“Agtultuloykayo nga Agbantay”!

“Ti kunaek kadakayo kunaek iti isuamin, Agtultuloykayo nga agbantay.”​—MARCOS 13:37.

1, 2. (a) Ania ti nasursuro ti maysa a lalaki maipapan iti panangsaluad iti sanikuana? (b) Iti ilustrasion ni Jesus maipapan iti mannanakaw, ania ti maadaltayo maipapan iti panagtalinaed a siririing?

NAKADULIN dagiti agkakapateg a sanikua ni Juan iti balayna. Intalimengna dagita iti sirok ti kama​—ti ipagarupna a katalgedan a lugar iti balayna. Ngem maysa a rabii, bayat a nakaturogda nga agassawa, sinerrek ti mannanakaw ti kuartoda. Nalawag nga ammo ti mannanakaw no sadino ti eksakto a pangbirokanna. Siaannad nga innalana amin a napateg a sanikua iti sirok ti kama agraman ti kuarta ni Juan nga inkabilna iti uuyosan ti lamisaan iti igid ti kama. Kabigatanna, natakuatan ni Juan ti naaramid a panagtakaw. Narigatnanto a malipatan ti napait a leksion a naadalna: Saan a mabantayan ti nakaturog a tao dagiti ik-ikutanna.

² Pudno met dayta iti naespirituan nga anag. Ditay masaluadan ti namnama ken pammatitayo no maturogtayo. Gapuna, imbalakad ni Pablo: “Saantay koma a maturog a kas iti ar-aramiden ti dadduma, no di ket agtalinaedtayo koma a siririing ken agtalinaedtayo a sipupuot.” (1 Tesalonica 5:6) Tapno maipakitana no kasano kapateg ti panagtalinaed a siririing, inusar ni Jesus ti ilustrasion maipapan iti mannanakaw. Inladawanna dagiti pasamak sakbay ti iyaayna kas Ukom, sa namallaag: “Agtultuloykayo nga agbantay, ngarud, agsipud ta saanyo nga ammo no ania nga aldaw nga umay ti Apoyo. Ngem ammuenyo ti maysa a banag, a no naammuan koma ti bumalay no ania a panagbantay nga umay idi ti mannanakaw, nagtalinaed koma a siririing ket saanna nga impalubos a maserrek ti balayna. Gapu itoy dakayo met paneknekanyo a sisasaganakayo, agsipud ta iti oras a saanyo nga ipagarup nga isu dayta, ti Anak ti tao umay.” (Mateo 24:42-44) Saan nga ibaga ti mannanakaw no kaano nga umay agtakaw. Aramidenna dayta iti tiempo nga awan ti mangnamnama kenkuana. Umasping iti dayta, kas kinuna ni Jesus, dumteng ti panungpalan daytoy a sistema iti ‘oras a saantayo nga ipagarup.’

“Agtalinaedkayo a Siririing, Agtakderkayo a Sititibker iti Pammati”

3. Kasano nga impakita ni Jesus ti kinapateg ti panagtalinaed a nakariing babaen ti ilustrasion dagiti adipen a naguray iti panagsubli ti apoda manipud iti maysa a kasar?

³ Kadagiti sasao a nairekord iti Ebanghelio ni Lucas, inyarig ni Jesus dagiti Kristiano kadagiti adipen nga agur-uray iti apoda nga agsubli manipud iti maysa a kasar. Masapul nga agsalukagda tapno nakariingda bayat ti panagsublina, a nakasaganada a mangpasangbay kenkuana. Umasping iti dayta, kinuna ni Jesus: “Iti oras a saanyo nga ipagpagarup umay ti Anak ti tao.” (Lucas 12:40) Dadduma a nabayagen nga agserserbi ken ni Jehova mabalin a malipatanda ti kinaganat ti panawen a pagbibiagantayo. Mabalin pay ketdi a panunotenda a mabayag pay ti panungpalan. Ngem ti kasta a panagpampanunot mabalin nga ibaw-ingna ti atensiontayo manipud kadagiti naespirituan a bambanag agturong kadagiti material a kalat, a mamagdungsa kadatayo iti naespirituan.​—Lucas 8:14; 21:34, 35.

4. Ania ti mangtignay kadatayo nga agtalinaed a sisasalukag, ken kasano nga impakita dayta ni Jesus?

⁴ Adda sabali pay a maadaltayo iti ilustrasion ni Jesus. Nupay saan nga ammo dagiti adipen no ania nga oras a sumangpet ti apoda, agparang nga ammoda no ania a rabii a sumangpet. Narigat koma ti agpatnag a siririing iti dayta a rabii no ammoda a sumangpet ti apoda iti sabali a rabii. Ngem saan, ammoda a sumangpet ti apoda iti dayta a rabii, ket nangted dayta iti dakkel a rason tapno agtalinaedda a siririing. Iti umasping a pamay-an, nalawag nga ipakita dagiti padto ti Biblia nga agbibiagtayo iti aldaw ti panungpalan; ngem dida ibaga kadatayo no ania nga aldaw wenno oras ti mismo a panungpalan. (Mateo 24:36) Ti panamatitayo nga umad-adanin ti panungpalan tulongannatayo nga agtalinaed a siririing. Ngem no talaga a kombinsidotayo nga asidegen ti aldaw ni Jehova, dakdakkel ti rasontayo nga agsalukag.​—Sofonias 1:14.

5. Kasanotayo nga “agtalinaed a siririing” kas indagadag ni Pablo?

⁵ Idi nagsurat ni Pablo kadagiti taga Corinto, indagadagna: “Agtalinaedkayo a siririing, agtakderkayo a sititibker iti pammati.” (1 Corinto 16:13) Wen, ti panagtalinaed a siririing ket nainaig iti panagbalintayo a natibker iti Nakristianuan a pammati. Kasano a makapagtalinaedtayo a siririing? Babaen ti pananggun-od iti naun-uneg a pannakaammo iti Sao ti Dios. (2 Timoteo 3:14, 15) Dagiti nasayaat nga ugali iti personal a panagadal ken regular a pannakigimong ket makapabileg iti pammatitayo, ken maysa a napateg nga aspeto ti pammatitayo ti panagtalinaed a silalagip iti aldaw ni Jehova. Saantayo a malipatan dagiti agkakapateg a kinapudno maipapan iti iyaay ti panungpalan daytoy sistema ti bambanag no pasaray repasuentayo dagiti pammaneknek iti Kasuratan a nakaas-asidegtayon iti dayta a panungpalan.a Nasayaat met no siputantayo dagiti pasamak iti lubong a mangtungpal iti padto ti Biblia. Insurat ti maysa a kabsat idiay Alemania: “Tunggal agbuyaak kadagiti damag​—dagiti gubat, ginggined, kinaranggas, ken ti panangrugit iti planetatayo​—ipaganetgetda kaniak ti kinaasideg ti panungpalan.”

6. Kasano nga inyilustrar ni Jesus a mabalin a makaturogtayo iti naespirituan bayat ti panaglabas ti panawen?

⁶ Iti Marcos kapitulo 13, mabasatayo ti sabali pay a salaysay maipapan iti panangidagadag ni Jesus kadagiti pasurotna nga agtalinaedda a siririing. Sigun iti daytoy a kapitulo, inyarig ni Jesus ti kasasaadda iti maysa nga agay-aywan iti ruangan nga agur-uray iti panagsubli ti apona manipud panagdaliasatna iti sabali a pagilian. Saan nga ammo ti agay-aywan iti ruangan no kaano a sumangpet ti apona. Basta masapul nga agtultuloy nga agbantay. Dinakamat ni Jesus ti uppat a tiempo ti panagbantay a mabalin nga idadateng ti apo. Nagpaut ti maikapat a panagbantay manipud alas tres ti parbangon agingga iti ileleggak ti init. Iti maudi a panagbantay, nalaka la nga agdungsa ti agay-aywan iti ruangan. Naipadamag nga ibilang dagiti soldado ti oras sakbay ti panagbannawag kas ti kasayaatan a tiempo a rumaut kadagiti kabusor gapu ta dida nakasagana. Umasping iti dayta, mabalin nga ita ti kakaruan a makarit ti panagtalinaedtayo a siririing, kabayatan daytoy maudi nga oras, bayat a naimas ti turog ti lubong iti aglawlawtayo iti naespirituan nga anag. (Roma 13:11, 12) Gapuna, iti ilustrasionna, maulit-ulit nga indagadag ni Jesus: “Agtultuloykayo a kumita, agtultuloykayo a siririing . . . Gapuna agtultuloykayo nga agbantay . . . Ti kunaek kadakayo kunaek iti isuamin, Agtultuloykayo nga agbantay.”​—Marcos 13:32-37.

7. Ania ti adda a peggad, ken maigapu iti dayta, ania a pammaregta ti masansan a mabasatayo iti Biblia?

⁷ Iti adu a gundaway kabayatan ti ministeriona ken kalpasan ti panagungarna, indagadag ni Jesus ti panagsalukag. Kinapudnona, iti nganngani amin a gundaway a dinakamat ti Kasuratan ti panungpalan daytoy sistema ti bambanag, mabasatayo ti pakdaar a nasken nga agtalinaed a siririing wenno agtultuloy nga agbantay.b (Lucas 12:38, 40; Apocalipsis 3:2; 16:14-16) Nalawag, pudno a dakkel ti peggad ti naespirituan a panagdungsa. Kasapulantayo amin dagita a pakdaar!​—1 Corinto 10:12; 1 Tesalonica 5:2, 6.

Tallo nga Apostol a Di Nakapagtalinaed a Siririing

8. Iti minuyongan ti Getsemani, ania ti inaramid dagiti tallo nga apostol ni Jesus idi kiniddawna nga agtultuloyda nga agbantay?

⁸ Saan nga umdas nga adda tarigagaytayo nga agtalinaed a siririing, kas makitatayo iti napasamak kada Pedro, Santiago, ken Juan. Naespirituan dagitoy tallo a lallaki a sisusungdo a simmurot ken ni Jesus ken nadungngoda unay kenkuana. Kaskasdi, iti rabii ti Nisan 14, 33 K.P., saanda a nagtalinaed a siririing. Idi pinanawanda ti makinngato a siled a nangrambakanda iti Paskua, ti tallo nga apostol simmurotda ken ni Jesus iti minuyongan ti Getsemani. Sadiay, kinuna kadakuada ni Jesus: “Maldaangan unay ti kararuak, uray agingga iti ipapatay. Agyankayo ditoy ket agtultuloykayo a makipagbantay kaniak.” (Mateo 26:38) Namitlo a sipapasnek a nagkararag ni Jesus iti nailangitan nga Amana, ken namitlo met a nagsubli iti ayan dagiti gagayyemna, ngem nakaturogda.​—Mateo 26:40, 43, 45.

9. Ania ti mabalin a pakaigapuan ti panagdungsa dagiti apostol?

⁹ Apay a dagitoy tallo a matalek a lallaki dida napatgan ti kiddaw ni Jesus iti dayta a rabii? Mabalin a maysa a rason ti pisikal a bannog. Nalabit nalabesen a tengnga ti rabii, “ta dagiti matada ket nadagsen” iti turog. (Mateo 26:43) Kaskasdi, kinuna ni Jesus: “Agtultuloykayo nga agbantay ken agkararagkayo nga agpatpatuloy, tapno saankayo a sumrek iti pannakasulisog. Ti espiritu, siempre, sigagagar, ngem ti lasag nakapuy.”​—Mateo 26:41.

10, 11. (a) Nupay nabannog, ania ti nakatulong ken ni Jesus a nagtultuloy a nagbantay iti minuyongan ti Getsemani? (b) Ania ti maadaltayo iti napasamak iti tallo nga apostol idi kiniddaw ni Jesus nga itultuloyda ti agbantay?

¹⁰ Awan duadua a nabannog met ni Jesus iti dayta nakallalagip a rabii. Ngem imbes a maturog, sipapasnek a nagkararag bayat dagidi a napateg a maudi nga oras ti wayawayana. Sumagmamano nga aldaw sakbayna, indagadagna nga agkararag dagiti pasurotna, a kunkunana: “Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak, ken iti panagtakder iti sanguanan ti Anak ti tao.” (Lucas 21:36; Efeso 6:18) No ipangagtayo ti balakad ni Jesus ken tuladentayo ti nasayaat nga ulidanna iti panagkararag, dagiti naimpusuan nga ararawtayo ken ni Jehova ti tumulong tapno makapagtalinaedtayo a siririing iti naespirituan.

¹¹ Siempre, ammo ni Jesus​—nupay saan nga ammo idi dagiti adalanna​—nga isu ket maaresto ken mapapatay. Dagiti pakasuotanna ket aggibus iti nakas-ang nga ipapatay iti kayo a pagtutuokan. Impakpakauna ni Jesus kadagiti apostolna dagitoy a bambanag, ngem dida matarusan no ania ti ibagbagana. Gapuna, nakaturogda bayat nga agkarkararag ni Jesus. (Marcos 14:27-31; Lucas 22:15-18) Kas kadagiti apostol, nakapuytayo met iti pisikal ken adda bambanag a ditay pay ammo. Kaskasdi, no malipatantayo ti kinaganat ti tiempo a pagbibiagantayo, mabalintay ti makaturog iti naespirituan nga anag. Makapagtalinaedtayo laeng a siririing no alertotayo.

Tallo a Napateg a Galad

12. Ania a tallo a galad ti innaig ni Pablo iti panagtalinaedtayo a nasiput?

¹² Kasanotayo a mataginayon ti pannakariknatayo iti kinaganat? Nakitatayon ti pateg ti kararag ken no apay a masapul a silalagiptayo iti aldaw ni Jehova. Kanayonanna, dinakamat ni Jesus ti tallo a napateg a galad a nasken a patanorentayo. Kunana: “No maipapan kadatayo a kukua ti aldaw, agtalinaedtay koma a sipupuot ket ikapettayo ti kabal ti barukong nga isu ti pammati ken ayat ket ti namnama ti pannakaisalakan kas kabal ti ulo.” (1 Tesalonica 5:8) Usigentayo iti apagbiit ti paset ti pammati, namnama, ken ayat iti panagtalinaedtayo a siririing iti naespirituan.

13. Ania ti maaramidan ti pammati iti panagtalinaedtayo nga alerto?

¹³ Masapul a natibker ti pammatitayo nga adda ni Jehova ken “isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Ti damo ken umuna a siglo a kaitungpalan ti padto ni Jesus maipapan ti panungpalan pabilgenna ti pammatitayo iti dakdakkel a kaitungpalanna iti panawentayo. Ken gapu iti pammatitayo, agtultuloy a sigagagar a segseggaantayo ti aldaw ni Jehova, a sigurado a “di bumurong a pumudnonto [ti naimpadtuan a sirmata]. Saanto a maladaw.”​—Habakuk 2:3.

14. Kasano kapateg ti namnama iti panagtalinaedtayo a siririing?

¹⁴ Ti sigurado a namnamatayo ket mayarig iti “sinipete maipaay iti kararua” a tumulong kadatayo a mangibtur kadagiti pakarigatan uray no masapul nga urayentayo ti sigurado a pannakatungpal dagiti kari ti Dios. (Hebreo 6:18, 19) Kuna ni Margaret, maysa a napulotan iti espiritu a kabsat nga agtawen iti nasurok a 90 ken nabautisaran nasurok a 70 a tawenen ti napalabas: “Idi agpegpeggad ti biag ni lakayko gapu iti kanser idi 1963, kayatko nga umay koman a dagus ti panungpalan. Ngem ita, nabigbigko a ti bagik la ti pampanunotek. Dimi ammo idi no kasanonto kasaknap ti trabaho iti intero a lubong. Uray ita, mangrugrugi pay laeng ti trabaho iti adu a lugar. Isu nga agyamanak ta nagan-anus ni Jehova.” Impanamnama kadatayo ni apostol Pablo: “Ti panagibtur [mangpataud iti] maysa a naanamongan a kasasaad; ti naanamongan a kasasaad, kalpasanna, namnama, ket ti namnama saan a mangiturong iti pannakaupay.”​—Roma 5:3-5.

15. Kasano a tignayennatayo ti ayat nupay kasla nabayagtayon nga agur-uray?

¹⁵ Ti Nakristianuan nga ayat ket naisangsangayan a galad gapu ta dayta ti kangrunaan a makagapu iti amin nga aramidentayo. Agserserbitayo ken ni Jehova gapu ta ay-ayatentayo, aniaman ti inkeddengna a tiempo. Ti panagayat iti kaarruba tignayennatayo a mangikasaba iti naimbag a damag ti Pagarian, kasano man kapaut ti inkeddeng ti Dios nga aramidentayo dayta ken kasano man kasansan nga agsublisublitayo kadagiti isu met laeng a pagtaengan. Kas insurat ni Pablo, “mataginayon ti pammati, namnama, ayat, dagitoy a tallo; ngem ti kadakkelan kadagitoy isu ti ayat.” (1 Corinto 13:13) Gapu iti ayat, makapagtultuloytayo nga agibtur ken nakariing. “[Ti ayat] inanamaenna ti amin a bambanag, ibturanna ti amin a bambanag. Ti ayat saan a pulos aggibus.”​—1 Corinto 13:7, 8.

“Itultuloymo a Salimetmetan a Sititibker ti Adda Kenka”

16. Imbes nga agkapuykapuy, ania a kababalin ti masapul a patanorentayo?

¹⁶ Agbibiagtayon iti napateg a tiempo. Dagiti pasamak iti lubong naynay nga ipalagipda kadatayo nga addatayon iti arinunos ti maudi nga al-aldaw. (2 Timoteo 3:1-5) Saan a tiempo itan nga agkapuykapuy no di ket tiempo tapno ‘agtultuloy a sititibker a salimetmetan ti adda kadatayo.’ (Apocalipsis 3:11) Maipakitatayo a nakasaganatayo iti oras ti pannubok no ‘agridamtayo no maipapan kadagiti kararag’ ken no patanorentayo ti pammati, namnama, ken ayat. (1 Pedro 4:7) Adu ti mabalintayo nga aramiden iti trabaho ti Apo. Ti panagbalin nga okupado kadagiti aramid a mangyanninaw iti nadiosan a debosion tulongannatayo nga agtalinaed a naan-anay a nakariing.​—2 Pedro 3:11.

17. (a) Apay a ditay koma maupay kadagiti sagpaminsan a pannakapaay? (Kitaenyo ti kahon iti panid 21.) (b) Kasano a matuladtayo ni Jehova, ken aniada a gunggona ti agur-uray kadagidiay mangaramid iti dayta?

¹⁷ “Ni Jehova ti binglayko,” insurat ni Jeremias, “dayta ti makagapu nga iparangarangkonto ti panagur-uray kenkuana. Naimbag ni Jehova iti daydiay mangin-inanama kenkuana, iti kararua a mangsapsapul kenkuana. Naimbag a ti maysa aguray, uray siuulimek, iti panangisalakan ni Jehova.” (Un-unnoy 3:24-26) Dadduma kadatayo ti saan pay a nabayag nga agur-uray. Dadduma ti adu a tawenen nga agur-uray tapno makitada ti panangisalakan ni Jehova. Ngem anian a nagababa daytoy a panawen ti panaguray no idilig iti biag nga agnanayon iti masanguanan! (2 Corinto 4:16-18) Ken bayat nga ur-urayentayo ti tiempo nga inkeddeng ni Jehova, mabalintayo a patanoren dagiti napateg a Nakristianuan a galad ken tulongan ti dadduma a mangaprobetsar iti panagan-anus ni Jehova ket awatenda ti kinapudno. Sapay koma ngarud ta itultuloytayo amin ti agbantay. Tuladentayo ni Jehova ket aganustayo, nga agyamantayo iti namnama nga intedna kadatayo. Ken bayat a simamatalek nga agridamtayo, sapay koma ta sititibker a salimetmetantayo ti namnama a biag nga agnanayon. Iti kasta, dagitoy a naimpadtuan a kari ti sigurado nga agaplikar kadatayo: “[Ni Jehova] itan-oknakanto a mangtagikua iti daga. Inton magessat dagidiay nadangkes, makitamto dayta.”​—Salmo 37:34.

[Footnotes]

Ania ti Sungbatyo?

• Kasano a maparayraytayo ti pammatitayo nga asidegen ti panungpalan daytoy sistema ti bambanag?

• Ania ti maadal iti kapadasan da Pedro, Santiago, ken Juan?

• Ania a tallo a galad ti tumulong kadatayo nga agtalinaed a siririing iti naespirituan?

• Apay a tiempo itan nga ‘itultuloy a salimetmetan a sititibker ti adda kadatayo’?

[Kahon/Ladawan iti panid 21]

“Naragsak Daydiay Agtultuloy a Manginanama.”​—Daniel 12:12

Iladawanyo ti maysa a guardia nga agatap nga adda naiplano a panagtakaw iti bambantayanna a lugar. Iti rabii, sipsiputan a naimbag ti guardia ti aniaman nga uni a pagilasinan ti kaadda ti mannanakaw. Kada oras, agsipsiput iti mangngeg wenno makitana. Iti kasta, nalaka a maawatan no maallilaw iti di umiso a pagilasinan​—ti uni ti pul-oy ti angin wenno karasakas ti pusa.​—Lucas 12:39, 40.

Mabalin met a mapasamak ti kasta kadagidiay ‘sigagagar nga agur-uray iti pannakaipalgak ni Apotayo a Jesu-Kristo.’ (1 Corinto 1:7) Impagarup dagiti apostol nga ‘isubli ni Jesus ti pagarian iti Israel’ kalpasan unay ti panagungarna. (Aramid 1:6) Kalpasan ti sumagmamano a tawen, naipalagip kadagiti Kristiano idiay Tesalonica nga iti masanguanan pay laeng a mapasamak ti kaadda ni Jesus. (2 Tesalonica 2:3, 8) Ngem nupay adda dagiti saan a natungpal a namnamaenda mainaig iti aldaw ni Jehova, dagiti nagkauna a pasurot ni Jesus dida pinanawan ti dalan nga agturong iti biag.​—Mateo 7:13.

Iti kaaldawantayo, saantayo koma a mabannog nga agbantay gapu iti pannakaupay iti kasla naladaw nga iyaay ti panungpalan daytoy sistema ti bambanag. Mabalin a maallilaw ti maysa nga alerto a guardia iti di umiso a pagilasinan, ngem nasaysayaat laengen nga agtalinaed nga agbantay! Dayta ti trabahona. Kasta met laeng kadagiti Kristiano.

[Ladawan iti panid 18]

Kombinsidokayo kadi nga asidegen ti aldaw ni Jehova?

[Dagiti Ladawan iti panid 19]

Makatulong dagiti gimong, kararag, ken nasayaat nga ugali iti panagadal tapno makapagtultuloytayo nga agbantay

[Ladawan iti panid 22]

Kas ken Margaret, siaanus ken siaaktibotayo koma nga agtultuloy nga agbantay