Asidegen nga usaren ni Jehova ti Pagarianna a mangikkat iti amin a problematayo. Nakamaymayat dayta a damag isu a masapul a maammuan met ti dadduma. Kayat ni Jesus nga ibaga dagiti pasurotna daytoy a mensahe iti amin a tattao. (Mateo 28:19, 20) Kasano a tungtungpalen dagiti Saksi ni Jehova ti bilin ni Jesus?

1. Kasano a matungtungpal ita ti Mateo 24:14?

Impadto ni Jesus: “Ti naimbag a damag maipapan iti Pagarian maikaskasabanto iti intero a daga.” (Mateo 24:14) Maragragsakan dagiti Saksi ni Jehova a makiraman iti daytoy a napateg a trabaho. Ikaskasabami ti naimbag a damag iti intero a lubong iti nasurok a 1,000 a lengguahe! Kasapulan ti adu a panagregget ken nasayaat a panangorganisar tapno maitungpal daytoy a nagdakkel a trabaho. Saan a maaramid dayta no awan ti tulong ni Jehova.

2. Ania dagiti ar-aramidenmi tapno makasabaanmi dagiti tattao?

Mangasabakami sadinoman a pakasarakanmi kadagiti tattao. Kas kadagiti Kristiano idi umuna a siglo, mangaskasabakami “iti binalaybalay.” (Aramid 5:42) Gapu iti daytoy a sistematiko a pamay-an, minilion a tattao ti makasarsaritami kada tawen. Ngem mangaskasabakami met iti adu a publiko a lugar ta saan a kanayon nga adda dagiti tattao iti balbalayda. Kanayon a mangbirbirokkami iti oportunidad a mangibaga iti dadduma iti maipapan ken Jehova ken kadagiti panggepna.

3. Makinresponsabilidad iti panangikasaba iti naimbag a damag?

Masapul nga ikasaba ti amin a pudno a Kristiano ti naimbag a damag iti dadduma. Seriosokami iti daytoy a responsabilidadmi. Ar-aramidenmi ti amin a kabaelanmi a mangasaba ta ammomi a biag ti nakataya. (Basaen ti 1 Timoteo 4:16.) Saankami a masuelsuelduan, ta kuna ti Biblia: “Inawatyo nga awan bayadna, itedyo nga awan bayadna.” (Mateo 10:7, 8) Adu a tattao ti saan nga umaw-awat iti mensahemi. Ngem itultuloymi latta ti mangasaba ta paset dayta ti panagdaydayawmi ken Jehova ken mangparagsak dayta kenkuana.

AMMUEM TI AD-ADU PAY

4. Ikagkagumaanmi a makasarita ti amin a tattao

VIDEO: Panangasaba “iti Kaadaywan a Paset ti Daga” (7:38)

• Ania ti magusgustuam maipapan iti panagregget dagiti Saksi ni Jehova a mangasaba?

Basaen ti Mateo 22:39 ken Roma 10:13-15, sa pagsaritaan dagitoy a saludsod:

• Kasano nga ipakita ti ministeriomi nga ay-ayatenmi dagiti kaarrubami?

• Ania ti marikna ni Jehova kadagiti mangikaskasaba iti naimbag a damag?​—Kitaen ti bersikulo 15.

5. Katrabahuannakami ti Dios

Ipakita ti adu a kapadasan nga iturturong ni Jehova ti trabahomi. Kas pagarigan, idiay New Zealand, nasarakan ti kabsat nga agnagan Paul ti maysa a babai bayat a mangaskasaba iti binalaybalay iti maysa a malem. Iti agsapa dayta nga aldaw, nagkararag ti babai nga inusarna ti nagan ti Dios a Jehova, ket indawatna nga adda koma bumisita kenkuana. “Kalpasan ti tallo nga oras,” kuna ni Paul, “nagtuktokak iti ridawna.”

Basaen ti 1 Corinto 3:9, sa pagsaritaan daytoy a saludsod:

• Kasano nga ipakita dagiti kapadasan a kas iti nadakamat a kapadasan idiay New Zealand nga iturturong ni Jehova ti trabaho a panangasaba?

Basaen ti Aramid 1:8, sa pagsaritaan daytoy a saludsod:

• Apay a kasapulanmi ti tulong ni Jehova tapno maitungpalmi ti ministeriomi?

Ammom kadi?

Kada lawas, iti gimongmi iti tengnga ti lawas, masansanaykami a mangasaba. No napadasmon nga inatenderan dayta a gimong, ania ti makunam iti pannakasanay a maaw-awatmi?

6. Tungtungpalenmi ti bilin ti Dios a mangasaba

Idi umuna a siglo, pinadas dagiti bumusbusor a pasardengen dagiti pasurot ni Jesus a mangasaba. Indepensa dagiti nagkauna a Kristiano ti ‘legal a kalinteganda a mangikasaba iti naimbag a damag.’ (Filipos 1:7) Kasta met ti ar-aramiden dagiti Saksi ni Jehova ita.a

VIDEO: Legal a Panangidepensa iti Naimbag a Damag (2:28)

Basaen ti Aramid 5:27-42, sa pagsaritaan daytoy a saludsod:

• Apay a saankami nga agsardeng a mangasaba?​—Kitaen ti bersikulo 29, 38, ken 39.

SUMARIO

Binilin ni Jesus dagiti pasurotna nga ikasabada ti naimbag a damag iti amin a nasion. Tultulongan ni Jehova dagiti agdaydayaw kenkuana tapno maaramidda daytoy a trabaho.

Rebiu

• Kasano a maikaskasaba ti naimbag a damag iti intero a lubong?

• Kasano nga ipakita ti ministeriomi nga ay-ayatenmi dagiti kaarrubami?

• Panagkunam, makaparagsak ngata ti trabaho a panangasaba? Apay?

AGDISKOBREKA PAY

Kitaem no kasano a mangaskasaba dagiti Saksi ni Jehova iti dadakkel a siudad.

Special Metropolitan Public Witnessing Idiay Paris (5:11)

Kasano a nakasabaan dagiti Saksi ni Jehova dagiti refugee?

Naipaay ti Naespirituan a Kasapulan Dagiti Refugee (5:59)

Ammuem ti ibaga ti maysa a babai no apay a naragsak ti biagna kas amin-tiempo a manangaskasaba.

Naragsakak ta Pinilik Daytoy a Karera (6:29)

Ammuem dagiti importante a desision ti korte a nakatulong tapno agtultuloy a maikasaba ti naimbag a damag.

“Dimmatag iti Korte Dagiti Mangikaskasaba iti Pagarian” (Agturturayen ti Pagarian ti Dios!, kapitulo 13)

Insuro ni Jesus a masapul a mabautisaran dagiti Kristiano. (Basaen ti Mateo 28:19, 20.) Ngem ania ti bautismo? Ken ania ti masapul nga aramiden ti maysa tapno makualipikar nga agpabautisar?

1. Ania ti bautismo?

Ti sao a “bautismo” ket naggapu iti Griego a sao a ti kayatna a sawen ket “maitaneb” iti danum. Idi nabautisaran ni Jesus, interamente a naitaneb iti Karayan Jordan. Kalpasanna, “simmang-at manipud iti danum.” (Marcos 1:9, 10) Kasta met, no mabautisaran dagiti pudno a Kristiano, masapul nga interamente a maitaneb, wenno maipalnedda, iti danum.

2. Ania ti ipakita ti pannakabautisar ti maysa?

No agpabautisar ti maysa, ipakpakitana nga indedikarnan ti biagna ken Jehova a Dios. Kasano ti panagdedikar? Sakbay a mabautisaran ti maysa, agkararag tapno ibagana ken Jehova a kayatna ti agserbi Kenkuana iti agnanayon. Ikarina a ni laeng Jehova ti pagserbianna ken ti panagaramid iti pagayatan ti Dios ti agbalin a kapatgan iti biagna. Pilienna a ‘tallikudan ti bagina ken agtultuloy a surotenna’ dagiti pannursuro ken inaramid ni Jesus. (Mateo 16:24) No agdedikar ken agpabautisar, posiblen nga agbalin a nadekket a gayyem ni Jehova ken dagiti padana nga agdaydayaw iti Dios.

3. Ania dagiti masapul nga aramiden ti maysa tapno mabautisaran?

Sakbayka a mabautisaran, masapul nga am-ammuem ni Jehova ken pabilgem ti pammatim kenkuana. (Basaen ti Hebreo 11:6.) Bayat nga umad-adu ti pannakaammom, bumilbileg met ti pammatim, ket lalo met a maayatmo ni Jehova. Sigurado a kayatmonton nga ibaga iti dadduma ti maipapan kenkuana ken suroten dagiti estandartena. (2 Timoteo 4:2; 1 Juan 5:3) No ti maysa ket agbibiagen a ‘makaay-ayo ken Jehova tapno naan-anay a maparagsakna,’ mabalinnan ti agdesision nga idedikar ti biagna iti Dios ken agpabautisar.​—Colosas 1:9, 10.a

AMMUEM TI AD-ADU PAY

4. Makasursurotayo iti panagpabautisar ni Jesus

Basaen ti Mateo 3:13-17 para iti ad-adu pay a detalye maipapan iti panagpabautisar ni Jesus. Kalpasanna, pagsaritaan dagitoy a saludsod:

• Tagibi pay laeng kadi ni Jesus idi nabautisaran?

• Kasano ti pannakabautisarna? Nawarsian laeng kadi iti danum?

Kalpasan a nabautisaran ni Jesus, rinugianna nga aramiden ti espesial a trabaho nga inted ti Dios. Basaen ti Lucas 3:21-23 ken Juan 6:38, sa pagsaritaan daytoy a saludsod:

• Kalpasan a nabautisaran ni Jesus, ania a trabaho ti inyun-unana iti biagna?

5. Magaw-atmo dagiti kualipikasion para iti bautismo

Iti rugrugi, mabalin a kasla saanmo a kaya ti agdedikar ken agpabautisar. Ngem dumtengkanto iti punto a mariknam a nakasaganakan a mangaramid iti dayta a napateg a desision. Tapno makitam ti dadduma a nangaramid iti dayta, i-play ti VIDEO.

VIDEO: No Kasano ti Agbalin a Gayyem ni Jehova (1:11)

Basaen ti Juan 17:3 ken Santiago 1:5, sa pagsaritaan daytoy a saludsod:

• Ania ti makatulong iti maysa tapno makapagsagana nga agpabautisar?

1. Ti panagdedikar ket panangibaga ken Jehova a kayattayon ti agserbi kenkuana iti agnanayon

2. Ti panagpabautisar ket panangipakaammo iti publiko a nagdedikartayon iti Dios

6. Agbalintayo a paset ti pamilia ni Jehova no agpabautisartayo

No agpabautisartayo, agbalintayo a paset ti agkaykaysa a sangalubongan a pamilia. Uray no nagduduma ti naggapuan, kasasaad ti biag, wenno napalabastayo, agpapada ti patpatien ken estandarte iti moral a sursurotentayo. Basaen ti Salmo 25:14 ken 1 Pedro 2:17, sa pagsaritaan daytoy a saludsod:

• Ania ti epekto ti panagpabautisar ti maysa iti relasionna ken Jehova ken iti dadduma nga agdaydayaw Kenkuana?

SUMARIO

Insuro ni Jesus a masapul a mabautisaran dagiti Kristiano. Tapno mabautisaran ti maysa, masapul a maaddaan iti nabileg a pammati ken Jehova, surotenna dagiti estandartena, ken idedikarna ti biagna Kenkuana.

Rebiu

• Ania ti bautismo, ken apay nga importante dayta?

• Ania ti koneksion ti panagdedikar ken panagpabautisar?

• Ania dagiti masapul nga aramiden ti maysa sakbay a maidedikarna ti biagna ken makapagpabautisar?

AGDISKOBREKA PAY

Ammuem ti kaipapanan ti bautismo ken dagiti kamali a kapanunotan maipapan iti dayta.

“Ania ti Bautismo?” (Artikulo iti website)

Ammuem dagiti masapul nga aramiden ti maysa tapno mabautisaran.

“Ayat ken Apresasion ken Jehova ti Pakatignayam nga Agpabautisar” (Ti Pagwanawanan, Marso 2020)

Basaem no ania ti nangibasaran ti maysa a lalaki iti desisionna nga agpabautisar.

“Kayatda a Sukimatek a Mismo ti Kinapudno” (Ti Pagwanawanan, Pebrero 1, 2013)

Ammuem no apay a nagsayaat a desision ti panagpabautisar ken no kasanoka nga agsagana para iti dayta.

“Masapul Kadi nga Agpabautisarak?” (Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 2, kapitulo 37)