• “Saanyo nga Ammo ti Aldaw Wenno Uray ti Oras”
    Ti Pagwanawanan—2012 | Septiembre 15

    • 1-3. (a) Aniada a situasion ti mangyilustrar iti punto ti dua a pangngarig ni Jesus? (b) Ania dagiti saludsod a sungbatantayo?

      IPAPANMO a kiniddaw kenka ti maysa a natan-ok nga opisial nga imanehuam para iti importante nga appointment-na. Ngem sumagmamano laeng a minuto sakbay ti oras a nagtulaganyo, nakitam a kurang gayam ti gasolina ti luganmo isu a nagdardaraska a napan nagpagasolina. Kapampanawmo idi sumangpet ti opisial. Idi saannaka a mabirokan, saanen a nakauray ket nagpaitulod iti sabali. Nakasublika met la a dagus ngem nadlawmo a nakapanawen ti opisial. Ania ngata ti mariknam?

      2 Ita, ipapanmo a sika ti opisial ket pimmilika iti tallo a lallaki tapno adda napateg nga ipaaramidmo kadakuada. Inlawlawagmo ti aramidenda, ket immanamongda amin. Ngem idi nagsublika, naammuam a dua laeng kadakuada ti nangasikaso iti impaaramidmo. Ti maysa a saan a nagtungpal ket nagpambar ken dina pay ketdi pinadas nga aramiden ti imbagam. Ania ngata ti mariknam?

      3 Nagusar met ni Jesus iti umasping a situasion kadagiti pangngarigna maipapan kadagiti birhen ken kadagiti talento. Inaramatna dagitoy a pangngarig tapno ipakitana ti makagapu no apay nga adda dagiti matalek ken masirib a napulotan a Kristiano iti tiempo ti panungpalan ken adda met dagiti saan nga agmatalek.a (Mat. 25:1-30) Impaganetgetna daytoy a punto idi kinunana: “Agtultuloykayo nga agbantay, ngarud, agsipud ta saanyo nga ammo ti aldaw wenno uray ti oras”​—kayatna a sawen, inton iyeg ni Jesus ti panangukom ti Dios iti lubong ni Satanas. (Mat. 25:13) Agaplikar met kadatayo dayta a balakad. Kasano a magunggonaantayo iti panagtultuloytayo nga agbantay, kas imparegta ni Jesus? Siasino dagiti nangpaneknek a nakasaganada a maisalakan? Ken ania ti aramidentayo itan tapno makapagtultuloytayo nga agbantay?