ENELDO

[Gr., aʹne·thon].

Umanamong dagiti agdama a leksikograpo a ti mula a natukoy babaen iti Griego a termino nga aʹne·thon isu ti eneldo (Anethum graveolens) imbes a ti anis (Gr., anʹne·son), kas kadagiti dadaan a patarus (KJ, Dy). Ti eneldo ket ad-adda a gagangay a maimulmula ita ngem iti anis iti rehion ti Palestina, ket ipatuldo ti pammaneknek a maimulmula dayta nanipud kadagidi kadaanan a tiempo iti Makintengnga a Daya, kasta met dagiti Griego ken Romano. Karaman ti eneldo kadagiti mula a nakaan-annad nga impaayan iti apagkapullo dagiti managinsisingpet a Fariseo, idinto ta napaayda a mangsalimetmet iti nadagdagsen a bambanag iti Linteg. (Mt 23:23) Ti Judio a Mishnah (Maʽaserot 4:5) imbilinna a saan laeng a dagiti bukel no di ket ti pay mula ken bungbunga ti maipaayan iti apagkapullo.

Ti mula dumakkel a kasla dakes a ruot, nga umarngi iti anis, ken magtenganna ti katayag nga agarup 0.5 m (2 pie) nga addaan nasayaat pannakatabasna, nasin-aw a berde a bulbulong ken sar-ay ti babassit a duyaw a sabsabong. Maimulmula dayta gapu iti nasayamusom a bukbukelna, a maipatpateg unay a pangpananam kadagiti taraon ken kasta met a kas agas maipaay kadagiti an-anayen iti tian.