Ipaay ni Jehova Dagiti Inaldaw a Kasapulantayo

“Sumardengkayo a maringgoran unay; ta . . . ni Amayo ammona a kasapulanyo dagitoy a banag.”​—LUCAS 12:29, 30.

1.Kasano ti panangtaraon ni Jehova kadagiti pinarsuana nga animal?

NAPALIIWYO kadin ti maysa a billit tuleng wenno dadduma a tumatayab a mangtuktuktok iti kasla maysa a rugit? Mabalin a panunotenyo no ania ti maalana iti panangtuktokna iti daga. Iti Sermonna iti Bantay, impakita ni Jesus a makasursurotayo iti pamay-an ti panangtaraon ni Jehova kadagiti tumatayab. Kinunana: “Paliiwenyo a sipapasnek dagiti tumatayab iti langit, agsipud ta saanda nga agmula iti bin-i wenno agani wenno agipempen kadagiti kamalig; kaskasdi a ti nailangitan nga Amayo taraonanna ida. Saan kadi a napatpategkayo ngem isuda?” (Mateo 6:26) Kadagiti nakaskasdaaw a pamay-an, tartaraonan ni Jehova ti amin a parsuana.​—Salmo 104:14, 21; 147:9.

2, 3. Ania a naespirituan a leksion ti maadaltayo iti insuro ni Jesus nga ikararagtayo ti tinapay a kasapulantayo iti inaldaw?

² Apay ngarud nga iti modelo a kararagna, inraman ni Jesus ti kiddaw nga: “Itedmo kadakami ita nga aldaw ti tinapaymi nga agpaay itoy nga aldaw”? (Mateo 6:11) Adda nabagas a naespirituan a leksion a maadal iti daytoy a simple a kiddaw. Umuna, ipalagipna kadatayo a ni Jehova ti Naindaklan a Manangipaay. (Salmo 145:15, 16) Kabaelan dagiti tattao ti agmula ken agsukay, ngem ti laeng Dios ti makabael a mangpadakkel kadagiti bambanag, iti naespirituan ken pisikal. (1 Corinto 3:7) Sagut ti Dios dagiti taraon ken inumentayo. (Aramid 14:17) No kiddawentayo nga ipaayna ti inaldaw a kasapulantayo, ipakpakitatayo kenkuana a ditay tagtagilag-anen dagita a probision. Siempre, ti kasta a kiddaw dina ikkaten ti responsabilidadtayo nga agtrabaho no kabaelantayo nga aramiden dayta.​—Efeso 4:28; 2 Tesalonica 3:10.

³ Maikadua, no kiddawentayo ti ‘tinapay nga agpaay itoy nga aldaw,’ ipasimudaagna a ditay koma maringgoran unay maipapan iti masanguanan. Innayon a kinuna ni Jesus: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo. Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo. Gapuna, dikay pulos maringgoran maipapan iti sumaganad nga aldaw, ta ti sumaganad nga aldaw addaanto kadagiti bukodna a pakaringgoran.” (Mateo 6:31-34) Ti panangikararag iti ‘tinapay nga agpaay itoy nga aldaw’ iparegtana ti simple a panagbiag buyogen ti “nadiosan a debosion agraman iti pannakapnek.”​—1 Timoteo 6:6-8.

Inaldaw a Naespirituan a Taraon

4. Aniada a pasamak iti biag ni Jesus ken dagiti Israelita ti mangipaganetget iti kinapateg ti naespirituan a taraon?

⁴ No ikararagtayo ti inaldaw a tinapay, malagiptayo met koma a kasapulantayo ti naespirituan a taraon iti inaldaw. Nupay mabisbisin unay kalpasan ti panagayunarna, saan a timmulok ni Jesus iti pannulisog ni Satanas a pagbalinenna a tinapay dagiti bato. Kinunana: “Adda a naisurat, ‘Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.’” (Mateo 4:4) Inadaw ni Jesus ti imbaga ni propeta Moises kadagiti Israelita: “Pinagpakumbabanaka [ni Jehova] ken binay-annaka nga agbisin ket tinaraonannaka iti manna, a saanmo a naammuan wenno uray dagiti ammam saanda a naammuan; tapno ipakaammona kenka a saan a babaen iti tinapay laeng nga agbiag ti tao no di ket babaen iti tunggal ebkas ti ngiwat ni Jehova nga agbiag ti tao.” (Deuteronomio 8:3) Babaen ti manna nga impaay ni Jehova, nataraonan dagiti Israelita saan laeng nga iti material a taraon no di pay ket kadagiti naespirituan a leksion. Naibilin nga “agpidutda tunggal maysa ti kaitutopanna iti inaldaw-aldaw.” No masobraanda ti alaenda para iti maysa nga aldaw, bumangsit ken iggesen ti matedda. (Exodo 16:4, 20) Ngem saan a kasta ti mapasamak iti maikanem nga aldaw, a doblienda ti alaenda tapno mailak-amanda iti aldaw ti Sabbath. (Exodo 16:5, 23, 24) Gapuna, naipaganetget iti isipda a masapul a natulnogda ken agpannuray ti biagda saan laeng nga iti tinapay no di ket “iti tunggal ebkas ti ngiwat ni Jehova.”

5. Kasano ti panangipaay ni Jehova iti inaldaw a naespirituan a taraontayo?

⁵ Kasapulantayo met ti inaldaw a naespirituan a taraon nga ipapaay ni Jehova babaen ti Anakna. Tapno maibanag dayta, dinutokan ni Jesus ti maysa a “matalek ken masirib nga adipen” tapno mangipaay iti “taraon iti umiso a tiempo” agpaay iti sangakabbalayan ti pammati. (Mateo 24:45) Dayta a klase matalek nga adipen dina laeng ipaay ti naruay a naespirituan a taraon babaen kadagiti katulongan iti panagadal iti Biblia no di pay ket iparegtana ti inaldaw a panagbasatayo iti Biblia. (Josue 1:8; Salmo 1:1-3) Kas ken Jesus, magun-odtayo ti naespirituan a taraon babaen ti inaldaw a panagreggettayo nga agadal ken aramiden ti pagayatan ni Jehova.​—Juan 4:34.

Pannakapakawan Dagiti Basol

6. Ania nga utang ti kiddawentayo a mapakawan, ken kadagiti ania a kondision a sidadaan ni Jehova a mangpunas kadagita?

⁶ Ti sumaruno a kiddaw iti modelo a kararag ket: “Pakawanennakami kadagiti utangmi, a kas met iti panangpakawanmi kadagiti nakautang kadakami.” (Mateo 6:12) Saan a tuktukoyen ditoy ni Jesus ti utang a kuarta. Tuktukoyenna ti pannakapakawan dagiti basoltayo. Iti rekord ni Lucas, kastoy ti pannakaibaga daytoy a kiddaw: “Pakawanennakami iti basbasolmi, ta pakawanenmi met ti tunggal maysa a nakautang kadakami.” (Lucas 11:4) Gapuna, kasla nakautangtayo ken ni Jehova no makabasoltayo. Ngem ti naayat a Diostayo sidadaan a ‘mangpunas,’ wenno mangwaswas, iti dayta nga utang no naimpusuan nga agbabawi, ‘agbaw-ing,’ ken kiddawentayo ti pammakawanna maibatay iti pammati iti pangsubbot a daton ni Kristo.​—Aramid 3:19; 10:43; 1 Timoteo 2:5, 6.

7. Apay a nasken nga ikararagtayo ti pammakawan iti inaldaw?

⁷ Makuna met a nakabasoltayo no ditay masalimetmetan dagiti pagalagadan ni Jehova mainaig iti kinalinteg. Gapu iti natawid a basol, agkamalitay amin iti sao, aramid, ken panunot wenno no ditay inaramid ti rumbeng koma nga aramidentayo. (Eclesiastes 7:20; Roma 3:23; Santiago 3:2; 4:17) No kasta, ammotayo man a nakabasoltayo iti dayta nga aldaw wenno saan, masapul nga iramantayo kadagiti inaldaw a kararagtayo ti pannakapakawan dagiti basoltayo.​—Salmo 19:12; 40:12.

8. Ania ti nasken nga aramidentayo no dumawattayo iti pammakawan, ket ania ti makagunggona a resultana?

⁸ No dumawattayo iti pammakawan, nasken a nabuyogan dayta iti panangsukimat iti bagi, panagbabawi, ken panagpudno, maibatay iti pammati iti mangsubbot a bileg ti naibukbok a dara ni Kristo. (1 Juan 1:7-9) Tapno mapaneknekan a napudno ti kararagtayo, ti kiddawtayo a pammakawan ket nasken a nabuyogan “kadagiti aramid a maitutop iti panagbabawi.” (Aramid 26:20) Iti kasta, makapagtalektayo a sidadaan a pakawanen ni Jehova dagiti basoltayo. (Salmo 86:5; 103:8-14) Mangyeg dayta iti awan kaaspingna a talna ti panunot, “ti talna ti Dios a mangringbaw iti isuamin a panunot,” ket iti kasta, ‘saluadannanto dagiti pusotayo ken dagiti pannakabalin ti isiptayo babaen ken Kristo Jesus.’ (Filipos 4:7) Ngem adda pay sabali nga isuro ti modelo a kararag ni Jesus a nasken nga aramidentayo tapno mapakawan dagiti basoltayo.

Tapno Mapakawan, Nasken a Mangpakawantayo

9, 10. (a) Ania a komento ti innayon ni Jesus iti modelo a kararag, ket ania ti ipaganetget dayta? (b) Kasano nga ad-adda nga inyilustrar ni Jesus a masapul nga ammotayo ti mangpakawan?

⁹ Makapainteres ti kiddaw a “pakawanennakami kadagiti utangmi, a kas met iti panangpakawanmi kadagiti nakautang kadakami.” Dayta laeng ti paset ti modelo a kararag a kinomentuan ni Jesus. Kalpasan ti kararag, innayonna: “Ta no pakawanenyo dagiti tattao kadagiti labsingda, pakawanennakayto met ti nailangitan nga Amayo; idinto ta no saanyo a pakawanen dagiti tattao kadagiti labsingda, uray ni Amayo saannanto a pakawanen dagiti labsingyo.” (Mateo 6:14, 15) Nalawag ngarud ti kinuna ni Jesus a pakawanennatayo ni Jehova no sidadaantayo a mangpakawan kadagiti sabsabali.​—Marcos 11:25.

¹⁰ Iti sabali nga okasion, nangted ni Jesus iti ilustrasion a mangipakita a nasken nga ammotayo ti mangpakawan no kayattayo a pakawanennatayo ni Jehova. Dinakamatna ti maysa nga ari a naimpusuan a nangwaswas iti nagdakkel nga utang kenkuana ti maysa nga adipen. Ngem nadagsen ti dusa nga impatawna iti dayta met laeng nga adipen idi dina kayat a waswasen ti nagbassit nga utang kenkuana ti padana nga adipen. Inngudo ni Jesus daytoy nga ilustrasion babaen iti panangikunana: “Iti kasta met laeng a pamay-an makilangento kadakayo ti nailangitan nga Amak no saankayo a mangpakawan tunggal maysa iti kabsatna manipud iti puspusoyo.” (Mateo 18:23-35) Nalawag ti leksion: Aniaman ti mabalin a nakabasolan kadatayo dagiti sabsabali, awan pakaimudinganna dayta kadagiti basoltayo a pinakawan ni Jehova. Malaksid iti dayta, inaldaw a pakawanennatayo ni Jehova. Gapuna, mapakawantayo met koma ti sagpaminsan a pakabasolan kadatayo dagiti dadduma.

11. Ania a balakad ni apostol Pablo ti surotentayo no kayattayo a pakawanennatayo ni Jehova, a mangyeg iti ania a resulta?

¹¹ Insurat ni apostol Pablo: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa no kasano a ti Dios sibubulos a nangpakawan met kadakayo babaen ken Kristo.” (Efeso 4:32) Ti panagpipinnakawan parayrayenna ti talna iti nagbabaetan dagiti Kristiano. Innayon nga indagadag ni Pablo: “Kas pinili ti Dios, nasantuan ken ay-ayaten, kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo. Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.” (Colosas 3:12-14) Naiparipirip amin dagitoy iti kararag nga insuro kadatayo ni Jesus: “Pakawanennakami kadagiti utangmi, a kas met iti panangpakawanmi kadagiti nakautang kadakami.”

Salaknib iti Sidong ti Pannulisog

12, 13. (a) Ania ti saan a kayat a sawen ti maikadua iti maudi a kiddaw iti modelo a kararag? (b) Asino ti kadaksan a Mannulisog, ken ania ti kaipapanan ti kararagtayo a ditay koma maiyeg iti sulisog?

¹² Ti maikadua iti maudi a kiddaw iti modelo a kararag ni Jesus ket: “Saannakami nga iyeg iti pannakasulisog.” (Mateo 6:13) Kayat kadi a sawen ni Jesus a kiddawentayo a dinatay sulisogen ni Jehova? Saan a kasta ti kayatna a sawen yantangay napaltiingan ni Santiago a mangisurat: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta iti dakes a bambanag saan a mabalin a suoten ti Dios ket isu saanna met a suoten ti asinoman.” (Santiago 1:13) Kanayonanna, insurat ti salmista: “No dagiti biddut koma ti siputam, O Jah, O Jehova, siasino ti makapagtakder?” (Salmo 130:3) Saan a sipsiputan ni Jehova ti tunggal panagkamalitayo, ken awan duadua a dinatay padasen a sulisogen nga agbasol. Ania ngarud ti kayat a sawen daytoy a paset ti modelo a kararag?

¹³ Ni Satanas a Diablo ti mangpadpadas a mangsulisog kadatayo nga agbasol, a mangsilo kadatayo babaen dagiti nasikap nga aramid, ken mangalon-on pay ketdi kadatayo. (Efeso 6:11) Isu ti kadaksan a Mannulisog. (1 Tesalonica 3:5) No ikarkararagtayo a ditay koma maiyeg iti sulisog, kidkiddawentayo ken ni Jehova a dinatay koma palubosan a matnag iti sulisog. Kidkiddawentayo kenkuana a tulongannatayo a di “magundawayan ni Satanas,” a madaerantayo koma dagiti pannulisog. (2 Corinto 2:11) Ikararagtayo a makapagtalinaedtayo iti “nalimed a lugar ti Kangatuan,” a matagiragsaktayo ti naespirituan a pannalaknib a maipaay kadagidiay mangbigbig iti kinasoberano ni Jehova iti amin nga aramidenda.​—Salmo 91:1-3.

14. Kasano nga ipanamnama kadatayo ni apostol Pablo a dinatayto pulos baybay-an ni Jehova no agpannuraytayo Kenkuana iti sidong ti pannulisog?

¹⁴ Masiguradotayo a no dayta ti napasnek a kiddawentayo, ket iparangarangtayo kadagiti kararag ken tigtignaytayo, dinatayto pulos baybay-an ni Jehova. Impanamnama kadatayo ni apostol Pablo: “Awan ti sulisog a nangkemmeg kadakayo malaksid iti kadawyan kadagiti tattao. Ngem ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”​—1 Corinto 10:13.

“Ispalennakami iti Daydiay Nadangkes”

15. Apay nga ad-adda a napateg ita nga ikararag ti pannakaispal maibusor iti daydiay nadangkes?

¹⁵ Sigun iti kangrunaan a mapagpiaran a manuskrito ti Kristiano a Griego a Kasuratan, nagngudo ti modelo a kararag ni Jesus babaen kadagitoy a sasao: “Ispalennakami iti daydiay nadangkes.”a (Mateo 6:13) Ti pannakasalaknib maibusor iti Diablo ket ad-adda a napateg iti daytoy tiempo ti panungpalan. Ni Satanas ken dagiti demoniona gubgubatenda dagiti napulotan a natda, “isuda a mangtungtungpal kadagiti bilin ti Dios ken addaan iti trabaho a panangsaksi ken Jesus,” agraman dagiti kakaduada a “dakkel a bunggoy.” (Apocalipsis 7:9; 12:9, 17) Indagadag ni apostol Pedro kadagiti Kristiano: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna. Ngem agtakderkayo a bumusor kenkuana, natibker iti pammati.” (1 Pedro 5:8, 9) Kayat a pasardengen ni Satanas ti trabahotayo a panangasaba. Padasennatayo a butbutngen babaen dagiti narelihiosuan, nakomersialan, wenno napolitikaan nga ahensiana ditoy daga. Ngem no agtalinaedtayo a natibker, ispalennatayo ni Jehova. Insurat ni adalan a Santiago: “Ngarud, agpasakupkayo iti Dios; ngem busorenyo ti Diablo, ket isu agtalawto kadakayo.”​—Santiago 4:7.

16. Siasino ti usaren ni Jehova a tumulong kadagiti adipenna a masusuot?

¹⁶ Pinalubosan ni Jehova a maipasango ti Anakna iti sulisog. Ngem kalpasan a sinaranget ni Jesus ti Diablo, nga inusarna ti Sao ti Dios kas salaknib, nangibaon ni Jehova kadagiti anghel a mangpabileg iti Anakna. (Mateo 4:1-11) Umasping iti dayta, usaren ni Jehova dagiti anghelna a tumulong kadatayo no agkararagtayo buyogen ti pammati ket isu ti pagkamangantayo. (Salmo 34:7; 91:9-11) Insurat ni apostol Pedro: “Ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot, ngem isaganana dagiti nakillo a tattao maipaay iti aldaw a panangukom tapno magessatda.”​—2 Pedro 2:9.

Asidegen ti Naan-anay a Pannakaispal

17. Babaen ti modelo a kararag, kasano nga impakita ni Jesus ti umiso a lugar dagiti bambanag?

¹⁷ Iti modelo a kararag, impakita ni Jesus no ania ti umiso a lugar dagiti bambanag. Ti kangrunaan a pakaseknantayo isu ti pannakaalangon ti naindaklan ken nasantuan a nagan ni Jehova. Yantangay ti Mesianiko a Pagarian ti usarenna a mangibanag iti dayta, ikararagtayo nga umay ti Pagarian tapno duprakenna ti amin nga imperpekto a natauan a pagarian, wenno gobierno, ken tapno masigurado a naan-anay a maibanag ti pagayatan ti Dios idiay langit ken ditoy daga. Ti namnamatayo a biag nga agnanayon iti paraiso a daga ket agpannuray iti pannakasantipikar ti nagan ni Jehova ken panangbigbig iti nalinteg a kinasoberanona iti intero nga uniberso. Kalpasan nga ikararag dagitoy nga agkakapateg a bambanag, mabalintay nga ikararag dagiti inaldaw a kasapulantayo, ti pannakapakawan dagiti basoltayo, ken ti pannakaispal manipud iti sulisog ken kadagiti panangallilaw daydiay nadangkes, ni Satanas a Diablo.

18, 19. Kasano a ti modelo a kararag ni Jesus tulongannatayo nga agtalinaed a sisasalukag ken mamagbalin iti namnamatayo a ‘natibker agingga iti panungpalan’?

¹⁸ Umad-adanin ti naan-anay a pannakaispaltayo iti daydiay nadangkes ken iti nalulok a sistema ti bambanagna. Ammo ni Satanas nga “ababan ti periodo ti tiempona” a nabatbati tapno maipakitana ti ‘dakkel nga ungetna’ iti daga, kangrunaanna kadagiti matalek nga adipen ni Jehova. (Apocalipsis 12:12, 17) Iti ragup a pagilasinan ti “panungpalan ti sistema ti bambanag,” impakpakauna ni Jesus dagiti makapagagar a pasamak, a dadduma kadagita ti ditay pay naimatangan. (Mateo 24:3, 29-31) Apaman a makitatayo a mapasamak dagita, ad-adda a tumibker ti namnamatayo a pannakaispal. Kinuna ni Jesus: “Bayat a mangrugi a mapasamak dagitoy a banag, tumakderkayo a sililinteg ket itangadyo dagiti uloyo, agsipud ta ti pannakaispalyo umas-asidegen.”​—Lucas 21:25-28.

¹⁹ Ti nabagas a modelo a kararag nga insuro ni Jesus kadagiti adalanna mangted kadatayo iti mapagpannurayan a giya no ania ti iraman kadagiti kararagtayo bayat nga umas-asidegen ti panungpalan. Sapay koma ta agtalinaedtayo a sikokompiansa agingga iti panungpalan, agtultuloy nga ipaay ni Jehova ti inaldaw a kasapulantayo, agpadpada iti naespirituan ken iti material. No sikakararag nga agsalukagtayo, ‘sititibker a mapetpetantayo ti panagtalek nga adda kadatayo idi damo agingga iti panungpalan.’​—Hebreo 3:14; 1 Pedro 4:7.

[Footnote]

Pangrepaso

• Ania dagiti ipasimudaagna no ikararagtayo ti ‘tinapay nga agpaay itoy nga aldaw’?

• Ilawlawagyo ti kiddaw a “pakawanennakami kadagiti utangmi, a kas met iti panangpakawanmi kadagiti nakautang kadakami.”

• Ania ti kayatna a sawen no ikararagtayo ken ni Jehova a dinatay iyeg iti sulisog?

• Apay a nasken nga ikararagtayo nga “ispalennakami iti daydiay nadangkes”?

[Dagiti Ladawan iti panid 15]

Nasken a mangpakawantayo no kayattayo ti mapakawan

[Picture Credit Line iti panid 15]

Lydekker