Ti Biag ken Ministerio ni Jesus
Inton Dumteng ni Kristo iti Pannakabalin ti Pagarian
NI Jesus ket kaskasdi a kadua pay laeng dagiti apostolna idiay Bantay dagiti Olivo. Kas sungbat iti panagdawatda ti pagilasinan ti kaaddana ken ti panungpalan ti sistema dagiti bambanag, ibagana kadakuada itan ti maudi iti serie dagiti tallo nga ilustrasion. “Ngem inton ti Anak ti tao umayto agraman iti dayagna, ken amin dagiti anghel maikuyog kenkuana,” inrugi ni Jesus, “isu ti panagtugawnanto iti trono ti gloriana.”
Saan a makita ti tattao dagiti anghel iti nailangitan a dayagda. Gapuna ti idadateng ti Anak ti tao, a ni Jesu-Kristo, a kadua dagiti anghel ket rebbeng ngarud a di makita dagiti natauan a matmata. Ti idadateng napasamak idi tawen 1914. Ngem agpaay iti ania a panggep? Inlawlawag ni Jesus: “Ket iti sanguananna maurnongto dagiti isuamin a nasion, ket paglalasinennanto ti maysa ken maysa kadagiti tao a kas iti pastor ilasinna dagiti karnero kadagiti kalding. Ket isaadnanto dagiti karnero iti makanawanna, ket dagiti kalding iti makatigidna.”
Iti panangiladawanna no aniat’ mapasamak kadagidiay nailasin iti naparaburan a dasig, kuna ni Jesus: “Iti dayta kunaento ti ari kadagiti adda iti makanawanna. ‘Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong.’” Dagiti karnero saandanto a makipagturay a kadua ni Kristo idiay langit ngem tawidendanto ti Pagarian iti pannakaawat nga isudanto dagiti naindagaan nga iturayan. “Ti pannakabangon ti lubong” napasamak idi damo a panagputot da Adan ken Eva kadagiti annak a magunggonaanto iti sagana ti Dios a mangsubbot ti sangatauan.
Ngem apay a nailasin dagiti karnero iti makanawan a pabor ti Ari? “Ta nagbisinak”, insungbat ti ari, “ket inikkandak ti kanen; nagwawak ket inikkandak ti inumen. Nagganggannaetak ket pinagdagusdak; lamolamoak, ket kinawesandak. Nagsakitak ket kinablaawandak. Nagianak idiay pagbaludan ket immaykayo kaniak.”
Yantangay dagiti karnero addada ditoy daga, kayatda a maammuan no kasano a naaramidanda koma dagiti a nagsayaat nga ar-aramid agpaay iti nailangitan nga Arida: “Apo, kaano ti pannakakitami kenka a mabisbisinan ket tinaraonandaka,” insaludsodda, “wenno mawaw ket inikkandaka ti inumen? Kaano ti pannakakitami kenka a ganggannaet ket pinagdagusdaka, wenno lamolamo, ket kinawesandaka? Kaano ti pannakakitami kenka a masakit wenno adda idiay pagbaludan ket immaykam kenka?”
“Pudno kunak kadakayo,” insungbat ti Ari, “a gapu ta inaramidyo iti maysa kadagitoy kanunummuan kadagitoy kakabsatko, inaramidyo met kaniak.” Dagiti kakabsat ni Kristo ket isuda dagiti natda pay ditoy daga kadagiti 144,000 a makipagturay a kaduana idiay langit. Ket ti panagaramid ti naimbag kadakuada, kuna ni Jesus, ket kas panagaramid ti naimbag metten kenkuana.
Sumaganad, kinasarita ti Ari dagiti kalding: “Umadayokayo kaniak, dakay a nailunod, inkay iti apuy nga agnanayon a naisagana iti Diablo ken kadagiti anghelna. Ta nagbisinak ket didak inikkan ti kanen, nagwawak, ket didak pinainum. Nagganggannaetak, ket didak pinagdagus; lamolamoak, ket didak kinawesan; masakitak ken addaak iti pagbaludan, ket didak sinarungkaran.”
Dagiti kalding, nupay kasta, nagreklamoda: “Apo, kaano ti pannakakitami kenka a mabisbisinan wenno mawaw wenno ganggannaet wenno lamolamo wenno masakit wenno idiay pagbaludan ket didaka nagserbian?” Naukom a siinget dagiti kalding iti isu met laeng a pakaibasaran iti pannakaukom a paborable dagiti karnero. “Gapu ta dikay inaramid iti maysa kadagiti kanunummuan kadagitoy [a kakabsatko],” insungbat ni Jesus, “dikay met inaramid kaniak.”
Gapuna ti kaadda ni Kristo iti pannakabalin ti Pagarian, kasakbayan la unay ti panungpalan daytoy dakes a sistema dagiti bambanag iti dakkel a rigat, isunto ti panawen ti pannakaukom. Dagiti kalding “mapandanto iti agnanayon a pannakagessat, ngem dagiti nalinteg [dagiti karnero], iti biag nga agnanayon.” Mateo 25:31-46; Apocalipsis 14:1-3.
◆ Apay a di makita ti kaadda ni Kristo, ket ania a trabaho ti aramidenna iti dayta a tiempo?
◆ Iti ania a pannakaawat a dagiti karnero tawidendanto ti Pagarian?
◆ Kaano a napasamak “ti pannakabangon ti lubong,” ken apay nga iti daydi?
◆ Maibatay iti ania a maukom dagiti tattao kas karnero wenno kas kalding?