Ti Biag ken Ministerio ni Jesus

No Apay Immay ni Jesus Ditoy Daga

KAS intay naammuanen iti immun-una a ruar daytoy a magasin, ti aldaw ni Jesus idiay Capernaum a kadua dagiti uppat nga adalanna ti okupado unay. Umuna, pinaimbagna ti tao a naluganan ti demonio nga adda idiay sinagoga, kalpasanna idiay balay ni Pedro pinaimbagna ti katugangan a babai ni Pedro, ket nagtultuloy agingga iti rabii ip-ipan dagiti tattao ti Capernaum kenkuana amin dagiti masaksakitda tapno maagasanda. Awan pay pulos panawen a panagmaymaysana.

Itan dayta ti agsapa iti sumaganad nga aldaw. Bayat a nasipnget pay, bimmangonen ni Jesus ket napan idiay ruar nga agmaymaysa. Isut’ napan iti naiputputong a lugar a sadiay mabalinna ti agkararag ken Amana nga agmaymaysa. Ngem ti panagmaymaysa ni Jesus ti ababa unay agsipud ta idi malasin ni Pedro ken dagiti dadduma nga isut’ awan, rimmuarda a nagsapsapul kenkuana.

Idi masarakanda ni Jesus, kuna ni Pedro: “Isuda amin sapulendaka.” Kayat dagiti tattao idiay Capernaum a makipagtaeng ni Jesus kadakuada. Inapresiarda dagiti naaramidanna kadakuada! Ngem immay kadi ni Jesus ditoy daga nangnangruna tapno agaramid kadagiti datdatlag a panangagas? Aniat’ kinunana?

Sigun iti maysa a salaysay ti Biblia, sinungbatan ni Jesus dagiti adalanna: “Mapantayo kadagiti purpurok ken il-ili a kaparanget, tapno mangasabaak met sadiay, ta maipuon itoy immayak.” Uray pay no ingunamgunam dagiti tattao nga agbati koma ni Jesus, kunana kadakuada: “Kadagiti sabsabali a siudad masapul met nga ipakaammok ti naimbag a damag ti pagarian ti Dios, ta daytoy ti panggep a nakaibaonak.”

Wen, immay ni Jesus ditoy daga nangnangruna tapno ikaskasabana ti Pagarian ti Dios a mangalangon ti nagan ni Amana ken mangsolber a naan-anay kadagiti amin nga an-anayen ti tao. Nupay kasta, tapno paneknekanna nga isut’ imbaon ti Dios, nagaramid ni Jesus kadagiti datdatlag a panangagas. Iti dayta met laeng a pamay-an ni Moises, adu a siglo sakbayna nagaramid kadagiti datdatlag tapno maipasdek dagiti pammaneknekna kas adipen ti Dios.

Ket, idi pinanawan ni Jesus ti Capernaum tapno mapan mangaskasaba kadagiti dadduma a siudad, dagiti uppat nga adalanna kimmuyogda kenkuana. Dagitoy nga uppat isu da Pedro ken ti kabsatna nga Andres, ken ni Juan ken ni kabsatna a Santiago. Malagipyo pay a, maysa laeng a lawas sakbayna, inawis ni Jesus ida kas dagiti immuna a managdaliasat a kakaduana.

Ti panangaskasaba ni Jesus iti Galilea a kadua dagiti uppat nga adalanna ket nakaskasdaaw panagballigina! Kinapudnona, ti report maipapan kadagiti ar-aramidna ti nagsaknap uray pay iti intero a Siria. Dadakkel a bunggoy manipud Galilea, Judea, ken iti ballasiw ti Karayan Jordan ti simmurot ken ni Jesus ken kadagiti adalanna. Marcos 1:35-39; Lucas 4:42, 43; Mateo 4:23-25; Exodo 4:1-9, 30, 31.

◆ Aniat’ napasamak iti kabigatanna kalpasan ti okupado nga aldaw ni Jesus idiay Capernaum?

◆ Apay a naibaon ni Jesus ditoy daga, ket aniat’ panggep dagiti datdatlag nga inaramidna?

◆ Asinot’ kimmuyog ken Jesus iti panangaskasabana idiay Galilea, ken aniat’ tignayda kadagiti ar-aramid ni Jesus?