Ti Biag ken Ministerio ni Jesus

Ti Pangngarig Dagiti Talento

INTULTULOY ni Jesus ti pannakisarsaritana kadagiti apostolna idiay Bantay dagiti Olivo babaen ti panangisalaysayna kadakuada ti maysa pay nga ilustrasion, ti maikadua kadagiti tallo nga agsasaruno. Tallo nga aldaw a nasapsapa, bayat nga isut’ adda idiay Jerico, insalaysayna ti pangngarig dagiti mina tapno ipakitana a ti Pagarian ket mabayag pay iti masanguanan. Ti pangngarig a salaysayenna itan, nupay addaan sumagmamano nga aga-asping a ramramit, deskribirenna iti kaitungpalanna kadagiti ar-aramid bayat ti kaadda ni Kristo iti pannakabalin ti Pagarian. Iyilustrar dayta a dagiti adalanna masapul nga agtrabahoda bayat nga addada ditoy daga tapno paaduenda “ti sansanikuana.”

Rinugian ni Jesus: “Ta dayta [kayatna a sawen, dagiti sirkumstansia a mainaig iti Pagarian] ket kas iti maysa a tao, a mapan iti sabali a daga, inayabanna dagiti adipenna ket inyawatna kadakuada dagiti kukuana.” Ni Jesus ket isu daydiay tao a, sakbay ti panagdaliasatna a napan idiay langit, impakumitna kadagiti ad-adipenna​—dagiti adalanna a nakalinea iti nailangitan a Pagarian​—dagiti kukuana. Dagitoy a kukua ket saanda a pisikal a sansanikuana no di ket irepresentarda ti talon a nasukayan nga isut’ pangnamnamaanna a pagtaudan ti ad-adu pay nga adalan.

Intalek ni Jesus dagiti kukuana kadagiti adipenna kasakbayan ti iyuulina sadi langit. Kasano? Babaen ti panangisurona kadakuada nga itultuloyda a talonen ti daga babaen ti panangikaskasabada ti mensahe ti Pagarian agingga iti ungto ti daga. Kas kinuna ni Jesus: “Ket intedna iti maysa ti lima a talento, intedna iti sabali ti dua, ket iti sabali intedna ti maysa, iti tunggal maysa kas iti kabaelanna, ket sa napan iti biahe.”

Dagiti walo a talento​—dagiti kukua ni Kristo​—naiwarasda ngarud sigun kadagiti kabaelan, wenno naespirituan a posibilidad, dagiti adipen. Dagiti adipen itaktakderanda dagiti klase dagiti adalan. Idi umuna a siglo, kaawatan a ti klase nga immawat kadagiti lima a talento ket inramanna dagiti apostol. Sa intuloy a sinalaysay ni Jesus a dagiti adipen nga immawat ti lima ken dua a talento ti agpadpada a nangdoble kadakuada babaen ti panangikaskasabada ti Pagarian ken ti panagaramidda ti adalan. Nupay kasta, ti adipen a nangawat ti maymaysa a talento inlemmengna dayta iti daga.

“Idi nalabes ti adu nga aldawen,” intuloy ni Jesus, “immay daydi apo dagiti adipen ket inayabanna ida a kinakuenta.” Idi laeng maika-20 a siglo, agarup 1,900 a tawtawen kamaudiananna, a nagsubli ni Kristo tapno makikuentaan, gapuna, talaga a daytat’ “adu nga aldawen.” Kalpasanna inlawlawag ni Jesus:

“Idi nagparang daydi immawat ti lima a talento, nangyeg ti sabali pay a lima a talento, a kunkunana, ‘Apo, lima a talento ti inyawatmo kaniak; adtoy, nakagunggonaak ti sabali a lima a talento.’ Ni apona kinunana kenkuana, ‘Naimbag, adipen a nalaing ken mapagtalkan! Napagtalkanka iti bassit. Isaadkanto nga agaywan iti adu. Makipagragsakka iti apom.’” Ti adipen a nangawat ti dua a talento nadoblena met dagiti talentona, ket isut’ immawat ti isu met laeng a komendasion ken gunggona.

Ngem, kasano ngay, ti pannakipagragsak dagitoy matalek nga adipen ken Apoda? Ay ket, ti ragsak ti Apoda, a ni Jesu-Kristo, ket isut’ panangawatna ti Pagarian idi napan iti adayo idiay yan ni Amana sadi langit. No maipapan kadagiti matalek nga adipen iti moderno a panawen, addaandat’ naindaklan a rag-o gaput’ pannakaitalek kadakuada ti ad-adda pay a responsabilidad iti Pagarian, ket bayat nga iringringpasdat’ naindagaan a kursoda, maaddaandanto ti nagpupuniponan a rag-o iti pannakapagungarda iti nailangitan a Pagarian. Ngem ti ngay maikatlo nga adipen?

“Apo, am-ammok a taoka a nainget,” inreklamo daytoy nga adipen. “Gapuna nagbutengak ket napanak ket inlemmengko ti talentom iti daga. Adtoy alaem ti kukuam.” Inggagara ti adipen ti di nagtrabaho iti talon babaen iti panangaskasaba ken panagaramid adalan. Gapuna isut’ inawagan ti apona a “managdakdakes ken nasadut” ket sinentensiaanna ti dusa: “Ikkatenyo ngarud kenkuana ti talento . . . Ket ti adipen nga awan kapapayanna ibellengyo iti sipnget iti ruar. Idiay addanto ti panagsangit ken panagngaretnget dagiti ngipen.” Dagidiay naibilang iti daytoy klase dakes nga adipen, a naibellengda iti ruar, ket awananda ti aniaman a naespirituan a rag-o.

Daytoy ti mangted ti mamagpanunot a leksion kadagiti isuamin nga agkunkuna a pasurot ni Kristo. Masapul nga agtignayda a mangparang-ay ti kukua ti nailangitan nga Apoda babaen ti pannakiramanda a naan-anay iti panangaskasaba no kayatda met a tagiragsaken ti komendasionna ken gunggonana ken no kayatda a malisian ti pannakaibellengda iti sipnget iti ruar ken pannakadadaelto iti kamaudiananna. Nagagetkay met laeng aya a mangus-usar kadagiti abilidadyo iti daytoy a banag? Mateo 25:14-30.

◆ Ania a leksion ti isuro daytoy sumaganad a pangngarig?

◆ Asinoda dagiti adipen, ken ania dagiti kukua a naitalek kadakuada?

◆ Kaanot’ iyaay ti apo a makikuentaan, ken aniat’ masarakanna?

◆ Aniat’ ragsak a serkan ti matalek nga adipen, ket aniat’ mapasamak iti dakes nga adipen?