Maikari a Maiturong Kadagiti Ubbog ti Dandanum ti Biag
“Ti Kordero . . . ipastorannanto ida, ket idalannanto ida kadagiti ubbog ti dandanum ti biag.”—APOC. 7:17.
1. Kasano a tinukoy ti Sao ti Dios dagiti napulotan a Kristiano, ken ania nga annongen ti intalek ni Jesus kadakuada?
TI Biblia tinukoyna dagiti napulotan a Kristiano a mangay-aywan kadagiti sanikua ni Kristo ditoy daga kas “ti matalek ken masirib nga adipen.” Idi sinukimat ni Kristo dayta nga “adipen” idi 1918, nakitana a dagidiay napulotan ditoy daga ti simamatalek a mangipapaay iti naespirituan a ‘taraon iti umiso a tiempo.’ Gapuna, ti Apoda a ni Jesus naragsakan a nangitalek kadakuada iti “amin a sanikuana.” (Basaenyo ti Mateo 24:45-47.) Iti kasta a pamay-an a dagiti napulotan pagserserbianda ti dadduma pay nga agdaydayaw ken Jehova ditoy daga sakbay nga awatenda ti nailangitan a tawidda.
2. Ania ti ramanen dagiti sanikua ni Jesus?
2 Adda karbengan ti apo a mangusar iti pamay-an a kayatna a pangusaran kadagiti amin a sanikuana. Ti sanikua ni Jesu-Kristo, ti Ari nga introno ni Jehova, ramanenna ti amin nga interes ti Pagarian ditoy daga. Karaman iti dayta ti “dakkel a bunggoy” a nasirmata ni apostol Juan. Kastoy ti panangiladawan ni Juan iti dakkel a bunggoy: “Adtoy! maysa a dakkel a bunggoy, nga awan ti tao a nakabael a mangbilang, manipud kadagiti amin a nasion ken kadagiti tribu ken kadagiti ili ken kadagiti pagsasao, a sitatakderda iti sanguanan ti trono ken iti sanguanan ti Kordero, a sikakawesda kadagiti puraw a pagan-anay; ket adda sangsanga ti palma kadagiti imada.”—Apoc. 7:9.
3, 4. Ania ti nagsayaat a pribilehio ti dakkel a bunggoy?
3 Ti dakkel a bunggoy ket paset ti tinukoy ni Jesus a “sabsabali a karnero.” (Juan 10:16) Ti namnamada ket agbiag nga agnanayon iti paraiso a daga. Makapagtalekda nga iturong ida ni Jesus “kadagiti ubbog ti dandanum ti biag” ken ti “Dios punasennanto ti amin a lua kadagiti matada.” Gapuna, “linabaanda dagiti pagan-anayda ket pinapudawda ida iti dara ti Kordero.” (Apoc. 7:14, 17) Iti imatang ti Dios, nakakawesda iti ‘puraw a pagan-anay’ gapu ta pinaneknekanda ti pammatida iti daton ni Jesus. Naibilangda ngarud a nalinteg a gagayyem ti Dios, kas ken Abraham.
4 Yantangay ibilang ti Dios a nalinteg ti umad-adu a dakkel a bunggoy ti sabsabali a karnero, manamnamada a malasatanda ti pannakadadael daytoy a sistema ti bambanag inton dakkel a rigat. (Sant. 2:23-26) Mabalinda ti umadani ken Jehova, ken kas maysa a grupo, addaanda iti nagsayaat a namnama a makalasat iti Armagedon. (Sant. 4:8; Apoc. 7:15) Imbes nga agwaywayas, situtulokda nga agpapaiwanwan iti nailangitan nga Ari ken kadagiti napulotan a kakabsatna ditoy daga.
5. Kasano a ti dakkel a bunggoy tultulonganda dagiti napulotan a kakabsat ni Kristo?
5 Agtultuloy a maipaspasango dagiti napulotan a Kristiano iti nakaro nga ibubusor ti lubong ni Satanas. Kaskasdi, manamnamada ti tulong ti kaduada a dakkel a bunggoy. Nupay bassit itan ti bilang dagiti napulotan a Kristiano, tinawen nga umad-adu iti ginasut a ribu ti bilang ti dakkel a bunggoy. Dagiti napulotan dida personal a maaywanan ti tunggal maysa kadagiti agarup 100,000 a kongregasion Kristiano iti intero a lubong. Gapuna, ti maysa a pamay-an a ti sabsabali a karnero matultulonganda dagiti napulotan a Kristiano ket babaen kadagiti kualipikado a lallaki a kameng ti dakkel a bunggoy nga agserserbi kas papanglakayen iti kongregasion. Tumulongda a mangasikaso iti minilion a Kristiano a naitalek iti “matalek ken masirib nga adipen.”
6. Kasano a naipadto ti panangtulong ti sabsabali a karnero kadagiti napulotan a Kristiano?
6 Impadto ni propeta Isaias dayta a sidadaan a panangtulong ti sabsabali a karnero kadagiti napulotan a Kristiano. Insuratna: “Daytoy ti kinuna ni Jehova: ‘Dagiti di tinangdanan a trabahador ti Egipto ken dagiti komersiante ti Etiopia ken dagiti Sabeo, natatayag a lallaki, umaydanto kenka a mismo, ket agbalindanto a kukuam. Iti likudam magnadanto.’” (Isa. 45:14) Iti simboliko a pamay-an, dagiti Kristiano ita nga addaan iti naindagaan a namnama magmagnada iti likudan ti napulotan a klase adipen ken ti Bagi a Manarawidwidna, a sumursurotda iti panangidauloda. Kas ‘di natangdanan a trabahador,’ situtulok ken naimpusuan nga us-usaren ti sabsabali a karnero ti pigsa ken sanikuada a mangsuportar iti sangalubongan a trabaho a panangasaba nga impaannong ni Kristo kadagiti napulotan a pasurotna ditoy daga.—Ara. 1:8; Apoc. 12:17.
7. Iti ania a masansanay ita ti dakkel a bunggoy?
7 Bayat a tultulonganda dagiti napulotan a kakabsatda, masansanay ita dagiti kameng ti dakkel a bunggoy kas pundasion ti baro a kagimongan ti sangatauan a mabuangay kalpasan ti Armagedon. Masapul a nalagda ken natalged daytoy a pundasion, ken nasken a sidadaan ken makabael dagiti miembrona a mangitungpal iti bilin ti Apo. Gundaway ti tunggal Kristiano nga ipakita ti tarigagayda nga agpausar iti Ari a ni Kristo Jesus. Babaen ti panangpaneknekda ita iti pammati ken kinasungdoda, ipakpakitada a situtulokdanto nga agtulnog kadagiti bilin ti Ari inton baro a lubong.
Paneknekan ti Dakkel a Bunggoy ti Pammatida
8, 9. Kasano a ti dakkel a bunggoy pampaneknekanda ti pammatida?
8 Ti sabsabali a karnero a kakadua dagiti napulotan a Kristiano pampaneknekanda ti pammatida iti nadumaduma a pamay-an. Umuna, tultulonganda dagiti napulotan a mangiwaragawag iti naimbag a damag ti Pagarian ti Dios. (Mat. 24:14; 28:19, 20) Maikadua, situtulokda nga agpasakup iti panangiwanwan ti Bagi a Manarawidwid.—Heb. 13:17; basaenyo ti Zacarias 8:23.
9 Maikatlo, supsuportaran ti dakkel a bunggoy dagiti napulotan a kakabsatda babaen ti panagbiagda a maitunos kadagiti nalinteg a pagalagadan ni Jehova. Ikagkagumaanda a patanoren ti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.” (Gal. 5:22, 23) Saan a dagitoy a galad ti agraraira ita no di ket “dagiti aramid ti lasag.” Kaskasdi, determinado dagiti kameng ti dakkel a bunggoy a mangliklik iti “pannakiabig, kinarugit, nalulok a kababalin, idolatria, panangannurot iti espiritismo, guranggura, ringgor, imon, dagiti irarasuk ti unget, rinnupir, pannakabingbingay, dagiti sekta, ap-apal, panagbarbartek, naariwawa a panagragragsak, ken bambanag nga umasping kadagitoy.”—Gal. 5:19-21.
10. Ania ti determinado nga aramiden ti dakkel a bunggoy?
10 Gapu ta imperpektotayo, mabalin a narigat a patanoren dagiti bunga ti espiritu, liklikan dagiti aramid ti lasag, ken sarangten ti impluensia ti lubong ni Satanas. Dumteng met ti pannakaupay kas resulta dagiti pagkapuyan, pannakapaay, wenno pisikal a limitasiontayo. Nupay kasta, ditay ipalubos a dagita ti mangpakapuy iti pammatitayo ken mangpabaaw iti ayattayo ken Jehova. Ammotayo a tungpalen ni Jehova ti karina nga ispalenna ti dakkel a bunggoy kabayatan ti dakkel a rigat.
11. Ania dagiti taktika nga inusar ni Satanas a mangpakapuy iti pammati dagiti Kristiano?
11 Kanayon koma ngarud a sisasalukagtayo gapu ta ammotayo a ti Diablo ti kangrunaan a kabusortayo, ken saan a nalaka a sumuko ni Satanas. (Basaenyo ti 1 Pedro 5:8.) Inusarna dagiti apostata ken dadduma pay tapno kombinsirennatayo a palso dagiti patpatientayo. Ngem kaaduanna a napaay dayta a taktikana. Adda met dagiti gundaway a gimminad ti panangasaba gapu iti panangidadanes, ngem masansan a dayta ketdi ti nangpabileg iti pammati dagidiay naidadanes. Gapuna, us-usaren ita ni Satanas ti pannakaupay, maysa a taktika a patienna a nalaklaka a mangpakapuy iti pammatitayo. Napakdaaran dagiti Kristiano idi umuna a siglo maipapan iti dayta a peggad: “Utobenyo a sisisinged [ni Kristo,] daydiay nakapagibtur iti kasta a mangbusor a panagsao dagiti managbasol maibusor kadagiti bukodda a pagimbagan.” Apay? “Tapno saankay koma a mabannog ken agkapuy kadagiti kararuayo.”—Heb. 12:3.
12. Kasano a ti balakad ti Biblia pabilgenna dagidiay maup-upay?
12 Adda kadi gundaway a kasla kayatmon ti sumuko? Mariknam kadi no dadduma a napaayka? No kasta, dimo ipalubos a gundawayan ni Satanas dagita a rikna a manglapped iti panagserbim ken Jehova. Ti naan-anay a panagsukimat iti Biblia, napasnek a panagkararag, ken regular a pannakigimong ken pannakilangen kadagiti kapammatian ti mangpabileg kenka tapno saan nga ‘agkapuy ti kararuam.’ Inkari ni Jehova a pasublienna ti pigsa dagidiay agserserbi kenkuana, ket mapagtalkan ti karina. (Basaenyo ti Isaias 40:30, 31.) Ipangpangrunayo iti biagyo dagiti Nakristianuan nga aktibidad. Liklikanyo dagiti pakasingaan a mangibus iti tiempo. Busbosenyo ketdi ti panawenyo a tumulong kadagiti sabsabali. Iti kasta, masursuroyo ti agibtur uray adda pakaupayan.—Gal. 6:1, 2.
Kalpasan ti Pannakaispal
13. Ania ti agur-uray nga aramiden dagidiay makalasat iti Armagedon?
13 Kalpasan ti Armagedon, riniwriw a mapagungar a nakillo a tattao ti masapul a masursuruan kadagiti pagalagadan ni Jehova. (Ara. 24:15) Masapul a maadalda ti pangsubbot a daton ni Jesus ken rumbeng a maisuro kadakuada no kasanoda a maipakita ti pammatida iti daton tapno magunggonaanda iti dayta. Masapul nga ilaksidda dagiti palso a sursuro a sigud a patpatienda ken balbaliwanda ti dati a panagbiagda. Nasken a sursuruenda nga ikawes ti baro a personalidad a pakabigbigan ti pudno a Kristiano. (Efe. 4:22-24; Col. 3:9, 10) Adu ti aramidento dagidiay makalasat a sabsabali a karnero. Anian a makaparagsakto ti agserbi ken Jehova yantangay awanton dagiti impluensia ken pakasingaan nga agraraira iti agdama a dakes a lubong!
14, 15. Deskribirenyo no kasano nga agrinnanud iti pannakaammo dagidiay makalasat iti dakkel a rigat ken dagiti mapagungar a nalinteg.
14 Iti dayta a tiempo, adunto met ti masursuro dagiti matalek nga adipen ni Jehova a natay sakbay ti ministerio ni Jesus ditoy daga. Maammuandanto no asino daydiay naikari a Mesias, a sinegseggaanda ngem saanda a nakita. Uray idi sibibiagda pay, impakitadan a sidadaanda nga agpaisuro ken Jehova. Anian a ragsak ken pribilehiotayo a tumulong kadakuada. Kas pagarigan, nakaay-ayatto nga ilawlawag ken Daniel no ania ti kaitungpalan dagiti padto nga insuratna ngem dina naawatan!—Dan. 12:8, 9.
15 Nupay adu ti mabalintayo nga isuro kadagiti mapagungar, adu met ti maammuantayo kadakuada. Mabalinda nga isalaysay kadatayo dagiti saan a detalyado a pasamak a dinakamat ti Biblia. Panunotenyo no kasano karagsak a maammuan dagiti detalye maipapan ken Jesus manipud iti kasinsinna a ni Juan a Mammautisar! Awan duadua nga ad-adda a maparayray ti pannakaawattayo iti Sao ti Dios babaen kadagiti maadaltayo kadagita a matalek a saksi. Dagiti matalek nga adipen ni Jehova a natay, agraman dagiti kameng ti dakkel a bunggoy a matay bayat iti tiempo ti panungpalan, umawatdanto iti “nasaysayaat a panagungar.” Nangrugida a nagserbi ken Jehova iti lubong nga iturturayan ni Satanas. Anian a rag-oda a mangitultuloy iti panagserbida iti sidong ti nasaysayaat a kasasaad iti baro a lubong!—Heb. 11:35; 1 Juan 5:19.
16. Sigun iti padto, ania dagiti mapasamak inton Aldaw ti Panangukom?
16 Addanto tiempo a maluktan dagiti lukot bayat ti Aldaw ti Panangukom. Ti Biblia ken dagitoy a lukot ti pakaibatayanto ti pannakaukom dagiti makalasat no maikarida met laeng nga umawat iti biag nga agnanayon. (Basaenyo ti Apocalipsis 20:12, 13.) Iti ngudo ti Aldaw ti Panangukom, addanto gundaway ti tunggal maysa a mangipakita no ania ti takderna mainaig iti isyu ti sapasap a kinasoberano. Itandudona ngata ti Pagarian ken agpaiwanwan iti Kordero nga agturong “kadagiti ubbog ti dandanum ti biag”? Wenno pilienna ti saan nga agpasakup iti Pagarian ti Dios? (Apoc. 7:17; Isa. 65:20) Iti dayta a tiempo, amin a tattao ti addaan iti gundaway a mangaramid iti bukodda a desision a di naimpluensiaan iti natawid a basol wenno dakes a lubong. Awanto ti asinoman a mabalin a mangkuestion iti kinaumiso ti maudi a panangukom ni Jehova. Dagiti laeng nadangkes ti naan-anayto a madadael.—Apoc. 20:14, 15.
17, 18. Ania ti siraragsak a segseggaan dagiti napulotan a Kristiano ken sabsabali a karnero bayat ti Aldaw ti Panangukom?
17 Gapu ta maikarida nga umawat iti Pagarian, dagiti napulotan a Kristiano segseggaanda ti panagturayda bayat ti Aldaw ti Panangukom. Anian a naindaklan a pribilehioda! Dayta a namnamada ti mangtigtignay kadakuada a mangannurot iti balakad ni Pedro kadagiti kakabsatda idi umuna a siglo: “Aramidenyo ti amin a kabaelanyo tapno pagbalinen a sigurado maipaay iti bagbagiyo ti pannakaayab ken pannakapiliyo; ta no itultuloyyo nga aramiden dagitoy a banag saankayto a pulos mapaay. Iti kinapudnona, no kasta sibabaknang a pannakaipaayto kadakayo ti iseserrek iti agnanayon a pagarian ti Apo ken Manangisalakantayo a ni Jesu-Kristo.”—2 Ped. 1:10, 11.
18 Makipagragsak ti sabsabali a karnero kadagiti napulotan a kakabsatda. Determinadoda a tumulong kadakuada. Kas gagayyem ti Dios ita, matignayda a mangaramid iti amin a kabaelanda nga agserbi iti Dios. Bayat ti Aldaw ti Panangukom, maragsakanda a naimpusuan nga agpasakup kadagiti urnos ti Dios bayat nga iturturong ida ni Jesus kadagiti ubbog ti dandanum ti biag. Kamaudiananna, maikaridan a maibilang kas naindagaan nga adipen ni Jehova iti agnanayon!—Roma 8:20, 21; Apoc. 21:1-7.
Malagipyo Kadi?
• Ania ti ramanen dagiti sanikua ni Jesus?
• Kasano a tultulongan ti dakkel a bunggoy dagiti napulotan a kakabsatda?
• Ania dagiti pribilehio ken namnama ti dakkel a bunggoy?
• Ania ti segseggaanyo inton Aldaw ti Panangukom?
[Ladawan iti panid 25]
Ti dakkel a bunggoy linabaanda ti pagan-anayda ken pinapudawda dayta babaen ti dara ti Kordero
[Ladawan iti panid 27]
Ania ti kayatyonto a maammuan kadagiti mapagungar a matalek a tattao?