“Isuronakami nga Agkararag”

“Maysa kadagiti adalanna kinunana kenkuana: ‘Apo, isuronakami nga agkararag.’”​—LUCAS 11:1.

1-3. (a) Apay a dinawat dagiti adalan ni Jesus ti pannakaisuroda nga agkararag? (b) Ania a salsaludsod maipapan ti kararag ti tumaud?

DADDUMA a tattao nasagutandat’ nagsayaat a timek ti kumakanta. Dadduma addaandat’ natural a talento kas musiko. Ngem tapno madanondat’ kangatuan a potensialda, uray dagitoy a kumakanta ken tomotokar kasapulandat’ panangisuro. Daytat’ umar-arngi iti kararag. Dagiti adalan ni Jesu-Kristo nailasinda a kasapulandat’ panangisuro tapno denggen ti Dios dagiti karkararagda.

² Kadarato a ni Jesus immadani a pribado ken Amana iti kararag, kas inaramidna iti nagpatnag sakbay ti panangpilina kadagiti 12 nga apostol. (Lucas 6:12-16) Nupay indagadagna met kadagiti adalanna ti panagkararagda a pribado, isut’ nangngegda a nagkararag iti publiko ket kunana nga isut’ saan a kas kadagiti narelihiusuan a managinsisingpet a nagkararag tapno mabuya dagiti tattao. (Mateo 6:5, 6) Ngarud, lohikal, a tinarigagayan dagiti pasurot ni Jesus ti umuna a panangisurona iti kararag. Gapuna, intay mabasa: “Ket naaramid nga idi adda iti maysa a disso nga agkarkararag, ken idi nalpas, maysa kadagidi adalanna kinunana kenkuana: ‘Apo, isuronakami nga agkararag, a kas met ti panangisuro ni Juan [a Mammautisar] kadagiti adalanna.’”​—Lucas 11:1.

³ Kasanot’ isusungbat ni Jesus? Aniat’ maadaltayo manipud iti ulidanna? Ken kasano a magunggonaantayo manipud panangisurona iti kararag?

Dagiti Leksion Agpaay Kadatayo

4. Apay a rebbengtay ti “agkararag a di agressat,” ket aniat’ kaipapananna ti panangaramid ti kasta?

⁴ Adut’ maadaltayo manipud sasao ken ulidan ni Jesus kas tao ti kararag. Maysa a leksion a ta no ti perpekto nga Anak ti Dios kasapulanna ti regular a panagkararag, dagiti imperpekto nga adalanna addaandat’ dakdakkel a pagkasapulan a kumita a kankanayon iti Dios a maipaay iti panangiwanwan, liwliwa, ken iti pannakataraon a naespirituan. Gapuna, rebbengna nga “agkararag[tayo] a di agressat.” (1 Tesalonica 5:17) Siempre, di kayat a sawen daytoy a masapul a kanayon a literal a sipaparintumeng. Imbes ketdi, rebbeng a kanayon koma nga addaantay ti kababalin nga agkararag. Rebbengtay ti kumita iti Dios a maipaay ti pannakaiwanwan iti amin nga aspeto ti biag tapno makapagtignaytayo a sisisirib ken kanayon nga addaan ti anamongna.​—Proverbio 15:24.

5. Aniat’ mabalin a mangsalín iti tiempo a rebbeng nga ipaaytay iti panagkararag, ken aniat’ rebbeng nga aramidentayo maipapan iti daytoy?

⁵ Kadagitoy “maudi nga al-aldaw,” adu a bambanag ti mangsalín ti tiempo a rebbeng a busbosentayo iti kararag. (2 Timoteo 3:1) Ngem no dagiti pagaburiduan iti pagtaengan, dandanag iti negosio, ken umas-asping pay ti mangsinga iti regular a panagkararagtayo iti nailangitan nga Amatayo, sobra a napadagsenantayon kadagiti pakaseknan itoy a biag. Ti kasta a situasion ket rebbeng a mapalinteg a din agtaktak, ta ti di panagkararag mangiturong iti pakapukawan ti pammati. Mabalin nga intay kissayan dagiti sekular nga obligasiontayo wenno timbengentay dagiti panagagawa iti biag babaen iti napaspasnek pay ken maulit-ulit a panangiturongtay ti pusotayo iti Dios agpaay ti pannakaiwanwan. Rebbeng nga “agsalukag[tayo] iti kararag.”​—1 Pedro 4:7.

6. Ania a kararag ti intay adalen itatta, ken iti ania a panggep?

⁶ Iti daydiay maaw-awagan modelo a kararag, sinursuruan ni Jesus dagiti adalanna no kasanot’ agkararag, saan nga no aniat’ eksakto a sawenda. Naiduma bassit ti salaysay ni Lucas manipud ti salaysay ni Mateo agsipud ta nagduduma nga okasion ti ramanenna. Adalentay daytoy a kararag kas pangarigan ti kababalin dagiti karkararagtayo kas paspasurot ni Jesus ken kas dagiti Saksi ni Jehova.

Ti Amatayo ken ti Naganna

7. Asinoda dagiti addaan pribilehio nga umawag ken Jehova kas “Amami”?

⁷ “Amami nga addaka sadi langit.” (Mateo 6:9; Lucas 11:2) Yantangay ni Jehova ti Namarsua ti sangatauan ken agtaeng iti langlangit, maiyanatup ti panangawag kenkuana kas “Amami nga addaka sadi langit.” (1 Ar-ari 8:49; Aramid 17:24, 28) Ti panangusar iti termino a “mi” [kalpasan ti Ama] ket panangbigbig a dagiti dadduma addaanda met ti nasinged a pannakirelasion iti Dios. Ngem asinot’ addaan ti di nakedngan a pribilehio a panangawag kenkuana kas Amada? Dagiti laeng dedikado, bautisado nga indibidual iti pamilia dagiti managdaydayawna. Ti panangawag ken Jehova nga “Amami” ipamatmatna nga addaantay pammati iti Dios ken bigbigentayo a ti kakaisuna a pakaibatayan ti pannakaikappia kenkuana ket isut’ naan-anay a panangakseptar iti daton a subbot ni Jesus.​—Hebreo 4:14-16; 11:6.

8. Apay a rebbeng nga iliwentay ti mangusar ti tiempo nga agkararag ken Jehova?

⁸ Anian a nagsinged ti rebbeng a panagriknatay iti nailangitan nga Amatayo! Kas annak a di pulos maum-uma a mapmapan ken amada, rebbeng nga iliwentay met ti panangbusbos ti tiempo a panagkararag iti Dios. Ti nauneg a panagyaman maipaay kadagiti naespirituan ken namaterialan a bendisionna ti rebbeng a mangtignay kadatayo nga agyaman kenkuana gapu kadagiti kinaimbagna. Rebbeng nga agannayastayo a mangitaklin kenkuana kadagiti awit a mangpadpadagsen kadatayo, a sitatalek a saranayennatayonto. (Salmo 55:22) Makasigurotayo a no matalektayo, isuamin nasayaatto ti pagtungpalanna agsipud ta ay-ayatennatayo.​—1 Pedro 5:6, 7.

9. Ti kararag a maipaay ti pannakasantipikar ti nagan ti Dios ket dawat a maipaay iti ania?

⁹ “Masantipikar koma ti naganmo.” (Mateo 6:9; Lucas 11:2) Ti sao a “nagan” no maminsan ipamatmatna ti persona mismo, ket ti “panangsantipikar” kayatna a sawen “panamagsanto, panangisina wenno panangsalimetmet kas sagrado.” (Idiligyo ti Apocalipsis 3:4.) Kaipapananna, ngarud, a ti kararag a panangsantipikar ti nagan ti Dios isut’ dawat nga agtignay ni Jehova a mangsantipikar ti bagina. Kasano? Babaen ti panangdalusna iti amin a pakaumsian a naibunton iti naganna. (Salmo 135:13) Iti dayta a panggep, ti Dios ikkatennanto ti kinadakes, itan-okna ti bagina, ket ipakaammona kadagiti nasnasion nga isu ni Jehova. (Ezequiel 36:23; 38:23) No il-iliwentayo a makita dayta nga aldaw ken pudno nga apresiarentay ti kinadayag ni Jehova, isunto ti kanayon nga asitgantayo iti narespeto nga espiritu a kayat nga ipaawat dagiti sasao a “masantipikar koma ti naganmo.”

Ti Pagarian ti Dios ken ti Pagayatanna

10. Aniat’ kayatna a sawen no ikararagtayo ti iyaay ti Pagarian ti Dios?

¹⁰ “Umay koma ti pagariam.” (Mateo 6:10; Lucas 11:2) Ti Pagarian a tuktukoyenna ditoy ket isut’ soberano a kinaturay ni Jehova, kas naiyebkas iti nailangitan a Mesianiko a gobierno kadagiti ima ni Jesu-Kristo ken dagiti kakaduana a “sasanto.” (Daniel 7:13, 14, 18, 27; Isaias 9:6, 7; 11:1-5) Aniat’ kaipapanan ti panangikarkararag iti dayta tapno “umay”? Kayat a sawen daytoy a dawdawatentayo a ti Pagarian ti Dios umay a maibusor kadagiti amin a naindagaan a bumusbusor iti nadiosan a kinaturay. Kalpasan a ti Pagarian ‘rumekennanto ken ibusennanto amin dagitoy a naindagaan a pagpagarian,’ pagbalinennanto ti daga kas sangalubongan a paraiso.​—Daniel 2:44; Lucas 23:43.

11. No il-iliwentayo ti pannakaaramid ti pagayatan ti Dios iti intero nga uniberso, aniat’ aramidentayo?

¹¹ “Maaramid koma ti pagayatam, kas sadi langit, kasta met ditoy daga.” (Mateo 6:10) Maysa daytoy a dawat nga itungpal ti Dios ti panggepna maipaay iti daga, a ramanennat’ panangikkatna kadagiti kabusorna. (Salmo 83:9-18; 135:6-10) Kinapudnona, ipasimudaagna nga il-iliwentayo ti pannakakakita ti pannakaaramid ti nadiosan a pagayatan iti intero nga uniberso. No daytat’ adda iti pusotayo, kanayontayto nga aramiden ti pagayatan ni Jehova iti ingganat’ kabaelantayo. Ditayto maaramid a sipupudno ti kasta a panagdawat no ditay met sipapasnek a pagregreggetan nga ar-aramiden ti pagayatan ti Dios iti bukodtayo a kasasaad. Ngarud, no agkarkararagtayo iti daytoy a pamay-an, rebbengtay a siguraduen a ditay agar-aramid kadagiti bambanag a maikontra iti dayta a pagayatan, kas ti panagarem iti di manamati wenno mangtultulad kadagiti nailubongan nga aw-awid. (1 Corinto 7:39; 1 Juan 2:15-17) Imbes ketdi, adda koma a kankanayon iti isiptayo ti panunot nga, ‘Aniat’ pagayatan ni Jehova iti daytoy a banag?’ Wen, no inayattay ti Dios iti amin a pusotayo, birukentayo ti direksionna iti amin a bambanag iti biag.​—Mateo 22:37.

Ti Inaldaw a Taraontayo

12. Ti panangidawat laeng ti ‘inaldaw a taraon’ ket addaan ania a nasayat nga epekto kadatayo?

¹² “Itedmo kadakam ita ti taraonmi itoy nga aldaw.” (Mateo 6:11) Iti salaysay ni Lucas mabasa: “Itdem koma kadakami ti taraonmi iti aldaw sigun iti adda a pagkasapulan.” (Lucas 11:3) Ti panagdawat iti Dios a mangipaay ti nesesita a taraon “itoy nga aldaw” iyadelantarnat’ pammati iti abilidadna a mangaywan kadagiti kasapulantayo iti inaldaw-aldaw. Dagiti Israelita agurnongdat’ manna “maipaay iti inaldaw,” saan nga agpaay iti maysa a lawas wenno ad-adu pay. (Exodo 16:4) Saan a kararag daytoy a maipaay kadagiti naiimas a taraon ken agsobsobra a probision no di ket agpaay kadagiti inaldaw a kasapulantayo bayat a tumaudda. Ti panangidawat ti inaldaw laeng a taraon makatulong met kadatayo a di agbalin a naagum.​—1 Corinto 6:9, 10.

13. (a) Iti dakdakkel a kaipapanan, aniat’ kayat a sawen ti panangdawat ti inaldaw a taraon? (b) Aniat’ rebbeng koma a kababalintayo, uray no agtrabahotayo a sidadagsen ket apagpag-isu laeng ti pagbiagtayo?

¹³ Iti dakdakkel a kaipapananna, ti panangidawat ti inaldaw a taraon ipamatmatna a ditay ipato nga agwaywayastayo no di ket kanayon a kumitkitatayo iti Dios a maipaay iti taraon, inumen, kawes, ken dadduma pay a kasapulan. Kas dagiti dedikado a miembro ti pamilia dagiti managdaydayawna, agtalektayo ken Amatayo ngem saantay met nga agtugtugaw lattan a sisasadut nga agur-uray kenkuana a mangipaay kadatayo a simimilagro. Agtrabahotayo ken usarentayo ti aniaman a pamay-an nga adda kadatayo a makagun-od ti taraon ken dadduma pay a kasapulan. Kaskasdi, siuumiso a pagyamanantay ti Dios iti kararag agsipud ta makitkitatayo iti likudan dagitoy a probision ti ayat, kinasirib, ken pannakabalin ti nailangitan nga Amatayo. (Aramid 14:15-17; idiligyo ti Lucas 22:19.) Mabalin a ti kinagagettayo ti mangibunga iti ibabaknangtayo. Ngem uray no agtrabaho a sipipigsa ket umdas laeng ti adda kadatayo, agyamantayo latta ken mapneken. (Filipos 4:12; 1 Timoteo 6:6-8) Kinapudnona, ti nadiosan a tao nga addaan ti gagangay laeng a taraon ken pagkawes ket mabalin a naragragsak ngem daydiay nabakbaknang iti namaterialan. Gapuna uray no bassit ti adda kadatayo gapu kadagiti sirkumstansia a ditay mamedmedan, saantay koma a maladingitan. Mabalinantay pay latta ti agbalin a nabaknang iti naespirituan. Pudno unay, ditay kasapulan ti agbalin a napanglaw iti pammati, namnama, ken ayat nga agpaay ken Jehova, nga isut’ pagturongan dagiti dayaw ken panagyamantayo iti naimpusuan a kararag.

Panangpakawan kadagiti Utangtayo

14. Agpaay kadagiti ania nga ut-utang ti pagdawatantayo ti pammakawan, ket aniat’ iyaplikar ti Dios kadakuada?

¹⁴ “Ket pakawanennakami kadagiti ut-utangmi, a kas met panamakawanmi kadagiti nakautang kadakami.” (Mateo 6:12) Ipakita ti salaysay ni Lucas a dagidiay nga ut-utang ket isuda dagiti basol. (Lucas 11:4) Ti natawid a basol lapdannatayo a mangaramid ti isuamin a bambanag sigun iti perpekto a pagayatan ti Amatayo. Iti maysa a kaipapanan, ngarud, dagitoy a pagkurkurangan isuda dagiti ut-utangtayo, wenno dagiti obligasiontayo iti Dios, nanipud nangrugitayo nga ‘agbibiag ken magmagna babaen iti espiritu.’ (Galacia 5:16-25; idiligyo ti Roma 7:21-25.) Addaantay kadagitoy nga utang agsipud ta imperpektotayo ket saantay a makarukod a naan-anay kadagiti pagannurotan ti Dios. Agpaay iti pannakapakawan dagitoy a basbasol nga addaantay ti pribilehio nga agkararag. Makaparagsak ta, mabalin nga iyaplikar ti Dios ti merito ti daton a subbot ni Jesus kadagitoy nga ut-utang, wenno basbasol.​—Roma 5:8; 6:23.

15. Ania a kababalin ti rebbeng nga adda kadatayo maipapan ti kasapulan a disiplina?

¹⁵ No ekspektarentayo ti Dios a mangpakawan ti ut-utangtayo, wenno basbasoltayo, masapul nga addaantay ti panagbabawi ken situtulok nga umawat ti disiplina. (Proverbio 28:13; Aramid 3:19) Gapu ta ay-ayatennatayo ni Jehova, itdenna kadatayo ti disiplina a kasapulantay a personal tapno makorehirtay dagiti pagkapuyantayo. (Proverbio 6:23; Hebreo 12:4-6) Siempre, maragsakantayo, no ti panagdakkel ti pammati ken pannakaammo makitana ti pusotayo a maitunos a naan-anay kadagiti linlinteg ken prinsipio ti Dios a ditay pulos agsalungasing a sipapakinakem. Ngem anian no maawatantayo a sipapakinakemtay bassit iti kinadakestayo? No kasta rebbeng a maladingitantay unay ket rebbeng nga agkararagtayo a sipapasnek maipaay iti pammakawan. (Hebreo 10:26-31) Iti panangiyaplikar ti balakad nga intay inawat, rebbeng a palintegentay a dagdagus ti kursotayo.

16. Apay a makagunggona ti panangitultuloy a panagdawat iti Dios a pakawanen dagiti basbasoltayo?

¹⁶ Ti panagdawat a regular iti Dios a pakawanenna ti basbasoltayo ket makagunggona. Ti panangaramid iti daytoy ipabigbigna a kanayon kadatayo ti kinamanagbasoltayo ket rebbeng nga addan mamagpakumbaba nga epekto. (Salmo 51:3, 4, 7) Kasapulantay ti nailangitan nga Amatayo a “mamakawan kadagiti basbasoltayo ken mangugas kadatayo iti amin a kinakillo.” (1 Juan 1:8, 9) Mainayon pay, ti panangdakamat kadagiti basbasoltayo iti kararag ket tumulong kadatayo a mangitultuloy ti pannakidangadang a sipipinget kontra kadagita. Iti kasta agtultuloytay met a mapalagipan iti pannakasapultay ti subbot ken ti merito ti naiparukpok a dara ni Jesus.​—1 Juan 2:1, 2; Apocalipsis 7:9, 14.

17. Kasano a ti panangikararag ti pammakawan tulongannatayo iti pannakirelasiontayo kadagiti dadduma?

¹⁷ Ti panagkararag a maipaay iti pammakawan ket makatulong met kadatayo nga agbalin a manangngaasi, nadungngo, ken managparabur kadagidiay mabalin a makautang kadatayo iti dadakkel ken babassit a bambanag. Kunat’ salaysay ni Lucas: “Ket pakawanem kadakami dagiti basbasolmi, ta pakawanenmi met ti isuamin a makautang kadakami.” (Lucas 11:4) Kinapudnona, magun-odantay laeng ti pammakawan ti Dios no datayo ket “pinakawantayo [metten] dagiti nakautang kadatayo,” tattao a nakabasol kadatayo. (Mateo 6:12; Marcos 11:25) Innayon ni Jesus: “Ta no pakawanenyo dagiti tao kadagiti pammaldaangda, pakawanennakayto met ni Amayo a nailangitan; ngem no saanyo a pakawanen dagiti tattao kadagiti pammaldaangda, ni Amayo dinakayto met a pakawanen kadagiti pammaldaangyo.” (Mateo 6:14, 15) Ti panangikararag maipaay iti pannakapakawan ti basbasoltayo rebbeng a tignayennatayo a paganusan dagiti dadduma ken pakawanen ida. Insurat ni apostol Pablo: “Kas iti pammakawan ni Jehova kadakayo, kastakayo met.”​—Colosas 3:13; Efeso 4:32.

Ti Sulisog ken ti Managdakdakes

18. Apay a rebbeng a ditay pabpabasolen ti Dios kadagiti pakasulsulisogan ken pakasusuotantayo?

¹⁸ “Ket dinakam iyeg iti pannakasulisog.” (Mateo 6:13; Lucas 11:4) Saan nga ipasimudaag dagitoy a sasao a ni Jehova ket sulisogennatayo nga agbasol. No maminsan saritaen ti Kasuratan ti panagar-aramid wenno panangpataud ti Dios kadagiti bambanag a palpalubosanna laeng. (Ruth 1:20, 21; idiligyo ti Eclesiastes 11:5.) “Ta ti Dios saan a mabalin a sulisogen kadagiti bambanag a dakes ket isu awan met ti sulisogenna,” insurat ni adalan a Santiago. (Santiago 1:13) Gapu itoy, ditay koma pabpabasolen ti nailangitan nga Amatayo kadagiti pannulisog ken suot dagiti dakes a bambanag, ta ni Satanas isut’ Mannulisog a padpadasenna nga imaniobra ti panagbasoltayo iti Dios.​—Mateo 4:3; 1 Tesalonica 3:5.

19. Kasanot’ panagkararagtayo maipapan iti sulisog?

¹⁹ Babaen iti dawat a, “Dinakam iyeg iti pannakasulisog,” kaipapananna a dawdawatentayo ken Jehova a dinatay koma palubosan a matnag no masulisog wenno mapilitan a sumukir kenkuana. Mabalintay nga idawat iti Amatayo nga iwanwanna dagiti addangtayo tapno awan koma ti sulisog nga umay iti dalantayo a nakaro unay para kadatayo. Gapu itoy, insurat ni Pablo: “Saan nga immay kadakayo ti uray ania a pannakasulisog a di met simro kadagiti isuamin a tattao. Ngem ti Dios mapagtalkan isu a dinto mangipalubos a masulisogkayo iti aglabes iti mabalinanyo, no di ket maigiddanto met ti dalan a paglisian, tapno mabalinyo a pagballigian.” (1 Corinto 10:13) Mabalintay nga ikararag nga iturongnatay ni Jehova tapno saantay a masulisog iti labes ti kabaelantayo ket isut’ mangipaay iti dalan a paglisian no nakarot’ panagleddaangtayo. Dagiti sulisog aggapuda iti Diablo, iti managbasol a lasagtayo, dagiti pagkapuyan ti dadduma, ngem mabalinnatay nga iwanwan ti nailangitan nga Amatayo tapno saandatay a madaeg.

20. Apay nga ikararag ti pannakaispal manipud “ti managdakdakes”?

²⁰ “No di ket isalakannakami iti managdakdakes.” (Mateo 6:13) Ti Dios pudno a malapdanna ni Satanas, “ti managdakdakes,” a mangparukma kadatayo. (2 Pedro 2:9) Ket nikaanoman awan pay dakdakkel a pannakasapul ti pannakaisalakan manipud iti Diablo ngem itatta, ta ‘isut’ addaan dakkel a pungtot ta ammona a bassiten ti tiempona.’ (Apocalipsis 12:12) Saantay nga ignorante kadagiti gakat ni Satanas, ngem pagaammona met dagiti pagkapuyantayo. Gapuna, kasapulantay nga ikararag ken Jehova a salimetmetannatay koma manipud kadagiti kuko ti kas leon a Kabusor. (2 Corinto 2:11; 1 Pedro 5:8, 9; idiligyo ti Salmo 141:8, 9.) Kas pangarigan, no interesadotayo a mangasawa, mabalin nga idawattay ken Jehova nga igaganatayo koma manipud kadagiti gakat ni Satanas ken manipud pannulisog a mangsukay kadagiti nailubongan a relasion a mabalin a mangiturong iti imoralidad wenno isusukir iti Dios babaen ti panangasawa ti di kapammatian. (Deuteronomio 7:3, 4; 1 Corinto 7:39) Il-iliwentayo aya ti bumaknang? No kasta kasapulan ti kararag a mangtulong kadatayo a mangresistir kadagiti sulisog nga agsugal wenno agkusit. Gaput’ gagarna a mangdadael ti pannakirelasiontayo ken Jehova, usaren ni Satanas ti aniaman nga igam iti arsenal dagiti pannulisogna. Gapuna sapay koma ta itultuloytayo ti agkararag iti nailangitan nga Amatayo, isu a dinto pulos mangbaybay-a kadagiti nalinteg a masulisog ket mangted panangispal manipud iti managdakdakes.

Ti Kararag Mamabileg ti Pammati ken Namnama

21. Kasanotay a nagunggonaan manipud panangikarkararag ti Pagarian?

²¹ Ti nailangitan nga Amatayo, a mangispal kadatayo manipud iti managdakdakes, pagragsakanna ti mangbendision kadatayo a sibubuslon. Kaskasdi, apay nga impalubosna ti kasta a kabayagen ti panawen a ti ingungotenna nga ili ikararagna nga, “Umay koma ti pagariam”? Bueno, iti adun a tawtawen, ti panagkarkararag iti kastoy a wagas ket pinarang-ayna ti tarigagay ken panangipategtayo iti Pagarian. Ti kasta a kararag ipalagipna kadatayo ti naindaklan a pannakasapul iti daytoy naimbag a nailangitan a gobierno. Ipaspasangona met a kanayon kadatayo ti namnama ti biag iti sidong ti turay ti Pagarian.​—Apocalipsis 21:1-5.

22. Ania komat’ agtultuloy a kababalintayo iti panagkararag iti nailangitan nga Amatayo, a ni Jehova?

²² Saan a pagduaduaan a ti kararag mamabileg ti pammati ken Jehova. Ti singgaluttay kenkuana ket mangpapigsa no sungbatanna dagiti karkararagtayo. Gapu itoy, ditay koma maum-uma nga agturong kenkuana nga inaldaw iti panagdayaw, panagyaman, ken panagararaw. Ken sapay koma ta agyamantayo iti makatulong a sungbat ni Jesus iti dawat dagiti paspasurotna: “Apo, isuronakami nga agkararag.”

Malagipyo Pay Aya?

◻ Ania dagiti leksion a maadaltayo manipud sasao ken ulidan ni Jesus kas tao ti kararag?

◻ Maipaay iti ania ti ikararagtayo maipapan iti nailangitan nga Amatayo ken ti naganna?

◻ Aniat’ idawdawattayo no ikarkararagtayo ti iyaay ti Pagarian ti Dios ken ti pannakaaramid ti pagayatanna ditoy daga?

◻ Idawdawattay ti ania no ikarkararagtayo ti inaldaw a taraontayo?

◻ Aniat’ kaipapananna no ikararagtayo ti pannakapakawan dagiti ut-utangtayo?

◻ Apay a nasken ti panagkararag maipapan ti pannulisog ken pannakaispal manipud ken Satanas, ti managdakdakes?

[Ladawan iti panid 16]

Indawat dagiti paspasurot ni Jesus kenkuana a sursuruanna ida nga agkararag. Ammoyo aya no kasanotay a magunggonaan manipud panangisurona iti panagkararag?