Aniat’ Mangtignay Kadakayo nga Agserbi iti Dios?

“Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo ken iti amin a pigsam.”​—MARCOS 12:30.

1, 2. Ania a makaparagsak a bambanag ti maitungtungpal maipapan iti trabaho a panangasaba?

SAAN a maikeddeng ti pudno a pateg ti maysa a kotse babaen laeng iti langana. Ti pintura mabalin a papintasenna ti ruarna, ken ti napintas a diseniona mabalin nga awisenna ti manamnama a gumatang; ngem ti napatpateg isu ti bambanag a saan a nalaka a makita​—ti makina a mangpaandar iti lugan, agraman ti isuamin a dadduma nga alikamen a mangtengtengngel iti dayta.

² Umasping dayta iti panagserbi ti Kristiano iti Dios. Aglaplapusanan ti nadiosan nga ar-aramid dagiti Saksi ni Jehova. Tinawen, nasurok a sangabilion nga oras ti mabusbos iti panangikasaba ti naimbag a damag ti Pagarian ti Dios. Kasta met, minilion a panagadal ti Biblia ti maidadaulo, ket ginasut a ribu dagiti mababautisaran. No maysakayo a manangiwaragawag ti naimbag a damag, addaankayo iti paset​—uray pay no kasla nagbassitan​—kadagitoy a makaparagsak nga estadistika. Ket manginanamakayo a “saan a nakillo ti Dios tapno lipatenna ti aramidyo ken ti ayat nga impakitayo iti naganna.”​—Hebreo 6:10.

3. Ania malaksid kadagiti aramid ti rumbeng a pakaseknan unay dagiti Kristiano, ken apay?

³ Nupay kasta, ti pudno a pateg ti panagserbitayo​—nagupgop man wenno indibidual​—ket saan a marukod laeng kadagiti numero. Kas naibaga idi ken Samuel, “ti tao kitaenna ti akinruar a panagparang; ngem ni Jehova kitaenna ti puso.” (1 Samuel 16:7) Wen, ti napateg iti Dios isu ti adda iti unegtayo. Pudno a napateg dagiti aramid. Dagiti aramid ti nadiosan a debosion arkosanda ti sursuro ni Jehova ken awisenda dagiti manamnama nga adalan. (Mateo 5:14-16; Tito 2:10; 2 Pedro 3:11) Kaskasdi, saan nga ipalgak dagiti aramidtayo ti isuamin nga estoria. Adda pakaigapuan ti pakaseknan ni napagungar a Jesus maipapan iti kongregasion idiay Efeso​—nupay adda rekordda a naimbag nga ar-aramid. “Ammok dagiti aramidmo,” imbagana kadakuada. “Nupay kasta, ikutak daytoy a maibusor kenka, a pinanawam ti ayat nga adda kenka idi damo.”​—Apocalipsis 2:1-4.

4. (a) Iti ania a pamay-an a ti panagserbitayo iti Dios agbalin a kas nakayugalian a ritual? (b) Apay a masapul ti panangsukimat iti bagi?

⁴ Adda peggad. Iti sumagmamanon a tiempo, ti panagserbitayo iti Dios mabalin a kasla maysa laengen a nakayugalian a rebbengen. Kastoy ti panangdeskribir ti maysa a Kristiano a babai iti kasasaadna: “Rummuarak nga agserbi, mapanak makigimong, agadal, agkararag​—ngem automatiko nga aramidek amin dayta, a diak makarikna iti aniaman.” Siempre, makomendaran dagiti adipen ti Dios no umagawada nupay mariknada a ‘maituang’ wenno ‘maipababa[da].’ (2 Corinto 4:9; 7:6) Nupay kasta, no agbalinen a saan a narang-ay ti Nakristianuan a rutinatayo, masapul a sukimatentayo ti makina, iti piguratibo a panagsao. Masapul uray dagiti kasayaatan a kotse ti kanayon a pannakamantener; kasta met, masapul dagiti amin a Kristiano ti kanayon a panangsukimat iti bagi. (2 Corinto 13:5) Makita ti dadduma dagiti aramidtayo, ngem dida maawatan no ania ti manggutugot kadagiti tignaytayo. Ngarud, tunggal maysa kadatayo, rumbeng a maseknan iti saludsod nga: ‘Ania ti mangtignay kaniak nga agserbi iti Dios?’

Dagiti Lapped iti Umiso a Pakatignayan

5. Ania a bilin ti kinuna ni Jesus nga umuna kadagiti isuamin?

⁵ Idi napagsaludsodan no ania kadagiti linteg a naited iti Israel ti umuna iti isuamin, inadaw ni Jesus ti maysa a bilin a naisentro, saan nga iti makinruar a langa, no di ket ti makin-uneg a motibo: “Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo ken iti amin a pigsam.” (Marcos 12:28-30) Ngarud, inlasin ni Jesus no aniat’ mangtignay kadatayo nga agserbi iti Dios​—ayat.

6, 7. (a) Iti ania a pamay-an a sisisikap a rinaut ni Satanas ti pamilia, ken apay? (2 Corinto 2:11) (b) Kasano a ti pannakapadakkel apektaranna ti kababalin ti tao iti nadibinuan nga autoridad?

⁶ Kayat ni Satanas a lapdan ti abilidadtayo a mangpatanor iti nasken a kualidad ti ayat. Tapno maibanag daytoy, maysa a pamay-anna isu ti panangraut iti pamilia. Apay? Agsipud ta ditoy ti pakapormaan ti umuna ken kaanduran a panangmatmattayo iti ayat. Pagaammo unay ni Satanas ti prinsipio ti Biblia a ti nasursuro iti kinaubing ket napateg iti kinanataengan. (Proverbio 22:6) Sisisikap nga ikagumaanna a dadaelen daytoy a panangmatmat iti ayat bayat iti kinaubing. Kas “dios daytoy a sistema ti bambanag,” makita ni Satanas a nagkurri a naimbag dagiti panggepna no adut’ dumakkel kadagiti pagtaengan a sadiay awan ti natalged ken naayat a kasasaad no di panagaapa, unget, ken naalas a sasao.​—2 Corinto 4:4; Efeso 4:31, 32; 6:4, footnote; Colosas 3:21.

⁷ Kinuna ti libro a Panangparagsak ti Biag ti Pamiliayo a ti pamay-an ti panangtaming ti ama iti rebbengenna kas naganak “mabalin nga addanto nasayaat nga epektona iti kababalin dagiti annakna iti autoridad, natauan man wenno nadiosan.”a Aminen ti maysa a Kristiano a lalaki a napadakkel iti sidong ti panangidaulo ti nauyong nga ama: “Para kaniak, nalaka ti agtulnog ken Jehova; narigrigat ti mangayat kenkuana.” Siempre, nasken ti panagtulnog, ta iti imatang ti Dios “ti panagtulnog naim-imbag ngem ti sakripisio.” (1 Samuel 15:22) Ngem ania ti makatulong kadatayo nga agtignay a saan laeng a gapu iti panagtulnog ket patanoren ti ayat ken Jehova kas pakatignayan iti panagdayawtayo?

“Ti Ayat ni Kristo Pilitennatayo”

8, 9. Kasanot’ rumbeng a panangtignay ti daton a subbot ni Jesus iti ayattayo ken Jehova?

⁸ Ti kangrunaan a pakatignayan a mangpatanor iti naimpusuan nga ayat ken Jehova isu ti panangapresiar iti daton a subbot ni Jesu-Kristo. “Babaen itoy ti ayat ti Dios naiparangarang iti kasasaadtayo, agsipud ta ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana.” (1 Juan 4:9) Apaman a maawatan ken maapresiartay dayta, daytoy a panagayat tignayenna ti ayat. “Agayattayo, agsipud ta [ni Jehova] immuna nga inayatnatayo.”​—1 Juan 4:19.

⁹ Situtulok nga inawat ni Jesus ti akemna nga agserbi kas Manangisalakan iti tao. “Babaen itoy naammuantayo ti ayat, agsipud ta dayta a maysa insukona ti kararuana maipaay kadatayo.” (1 Juan 3:16; Juan 15:13) Ti managsakripisio nga ayat ni Jesus tignayenna koma ti panangapresiartayo. Tapno iyilustrar: Kas pagarigan ngay ta naalawkayo iti pannakalmes. Mabalin kadi a basta agawidkayo, agpamaga, ket lipatenyon dayta? Siempre saan! Mariknayo a nakautangkayo iti tao a nangalaw kadakayo. Ta, utangyo ti biagyo iti dayta a tao. Saan kadi a kasta met ti utangtayo kada Jehova a Dios ken ni Jesu-Kristo? No awan ti subbot, arigna a tunggal maysa kadatayo mabalin a nalmesen, iti basol ken ipapatay. Ngem, gapu itoy a dakkel nga ayat, addaantayo ti namnama nga agbiag nga agnanayon iti maysa a paraiso a daga.​—Roma 5:12, 18; 1 Pedro 2:24.

10. (a) Kasanotay a mapagbalin a maysa a personal a banag ti subbot? (b) Kasano a pilitennatay ti ayat ni Kristo?

¹⁰ Mennamennaenyo ti subbot. Mangaramid[kayo] iti personal nga aplikasion, kas ken Pablo: “Kinapudnona, ti biag a pagbiagko ita iti lasag pagbiagko babaen ti pammati iti Anak ti Dios, a nagayat kaniak ken nangiyawat iti bagina maipaay kaniak.” (Galacia 2:20) Ti kasta a panagmennamenna parayrayenna ti naimpusuan a pakatignayan, ta nagsurat ni Pablo kadagiti taga Corinto: “Ti ayat nga adda ken Kristo pilitennakami, agsipud ta . . . isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken napagungar.” (2 Corinto 5:14, 15) Kuna ti The Jerusalem Bible a ti ayat ni Kristo “ringbawannakami.” No panunotentayo ti ayat ni Kristo, mapilittayo, matignaytayo iti kasta unay, marimbawantay pay. Tignayenna ti puspusotayo ken paggunayennatayo. Kas panangyulog ti patarus ni J. B. Phillips, “ti talaga a gubuayan ti panagtignaytayo isu ti ayat ni Kristo.” Aniaman a sabali a kita ti pakatignayan dina patauden ti napaut a bunga kadatayo, kas ipakita ti ulidan dagiti Fariseo.

“Siputanyo ti Lebadura Dagiti Fariseo”

11. Deskribirenyo ti kababalin dagiti Fariseo kadagiti relihioso nga ar-aramid.

¹¹ Pinagbalin dagiti Fariseo nga awan mamaay ti panagdayaw iti Dios. Imbes nga igunamgunamda ti ayat iti Dios, impaganetgetda dagiti aramid kas pakarukodan iti espiritualidad. Ti kankanayon a panangpampanunotda kadagiti detaliado a paglintegan pinagparangna ida a nalinteg iti ruar, ngem iti uneg “napnoda kadagiti tulang dagiti natay a tattao ken tunggal kita ti kinarugit.”​—Mateo 23:27.

12. Kalpasan a pinaimbag ni Jesus ti maysa a lalaki, kasano nga impakita dagiti Fariseo ti kinaawan rikna ti pusoda?

¹² Naminsan siaasi a pinaimbag ni Jesus ti maysa a lalaki a nagango ti imana. Anian a ragsak daytoy a lalaki a makapadas iti dagus a pannakaimbag ti maysa a sakit nga awan duadua a nangipaay iti adu a pisikal ken emosional a rigat! Ngem, dagiti Fariseo dida nakipagragsak kenkuana. Imbes ketdi, nangbabalawda gapu kadagiti detalye​—a ni Jesus timmulong iti [aldaw] ti Sabbath. Gapu ta pampanunotenda ti detalye ti panangyulogda iti Linteg, naan-anay a di naawatan dagiti Fariseo ti talaga a kaipapanan ti Linteg. Di pakasdaawan a “naan-anay a napaladingit [ni Jesus] iti kinaawan rikna ti puspusoda”! (Marcos 3:1-5) Kasta met, pinakdaaranna dagiti adalanna: “Siputanyo ti lebadura dagiti Fariseo ken dagiti Saduceo.” (Mateo 16:6) Naibutaktak dagiti tignay ken kababalinda iti Biblia agpaay a pakagunggonaantayo.

13. Aniat’ leksion nga adda iti ehemplo dagiti Fariseo nga agpaay kadatayo?

¹³ Sursuruannatayo ti ulidan dagiti Fariseo a masapul a maaddaantayo iti nainkalintegan a panangmatmat iti ar-aramidtayo. Kinapudnona, nasken dagiti aramid, ta “ti pammati nga awanan ar-aramid ket natay.” (Santiago 2:26) Nupay kasta, adda pagannayasan ti imperpekto a tattao a mangukom kadagiti sabsabali babaen iti aramidda imbes a babaen ti kinataoda. No maminsan, kastoy pay ti panangukomtay iti bagbagitayo. Nalabit sangkapanunottayo ti ar-aramid, a kasla dagitoy laeng ti pakaibatayan ti espiritualidadtayo. Malipatantayo ti panangsukimat kadagiti motibotayo. (Idiligyo iti 2 Corinto 5:12.) Nalabit agbalintayo a nainget a managtungpal kadagiti linteg ken bilin a “mangsagat iti sepsep ngem mangalun-on iti kamelio,” a tungpalen ti naisurat iti linteg ngem labsingen ti panggepna.​—Mateo 23:24.

14. Kasano a maipadis dagiti Fariseo iti narugit a kopa wenno pinggan?

¹⁴ Ti saan a naawatan dagiti Fariseo ket no talaga nga inay-ayat ti maysa a tao ni Jehova, gagangay a sumaruno ti panagaramid iti nadiosan a debosion. Ti espiritualidad agayus a rummuar nga agtaud iti uneg. Sibibileg a binabalaw ni Jesus dagiti Fariseo gapu iti biddut a panagpampanunotda maipapan itoy, a kunkunana: “Asikayo pay, eskriba ken Fariseo, a managinsisingpet! agsipud ta dalusanyo ti ruar ti kopa ken ti pinggan, ngem iti uneg napnoda iti samsam ken panaglablabes. Bulsek a Fariseo, dalusam nga umuna ti uneg ti kopa ken ti pinggan, tapno ti ruarna agbalin met a nadalus.”​—Mateo 23:25, 26.

15. Mangisitar kadagiti pagarigan a mangipakita a kitaen ni Jesus saan laeng a ti langa.

¹⁵ Ti makinruar a langa ti kopa, ti pinggan, wenno uray pay ti maysa a patakder dina ipalgak ti isuamin. Nasdaaw dagiti adalan ni Jesus iti kinapintas ti templo ti Jerusalem, nga inawagan ni Jesus a “rukib dagiti mannanakaw” gapu iti maar-aramid iti uneg. (Marcos 11:17; 13:1) Ti agpayso iti templo ket agpayso met iti minilion nga agak-aklon a Kristiano, kas ipakita ti rekord ti Kakristianuan. Kinuna ni Jesus nga ukomenna ti dadduma a nangaramid iti “mannakabalin nga ar-aramid” iti naganna nga “agar-aramid ti kinakillo.” (Mateo 7:22, 23) Maisupadi unay iti dayta, kinunana iti maysa a balo a nagidonar iti dandani awan pategna a kuarta idiay templo: “Daytoy napanglaw a balo a babai nangipisok iti ad-adu ngem kadagidiay amin a mangipispisok iti kuarta kadagiti baul ti gameng . . . Isu, manipud iti panagkasapulanna, impisokna ti isuamin nga adda kenkuana, ti amin a pagbiagna.” (Marcos 12:41-44) Agsimparat a pangngeddeng? Nikaanoman. Kadagitoy dua a kasasaad, imparangarang ni Jesus ti panangmatmat ni Jehova. (Juan 8:16) Nakitana dagiti motibo ti ar-aramid[da] ket maitutop ti panangukomna.

“Tunggal Maysa Sigun iti Kabaelanna”

16. Apay a saan a masapul a kankanayon nga idilig ti trabahotayo iti sabali a Kristiano?

¹⁶ No umiso dagiti motibotayo, saanen a kankanayon a kasapulan ti panangidilig. Kas pagarigan, bassit ti pagimbagan ti panangikagumaan a mangabut iti kaadu ti oras a busbusbosen ti maysa a Kristiano iti ministerio wenno ti panangitupag ti naaramidan ti maysa iti panangasaba. Imbaga ni Jesus nga ayatenyo ni Jehova iti isuamin a puso, isip, kararua, ken pigsayo​—saan a sigun iti maysa a tao. Agduduma ti abilidad, bileg, ken kasasaad ti tunggal tao. No ipalubos ti kasasaadyo, tignayennakayo ti ayat a mangbusbos iti adu a tiempo iti ministerio​—nalabit kas maysa pay nga amin tiempo a ministro a payunir. No makidangdangadangkayo iti sakit, nupay kasta, mabalin a basbassit ti tiempo a busbosenyo iti ministerio ngem ti tarigagayanyo. Dikay maupay. Ti kinamatalek iti Dios saan a marukod babaen iti oras. Maragsakankayto no nadalus dagiti motiboyo. Nagsurat ni Pablo: “Ngem paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o unay maipapan iti bagina met laeng, ket saan nga iti panangipadis iti sabali a tao.”​—Galacia 6:4.

17. Iti bukodyo a sasao, isalaysayyo iti ababa ti pangngarig kadagiti talento.

¹⁷ Usigenyo ti pangngarig ni Jesus kadagiti talento, kas nailanad idiay Mateo 25:14-30. Maysa a lalaki a nganngani agdaliasat iti sabali a daga nangayab kadagiti adipenna ket intalekna kadakuada dagiti sanikuana. “Iti daydiay maysa isu nangted iti lima a talento, iti sabali dua, iti sabali pay maysa, iti tunggal maysa sigun iti bukodna a kabaelan.” Idi nagsubli ti apo a makikuentan kadagiti adipenna, ania ti nasarakanna? Ti adipen a naikkan iti lima a talento nakagun-od iti lima pay. Kasta met, ti adipen a naikkan iti dua a talento nakagun-od iti dua pay. Ti adipen a naikkan iti maysa a talento inkalina dayta iti daga ket awan ti inaramidna iti kinabaknang ti apona. Ania ti panangmatmat ti apo iti kasasaad?

18, 19. (a) Apay a saan a pinagdilig ti apo ti adipen a naikkan iti dua a talento ken ti adipen a naikkan iti lima a talento? (b) Ania ti isuro ti pangngarig dagiti talento kadatayo maipapan iti komendasion ken panangidilig? (c) Apay a nakagun-od ti di nasayaat a pannakaukom ti maikatlo nga adipen?

¹⁸ Umuna, usigentayo dagiti adipen a naikkan ti lima ken dua a talento. Iti tunggal maysa kadagitoy nga adipen, kinuna ti apo: “Nasayaat unay, naimbag ken matalek nga adipen!” Naibagana kadi daytoy iti adipen a naikkan iti lima a talento no nakagun-od laeng iti dua [a talento]? Nalabit saan! Iti kasumbangirna, dina imbaga iti adipen a nakagun-od iti dua a talento: ‘Apay a dika nakagun-od iti lima? Ta, kitaem ti padam nga adipen ket mano ti nagun-odanna para kaniak!’ Saan, ti naasi nga apo, a mangiladawan ken Jesus, saan a nagidilig. Intudingna dagiti talento “iti tunggal maysa sigun iti bukodna a kabaelan,” ket dina ninamnama ti ad-adu ngem ti maipaay ti tunggal maysa. Agpada dagiti adipen a nakagun-od iti pareho a komendasion, ta agpadada a nagtrabaho iti isuamin a kararua agpaay iti apoda. Makasursurotayo amin iti daytoy.

¹⁹ Siempre, saan a nakomendaran ti maikatlo nga adipen. Kinapudnona, naipalladaw iti kasipngetan iti ruar. Agsipud ta maymaysa laeng a talento ti inawatna, mabalin a saan a manamnama a makagun-od iti kas ti kaadu ti nagun-odan ti adipen nga addaan iti lima a talento. Nupay kasta, dina man la pinadas! Ti pannakagun-odna iti di nasayaat a pannakaukomna ket gapu iti “dakes ken nasadut” a kababalin ti pusona, a mangiparangarang iti kinakurang ti ayatna iti apona.

20. Kasano a matmatan ni Jehova dagiti limitasiontayo?

²⁰ Inanamaen ni Jehova a tunggal maysa kadatayo ti agayat kenkuana iti isuamin a pigsa, ngem anian a makapabileg-puso ta “isu a mismo ammona ti pannakasukogtayo, isu a malagipna a tapuktayo”! (Salmo 103:14) Kunaen ti Proverbio 21:2 a “ni Jehova gantingenna dagiti puspuso”​—saan a ti estadistika. Maawatanna ti aniaman a limitasiontayo a ditay matengngel, dagita man ket pinansial, pisikal, emosional, wenno dadduma pay. (Isaias 63:9) Maigiddato iti dayta, inanamaenna nga usarentayo ti amin a sanikuatayo [kas ti tiempo, impluensia, ken kuarta] iti inggat’ kabaelantayo. Naan-anay ni Jehova, ngem no makilangen kadagiti imperpekto a managdaydayawna, isut’ saan a perpeksionista. Isut’ nainkalintegan iti pannakilangenna ket realistiko met ti inanamaenna.

21. No ti panagserbitayo iti Dios ket natignay babaen iti ayat, aniat’ sumaruno a naimbag a resulta?

²¹ Ti panagayat ken ni Jehova iti isuamin a puso, kararua, isip, ken pigsatayo ket “napatpateg nga adayo ngem kadagiti amin a sibubukel a daton a napuoran ken dagiti sakripisio.” (Marcos 12:33) No matignaytayo babaen iti ayat, ngarud aramidentayo ti amin a kabaelantayo iti panagserbi iti Dios. Nagsurat ni Pedro a no dagiti nadiosan a kualidad, agraman ti ayat, “adda kadakayo ken aglippiasda, lapdandanto ti panagbalinyo a di aktibo wenno di nabunga maipapan iti umiso a pannakaammo ken ni Apotayo a Jesu-Kristo.”​—2 Pedro 1:8.

[Footnote]

Bilang Repaso

◻ Ania koma ti manggutugot kadatayo nga agserbi iti Dios?

◻ Kasano a ti ayat ni Kristo pilitennatayo nga agserbi ken Jehova?

◻ Ania a panagpampanunot dagiti Fariseo ti masapul a liklikantayo?

◻ Apay a di nainsiriban ti kanayon a panangidilig ti panagserbitayo iti sabali a Kristiano?

[Dagiti Ladawan iti panid 16]

Agduduma dagiti abilidad, bileg, ken kasasaad dagiti indibidual