-38; Mateo 22:29-32.

Dadduma ti mangpanunot a ti tuktukoyen ni Jesus ditoy isu ti nainlangitan a panagungar, ngem dagiti rason iti panamati iti sungbatna ket maipapan iti naindagaan a panagungar iti umay a “sistema dagiti bambanag.” Aniada dagiti rasontayo iti kastoy a panangmatmat? Dagidiay agim-imtuod kenkuana dida mamati kenkuana wenno dida ammo ti maipapan iti nainlangitan a panagungar. Inimtuodda ti maipapan iti maysa a Judio a pamilia iti sidong ti Linteg. Kas sungbat tinukoy ni Jesus da Abraham, Isaac, ken Jacob, dagiti lallaki a manginanama manen nga agbiag ditoy daga. (Genesis 42:38; Job 14:13-15; idiligyo iti Hebreo 11:19.) Dagidiay a patriarka, ken dagiti minilion a dadduma pay, a mapagungar ditoy daga ken mapaneknekan a matalek agbalindanto a “kakasla kadagiti anghel.” Nupay no matayda, saandanton a matay apaman nga inkeddengen ti Dios ida a nalinteg a maipaay iti agnanayon a biag.

Dagiti rikrikna ti tao itatta ti mabalin a mamagbalin iti daytoy a panangipapan a narigat nga awaten. Ngem paliiwentayo nga awan iti uray sadinoman iti Biblia a naibaga a ti panangpagungar ti Dios kadagiti matalek kaipapananna ti panangisublina iti naasawaan a kasasaadda. Gapuna, awan ti mamati a no ni Aquila ken ni Priscilla nagun-odanda ti biag idiay langit, intuloyda ti panagasawada. (Aramid 18:2) Ket ni Jose ken ni Maria ti nalawag nga agbiagdanto iti nagduma a lugar​—ni Jose ditoy daga ken ni Maria idiay langit. (Juan 19:26; Aramid 1:13, 14) Yantangay awan kadatayo ti nagbiag idiay langit, ditay maibaga no ania ti rikrikna da Aquila, Priscilla, ken Maria sadiay, ngem masiguradotayo a makasarakda iti naan-anay a pannakapnek iti nainlangitan a panagserbida.

Umasping iti dayta, pulos a saantayo a nagbiag a kas perpekto a tattao. Gapuna ditay masigurado no anianto ti riknatayo maipapan iti napalabas a relasion no magun-odantayton ti naan-anay a natauan a biag idiay paraiso. Nasayaat ti pananglagiptayo nga idi insawang ni Jesus dagita a sasao isut’ maysa a naan-anay a tao ket ngarud adda iti nasaysayaat a kasasaad a mangapresiar iti rikrikna dagidiay a “maibilang a maikari iti pananggun-od iti dayta a sistema dagiti bambanag.” Makapagtalektayo met a ni Jesus kabaelanna ti ‘makipagrikna kadagiti agdama a pagkapuyantayo.’ (Hebreo 4:15) Gapuna no ti maysa a Kristiano masarakanna a narigatna nga awaten ti panangipapan a dagiti mapagungar saandanton a mangasawa wenno makiasawa, masiguradona a ti Dios ken ni Kristo ket mannakaawatda. Ket mabalinna ti aguray ket kitaenna no ania ti mapasamak.

Awan ti rason ita a nalabes ti panangipaganetgettayo iti daytoy a banag. Nagsurat ti salmista: “Ammoyo a ni Jehova isu ti Dios. Isu ti nangaramid kadatayo, ket datayo kukuanatayo. Datayo ti ilina, ken karkarnero ti pagpaarabanna . . . Agyamankayo kenkuana, ket bendituenyo ti naganna. Ta ni Jehova naimbag.” (Salmo 100:3-5) Ti nagimbagan a Diostayo ti sigurado a mangipaay a siwawadwad kadagiti pudno a kasapulantayo no “maibilangtayo a maikari iti pananggun-od iti dayta a sistema dagiti bambanag.”​—Job 34:10-12; Salmo 104:28; 107:9.

Ti kinaimbag ti Dios naiparangarang met iti panangipakaammona kadatayo a ti ipapatay ti maysa nga asawa pinagpatinggana ti panagasawa. (Roma 7:2) Gapuna siasinoman a nakapukaw iti asawana maammuanna nga isut’ siwayawaya a mangasawa wenno makiasawa manen no kasapulan dayta wenno dayta ti kasayaatan. Dadduma ti nangasawa wenno nakiasawa manen, ket iti kasta nakatulong daytoy a nangpunno iti agdama a kasapulanda ken ti kasapulan ti pamiliada. (1 Corinto 7:36-38; Efeso 6:1-4) Ngarud, ti maysa a Kristiano a ti asawana ket natayen saan koma a mapilit nga agtalinaed nga awan asawana itan gapu iti pananginanama nga agtiponto manen dagiti dati nga agasawa iti panagungar iti biag ditoy daga iti umay a sistema.

[Dagiti Footnote]