Ti Biag ken Ministerio ni Jesus

“Pudno a Daytoy ket Anak ti Dios”

DI PAY nagbayag ni Jesus iti kayo idi, iti tengngat’ aldaw, napasamak ti maysa a misterioso, tallo-oras-kabayagna a kinasipnget. Saan a daytat’ gapu ti eklipse a solar, yantangay mapaspasamak laeng daytoy iti panawen ti baro a bulan, ken kabus ti bulan iti tiempo ti Paskua. Mainayon pay, dagiti eklipse a solar agpaut laeng ti sumagmamano a minuto. Gapuna ti kinasipnget addaan nadiosan a namunganayan! Daytat’ nalabit namagsarimadeng kadagidiay manguy-uyong ken Jesus, ken nangpasardeng pay kadagiti panangum-umsida.

No ti nakabutbuteng a pagsidsiddaawan napasamak sakbay ti panangtubngar ti maysa a managdakdakes iti kaduana ken indawatna ken Jesus nga isut’ laglagipenna, mabalin a daytat’ maysa a makagapu iti panagbabawina. Nalabit bayat iti kinasipngetna a dagiti uppat a babbai, awan sabali, ti ina ni Jesus ken ni Salome a kabsatna, ni Maria Magdalena, ken ni Maria nga ina ni apostol Santiago a Basbassit, nga immasidegda idiay kayo a pagtutuokan. Ni Juan, ti apostol a dinungdungngo ni Jesus, adda met a kaduada idiay.

Anian ti ‘pannakaduyok’ ti puso ti ina ni Jesus bayat a buybuyaenna ti anak a pinaspasusona ken tinagibina a nakabitin sadiay nga agtutuok! Kaskasdi, pampanunoten ni Jesus, saan a ti bukodna nga ut-ot, no di ket ti pagimbagan ni inana. Buyogen dakkel a rigat, tinung-edanna ni Juan ket kunana ken inana: “Babai, adtoy! Ti anakmo!” Sa, timmung-ed ken Maria, kunana ken Juan: “Adtoy! Ti inam!”

Iti dayta intalek ni Jesus ti panangaywan ken inana, a kaawatan balo itan, iti dungdungnguenna unay nga apostol. Inaramidna daytoy ta dagiti dadduma nga annak a lallaki ni Maria ti di pay nangipamatmat ti pammati kenkuana. Gapuna nangted nasayaat nga ulidan iti panangipaay saan laeng a kadagiti pisikal a kasapulan ni inana no di ket pay dagiti naespirituan a kasapulanna.

Iti agarup maikatlo iti malem, kuna ni Jesus: “Mawawak.” Sa, idi mariknana a ni Amana, iti arigna, ket inikkatnan ti pannalaknibna kenkuana tapno masuot ti kinatarnawna aginggat’ punget, isut’ nagpukkaw iti dakkel a timek: “Diosko, Diosko, apay-apay binaybay-annak?” Idi mangngegda daytoy, dagiti sitatakder iti asideg kinunada: “Kitaenyo! Ni Elias ti ayabanna.” Ket dagus a timmaray ti maysa kadakuada ket, babaen panangusarna ti espongha a naipasagepsep iti naalsem nga arak idiay murdong ti sukdal a hisopo, inikkanna ti mainum. Ngem dadduma kunada: “Bay-am! Kitaentayo no umay ni Elias a mangisalakan kenkuana.”

Idi awaten ni Jesus ti naalsem nga arak, nagpukkaw: “Natungpalen!” Wen, naitungpalna aminen a nangibaonan ni Amana kenkuana ditoy daga nga aramiden. Kamaudiananna, kunana: “Ama, kadagita imam ti pangitalkak itoy espirituk.” Ngarud inkumit ni Jesus iti Dios ti puersa ti biagna a sitatalek a daytat’ isublinto ti Dios manen kenkuana. Kalpasanna indumogna ti ulona ket natayen.

Iti kanito a nauyosen ti maudi nga anges ni Jesus, adda napigsa a ginggined, a pinisipisina dagiti batbato. Ti ginggined ti nakapigpigsa ta dagiti tanem a pakalaglagipan idiay ruar ti Jerusalem naglukatda, ket naipuruak dagiti bangkay manipud kadakuada. Ket dagiti naglabas, a nakakita kadagiti bangkay a nagparang, simrekda iti siudad ket impadamagda dayta.

Mainayon pay, iti kanito a natay ni Jesus, ti napuskol a kurtina a namagsina ti Nasantuan ken ti Nasantuan Unay idiay templo ti Dios napigis a nagkaddua, manipud ngato agingga iti baba. Kaawatan a daytoy nagpintas pannakabordana a kurtina ket agarup 18 metros ti kangatona ken nakadagdagsen! Ti nakaskasdaaw a milagro saan laeng a nangiparangarang ti pungtot ti Dios maibusor kadagiti mammapatay iti Anakna no di ket ipamatmat dayta a ti iseserrek iti Nasantuan Unay, iti langit mismo, ket pinagbalin itan a posible babaen iti ipapatay ni Jesus.

Ket, idi narikna dagiti tattao ti ginggined ken nakitada a mapaspasamak dagiti bambanag, nagbutengda ti kasta unay. Ti opisial ti buyot nga inkargado iti panangpapatay nangted dayaw iti Dios: “Pudno a daytoy ket Anak ti Dios,” kunana. Mabalin nga isut’ siimatang idi a ti kalintegan ti nadiosan a kinaanak napagsasaritaan idi maukom ni Jesus iti saklang ni Pilato. Ket itan isut’ kumbinsido a ni Jesus ket Anak ti Dios, wen, pudpudno nga isut’ katan-okan a tao a nagbiag pay laeng.

Uray met dagiti dadduma naparmekda kadagitoy namilagruan a pasamak, ket rinugianda ti agawiden a dandanogenda dagiti barukongda, kas simbolo ti nasaem a ladingit ken bainda. Agbuybuya iti adayo isuda dagiti babbai nga adalan ni Jesus a natignay unay kadagitoy napateg a paspasamak. Ni apostol Juan adda met idi a siiimatang. Mateo 27: 45-56; Marcos 15:33-41; Lucas 23:44-49; 2:34, 35; Juan 19:25-30.

◆ Apay a di mabalin a ti eklipse a solar ti makagapu kadagiti tallo oras a kinasipnget?

◆ Di nagbayag sakbay ti ipapatayna, ania a nasayaat nga ulidan ti impaay ni Jesus kadagidiay natataenganen a nagannak?

◆ Ania dagiti maudi nga uppat a sasao ni Jesus sakbay ti ipapatayna?

◆ Aniat’ naaramidan ti ginggined, ken aniat’ pateg ti pannakapigis ti kurtina ti templo a nagkaddua?

◆ Kasano a ti opisial ti buyot nga inkargado iti panangpapatay naapektaran babaen kadagiti milagro?