No Kasanot’ Pananggun-od iti Rag-o iti Panagaramid ti Adalan
MAYSA kadagiti napalaus a rag-o a mabalin a mapasaran ti maysa a tao isut’ panagbalin a katrabahuan ti Dios. Ita, karaman iti trabaho ti Dios ti panangurnong kadagiti tao nga agannayas iti kinalinteg nga agturong iti kongregasion Kristiano ken panangsanay kadakuada para iti biag kas Kristiano ita ken kasta met maipaay iti pannakaisalakan nga agturong iti baro a lubong.—Mikias 4:1-4; Mateo 28:19, 20; 2 Pedro 3:13.
Maysa a gubuayan ti dakkel a rag-o para kadagiti Saksi ni Jehova idiay Latin America ti pannakakita iti sangamilion a tao a nagbalin nga adalan ni Jesu-Kristo sipud pay idi 1980. Iti daytoy nabunga a tay-ak, a sadiay adu ti mangraem ken mamati iti Biblia, nakaad-adu ti natulongan ti sumagmamano nga amin-tiempo a ministro a mangidedikar ti biagda ken Jehova. Iti kinaadu ti kapadasan, nalabit nga adda maikunada kadatayo maipapan iti rag-o iti panagaramid ti adalan. Mabalin a makatulong ti sumagmamano kadagiti singasingda tapno magun-odyo ti rag-o iti panagaramid kadagiti adalan iti lugar a pagnanaedanyo.
Panangilasin Kadagiti Manamnama a “Karnero”
“Iti aniaman a siudad wenno purok a serkanyo, birukenyo no asino iti dayta ti maikari,” kinuna ni Jesus idi imbaonna dagiti apostolna a mangasaba. (Mateo 10:11) No sumarungkarkayo kadagiti tao, kasanoyo a mailasin dagidiay mabalin a matulongan iti naespirituan a pamay-an? Kuna ni Edward, maysa nga amin-tiempo a ministro iti nasuroken a 50 a tawen: “Ipakpakitada dayta babaen kadagiti napasnek a panagsaludsod ken pannakapnekda no naipaay dagiti sungbat manipud iti Kasuratan.” Inayon pay ni Carol: “No agipudno kaniak ti maysa a tao iti personal a parikut wenno pakadanagan, daytat’ pudpudno a maysa a panagpatulong. Ikagumaak ti agbirok iti makatulong nga impormasion kadagiti publikasion ti Watch Tower Society. Ti kasta a personal nga interes masansan nga agresulta iti panagadal iti Biblia.” Ngem, saan a kanayon a nalaka a mailasin dagiti napasnek a tattao. Isalaysay ni Luis: “Dadduma a kasla interesado unay agparang a saan met gayam nga interesado, ngem ti dadduma a kasla bumusbusor idi damo nagbalbaliwda idi mangngegda ti talaga nga ibagbaga ti Biblia.” Tangay adu a taga-Latin America ti mangraem iti Biblia, kunana pay, “Mailasinko dagidiay mabalin a matulongan iti naespirituan no silalakada nga awaten ti isursuro ti Biblia kalpasan nga ipakitak dayta kadakuada.” Ti panangtulong iti kakasta a “maikari” tapno rumang-ay iti naespirituan mangyeg iti pudpudno a rag-o ken pannakapnek. Kasanoyo a maaramid daytoy?
Panangirugi Kadagiti Panangyadal iti Biblia
Ti panangaramat kadagiti katulongan iti panagadal iti Biblia nga impaay ti “matalek ken masirib nga adipen” ti gagangay a kasayaatan a pamay-an tapno matulongan dagiti tao a mangtarus iti kinapudno ti Biblia. (Mateo 24:45) Kasanoyo a mapatanor ti panangipateg iti kakasta a katulongan iti panagadal iti Biblia? Kuna ni Edward: “Tangay nagduduma unay ti kasasaad, personalidad, ken panangmatmat dagiti tao, ikagkagumaak ti agbalin a mannakibagay iti panangirugi kadagiti panagadal.” Saanyo a maaramat ti isu met laeng a wagas iti isuamin.
Iti dadduma, mabalin a kasapulan ti adu nga impormal a saritaan iti Kasuratan sakbay nga idatag ti maysa a libro a pagadalan iti Biblia. Nupay kasta, ipadamag ti maysa nga agassawa a misionero: “Gagangayen nga itukonmi ti panagadal iti damo nga isasarungkar.” Kasta met, maysa a Saksi a nakatulong iti 55 a tao agingga iti punto ti panagdedikar kunana: “Ti kangrunaan a pamay-an iti panangirugik iti panangyadal iti Biblia isut’ direkta a panangusig iti libro a Mabalinyo ti Agbiag nga Agnanayon iti Paraiso a Daga.” Nupay saan a kayat ti dadduma ti idea a panangadal iti aniaman, magagaran ti dadduma a mangadal ti aniaman a patienda a makatulong kadakuada iti biag. Masansan nga agparang a makaawis kadagitoy ti tukon a libre a panagadal iti Biblia iti pagtaengan. Ilawlawag ti sumagmamano a misionero daytoy a tukon ket kalpasanna kunaenda: “Kayatko nga ipakita kenka no kasanotay nga aramiden dayta. No magustuam, mabalinmo nga itultuloy. No saan, adda kenkan dayta.” No maitukon iti kasta a pamay-an, saan nga agdanag dagiti tao nga umawat.
Kuna ti maysa pay a Saksi, a nakatulong kadagiti adu a nakurapay ken nababa ti adalda: “Natakuatak a nangnangruna a makatulong dagiti tract iti panangirugi kadagiti panangyadal iti Biblia.” Aniaman a publikasion ti aramatenda, ti Biblia ti kangrunaan nga ipagpaganetget dagiti amin-tiempo a mannursuro. Kuna ni Carola: “Iti damo a panagadal, agaramatak laeng kadagiti ladawan ken agarup lima a kasuratan, tapno maparuar dagiti kangrunaan a punto ken saan nga agparang a narikut ti Biblia.”
Panamagtalinaed a Nabiag ti Interes
Pagragsakan dagiti tao ti pannakariknada iti irarang-ay, gapuna isingasing ni Jennifer: “Aramidenyo a nabiag ti panagadal. Parang-ayenyo.” Ti regular a panangidaulo iti panagadal nga awan dagiti lawas a malanganan tumulong met kadakuada a makarikna a rumangrang-ayda. Ilawlawag ti maysa nga special pioneer a dimmakkel iti aw-away ti kinapateg ti simple a panangilawlawag ken panangipamaysa kadagiti kangrunaan a punto, tapno rumang-ay uray dagidiay addaan nababa nga adal. Kunana: “Iti purokmi, masapul a bisibisanmi ti daga iti danum kalpasan ti panangmula kadagiti bin-i. No palayasánmi ti talon, tumangken ti rabaw ti daga a saan a masalput dagiti rumusrusing a bukel, ket matayda. Kasta met, no adu unay dagiti punto nga iyallatiwyo kadagiti kabbaro nga interesado, mabalin a kasla narigat unay dayta ket sumukoda.” Uray dagiti tao a nausisa masapul nga agsursuro a mangipamaysa iti maysa a tema iti maysa gundaway no kayatda ti rumang-ay iti pannakaawat. Kinuna ni Jesus kadagiti apostolna: “Adu pay a bambanag ti sawek kadakayo, ngem dikay kabaelan nga awiten ida iti agdama.”—Juan 16:12.
Maysa pay a pamay-an tapno mapagtalinaed a nabiag ti interes isut’ panangparegta kadagidiay sarsarungkaranyo nga agtultuloy a mangpanunot iti Sao ti Dios uray no awankayo. Isingasing ni Yolanda: “Mangibatikay iti maysa a saludsod. Ikkanyo ida iti aramidenda iti pagtaengan, kas ti panangbasa iti maysa paset ti Biblia wenno panangsukimat iti maysa a tema a pakaseknanda.”
Panangpataud iti Ayat ken Jehova
Dumakkel ti rag-oyo no tulonganyo dagiti estudianteyo nga agbalin a “managtungpal iti sao, ken saan a managdengngeg laeng.” (Santiago 1:22) Kasanoyo a maaramid dayta? Matignay dagiti pudno a Kristiano iti panagayat ken Jehova. Ilawlawag ni Pedro, a taga Mexico: “Saan a mabalin nga ayaten dagiti tao ti maysa a dida am-ammo, gapuna iti damo pay laeng a panagadal, isurokon kadakuada ti nagan ti Dios manipud iti Biblia, ken mangbirokak kadagiti gundaway a mangipaganetget kadagiti kababalin ni Jehova.” Iti panagsasarita, mapabilegyo ti panangipateg ken Jehova babaen ti panangyebkas kadagiti riknayo para kenkuana. Kuna ni Elizabeth: “Kanayon nga ikagkagumaak a dakamaten ti kinaimbag ni Jehova. Kadagiti panangyadalko, no makakitaak iti maysa a napintas a sabong, makaay-ayo a tumatayab, wenno naparagsit a kuting, kanayon a dakamatek nga aramid ni Jehova dayta.” “Dakamatenyo ti maipapan iti kari ti Dios a baro a lubong kas ti pudpudno nga ammoyo iti dayta,” isingasing ni Jennifer. “Isaludsodyo no ania ti kayatda nga aramiden idiay baro a lubong.”
No mennamennaen ti maysa a tao buyogen ti panangipateg dagiti masursurona maipapan ken Jehova, mayukuok dayta iti pusona ken matignay iti daytoy. Ngem saanna a mamennamenna no awan malagipna. Makatulong iti memoria ti ababa a panangrepaso iti tallo wenno uppat a kangrunaan a punto kalpasan ti tunggal panagadal. Ipaisurat ti adu a mangyad-adal iti Biblia kadagiti kabbaro dagiti pannulbek a kasuratan a kakuyog ti maysa a nota iti likud ti Bibliada. Ilawlawag ti maysa a misionera manipud England ti maysa pay a gunggona ti panagrepaso: “Saludsodek no kasanoda a nagunggonaan iti impormasion. Daytoy ti mangtignay kadakuada nga agmennamenna buyogen ti panangipateg kadagiti dana ken linteg ni Jehova.”
Kuna ti maysa a matalek a Saksi a nagturpos iti maikatlo a klase ti Gilead: “Kasapulan a nabaratayo. Rumbeng a maanninaw dagiti estudiantetayo a patientayo ti isursurotayo.” Mabalin a makaimpluensia ti pammati a nangtignay kadakayo nga agbalin a naragsak a “managaramid iti trabaho” no iyebkasyo dayta.—Santiago 1:25.
“Naammuak nga as-asideg dagiti tao iti Dios no tulongak ida a mangbigbig kadagiti sungbat dagiti kararagda,” kuna ti maysa a Saksi a nakatulong iti adu nga agdayaw ken Jehova. “Ipaayak ida kadagiti pagarigan manipud iti bukodko a kapadasan, a kas iti daytoy: Idi dimtengkam iti kaduak iti maysa a baro a destino kas payunir, adda laeng bassit a natengmi, sangabalkut a mantekilia, ken awan kuartami. Naibusmin ti pangrabiimi ket nakunami, ‘Awanton ti pamigatta.’ Inkararagmi dayta, sa naturog. Kabigatanna, maysa a Saksi a taga sadiay ti dimteng ken nakiam-ammo, a kunana, ‘Inkararagko a mangibaon koma ni Jehova kadagiti payunir. Ita makaduakayo iti agmalmalem, ngem tangay agnanaedak iti away, masapul a makipangaldawak kadakayo, isu a nagbalonak para kadatay amin.’ Nakaad-adu a karne ti baka ken nateng. Kanayon nga ibagbagak kadagiti estudiantek a pulos a dinatay baybay-an ni Jehova no iyun-unatay ti Pagarianna.”—Mateo 6:33.
Mangitukon iti Praktikal a Tulong
Ad-adu pay ti nairaman iti panagaramid kadagiti adalan ni Kristo ngem iti panangyadal iti Biblia. Kuna ti maysa a misionero a nagserbi iti adun a tawen kas agdaldaliasat a manangaywan: “Ipaayanyo ida iti panawen. Dikay agdardaras a pumanaw kalpasan ti panagadal. No mayanatup, agtalinaed ken makitungtong biit.” Kuna ni Elizabeth: “Mangipakpakitaak iti interes kadakuada agsipud ta biag ti nairaman. Adu a gundaway a madanaganak kadakuada a kas kettay annakko ida.” Insingasing met ti dadduma a Saksi: “Sarungkaranyo ida no masakitda.” “No asidegkayo iti pagtaenganda, kas pagarigan iti tay-ak ti ministerio, sarungkaranyo ida iti apagbiit tapno iyam-ammo kadakuada ti dadduma pay a Saksi.” Kuna ni Eva: “Agimdeng a naimbag tapno matarusan ti nalikudan ken kasasaad iti biag ti tao. Dagitoy ti mangapektar iti panangmatmat dagiti tao iti kinapudno ken mabalin a manglapped iti panagrang-ayda. Agbalinkay a gayyemda tapno maaddaanda iti talek a mangibaga kadagiti parikutda.” Inayon pay ni Carol: “Napateg ti napudno nga interes iti tao tangay dagiti panagbalbaliw nga iyeg ti kinapudno iti biagna no dadduma kaipapananna ti pannakapukaw ti pamilia ken dagiti gagayyem. Iti kaaduanna, nasayaat no ammo ti estudiante no sadinot’ pagnanaedantayo ken addaan talek nga umay kadatayo iti aniaman nga oras.” Tulonganyo a mangmatmat iti kongregasion kas baro a pamiliana.—Mateo 10:35; Marcos 10:29, 30.
“Agalistokayo a mangitukon iti praktikal a tulong. Katugawyo ida kadagiti gimong, ken tulonganyo ida kadagiti annakda,” kuna ni Yolanda. Paset amin ti panagaramid ti adalan ti panangipakita kadagiti kabbaro no kasanoda a sanayen dagiti annakda, parang-ayen ti pagalagadanda iti kinadalus, agsagana iti komento kadagiti gimong, ken panangiparang kadagiti paset iti Teokratiko nga Eskuelaan iti Panagministro. Kuna pay ti maysa a sister: “Napateg a sanayen dagiti kabbaro para iti ministerio. No maliwayan daytoy a paset ti panagsanay, agtalinaed ti dadduma a mabuteng iti trabaho a panangasaba, mapukawda ti rag-o iti panagserbi ken Jehova, ket saanda a makapagibtur.” Gapuna mangipaay iti naannad a panangsanay iti trabaho a panagbalaybalay, iti panagsarungkar, ken iti panangirugi iti panagadal iti Biblia. Dakkel ti rag-oyo no makitayo a rumang-ay ti estudianteyo babaen ti tulong ken panangiwanwanyo.
Papigsaen Ida nga Agibtur
“Adda pagannayasan a maliwayan ti panagadal no nabautisaranen ti estudiante,” mamakdaar ti maysa nga aduan kapadasan a managaramid ti adalan. Rumbeng a laglagipen agpada ti mannursuro ken ti estudiante a ti kabbaro a nabautisaran a Kristiano ti saan pay a nataengan iti naespirituan. Adu pay ti aramidenna tapno rumang-ay ti pammatina, iti panangipategna iti linteg ti Dios, ken iti ayatna ken Jehova. Napateg a paregtaen a maaddaan iti nasayaat nga ugali iti personal a panagadal tapno agtultuloy a rumang-ay.—1 Timoteo 4:15.
Nalabit a kasapulan ti kabbaro ti tulong tapno rumang-ay ken agbalin managpadagus a kameng ti timpuyog dagiti agkakabsat. Mabalin a kasapulanna ti panangiwanwan iti panangsango kadagiti kinaimperpekto dagiti kakabsat bayat a dumekdekket kadakuada. (Mateo 18:15-35) Nalabit a kasapulanna ti tulong tapno agbalin a nasigo a mannursuro, a makaaramid iti bukodna a panagsukimat. Isalaysay ti maysa a misionera: “Maysa nga estudiante kalpasan a nabautisaran ti agtarigagay a mangparang-ay iti kabaelanna kas mannursuro, gapuna kinunana kaniak, ‘Kasapulan a mangidauloak iti maysa a baro a panagadal iti sumaganad a lawas, ngem masapul nga irepasok iti memoriak dagiti immuna a kapitulo a napagadalak. Mabalin kadi a pagadalanta manen dagitoy a kapitulo, a saggaysa, tapno mailistak ti pannakailawlawag dagiti kasuratan ken dagiti ilustrasion, ket kalpasanna maaramatko ida no mangidauloak iti panagadal?’ Nagbalin a nalaing a mannursuro, nga uppat kadagiti estudiantena ti nabautisaran iti maysa nga asamblea.”
No Apay a Nakapatpateg ti Panagaramid ti Adalan
“Ti panagaramid kadagiti adalan kaipapananna ti ad-adu a managdaydayaw ken Jehova. Kaipapananna ti biag kadagidiay mangawat iti kinapudno,” kuna ni Pamela. “Pagaayatko nga isuro ti kinapudno iti sabsabali—nakasaysayaat dayta! Makita ti maysa dagiti estudiante nga in-inut a rumang-ay, a mangaramid kadagiti panagbalbaliw iti biagda ken mangsaranget kadagiti bangen a kasla di mapagballigian no saan a gapu iti espiritu ni Jehova. Adu kadagidiay nasursuruan nga agayat ken Jehova ti nagbalin a nadekket a gagayyemko.”
“No malaglagipko dagidiay natulongak nga agbalin nga adalan,” isalaysay ti maysa a misionera manipud Germany, “makitak ti sumagmamano a managbabain unay a tattao a napalalo ti irarang-ayda kas dagiti ministro ti Dios a kasla di nakappapati. Makitak dagiti tao a nagballigi kadagiti dadakkel a bangen, nalawag a gapu iti tulong ni Jehova. Makitak dagiti pamilia a dati a nawarawara ngem ita nagkaykaysadan—nararagsak nga annak nga addaan kadagiti responsable a nagannak. Makitak dagiti tao a mangtagtagiragsak iti addaan kaipapanan a biag, a mangidaydayaw ken Jehova. Daytoy ti rag-o iti panagaramid kadagiti adalan.”
Wen, maysa a gubuayan ti awan kaaspingna a rag-o ti panagbalin a katrabahuan ni Jehova a Dios iti panagaramid kadagiti adalan. Napaneknekan dayta kadagiti kapadasan dagiti misionero ken dagiti payunir. Magun-odyo ti kasta met laeng a rag-o ken pannakapnek no iyaplikaryo dagiti singasing ken aramidenyo dayta iti amin-kararua. Buyogen ti bendision ni Jehova, maan-anayto ti rag-oyo.—Proverbio 10:22; 1 Corinto 15:58.