PINGPING

Ti agsumbangir a sikigan ti rupa iti ngato ti panga ken baba ti mata; iti Hebreo lechiʹ, ket iti Griego si·a·gonʹ. Dakamaten ti Biblia ti panangtungpa iti pingping, saan laeng a tapno dangran iti pisikal, no di ket tapno dusaen, umsien, wenno insultuen. Gapuna, ti mammadto ni Jehova a ni Mikaias ket natungpa ti pingpingna gapu iti panangipadtona kadagiti dakes a pagbanagan ti nadangkes a ni Ari Acab ti Israel. (1Ar 22:24; 2Cr 18:23) Natungpa ti pingping ni Job kas panangumsi kenkuana dagidiay di nangraem ken nanguyaw kenkuana idi susuoten ni Satanas.​—Job 16:10.

Impadto da mammadto Isaias ken Mikias ti pannakatungpa ti pingping ti Mesias ken pannakaparut ti buok ti pingpingna, a mangipasimudaag iti nakaro a panangumsi kenkuana dagiti kabusorna. (Isa 50:6; Mik 5:1) Natungpal daytoy ken Jesu-Kristo idi tinungtungpa dagiti Judio bayat a maus-usig iti saklang ti Sanhedrin; ken idi tinungtungpa dagiti Romano a soldado sakbay unay ti pannakapapatayna iti kayo a pagtutuokan. (Mt 26:67, 68; Jn 18:22, 23; 19:3) Ngem saan nga imbales ni Jesus ti inaramidda kenkuana ken saan met a simmungbat iti makapasakit a sasao.

Imbalakad ni Jesus kadagiti adalanna: “Nangngegyo a naikuna, ‘Mata iti mata ken ngipen iti ngipen.’ Nupay kasta, kunak kadakayo: Dikay busoren daydiay nadangkes; no di ket siasinoman a mangtungpa kenka iti makannawan a pingpingmo, iparangmo pay kenkuana ti bangir.” (Mt 5:38, 39) Saan nga isursuro ni Jesus ditoy ti pasipismo (ti saan a panangidepensa iti bagi manipud pannakaranggas). Imbes ketdi isursurona a saan a kasapulan ti maysa a Kristiano ti dumanog no isu ket madanog, kayatna a sawen a saan nga agibales. Ipagpaganetgetna idi ti prinsipio a panangliklik iti riri babaen ti saan nga ibabales. Ti panangtungpa iti pingping ket saan a nairanta a pangdunor iti pisikal a pamay-an no di ket panginsulto laeng wenno maipaay iti panangkarit a makiapa. Saan a kinuna ni Jesus a no matungpa ti pingping ti maysa a Kristiano, rebbeng a tumakder ken itayana ti bangir a rupana tapno matungpa. Ibagbaga ni Jesus a di umiso a bumales ti maysa a Kristiano no adda asinoman a mangkarit kenkuana tapno makiapa wenno makirikiar babaen iti panangtungpa wenno panangsair kenkuana iti makainsulto a sasao. Maitunos daytoy iti sasao dagiti apostol, a mangipagpaganetget pay iti daytoy a prinsipio.​—Ro 12:17-21; 1Pe 3:9.