“Agtultuloykayo nga Agbantay”—Dimtengen ti Oras ti Panangukom!
Ti impormasion iti daytoy a maadal nga artikulo ket naibatay iti broshur nga Agtultuloyka nga Agbantay! a nairuar kadagiti kombension distrito a naangay iti intero a lubong kabayatan ti 2004/05.
“Agtultuloykayo nga agbantay . . . agsipud ta saanyo nga ammo no ania nga aldaw nga umay ti Apoyo.”—MATEO 24:42.
1, 2. Ania ti maitutop a nangyarigan ni Jesus iti iyaayna?
ANIA ti aramidenyo no maammuanyo nga adda agtatakaw a mangsisiim kadagiti pagtaengan iti lugaryo? Tapno masalaknibanyo dagiti ay-ayatenyo iti biag ken dagiti napateg a sanikuayo, agtalinaedkayo nga alerto ken managbantay. Awan ti mannanakaw nga agsurat tapno ipakaammona no kaano nga umay agtakaw. Imbes ketdi, umay a siuulimek ken di mapakpakadaan.
2 Saan laeng a naminsan nga inusar ni Jesus kas ilustrasion dagiti pamay-an ti maysa nga agtatakaw. (Lucas 10:30; Juan 10:10) No maipapan kadagiti mapasamak bayat ti tiempo ti panungpalan ken sakbay ti panangukomna, namakdaar ni Jesus: “Agtultuloykayo nga agbantay, ngarud, agsipud ta saanyo nga ammo no ania nga aldaw nga umay ti Apoyo. Ngem ammuenyo ti maysa a banag, a no naammuan koma ti bumalay no ania a panagbantay nga umay idi ti mannanakaw, nagtalinaed koma a siririing ket saanna nga impalubos a maserrek ti balayna.” (Mateo 24:42, 43) Inyarig ngarud ni Jesus ti iyaayna iti idadateng ti maysa a mannanakaw—saan a mapakpakadaan.
3, 4. (a) Ania ti iraman ti panangipangag iti pakdaar ni Jesus maipapan iti iyaayna? (b) Ania a salsaludsod ti tumaud?
3 Maitutop dayta nga ilustrasion yantangay awan ti makaammo iti eksakto a petsa ti iyaay ni Jesus. Iti umun-una a paset dayta a padto, kinuna ni Jesus: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mateo 24:36) Gapuna, indagadag ni Jesus kadagiti agdengdengngeg kenkuana: “Paneknekanyo a sisasaganakayo.” (Mateo 24:44) Dagidiay mangipangag iti dayta a pakdaar ni Jesus ket nakasagana, nga agtigtignayda a siuumiso, kaanoman nga umay ni Jesus kas Ahente nga usaren ni Jehova a mangdadael.
4 Tumaud dagiti napateg a saludsod: Agpaay laeng kadi kadagiti tattao iti lubong ti pakdaar ni Jesus, wenno kasapulan nga ‘agtultuloy nga agbantay’ uray dagiti pudno a Kristiano? Apay a naganat ti ‘agtultuloy a panagbantay,’ ken ania ti iraman dayta?
Siasino ti Mapakpakdaaran?
5. Kasanotay nga ammo nga agaplikar kadagiti pudno a Kristiano ti pakdaar nga “agtultuloykayo nga agbantay”?
5 No kadagiti tattao iti lubong a mangyaleng-aleng iti pakdaar maipapan iti umad-adani a didigra, talaga a kasla mannanakaw ti iyaay ti Apo. (2 Pedro 3:3-7) Ngem komusta met kadagiti pudno a Kristiano? Nagsurat ni Pablo kadagiti padana a manamati: “Dakayo pagaammoyo unay a ti aldaw ni Jehova umay nga apagpag-isu a kas iti mannanakaw iti rabii.” (1 Tesalonica 5:2) Ditay pagduaduaan a “ti aldaw ni Jehova umay.” Ngem umdas kadin dayta tapno ditay agtultuloy nga agbantay? Imutektekanyo ta kadagiti adalanna a kinuna ni Jesus: “Iti oras a saanyo nga ipagarup nga isu dayta, ti Anak ti tao umay.” (Mateo 24:44) Sakbay dayta, idi parparegtaenna dagiti adalanna nga itultuloyda a biroken ti Pagarian, imballaag ni Jesus: “Agtalinaedkayo a nakasagana, agsipud ta iti oras a saanyo nga ipagpagarup umay ti Anak ti tao.” (Lucas 12:31, 40) Saan kadi a nalawag a dagiti pasurotna ti pampanunoten ni Jesus idi impakdaarna: “Agtultuloykayo nga agbantay”?
6. Apay a kasapulantayo ti ‘agtultuloy nga agbantay’?
6 Apay a kasapulan nga ‘agtultuloytayo nga agbantay’ ken ‘agtalinaedtayo a nakasagana’? Inlawlawag ni Jesus: “Dua a lallaki ti addanto iti talon: maysa ti maalanto ket ti sabali mabaybay-an; dua a babbai ti aggilgilingto iti paggilingan babaen iti ima: maysa ti maalanto ket ti sabali mabaybay-an.” (Mateo 24:40, 41) Dagidiay mangipaneknek a nakasaganada isudanto ti ‘maala,’ wenno maisalakan, inton madadael daytoy dakes a lubong. Dadduma ti “mabaybay-an” a madadael gapu ta inar-aramidda lattan ti kaykayatda. Mabalin a karaman kadagita dagiti indibidual a sigud a nalawlawagan ngem saan a nagtultuloy a nagbantay.
7. Ania ti gundawaytayo a paneknekan gapu ta ditay ammo no kaano nga umay ti panungpalan?
7 Gapu ta ditay ammo ti eksakto nga aldaw ti panungpalan daytoy daan a sistema, addaantayo iti gundaway a mangpaneknek a nasin-aw ti motibo ti panagserbitayo iti Dios. Kasano? Mabalin a kasla nagbayag ti panungpalan. Nakalkaldaang ta dadduma a Kristiano nga addaan iti kasta a panagrikna binaybay-anda a bimmaaw ti regta ti panagserbida ken ni Jehova. Ngem idi nagdedikartayo, sidadaan nga indatagtayo ti bagitayo ken ni Jehova tapno agserbitayo kenkuana. Sipapanunot dagidiay makaam-ammo ken ni Jehova nga isu ket saan a maay-ayo no agbalin a naregta ti maysa gapu laeng ta asidegen ti panungpalan. Mabasa ngamin ti Dios ti linaon ti puso.—1 Samuel 16:7.
8. Kasano a ti panagayat ken ni Jehova tignayennatayo nga agtultuloy nga agbantay?
8 Gapu ta pudpudno nga ay-ayatentayo ni Jehova, pagragsakantayo nga aramiden ti pagayatanna. (Salmo 40:8; Mateo 26:39) Ken kayattayo ti agserbi kenkuana iti agnanayon. Saan a maksayan ti kinapateg dayta a namnama gapu laeng ta nabaybayag ti panaguraytayo ngem iti nalabit namnamaentayo a pannakatungpalna. Kangrunaan iti amin, itultuloytayo ti agbantay gapu ta nakapatpateg a pasamak ti aldaw ni Jehova no iti pannakatungpal ti panggepna. Ti nasged a tarigagaytayo a mangay-ayo iti Dios tignayennatayo a mangyaplikar iti balakad ti Saona ken mangipangpangruna iti Pagarian iti biagtayo. (Mateo 6:33; 1 Juan 5:3) No maipapan iti agtultuloy a panagbantay, usigentayo ita no kasano a rumbeng nga apektaranna ti panagdesdesisiontayo ken ti wagas ti panagbiagtayo iti inaldaw.
Ania ti Direksion ti Biagmo?
9. Apay a dagiti tattao iti lubong masapul a maawatanda ita ti kaipapanan ti panawentayo?
9 Madlaw ti adu a tattao a gagangay laengen ita dagiti narikut a problema ken nakaam-amak a pasamak, ken nalabit a dida naragsak iti direksion ti biagda. Ngem ammoda kadi no ania ti pudpudno a kaipapanan dagiti pasamak iti lubong? Mabigbigda kadi nga agbibiagtayon iti “panungpalan ti sistema ti bambanag”? (Mateo 24:3) Ammoda kadi a ti panagsaknap ti kinamanagimbubukodan, kinaranggas, uray dagiti saan a nadiosan a kababalin, ket pakabigbigan nga addatayon “kadagiti maudi nga aldaw”? (2 Timoteo 3:1-5) Masapul a maawatanda ita ti kaipapanan dagitoy a pasamak ken sukimatenda no ania ti direksion ti biagda.
10. Ania ti nasken nga aramidentayo tapno masiguradotayo nga agtultuloytayo nga agbantay?
10 Komustatayo met? Inaldaw a mangaramidtayo kadagiti desision mainaig iti trabaho, salun-at, pamilia, ken panagdayawtayo. Ammotayo no ania ti ibaga ti Biblia, ket ikagkagumaantayo nga iyaplikar dayta. Gapuna, nasken nga imtuodentayo iti bagitayo: ‘Dagiti kadi pakaringgoran iti biag riningbawandan dagiti naespirituan a kalatko? Ipalpalubosko kadi a dagiti pilosopia ken panagpampanunot daytoy a lubong ti mangimpluensia iti desisionko?’ (Lucas 21:34-36; Colosas 2:8) Masapul nga itultuloytayo nga ipakita nga agtalektayo ken ni Jehova iti amin a pusotayo ket ditay agpannuray iti bukodtayo a pannakaawat. (Proverbio 3:5) Iti kasta, maitultuloytayo a ‘mapetpetan ti pudpudno a biag’—ti biag nga agnanayon iti baro a lubong ti Dios.—1 Timoteo 6:12, 19.
11-13. Ania ti maadaltayo maipapan iti napasamak (a) idi kaaldawan ni Noe? (b) idi kaaldawan ni Lot?
11 Naglaon ti Biblia iti adu a pakaballaagan a pagarigan a tumulong kadatayo nga agtultuloy nga agbantay. Usigentayo ti napasamak idi kaaldawan ni Noe. Sakbay pay ti Layus, nabayagen a nangted ti Dios iti pakdaar. Ngem saan nga impangag dayta dagiti tattao malaksid ken ni Noe ken ti pamiliana. (2 Pedro 2:5) Mainaig iti dayta, kinuna ni Jesus: “Kas idi kaaldawan ni Noe, kastanto ti kaadda ti Anak ti tao. Ta kas kadakuada kadagidi nga aldaw kasakbayan ti layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida, kastanto ti kaadda ti Anak ti tao.” (Mateo 24:37-39) Ania ti maadaltayo iti dayta? No adda asinoman kadatayo a mangyun-una kadagiti gagangay a pakaseknan—uray dagiti kadawyan nga aktibidad iti biag—imbes a kadagiti naespirituan nga aktibidad nga idagdagadag ti Dios nga iyun-unatayo, masapul a tingitingentayo a naimbag ti kasasaadtayo.—Roma 14:17.
12 Panunotenyo met ti kasasaad idi kaaldawan ni Lot. Nabaknang iti material ngem nalulok iti moral ti siudad a Sodoma, ti nagnaedan ni Lot ken ti pamiliana. Imbaon ni Jehova dagiti anghelna a mangdadael iti dayta a lugar. Indagadag dagiti anghel ken ni Lot ken iti pamiliana a panawanda ti Sodoma ket dida pulos tumaltaliaw. Gapu iti pammabileg dagiti anghel, pinanawanda ti siudad. Ngem ti asawa ni Lot agparang a dina malipatan ti pagtaenganna sadi Sodoma. Sisusukir a timmaliaw, a nakaigapuan ti ipapatayna. (Genesis 19:15-26) Pakdaarannatayo ni Jesus iti mabalin a mapasamak kadatayo idi kinunana: “Laglagipenyo ti asawa ni Lot.” Ipampangagtayo kadi dayta a pakdaar?—Lucas 17:32.
13 Naispal dagidiay nangipangag iti pakdaar ti Dios, kas ken ni Noe ken ti pamiliana, agraman ni Lot ken dagiti babbalasangna. (2 Pedro 2:9) Bayat a mennamennaentayo dagita a pagarigan, makapabileg met kadatayo ti linaonda a mensahe ti pannakaisalakan agpaay kadagidiay managayat iti kinalinteg. Dayta ti mangpatibker iti pusotayo nga agtalek iti pannakatungpal ti inkari ti Dios a “baro a langlangit ken maysa a baro a daga” a ‘pagtaengan ti kinalinteg.’—2 Pedro 3:13.
‘Dimtengen ti Oras ti Panangukom’!
14, 15. (a) Ania ti iraman “ti oras” ti panangukom? (b) Ania ti kalikaguman ti ‘panagbuteng iti Dios ken panangidayaw kenkuana’?
14 Bayat nga itultuloytayo ti agbantay, ania ti manamnamatayo? Ti libro nga Apocalipsis ibalabalana a saggaysa no kasano a matungpal ti panggep ti Dios. Napateg ti panagtignaytayo maitunos iti dayta tapno makapagsaganatayo. Nalawag a deskribiren ti padto no ania dagiti mapasamak kabayatan ‘ti Aldaw ti Apo,’ a nangrugi idi nagturay ni Kristo idiay langit idi 1914. (Apocalipsis 1:10) Dakamaten ti Apocalipsis ti maysa nga anghel a nakaitalkan ti “agnanayon a naimbag a damag nga ideklarana.” Impakaammona babaen ti natbag a timek: “Agbutengkayo iti Dios ket idayawyo, agsipud ta dimtengen ti oras ti panangukomna.” (Apocalipsis 14:6, 7) Ababa la a tiempo dayta nga “oras” ti panangukom; iramanna ti panangipakaammo ken panangibanag kadagiti panangukom a nadakamat iti dayta a padto. Agbibiagtayon iti dayta a tiempo.
15 Sakbay nga agngudo ti oras ti panangukom, maidagdagadag ita kadatayo: “Agbutengkayo iti Dios ket idayawyo.” Ania ti kalikaguman dayta? Ti umiso a panagbuteng iti Dios nasken a tignayennatayo a mangliklik iti kinadakes. (Proverbio 8:13) No pudno nga idaydayawtayo ti Dios, masapul nga umimdengtayo kenkuana buyogen ti dakkel a panagraem. Regular a basaentayo ti Saona, ti Biblia, uray no okupadotayo kadagiti dadduma pay nga aktibidad. Saantay a tagilag-anen ti balakadna a tabunuantayo dagiti Nakristianuan a gimong. (Hebreo 10:24, 25) Ipategtayo ken sireregta nga itungpaltayo ti pribilehiotayo a mangipakaammo iti naimbag a damag maipapan iti Mesianiko a Pagarian ti Dios. Iti amin a panawen, agtalektayo ken ni Jehova buyogen ti amin a pusotayo. (Salmo 62:8) Gapu ta bigbigentayo ni Jehova kas ti Sapasap a Soberano, isu ket idaydayawtayo babaen ti sitatallugod a panagpasakup kenkuana kas Soberano iti biagtayo. Talaga kadi nga agbutengkayo iti Dios ken idaydayawyo babaen kadagita a wagas a nadakamat?
16. Apay a makunatayo a natungpalen ti pannakaukom ti Babilonia a Dakkel a nadakamat iti Apocalipsis 14:8?
16 Ituloy a deskribiren ti Apocalipsis kapitulo 14 dagiti dadduma pay a mapasamak bayat ti oras ti panangukom. Umuna a nadakamat ti Babilonia a Dakkel, ti sangalubongan nga imperio ti palso a relihion: “Ti sabali pay, ti maikadua nga anghel, simmaruno, a kunkunana: ‘Narban! Ti Babilonia a Dakkel narban!’” (Apocalipsis 14:8) Wen, iti panangmatmat ti Dios, narban ti Babilonia a Dakkel. Idi 1919, nawayawayaanen dagiti napulotan nga adipen ni Jehova manipud iti pannakaadipen kadagiti Nababiloniaan a doktrina ken kaugalian, a nangdominar kadagiti tattao ken nasnasion iti adun a milenio. (Apocalipsis 17:1, 15) Iti kasta, impamaysada ti biagda iti panangitandudo iti pudno a panagdayaw. Sipud idin, nangrugin ti sangalubongan a pannakaikasaba ti naimbag a damag ti Pagarian ti Dios.—Mateo 24:14.
17. Ania ti iraman ti iruruar manipud iti Babilonia a Dakkel?
17 Ngem saan laeng a dayta ti iraman ti panangukom ti Dios iti Babilonia a Dakkel. Asidegen a dumteng ti naan-anay a pannakadadaelna. (Apocalipsis 18:21) Adda naimbag a rason a ti Biblia idagadagna kadagiti tattao iti sadinoman: “Rummuarkayo kenkuana [ti Babilonia a Dakkel] . . . no saanyo a kayat ti makiraman kenkuana kadagiti basolna.” (Apocalipsis 18:4, 5) Kasanotayo a rummuar iti Babilonia a Dakkel? Saan nga umdas ti basta panaglusulostayo manipud iti palso a relihion. Adda impluensia ti Babilonia iti adu a nalatak a piesta ken kostumbre, iti nalulok a kababalin ti lubong mainaig iti sekso, iti pannakaitandudo dagiti paglinglingayan maipapan iti espiritismo, ken adu pay. Ti agtultuloy a panagbantay kalikagumanna nga ipakitatayo babaen kadagiti tigtignaytayo ken kadagiti tarigagay ti pusotayo a pudpudno a naisinatayo iti aniaman a wagas manipud iti Babilonia a Dakkel.
18. Maitunos iti nadeskribir iti Apocalipsis 14:9, 10, ania ti siaannad a liklikan dagiti naridam a Kristiano?
18 Iti Apocalipsis 14:9, 10, nadeskribir ti kanayonan nga aspeto ‘ti oras ti panangukom.’ Kuna ti sabali nga anghel: “No ti asinoman agdaydayaw iti atap nga animal ken iti ladawanna, ket umawat iti marka iti mugingna wenno iti imana, inumennanto met ti arak ti unget ti Dios.” Apay? ‘Ti atap nga animal ken ti ladawanna’ isimboloda ti natauan a turay, a di mangbigbig iti kinasoberano ni Jehova. Dagiti naridam a Kristiano naannadda a saan nga agpaimpluensia wenno agpamarka, iti kababalin man wenno iti aramid, kas maysa a mangsupsuporta kadagidiay agkedked a mangbigbig iti sapasap a kinasoberano ti pudno a Dios a ni Jehova. Ammo dagiti Kristiano a naipasdeken idiay langit ti Pagarian ti Dios, a daytoy ti mangtalipupos kadagiti amin a turay ti tao, ket daytoy ti agturay iti agnanayon.—Daniel 2:44.
Sipapanunotkayo Koma iti Kinaganat ti Panawen!
19, 20. (a) Bayat nga umad-asideg ti panagpatingga ti maudi nga al-aldaw, ania ti masiguradotayo nga ikagkagumaan nga aramiden ni Satanas? (b) Ania koma ti determinado nga aramidentayo?
19 Bayat nga umad-adanitayon iti panagpatingga ti maudi nga al-aldaw, ad-adda a kumaro dagiti pakarigatan ken pannulisog. Agingga nga imperpekto ken agbibiagtayo iti daytoy daan a sistema, mapasarantayo ti bambanag a kas iti nakapuy a salun-at, kinalakay ken kinabaket, ipupusay dagiti ing-ingungoten, nasaktan a rikna, pannakapaay gapu iti di panangikankano dagiti tattao iti panagreggettayo a mangikasaba iti Sao ti Dios, ken adu pay. Ditay liplipatan a ni Satanas gunggundawayanna dagiti pakarigatantayo tapno sumukotayo—nga isardengtayon nga ikasaba ti naimbag a damag wenno saantayon nga agbiag maitunos kadagiti pagalagadan ti Dios. (Efeso 6:11-13) Saan a tiempo ita tapno lipatentayo ti kinaganat ti panawen a pagbibiagantayo!
20 Ammo ni Jesus a mabalin a sumukotayo gapu iti adu a pakarigatan, isu a balakadannatayo: “Agtultuloykayo nga agbantay . . . agsipud ta saanyo nga ammo no ania nga aldaw nga umay ti Apoyo.” (Mateo 24:42) Gapuna, agtalinaedtayo koma ng alerto no ania a paset ti panawen ti pagbibiagantayon ita. Agannadtayo kadagiti taktika ni Satanas a mangpabannayat wenno mangpasuko kadatayo. Ad-adda a determinadotayo koma a mangikasaba a sireregta iti naimbag a damag maipapan iti Pagarian ti Dios. Wen, itultuloytayo ti agbalin a sipapanunot iti kinaganat ti panawen bayat nga ipangagtayo ti pakdaar ni Jesus: “Itultuloyyo ti agbantay.” No aramidentayo dayta, maidaydayawtayo ni Jehova ken mairamantayo kadagidiay addaan iti namnama a mangsagrap kadagiti agnanayon a pamendisionna.
Ania ti Sungbatyo?
• Kasanotayo nga ammo nga agaplikar kadagiti pudno a Kristiano ti pakdaar ni Jesus nga ‘agtultuloy nga agbantay’?
• Aniada a mangpakdaar a pagarigan iti Biblia ti tumulong kadatayo nga ‘agtultuloy nga agbantay’?
• Ania ti oras ti panangukom, ket ania ti maidagdagadag nga aramidentayo sakbay nga aggibus dayta?
[Ladawan iti panid 23]
Inyarig ni Jesus ti iyaayna iti idadateng ti maysa a mannanakaw
[Ladawan iti panid 24]
Asidegen ti pannakadadael ti Babilonia a Dakkel
[Dagiti Ladawan iti panid 25]
Determinadotayo koma a sireregta a mangasaba