Siwawaya a Panangtungpal iti Nakristianuan a Dedikasion

“No sadino ti yan ti espiritu ni Jehova, adda wayawaya.”​—2 CORINTO 3:17.

1. Siasino ti nagdedikaran dagiti Saksi ni Jehova, ket apay nga agus-usarda kadagiti legal nga ahensia?

PATIEN dagiti Saksi ni Jehova nga agtalinaed iti agnanayon ti relihionda. Ngarud, inanamaenda ti agserbi iti Dios “buyogen ti espiritu ken kinapudno” iti agnanayon. (Juan 4:23, 24) Kas tattao nga addaan nawaya a nakem, sibubulos a nagdedikar dagitoy a Kristiano ken ni Jehova a Dios ken determinadoda nga agbiag a mayannurot iti dayta. Gapuna, agpannurayda iti Sao ti Dios ken iti nasantuan nga espirituna. Bayat a naimpusuan nga agbibiagda a mayannurot iti panagdedikarda kas Kristiano nga addaan inted-Dios a wayawaya, ipakpakita dagiti Saksi ti umno a panagraem iti akem dagiti “nangatngato nga agtuturay” ti gobierno ken siuumiso nga us-usarenda dagiti legal a pamay-an ken probision. (Roma 13:1; Santiago 1:25) Kas pagarigan, us-usaren dagiti Saksi ti Watch Tower Society kas legal nga instrumento​—maysa kadagiti adu iti nagduduma a pagilian​—tapno maitungpalda ti trabahoda a panangtulong kadagiti padada a tattao, nangruna iti naespirituan a pamay-an. Ngem dagiti Saksi dedikadoda iti Dios, saan nga iti aniaman a legal nga ahensia, ket agpaut iti agnanayon ti panagdedikarda ken Jehova.

2. Apay nga apresiaren unay dagiti Saksi ni Jehova ti Watch Tower Society ken dagiti umasping a legal nga ahensia?

² Kas ad-adipen a dedikado iti Dios, obligado dagiti Saksi ni Jehova a mangtungpal iti bilin ni Jesus a ‘mangaramid[da] kadagiti adalan a tattao iti isuamin a nasnasion, a bautisaran[da] ida iti nagan ti Ama ken ti Anak ken ti nasantuan nga espiritu, nga isuro[da] ida.’ (Mateo 28:19, 20) Agtultuloy daytoy a trabaho agingga iti panungpalan ti sistema dagiti bambanag, ta kinuna pay ni Jesus: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:3, 14) Kada tawen, dagiti pagimprentaan ti Watch Tower Society ken dagiti umasping a legal nga ahensia ipapaayanda dagiti Saksi ni Jehova iti minilion a Biblia, libro, broshur, ken magasin a mausar iti sangalubongan a trabahoda a panangasaba. Napateg ngarud dagitoy a legal nga ahensia iti panangtulong kadagiti dedikado nga adipen ti Dios a mangtungpal iti dedikasionda kenkuana.

3. Iti ania nga anag nga us-usaren idi dagiti Saksi ni Jehova ti termino a “ti Sosiedad?”

³ Mabalin nga ikalintegan ti maysa a tao a ti wagas a panangdakamat dagiti Saksi iti Watch Tower Society​—wenno masansan a basta “ti Sosiedad”​—ipamatmatna a saan la a legal nga instrumento ti pangibilanganda iti dayta. Saan aya nga ibilangda dayta kas ultimo nga autoridad kadagiti banag a mainaig iti panagdaydayaw? Ti libro a Dagiti Saksi ni Jehova​—Manangiwaragawag iti Pagarian ti Dios lawlawagenna daytoy a punto babaen ti panagkunana: “No Ti Pagwanawanan [Hunio 1, 1938] dakamatenna ‘Ti Sosiedad,’ saan laeng a dayta legal nga ahensia ti tuktukoyenna, no di ket ti gunglo dagiti napulotan a Kristiano a nangipasdek iti dayta legal nga ahensia ken mangus-usar iti dayta.”a Gapuna a dayta nga ebkas itakderanna ti “matalek ken naannad nga adipen.” (Mateo 24:45) Iti daytoy nga anag nga inusar dagiti Saksi ti termino a “ti Sosiedad.” Siempre, saan a mabalin a pagsinnukaten ti legal a korporasion ken ti “matalek ken masirib nga adipen.” Mapili dagiti direktor ti Watch Tower Society, idinto ta dagiti Saksi a mangbukel iti ‘matalek nga adipen’ ket pinulotan ti nasantuan nga espiritu ni Jehova.

4. (a) Kasano ti pannakisarita dagiti adu a Saksi tapno maliklikan ti di umiso a panangipapan? (b) Apay a natimbengtay koma no maipanggep kadagiti termino?

⁴ Tapno maliklikan ti di umiso a panangipapan, ikagkagumaan dagiti Saksi ni Jehova ti agbalin a naannad iti pannakisaritada. Imbes a kunada, “isursuro ti Sosiedad,” adu a Saksi ti mangar-aramat kadagiti ebkas a kas iti, “kuna ti Biblia” wenno, “ti maawatak, kastoy ti isursuro ti Biblia.” Iti kastoy a wagas, ipagpaganetgetda ti personal a desision ti tunggal Saksi a nangawat kadagiti pannursuro ti Biblia ken maliklikanda met ti di umiso a panangipapan a padikdiktaran dagiti Saksi iti relihioso a sekta. Siempre, di rumbeng a pagsusupiatan dagiti singasing maipanggep kadagiti termino. Total, napateg ti termino no la ket ta lapdanna ti di umiso a pannakaawat. Nasken ti Nakristianuan a kinatimbeng. Balakadannatayo ti Biblia a “di[tay] makiapa maipapan kadagiti sasao.” (2 Timoteo 2:14, 15) Dinakamat pay ti Kasuratan daytoy a prinsipio: “Malaksid no babaen ti pagsasao mangiyebkaskayo iti sasao a nalaka a maawatan, kasanonto a maammuan no ania ti maisasao?”​—1 Corinto 14:9.

Ti Espiritu ti Dios Kissayanna ti Panagkasapulan Kadagiti Pagannurotan

5. Ania ti kayat a sawen ti 1 Corinto 10:23?

⁵ “Amin a bambanag nainkalinteganda; ngem saan nga amin a bambanag makapasayaatda,” kinuna ni apostol Pablo. Kinunana pay: “Amin a bambanag nainkalinteganda; ngem saan nga amin a bambanag makapabilegda.” (1 Corinto 10:23) Nalawag a di kayat a sawen ni Pablo a nainkalintegan ti panangaramid kadagiti banag a sipapanayag a kondenaren ti Sao ti Dios. No idilig iti agarup 600 a linteg a naited iti nagkauna nga Israel, manmano dagiti nabatad a bilin a mangiwanwan iti panagbiag dagiti Kristiano. Gapuna, adu a banag ti maipabiang iti konsiensia ti tunggal maysa. Ti tao a nagdedikar ken Jehova tagiragsakenna ti wayawaya nga itden ti panagpaiwanwan iti espiritu ti Dios. Tangay impapusona ti kinapudno, ti maysa a Kristiano surotenna ti konsiensiana a sinanay ti Biblia ken agpannuray iti panangidalan ti nasantuan nga espiritu ti Dios. Tumulong daytoy iti dedikado a Kristiano a mangeddeng no ania ti “mangpabileg” ken “makapasayaat” kenkuana ken kadagiti sabsabali. Mabigbigna a dagiti desision nga aramidenna apektaranda ti personal a relasionna iti Dios a nagdedikaranna.

6. Kadagiti Nakristianuan a gimong, kasanotay a maipakita nga impapusotayo ti kinapudno?

⁶ Maipakita ti maysa a Saksi nga impapusona ti kinapudno babaen ti panagkomentona kadagiti Nakristianuan a gimong. Iti damo, mabalin a basaenna ti naikuna iti publikasion a maadal. Nupay kasta, inton agangay rumang-ay agingga a mayebkasnan ti pannursuro ti Biblia iti bukodna a sasao. No kasta, ipampaneknekna a parparang-ayenna ti abilidadna nga agpanunot, a dina ul-uliten laeng ti ibagbaga dagiti dadduma. Ti panangbukel kadagiti kapanunotan iti bukodna a sasao ken ti naimpusuan a panangyebkas iti umiso a sasao ti kinapudno ket pagragsakanna ken dayta ti mangipakita nga isu ket kombinsido iti panunotna.​—Eclesiastes 12:10; idiligyo ti Roma 14:5b.

7. Ania ti sibubulos nga inkeddeng dagiti adipen ni Jehova?

⁷ Ayat iti Dios ken kadagiti padada a tao ti mangtigtignay kadagiti Saksi ni Jehova. (Mateo 22:36-40) Pudno, pinagkaykaysa ida ti Nakristianuan nga ayat kas sangalubongan a timpuyog dagiti agkakabsat. (Colosas 3:14; 1 Pedro 5:9) Ngem tangay adda wayawayada nga agpili, personal a nagdesision ti tunggal maysa a mangipakaammo iti naimbag a damag ti Pagarian ti Dios, agtalinaed a neutral iti politika, umadayo iti dara, mangidian iti dadduma a kita ti paglinglingayan, ken agbiag a mayannurot kadagiti pagalagadan ti Biblia. Saan a naipilit kadakuada dagitoy a desision. Dagitoy a desision ket paset ti wagas ti panagbiag a sibubulos a pinili dagiti manamnama nga agbalin a Saksi sakbay a nagdedikarda kas Kristiano.

Manungsungbat iti Bagi a Manarawidwid?

8. Ania a saludsod ti nasken a malawlawagan?

⁸ Nalawag nga ipakita ti Biblia a dagiti pudno a Kristiano saanda a mapilpilit nga agserbi iti Dios. Kunana: “Ni Jehova isu ti Espiritu; ket no sadino ti yan ti espiritu ni Jehova, adda wayawaya.” (2 Corinto 3:17) Ngem kasano a maitunos daytoy iti ideya maipapan iti “matalek ken masirib nga adipen” agraman ti Bagi a Manarawidwidna?​—Mateo 24:45-47.

9, 10. (a) Kasano nga agaplikar iti kongregasion Kristiano ti prinsipio ti kinaulo? (b) Mainaig iti panangsurot iti prinsipio ti kinaulo, ania ti kasapulan a maaramid iti uneg ti kongregasion Kristiano idi umuna a siglo?

⁹ Tapno masungbatan daytoy a saludsod, masapul a laglagipentayo ti Nainkasuratan a prinsipio ti kinaulo. (1 Corinto 11:3) Iti Efeso 5:21-24, naipabigbig ni Kristo kas “ulo ti kongregasion,” a ‘pagpasakupanna.’ Iti pannakaawat dagiti Saksi ni Jehova, ti matalek ken masirib nga adipen ket buklen dagiti naespirituan a kakabsat ni Jesus. (Hebreo 2:10-13) Nadutokan daytoy klase matalek nga adipen a mangipaay iti naespirituan a “taraon iti umiso a tiempo” iti ili ti Dios. Iti daytoy panawen ti panungpalan, dinutokan ni Kristo daytoy nga adipen “nga agaywan kadagiti amin a sanikuana.” No kasta, amin dagiti agkunkuna a Kristiano rebbeng a raemenda ti akemna.

¹⁰ Ti panggep ti kinaulo ket tapno mataginayon ti panagkaykaysa ken masigurado nga “isuamin a bambanag maaramid koma a sitatakneng ken addaan urnos.” (1 Corinto 14:40) Tapno maaramid daytoy idi umuna a siglo, napili ti sumagmamano a napulotan a Kristiano iti klase matalek ken masirib nga adipen a mangirepresentar itoy nga intero a grupo. Kas paneknekan dagiti simmaruno a pasamak, inanamongan ken binendisionan ni Jehova ti panangaywan daytoy bagi a manarawidwid idi umuna a siglo. Dagiti Kristiano idi umuna a siglo siraragsak nga inawatda dayta nga urnos. Wen, aktual nga inawatda ken siyayamanda gapu iti nasayaat nga imbungana.​—Aramid 15:1-32.

11. Kasano koma a matmatan ti Bagi a Manarawidwid iti agdama a panawen?

¹¹ Napateg pay laeng ti kasta nga urnos. Iti agdama, ti Bagi a Manarawidwid dagiti Saksi ni Jehova ket buklen ti sangapulo a napulotan a Kristiano, a bin-ig nga adun a dekada nga agserserbida kas Kristiano. Ipapaayanda dagiti Saksi ni Jehova iti naespirituan a pannarabay, kas ti inaramid ti bagi a manarawidwid idi umuna a siglo. (Aramid 16:4) Kas kadagiti nagkauna a Kristiano, siraragsak a mangnamnama dagiti Saksi kadagiti nataengan a kakabsat iti Bagi a Manarawidwid maipaay iti naibatay-Biblia a panangiwanwan ken pannarabay kadagiti banag a mainaig iti panagdaydayaw. Nupay dagiti kameng ti Bagi a Manarawidwid ket ad-adipen ni Jehova ken ni Kristo, kas kadagiti padada a Kristiano, bilinennatayo ti Biblia: “Agtulnogkayo koma kadagidiay mangidadaulo kadakayo ket agpasakopkayo, ta agtultuloy a bambantayanda dagiti kararuayo a kasla isudanto dagidiay mangaramid iti pannakikuenta; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy makadangranto kadakayo.”​—Hebreo 13:17.

12. Siasino ti masapul a panungsungbatan ti tunggal Kristiano?

¹² Ti kadi panangaywan nga impabiang ti Kasuratan iti Bagi a Manarawidwid kaipapananna a tunggal maysa kadagiti Saksi ni Jehova masapul a manungsungbat iti dayta kadagiti aramidna? Saan segun iti sasao ni Pablo kadagiti Kristiano idiay Roma: “Apay nga ukomem ni kabsatmo? Wenno apay nga umsiem met ni kabsatmo? Ta agtakdertayto amin iti saklang ti pagtugawan a pangukoman ti Dios . . . Tunggal maysa kadatayo idatagnanto iti Dios ti maysa a pannakikuenta a maipaay iti bagina.”​—Roma 14:10-12.

13. Apay nga ireport dagiti Saksi ni Jehova ti magapuananda iti trabahoda a panangasaba?

¹³ Ngem, di met aya maekspektar nga ireport ti tunggal Saksi ti magapuananda iti trabahoda a panangasaba? Wen, ngem ti panggep daytoy ket sibabatad a nailawlawag iti maysa a libro dagiti Saksi, a kunana: “Dagiti nagkauna a pasurot ni Jesu-Kristo interesadoda a makadamag iti irarang-ay ti trabaho a panangasaba. (Marcos 6:30) Bayat a rumangrang-ay ti trabaho, maur-urnong dagiti estadistikal a report agraman ti pannakaisalaysay dagiti naisangsangayan a kapadasan dagidiay makiramraman iti panangikaskasaba iti naimbag a damag. . . . (Aramid 2:5-11, 41, 47; 6:7; 1:15; 4:4) . . . Anian a makaparegta kadagidi a matalek a Kristiano a trabahador ti pannakadamagda iti magapgapuanan! . . . Umasping iti dayta, ti moderno-aldaw nga organisasion ni Jehova pagreggetanna nga idulin ti umiso a rekord ti maar-aramidan a trabaho kas kaitungpalan ti Mateo 24:14.”

14, 15. (a) Kasano nga agaplikar iti Bagi a Manarawidwid ti 2 Corinto 1:24? (b) Ania ti nasken a pangibatayan ti tunggal Kristiano iti panangaramidna kadagiti personal a desision, kas panangbigbig iti ania a kinapudno?

¹⁴ Ti Bagi a Manarawidwid ket maysa a naayat a probision ken pagulidanan iti pammati a maikari a tuladen. (Filipos 3:17; Hebreo 13:7) Babaen ti panangsurot ken panangtuladda ken Kristo kas pagwadan, maikunada ti sasao ni Pablo: “Saan a gapu ta dakami dagiti agturay iti pammatiyo, no di ket katrabahuandakami a maipaay iti rag-oyo, ta sitatakderkayo babaen ti pammatiyo.” (2 Corinto 1:24) Babaen ti panangpaliiwda iti kasasaad, ipakpakita ti Bagi a Manarawidwid ti pagimbagan ti panangipangag kadagiti balakad ti Biblia, mangipapaay kadagiti singasing no kasano nga iyaplikar dagiti linteg ken prinsipio ti Biblia, mamakpakdaar maipapan kadagiti nalmeng a peggad, ken ipapaayanna dagiti “katrabahuan” iti kasapulan a pammaregta. No kasta, tungtungpalenna ti rebbengenna a mangaywan kadagiti Kristiano, tultulonganna ida a mangtaginayon iti rag-oda, ken pabpabilgenna ti pammatida tapno makapagtakderda a natibker.​—1 Corinto 4:1, 2; Tito 1:7-9.

¹⁵ No agdesision ti maysa a Saksi maibatay iti balakad ti Biblia nga impaay ti Bagi a Manarawidwid, aramidenna dayta iti kabukbukodanna a nakem agsipud ta iti panagadalna a mismo iti Biblia, kombinsido a daytoy ti umno nga aramiden. Ti Sao ti Dios a mismo ti mangimpluensia iti tunggal Saksi a mangyaplikar iti natimbeng a Nainkasuratan a balakad nga ipapaay ti Bagi a Manarawidwid, a naan-anay a bigbigenna a dagiti desisionna apektaranda ti personal a relasionna iti Dios a nagdedikaranna.​—1 Tesalonica 2:13.

Estudiante ken Soldado

16. Nupay dagiti desision maipanggep iti kondukta ket personal a banag, apay a mailaksid dagiti dadduma?

¹⁶ Ngem no dagiti desision maipanggep iti kondukta ket personal a banag, apay a mailaksid ti dadduma kadagiti Saksi ni Jehova? Awan ti di nainkalintegan a makaikeddeng a rebbeng a mailaksid ti asinoman a nakabasol. Imbes ketdi, Nainkasuratan a maipaannurot laeng daytoy a tignay no ti maysa a kameng ti kongregasion ket awanan panagbabawi nga agar-aramid kadagiti nadagsen a basol, kas kadagidiay naibinsabinsa iti maika-5 a kapitulo ti Umuna a Corinto. No kasta, nupay mailaksid ti maysa a Kristiano a makiabig, mapasamak laeng daytoy no paiden ti indibidual ti naespirituan a tulong dagiti naayat a pastor. Saan laeng a dagiti Saksi ni Jehova ti mangar-aramid iti daytoy a Nakristianuan a kaugalian. Kuna ti The Encyclopedia of Religion: “Adda kalintegan ti aniaman a kagimongan a masalakniban manipud kadagiti agsalungasing a miembro a mamagpeggad iti pagimbagan ti amin. Iti benneg ti relihion, masansan a maipatungpal daytoy a kalintegan iti pammati a ti pannusa [a panangilaksid] apektaranna ti takder ti maysa iti sanguanan ti Dios.”

17, 18. Kasano a mayilustrar ti kinaumiso ti panangilaksid?

¹⁷ Dagiti Saksi ni Jehova ket estudiante ti Biblia. (Josue 1:8; Salmo 1:2; Aramid 17:11) Ti programa a panangisuro iti Biblia nga inyurnos ti Bagi a Manarawidwid ket mayarig iti kurikulum ti eskuelaan a sinangal ti board of education. Nupay saan a ti board a mismo ti pagtaudan ti maisuro, dayta ti mangipasdek iti kurikulum, mangikeddeng iti wagas ti panangisuro, ken mangiruar kadagiti kasapulan a direktiba. No sipapanayag nga agkitakit ti asinoman a mangtungpal kadagiti pagannurotan ti institusion, riribukenna dagiti padana nga estudiante, wenno ibabainna ti eskuelaan, mabalin a mailaksid. Adda karbengan dagiti autoridad ti eskuelaan nga agtignay a maipaay iti pagimbagan dagiti amin nga estudiante.

¹⁸ Saan laeng nga estudiante dagiti Saksi ni Jehova no di ket soldado ida ni Jesu-Kristo, a nasursuruan a ‘makirupak iti nasayaat a dangadang iti pammati.’ (1 Timoteo 6:12; 2 Timoteo 2:3) Siempre, mabalin nga agtungpal iti di pananganamong ti Dios ti agtultuloy a kababalin a di maiparbeng iti maysa a Kristiano a soldado. Tangay adda wayawayana nga agpili, ti maysa a Kristiano a soldado mabalinna nga aramiden ti kayatna, ngem masapul nga apitenna ti bunga ti desisionna. Inkalintegan ni Pablo: “Awan ti tao nga agserserbi kas maysa a soldado a makiraman kadagiti panagkomersio a negosio iti biag, tapno magun-odanna ti anamong daydiay nangipasalista kenkuana kas maysa a soldado. Mainayon pay, no ti asinoman makidangadang uray pay kadagiti ay-ayam, isu di makoronaan malaksid no nakidangadang sigun kadagiti pagannurotan.” (2 Timoteo 2:4, 5) Dagiti nataengan a Kristiano, agraman dagidiay kameng ti Bagi a Manarawidwid, naan-anay nga agserserbida iti Panguluenda, ni Jesu-Kristo, a tungtungpalenda dagiti “pagannurotan” tapno magun-odda ti biag nga agnanayon.​—Juan 17:3; Apocalipsis 2:10.

19. Iti panangusigtayo iti Nakristianuan a dedikasion, ania ti masiguradotayo?

¹⁹ Saan kadi a nalawag nga ipakita ti kinapudno a dagiti Saksi ni Jehova ket ad-adipen ti Dios, saan nga ad-adipen dagiti tattao? Kas dedikado a Kristiano a mangtagtagiragsak iti wayawaya a pakaigapuan ti panangwayawaya kadakuada ni Kristo, bay-anda a ti espiritu ti Dios ken ti Saona ti mangiwanwan iti panagbiagda bayat nga agserserbida a sangsangkamaysa kadagiti kakabsatda iti kongregasion ti Dios. (Salmo 133:1) Dagiti pammaneknek iti daytoy ikkatenna met koma ti aniaman a panagduadua iti pagtaudan ti pigsada. Kas iti salmista, maikantada: “Ni Jehova isu ti bileg ken kalasagko, ti pusok nagtalek kenkuana, ket naarayatak: anansata toy pusok agragsak unay; ket iti kantak idaydayawkonto.”​—Salmo 28:7.

[Footnote]

Kasanoyo a Sungbatan?

◻ Kasano a makatulong kadagiti Saksi ni Jehova ti Watch Tower Society ken dagiti umasping a legal nga ahensia?

◻ Kasano a magunggonaan dagiti Kristiano iti akem ti Bagi a Manarawidwid dagiti Saksi ni Jehova?

◻ Apay nga ireport dagiti adipen ni Jehova ti trabahoda a panangasaba?

◻ Kadagiti ania a kasasaad a maitutop ti panangilaksid iti maysa a dedikado a Kristiano?

[Ladawan iti panid 19]

Ti bagi a manarawidwid idi umuna a siglo sinalimetmetanna ti panagkaykaysa iti doktrina

[Ladawan iti panid 23]

Iti intero a lubong, sagsagrapen dagiti Saksi ni Jehova ti wayawaya a pakaigapuan ti panangwayawaya ni Kristo kadakuada