Ti Panangmatmat ti Biblia

Mainanama Kadi Dagiti Pudno a Kristiano ti Pannalaknib ti Dios?

TAPNO agitulod kadagiti pangsaranay a bambanag kadagiti padada a managdaydayaw, nag-convoy dagiti Kristiano, kalpasan ti panagkararag, iti dinadael-gubat a lugar a mabalin a pakatayanda. Sitatalged a nalasatanda dayta, a nagsiddaawan unay dagiti aggugubat a buyot. Sinalakniban kadi ida ti anghel ti Dios?

Maysa nga agassawa a Kristiano nga agserserbi kas ministro iti adun a tawen ti natay idi natnag ti maysa nga eroplano iti lugar a pangaskasabaanda iti binalaybalay. Iti daydi a partikular a kanito, apay a saan ida nga inlisi ti anghel ti Dios wenno inturong ti eroplano iti sabali a lugar?​—Idiligyo ti Aramid 8:26.

No pagdiligen dagitoy a pasamak, mayimtuodtayo: Apay a matay ti dadduma a Kristiano bayat nga ar-aramidenda ti pagayatan ti Dios, idinto ta makalasat ti dadduma, masansan nga iti nakapegpeggad a kasasaad? Mainanama kadi dagiti Kristiano ti pannalaknib ti Dios, nangnangruna kadagitoy a napeggad a “maudi nga al-aldaw”?​—2 Timoteo 3:1.

Ti Panggep ti Pannalaknib ti Dios

Inkari ni Jehova a Dios a bendisionan ken salaknibanna ti ilina. (Exodo 19:3-6; Isaias 54:17) Nangnangruna nga inaramidna daytoy idi umuna siglo, idi arigna maladaga pay laeng ti kongregasion Kristiano. Nagadu ti tunggal kita ti milagro. Pinaadu ni Jesus ti makan a pangtaraon iti rinibu; pinaimbagna ken dagiti pasurotna ti tunggal kita ti sakit ken an-annayen, pinaruarda dagiti napigpigsa ngem tao nga espiritu manipud kadagiti linuganan-demonio, ket nangpagungarda pay kadagiti natay. Babaen iti panangiwanwan ti Dios, dimmakkel ti arigna maladaga a kongregasion ken naipasdek a sititibker. Kaskasdi, agpapan pay iti amin a nabatad a panangsuporta ti Dios, nagsagaba ti adu a matalek a Kristiano iti mabalin nga awagan a di naintiempuan nga ipapatay.​—Idiligyo ti Salmo 90:10.

Usigenyo dagiti kasasaad da Santiago ken Juan, annak ni Zebedeo. Idi napilida kas apostol, kaduada ni Pedro kadagiti kasisingedan a gagayyem ni Kristo.a Ngem napapatay ni Santiago kas martir idi tawen 44 K.P., idinto ta nagbiag ni kabsatna a Juan agingga iti arinunos ti umuna a siglo. Nabatad nga agpadada a nangaramid iti pagayatan ti Dios. Apay a napalubosan a matay ni Santiago, idinto ta nagbiag ni Juan?

Sigurado a kabaelan ti Mannakabalin-amin a Dios nga ispalen ti biag ni Santiago. Kinapudnona, kalpasan unay ti pannakapapatay ni Santiago kas martir, ti anghel ni Jehova ti nangispal ken ni Pedro manipud ken patay. Apay a saan nga insalakan ti anghel ni Santiago?​—Aramid 12:1-11.

Nausar a Mangibanag iti Panggep ti Dios

Tapno maawatan no apay a maipaay ti pannalaknib ti Dios, masapul a maawatantayo a maited dayta saan laeng a tapno kabaelan dagiti indibidual ti agbiag iti napapaut no di ket tapno salakniban ti napatpateg pay nga amang, ti pannakaibanag ti panggep ti Dios. Kas pagarigan, naipanamnama ti pannakailasat ti intero a kongregasion Kristiano agsipud ta mainaig unay dayta iti pannakatungpal dayta a panggep. Nupay kasta, sibabatad a kinuna ni Kristo kadagiti adalanna a sanguenda kas indibidual ti ipapatay gapu iti pammatida. Kalpasan nga imbagana daytoy, inggunamgunam ni Jesus, saan a ti pannakaisalakan babaen iti milagro, no di ket ti “panagibtur agingga iti panungpalan.” (Mateo 24:9, 13) Ti kinapudno a nasalakniban ti dadduma nga indibidual, bayat a saan a nasalakniban ti dadduma, dina ipamatmat a mangidumduma ti Dios. Basta inusar la ti Dios ti tao nga adda iti kasayaatan a posision a mangibanag iti panggepna, a kamaudiananna, pakagunggonaanto ti intero a sangatauan.

Tangay agpayso a posible ti di naintiempuan nga ipapatay iti panagserbi ti Dios, rumbeng nga addaan dagiti Kristiano iti umasping a natimbeng a kababalin kas iti tallo a matalek a Hebreo a nasentensiaan ken patay gapu iti panagdayawda iti Dios. Imbagada iti ari ti Babilonia: “No kasta, ti Diosmi isu a pagserbianmi mabalinnakami nga isalakan. Iti urno a sumsumged ken dumardarang ken ita imam, O Ari, ilapsutnakamto. Ngem no saan, maipakaammo koma kenka, O Ari, a dagita diosmo dikamto pagserbian, ken kasta met dikamto pagdaydayawan ti ladawan a balitok nga impatakdermo.”​—Daniel 3:17, 18.

Intalimeng ni Jehova ti biag da Pedro ken Juan gapu iti kangrunaan nga akemda iti pannakaibanag ti panggepna. Nausar ni Pedro a “mangpabileg” iti kongregasion babaen iti panangaramid iti trabaho a panangipastor, a pakairamanan ti panagsurat iti dua a napaltiingan a libro ti Biblia. (Lucas 22:32) Insurat ni Juan ti lima a libro ti Biblia ken maysa a ‘sadiri’ iti immuna a kongregasion.​—Galacia 2:9; Juan 21:15-23.

Imposible a maipakpakauna no kasano nga ammo ni Jehova a siuumiso no kaano ken no iti ania a pamay-an a makibiang iti biag dagiti adipenna. Ti la sigurado a maibaga isut’ inkari ni Kristo a kaaddana kadagiti pasurotna “agingga iti panungpalan ti sistema ti bambanag.” (Mateo 28:20) Iti naisangsangayan a pamay-an, addanto ‘kadatayo’ babaen iti angheliko a pannakaiturong ti trabaho a panangasaba. (Mateo 13:36-43; Apocalipsis 14:6) Malaksid kadagitoy a pangkaaduan a panangipamatmat, ditay eksakto a manamnama no kasano a maiparangarang ti tulong ti Dios wenno no asino ti mabalin nga umawat iti pannalaknib ti Dios. Kasanon no marikna ti maysa a Kristiano nga addaan iti pannalaknib ken panangiwanwan ti Dios? Tangay saan a naan-anay a mapaneknekan wenno di mapaneknekan daytoy, awan koma ti mangukom kadagiti napasnek a panangbigbig ti kasta a tao.

Aleng-aleng Aya ti Dios?

Ipakita aya ti kinapudno a palpalubosan ti Dios ti ipapatay dagiti Kristiano nga isut’ kasla aleng-aleng? Pulos a saan. (Eclesiastes 9:11) Itartrabaho ni Jehova ti pannakaitalimeng ti biagtayo saan la nga iti sumagmamano a tawen wenno dekada no di ket agpaay iti agnanayon. Manipud iti panangmatmatna, imammaniobrana dagiti pasamak agpaay iti agnanayon a pagimbagan ti tunggal indibidual nga agay-ayat kenkuana wenno umad-adani kenkuana. (Idiligyo ti Mateo 18:14.) Ti pannakatungpal ti panggepna kaipapanannanto ti naan-anay a pannakaikkat ti aniaman a pagsagsagabaantayo iti daytoy sistema dagiti bambanag​—uray pay ni patay. Anian a di matukod ken naan-anay dagiti pannakilangen ti Dios nga uray la naibuyog ni apostol Pablo a mangyebkas: “O nagunegen dagiti kinabaknang ken sirib ken pannakaammo ti Dios! Anian a di pannakasukimat kadagiti panangukomna ken di pannakatalunton kadagiti dalanna!”​—Roma 11:33.

Tangay awan ti makaisina kadatayo manipud iti ayat ti Dios, saan nga ‘Addaanakto aya iti pannalaknib ti Dios?’ ti saludsod a rumbeng nga iyimtuod ti tunggal Kristiano no di ket ‘Adda aya kaniak ti bendision ni Jehova?’ No kasta ti aramidentayo, ipaayannatayto iti agnanayon a biag​—aniaman ti mapasamak kadatayo iti daytoy sistema dagiti bambanag. No idilig ti agnanayon a naan-anay a biag, aniaman a panagsagaba​—uray pay ni patay​—iti daytoy a sistema ti kaslanto “apagkanito ken nalag-an” laeng.​—2 Corinto 4:17.

[Footnote]