Siasino Dagiti Mangikaskasaba iti Naimbag a Damag?

“ . . . maikaskasabanto iti intero a mapagnaedan a daga.”​—MATEO 24:14.

IKASKASABA dagiti Saksi ni Jehova ti naimbag a damag iti intero a lubong iti nadumaduma a pamay-an. Ar-aramidenda daytoy babaen iti:

Pannakisarita. Kas ken Jesus ken dagiti adalanna, idanon dagiti Saksi ni Jehova ti naimbag a damag kadagiti tattao. (Lucas 8:1; 10:1) Saanda nga urayen dagiti tattao a mapan kadakuada. Ti nasuroken a pito a milion a Saksi ikaskasabada kadagiti tattao ti maipapan iti Pagarian. Mangasabada iti binalaybalay, kadagiti lansangan, babaen iti telepono, ken iti dadduma pay a pamay-an. Idi napan a tawen, binusbos dagiti Saksi ti nasurok a maysa ket kagudua a bilion nga oras iti panangasabada.

Saan laeng a maipapan iti Pagarian ti Dios ti isuroda iti sabsabali no di ket maipapan pay iti “amin a bambanag nga imbilin [ni Jesus].” (Mateo 28:20) Regular a mangikonduktada iti nasurok a walo a milion a libre a panangyadal iti Biblia iti pagtaengan.

Mangaskasaba dagiti Saksi iti intero a lubong iti 236 a daga. Kasabaanda amin a kita ti tattao. Mangasabada iti away ken iti siudad, kadagiti kabakiran ti Amazon ken iti nalam-ek a kabakiran ti Siberia, kadagiti desierto ti Africa ken iti Kabambantayan ti Himalaya. Awan ti sueldoda iti daytoy a trabaho. Aramatenda ti kuarta ken orasda gapu iti ayatda iti Dios ken iti padada a tao.

Nadumaduma a Publikasion. Daytoy a magasin a ti kompleto a paulona ket Ti Pagwanawanan Mangibumbunannag iti Pagarian ni Jehova ket maipabpablaaken iti 185 a lenguahe ken maiwarwaras ti nasurok a 42 a milion a kopia iti tunggal ruar. Ti kaduana a magasin nga Agriingkayo!, a mangiwarwaragawag met iti Pagarian, ket maipabpablaak iti 83 a lenguahe ken maiwarwaras iti dandani 40 a milion a kopia iti tunggal ruar.

Magun-odan iti agarup 540 a lenguahe dagiti libro, broshur, tract, CD/MP3, ken DVD a mangilawlawag kadagiti pannursuro ti Biblia. Iti laeng napalabas a sangapulo a tawen, nakapataud ken nakaiwaras dagiti Saksi iti nasurok a 20 a bilion a kopia dagitoy a material, nga agpromedio iti agarup tallo a kopia iti tunggal indibidual ditoy daga!

Inyimprenta wenno impayimprenta met dagiti Saksi ni Jehova ti nadumaduma a patarus ti Biblia. Ti New World Translation of the Holy Scriptures​—nga impatarus, inyimprenta, ken inwaras dagiti Saksi​—ket magun-odan itan iti 96 a lenguahe, iti intero wenno iti sumagmamano a pasetna. Nasuroken a 166 a milion a kopia ti naiwaras.

Nakristianuan a Gimong. Dagiti linawas a gimong kadagiti Kingdom Hall ket saan laeng a gagangay a narelihiosuan a panagtataripnong; nairanta a makaisuro dagita. Naibatay iti Biblia dagiti maipalawag, ket maadal ti Biblia babaen iti tulong ti magasin a Pagwanawanan ken dadduma pay a publikasion. Kadagiti gimong, masursuro met dagiti Saksi ti agbalin nga ad-adda nga epektibo a manangiwaragawag iti naimbag a damag.

Agpapada ti material nga adalen dagiti Saksi iti nasurok a 107,000 a kongregasion iti intero a lubong. Silulukat dagitoy a gimong iti publiko. Awan ti panagkolekta iti kuarta. Siempre, awan mamaay dagitoy no saan nga al-alagaden dagiti Saksi ti ikaskasabada.

Nasayaat nga Ulidan. Ikagkagumaanda ti agbiag kas mapagulidanan a Kristiano, a tratuenda ti dadduma iti pamay-an a kayatda a panangtrato kadakuada ti sabsabali. (Mateo 7:12) Nupay imperpektoda ken adda pagkurkuranganda no dadduma, ikagkagumaanda a siaayat a pakilangenan ti amin a tattao saan laeng a babaen ti panangiranudda iti naimbag a damag no di ket babaen iti itutulongda iti dadduma pay a pamay-an.

Saan a padpadasen dagiti Saksi ni Jehova a kombertien ti intero a lubong babaen ti panangasabada. Imbes ketdi, inton mapneken ni Jehova iti pannakaibanag dayta a trabaho, dumtengton ti panungpalan, kas impadto ni Jesus. Anianto ti mapasamak iti daga ken kadagiti agnanaed a tattao?

[Ladawan iti panid 7]

Ikaskasaba dagiti Saksi ni Jehova ti naimbag a damag iti intero a lubong

Ania ti “Panungpalan”?

“. . . ket iti kasta umayton ti panungpalan.”​—MATEO 24:14.

MASANSAN a topiko ti publiko ti maipapan iti panungpalan ti lubong. Agduduma ti pannakailadawan dayta kadagiti libro, pelikula, ken magasin. Kas pagarigan, maitamtampok dayta kas nakabutbuteng, nakakatkatawa wenno nasientipikuan pay ketdi. Kunada pay a dayta ket pannakatalipupos babaen iti nuklear a gubat, idudungpar dagiti asteroid, makapapatay a virus, di makontrol a panagbaliw ti klima, wenno iraraut dagiti agnanaed iti sabali a planeta.

Nagduduma met ti panangmatmat dagiti relihion, ket adu ti mangisursuro a “ti panungpalan” ti mamagpatingga iti amin a biag ditoy daga. Kastoy ti kinuna ti maysa a teologo maipapan iti Mateo 24:14: “Daytoy a bersikulo ti maysa kadagiti kapatgan iti intero a Sao ti Dios . . . Mapasaranto ti kaputotantayo dagita a nakalkaldaang a pasamak nupay manmano laeng ti mangipagarup a mapasamak dayta.”

Dagita a panangmatmat ket saan a maitunos iti napateg a kinapudno: ‘Sititibker nga impasdek’ ni Jehova a Dios ti planeta a daga, ket “saanna a pinarsua a maipaay laeng iti awan kapapay-anna” no di ket binukelna dayta “tapno mapagnaedan a mismo.” (Isaias 45:18) Isu nga idi dinakamat ni Jesus ti “panungpalan,” saanna a kayat a sawen a madadaelto ti daga wenno maungawto ti tao. Ibagbagana a madadaelto dagiti nadangkes​—dagidiay saan nga agbibiag maitunos iti naayat a panangiwanwan ni Jehova.

Usigem daytoy nga ilustrasion. Ipapanmo nga adda napintas a balaymo ket impalubosmo a libre nga agnaed iti dayta dagiti tattao. Natalna nga agnanaed sadiay ti sumagmamano ken ay-aywananda a naimbag ti balaymo, ngem dadduma ti nariribuk nga uray la agriririda ken gunggundawayanda dagiti nasingpet nga agnanaed. Dinadaelda dagiti sanikuam ken didaka ipangpangag uray anawaem ida.

Ania ngata ti aramidem tapno marisutmo ti problema? Dadaelem kadi ti balaymo? Nalabit saan. Mabalin a papanawem dagidiay dakes nga agnanaed ket tarimaanem ti dinadaelda.

Kastanto met ti aramiden ni Jehova. Pinaltiinganna ti salmista a mangisurat: “Magessatto dagiti mismo a managaramid iti dakes, ngem dagidiay mangin-inanama ken Jehova isuda ti mangtagikuanto iti daga. Ket iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”​—Salmo 37:9-11.

Dinakamat met dayta ti napaltiingan nga apostol a ni Pedro. Insuratna: “Adda idi langlangit nanipud idi ugma ken maysa a daga nga agtaktakder a sititibker manipud iti danum ken iti tengnga ti danum babaen ti sao ti Dios; ket babaen kadagidiay a pamay-an nagpasar iti pannakadadael ti lubong iti daydi a tiempo idi nalayus iti danum.” (2 Pedro 3:5, 6) Tuktukoyen ditoy ni Pedro ti Layus idi kaaldawan ni Noe. Nadadael dagiti di nadiosan a tattao, ngem saan a nadadael ti daga. Dayta a sangalubongan a Layus ti agserbi a “pagtuladan maipaay kadagiti di nadiosan a tattao maipapan iti bambanag nga umay.”​—2 Pedro 2:6.

Innayon pay ni Pedro: “Naidulin ti langlangit ken ti daga nga adda ita maipaay iti apuy.” Mabalin a di umiso ti maawatam no agingga laeng dita ti basaem. Ngem paliiwem ta ituloy a kunaen ti bersikulo: “Ken ti pannakadadael dagiti di nadiosan a tattao.” Dagiti di nadiosan wenno nadangkes a tattao ti madadael imbes a ti daga. Anianto ti sumaruno a mapasamak? Insurat ni Pedro: “Adda baro a langlangit [Mesianiko a Pagarian ti Dios] ken baro a daga [nalinteg a kagimongan ti tao] nga ur-urayentayo sigun iti karina, ket kadagitoy agtaeng ti kinalinteg.”​—2 Pedro 3:7, 13.

Ipakita met ti padto ti Biblia nga asidegen a dumteng ti “panungpalan.” Basaem ti Mateo 24:3-14 ken 2 Timoteo 3:1-5 tapno maammuam dagiti pasamak a mangpaneknek nga asidegen ti panungpalan.a

Pakasdaawam kadi nga adu ti matikaw iti kunaen ti Mateo 24:14, nupay maawatan met dayta uray ti maysa nga ubing? Adda dagiti makagapu. Binulsek ngamin ni Satanas ti pampanunot dagiti tattao tapno saanda a mabigbig dagiti napateg a kinapudno a masarakan iti Sao ti Dios. (2 Corinto 4:4) Kasta met, saan a naipalgak ti panggep ti Dios kadagiti natangsit ngem naipalgak dayta kadagiti napakumbaba. Kinuna ni Jesus maipapan iti daytoy: “Idaydayawka iti publiko, Ama, Apo ti langit ken daga, agsipud ta inlemmengmo dagitoy a banag kadagiti mamasirib ken nasaririt ket impalgakmo ida kadagiti ubbing.” (Mateo 11:25) Anian a pribilehio ti mairaman kadagiti napakumbaba a makaammo iti pudpudno a kaipapanan ti Pagarian ti Dios ken mangnamnama kadagiti bendision nga iyegna iti amin a mangsuporta iti dayta!