Ti Biag ken Ministerio ni Jesus

Sibibiag ni Jesus!

IDI a nasarakan dagiti babbai nga awanen naggian iti tanem ni Jesus, nagdardaras a pimmanaw ni Maria Magdalena tapno ibagana kada Pedro ken Juan. Nupay kasta, dagiti dadduma a babbai nalawag a nagbatida iti tanem. Di nagbayag, nagparang ti maysa nga anghel ket inawisna ida iti uneg.

Ditoy nakita dagiti babbai ti sabali pay nga anghel, ket maysa kadagiti anghel kunana kadakuada: “Dikay agbuteng, ta ammok a sapsapulenyo ni Jesus a nailansa. Awan ditoy, ta nagungaren, a kas kinunana kadakayo. Umaykayo, kitaenyo ti disso a nakaitanemanna. Ket inkay a di agtaktak ket ibagayo kadagiti adalanna a nagungaren kadagiti natay.” Gapuna buyogen buteng ken dakkel a rag-o, dagitoy a babbai pimmanawda met.

Kabayatanna, nasarakanen ni Maria da Pedro ken Juan, ket imbagana kadakuada: “Inikkatda ti Apo manipud nakaitanemanna, ket dimi ammo no adino ti nangikabilanda kenkuana.” Dagdagus a dagiti dua nga apostol nagtarayda a pimmanaw. Ni Juan naparpartak a tumaray​—nalawag gapu ta ub-ubing​—ket immun-una a nakadanon iti tanem. Iti daytoy a tiempo nakapanawen dagiti babbai, gapuna awan uray maysa nga adda iti aglawlaw. Nagdumog, ni Juan simmirip iti tanem ket nakitana dagiti baredbed, ngem isut’ nagtalinaed idiay ruar.

Idi a simmangpet ni Pedro, di nagtaktak ket dagus a simrek iti uneg. Nakitana sadiay dagiti baredbed ken kasta met ti lupot a pinangbungon iti ulo ni Jesus. Daytat’ nalukot iti maysa a lugar. Simrek met itan ni Juan iti tanem, ket patiennan ti imbaga ni Maria. Ngem di naawatan da Pedro ken Juan a ni Jesus napagungaren, numan pay Isu masansan nga ibagana idi kadakuada nga Isu kastanto. Masmasdaawan, dagiti dua nagawidda, ngem ni Maria, a nagsubli idiay tanem, nagtalinaed.

Kabayatanna, dagiti dadduma a babbai nagal-alistoda tapno ibagada kadagiti adalan a napagungaren ni Jesus, kas imbilin dagiti anghel nga aramidenda. Bayat nga agtartarayda iti kapartakan a kabaelanda, sinabat ida ni Jesus ket kinunana: “Kumabblaawak kadakayo!” Nagparintumengda iti sakaananna, ket nagruknoyda kenkuana. Idin kinuna ni Jesus: “Dikay agbuteng! Inkayo, ibagayo kadagiti kakabsatko a mapanda idiay Galilea; ket idiay makitadakto.”

Sakbay dayta, idi a napasamak ti ginggined ket nagparang dagiti anghel, nakigtot dagiti agbambantay a soldado ket kas da la natay a tattao. Idi a nariingandan, dagdagus a napanda idiay siudad ket imbagada kadagiti panguluen a papadi no ania ti napasamak. Kalpasan pannakiuman kadagiti “lallakay” dagiti Judio, naaramid ti pangngeddeng a panangpadas a panangpaulimek ti banag babaen panangpasuksok kadagiti soldado. Imbilinda: “Kunaenyo, ‘dagiti adalanna immayda iti rabii ket tinakawda idi addakami a matmaturog.’”

Yantangay dagiti soldado a Romano madusada iti ipapatay gaput’ pannaturog iti puestoda, inkari dagiti papadi: “Ket no daytoy [damag ti pannaturogda] mangngegto ti gobernador, isu kasaominto ket dakami ti makaammo kadakayo.” Yantangay nawadwad ti pasuksok, inaramid dagiti soldado ti kas naibilin kadakuada. Kas resultana, ti ulbod a damag maipapan ti pannakatakaw ti bagi ni Jesus nagsaknap kadagiti Judio.

Ni Maria Magdalena, a nabati idiay tanem, nagladingit. Sadino ngata ti ayan ni Jesus? Nagdumog tapno kitaenna ti tanem, nakitana dagiti dua nga anghel a nagtagipuraw, a nagparang manen! Maysat’ situtugaw idiay uluanan ket ti sabali idiay sakaanan ti nakaipaiddaan ti bagi ni Jesus. “Babai, apay agsangsangitka?” inimtuodda.

“Inikkatda ditoy ti Apok,” insungbat ni Maria, “ket diak ammo no adino ti nangikabilanda kenkuana.” Idin timmaliaw iti likudan ket nakitana ti maysa a nangulit ti saludsod: “Babai, apay agsangsangitka?” Ket daytoy sinaludsodna pay: “Asino ti sapsapulem?”

Impagarupna a daytoy a tao isut’ agay-aywan ti minuyongan nga ayan ti tanem, ket kinunana kenkuana: “Apo, no sika ti nangikkat ditoy, ibagam kaniak no adino ti nangikabilam kenkuana, ket ipanawkonto ditoy.”

“Maria!” kinunana. Ket dagdagus naammuanna, babaen ti pamiliar a wagas a pannakisaritana kenkuana, nga isu ni Jesus. “Rab·boʹni!” (kayat na a sawen “Mannursuro”) impukkawna. Ket buyogen ti napalaus a rag-o, isut’ iniggamanna. Ngem kinuna ni Jesus: “Dinak sagiden. Ta saanak pay nga immuli ken Amak. Ngem inka kadagiti kakabsatko ket kunam kadakuada, ‘Umuliak ken Amak ken Amayo ken iti Diosko ken Diosyo.”

Itan nagtaray ni Maria iti disso a nagguummongan dagiti apostol ken padana nga ad-adalan. Innayonna ti salaysayna iti damag a naiteden dagiti dadduma a babbai maipapan pannakakitada iti napagungaren a Jesus. Kaskasdi, dagitoy a lallaki, a di namati kadagidi immuna a babbai, nalawag a dida met namati ken Maria. Mateo 28:3-15; Marcos 16:5-8; Lucas 24:4-12; Juan 20:2-18.

◆ Kalpasan pannakasarakda nga awanen naggian ti tanem, aniat’ inaramid ni Maria Magdalena, ket naaddaan dagiti dadduma a babbai ti ania a kapadasan?

◆ Kasanot’ panagtignay da Pedro ken Juan iti pannakasarakda nga awanen naggian ti tanem?

◆ Aniat’ nasabat dagiti dadduma a babbai iti dalanda a mangipadamag kadagiti adalan ti panagungar ni Jesus?

◆ Aniat’ napasamak iti agbambantay a soldado, ket aniat’ sungbat dagiti papadi iti impadamagda?

◆ Aniat’ napasamak idi nga agmaymaysa ni Maria Magdalena idiay tanem, ket aniat’ sungbat dagiti adalan kadagiti impadamag dagiti babbai?