Tultuladem Kadi ti Panangmatmat ni Jehova iti Sabsabali?
“Awan koma ti panaglalasin iti bagi . . . Dagiti kamengna addaanda koma iti isu met laeng a panangisakit iti maysa ken maysa.”—1 COR. 12:25.
1. Ania ti nariknam idi simrekka iti naespirituan a paraiso?
IDI simminatayo iti dakes a lubong ket nangrugitayon a makitimpuyog iti ili ni Jehova, naragsakantayo la ketdi gapu iti nasged nga ayat ken pannakaseknan nga adda iti nagbabaetanda. Anian ti pannakaidumada kadagiti nasabrak, mananggura, ken mannakirupir a tattao nga iturturong ni Satanas! Simrektayo iti naespirituan a paraiso, nga agar-ari ti talna ken panagkaykaysa.—Isa. 48:17, 18; 60:18; 65:25.
2. (a) Ania ti mabalin a mangapektar iti panangmatmattayo iti sabsabali? (b) Ania ti nasken nga aramidentayo?
2 Ngem iti panaglabas ti tiempo, mabalin a mangrugin nga agdepekto ti panangmatmattayo kadagiti kapammatiantayo gapu iti kinaimperpektotayo. Mabalin a tagidaksentayo unayen dagiti pagkamkamalianda imbes a kumitatayo iti pakabuklan dagiti naespirituan a galadda. Iti simple a pannao, malipatantayon a matmatan ida a kas iti panangmatmat ni Jehova. No mapasamak ti kasta kadatayo, sukimatentayo a dagus ti panangmatmattayo ket itunostayo dayta iti nalawag a panangmatmat ni Jehova.—Ex. 33:13.
Ti Panangmatmat ni Jehova Kadagiti Kakabsattayo
3. Ania ti nangyarigan ti Biblia iti kongregasion Kristiano?
3 Iti 1 Corinto 12:2-26, inyarig ni apostol Pablo ti kongregasion dagiti napulotan a Kristiano iti maysa a bagi nga addaan iti “adu a kameng.” No kasano nga agduduma dagiti paset ti bagi, agduduma met ti personalidad ken abilidad dagiti kameng ti kongregasion. Kaskasdi nga akseptaren amin ida ni Jehova. Ay-ayaten ken ipatpategna ti tunggal kameng ti kongregasion. Gapuna, ibalbalakad met kadatayo ni Pablo a dagiti kameng ti kongregasion ket “addaanda koma iti isu met laeng a panangisakit iti maysa ken maysa.” Mabalin a narigat dayta agsipud ta ti personalidad dagiti dadduma ket naiduma iti personalidadtayo.
4. Iti ania a kasasaad a nasken a baliwantayo ti panangmatmattayo kadagiti kakabsattayo?
4 Mabalin pay ketdi nga agannayastayo a kanayon a mangdillaw kadagiti pagkapuyan dagiti kakabsattayo. Mayarig dayta iti panangmatmat iti maysa a retrato, a ti maysa laeng a paset ti nakaipamaysaan dagiti matatayo. Ngem ni Jehova nalawlawa ti panangmatmatna. Mabalin nga agannayastayo a kumita iti laeng ditay magustuan iti maysa a tao, ngem ni Jehova kitaenna ti intero a kinatao ti maysa, agraman ti amin a nasayaat a galadna. No ad-adda nga ikagumaantayo a tuladen ni Jehova, ad-adda a maitandudotayo ti ayat ken panagkaykaysa iti kongregasion.—Efe. 4:1-3; 5:1, 2.
5. Apay a saan a nainkalintegan nga ukomentayo ti sabsabali?
5 Pagaammo ni Jesus nga adda pagannayasan dagiti imperpekto a tattao a mangukom wenno mangkritikar. Imbalakadna: “Isardengyo ti mangukom tapno saankayo a maukom.” (Mat. 7:1) Imutektekanyo ta saan a kinuna ni Jesus a “saankayo a mangukom” no di ket “isardengyo ti mangukom.” Ammona a nakairuamanen ti adu kadagiti dumdumngeg kenkuana ti mangkritikar. Adda met kadin ti kasta a kababalintayo? No wen, nasken nga ikagumaantayo ti agbalbaliw tapno saantayo nga aglak-am iti di mainugot a pannakaukom. Kinapudnona, siasinotayo koma tapno ukomentayo ti maysa a dinutokan ni Jehova wenno tapno ibagatayo nga isu ket saan a maikari nga agbalin a kameng ti kongregasion? Mabalin nga adda pagkurkurangan ti maysa a kabsat, ngem no isu ket itultuloy nga awaten ni Jehova, nainkalintegan kadi a laksidentayo isuna? (Juan 6:44) Talaga kadi a patientayo nga iturturong ni Jehova ti organisasionna ket no adda dagiti nasken a mabalbaliwan, agtignayto iti intudingna a tiempo?—Basaem ti Roma 14:1-4.
6. Ania ti panangmatmat ni Jehova kadagiti adipenna?
6 Ti nagsayaat unay maipapan ken Jehova ket makitana ti potensial a pagbalinan ti tunggal Kristiano apaman a magtenganda ti kinaperpekto iti baro a lubong. Ammona met no ania ti rimmang-ayandan iti panangyaplikarda kadagiti naadalda iti Biblia. Dayta ti gapuna a saan a dagiti nainlasagan a pagkapuyanda ti kitkitaenna. Mabasatayo iti Salmo 103:12: “Kas iti kaadayo ti leleggakan ti init manipud iti lelennekan ti init, kasta ti kaadayona manipud kadatayo ti nangikabilanna kadagiti salungasingtayo.” Anian a yaman ti tunggal maysa kadatayo gapu iti dayta!—Sal. 130:3.
7. Ania ti masursurotayo iti panangmatmat ni Jehova kenni David?
7 Paneknekan ti Kasuratan ti naisangsangayan nga abilidad ni Jehova a kumita nga ad-adda kadagiti makaay-ayo a galad ti maysa a tao. Ti Dios dineskribirna ni David kas “adipenko a David, a nangsalimetmet kadagiti bilinko ken simmurot kaniak buyogen ti isuamin a pusona babaen ti panagaramid laeng iti umiso kadagiti matak.” (1 Ar. 14:8) Siempre, ammotayo nga adda met dagiti nagbasolan ni David. Kaskasdi a ti ad-adda a kinita ni Jehova ket dagiti nasayaat a galad gapu ta ammona a napalungdo ti puso ni David.—1 Cron. 29:17.
Matmatam Dagiti Kapammatiam a Kas iti Panangmatmat ni Jehova
8, 9. (a) Kasanotayo a matulad ni Jehova? (b) Kasano a mayilustrar dayta, ken ania ti masursurotayo?
8 Mabasa ni Jehova ti puso idinto ta ditay kabaelan dayta. Umdas daytan a rason tapno liklikantay ti mangukom. Ditay ammo ti amin a motibo ti maysa a tao. Tuladentay koma ni Jehova babaen ti ditay panangipamaysa kadagiti pagkapuyan, a mapukawton iti masanguanan. Saan kadi a nagsayaat nga ikagumaantayo a tuladen ti Dios no maipapan iti dayta a banag? Ti panangaramid iti dayta ket makatulong unay tapno maaddaantayo iti natalna a relasion kadagiti kapammatiantayo.—Efe. 4:23, 24.
9 Kas pagarigan, iladawam iti panunotmo ti maysa a maperperdin a balay—matmatnagen dagiti kalasuganna, nadadaelen dagiti tawana, ken bimladen dagiti bobidana. Nalabit, kunaen ti kaaduan a makakita a nasaysayaat no marakraken dayta ta saan a makaay-ayo a buyaen. Ngem adda maysa a tao nga immay nangkita ket naan-anay a naiduma ti panangmatmatna. Imbes a dagiti makinruar a depekto ti pangipamaysaanna iti atensionna, ad-adda a kinitana ti pundasion ti balay ket kombinsido a mabalin pay a matarimaan dayta. Ginatangna dayta a balay sana tinarimaan ken pinapintas. Idi nalpasen, kuna dagiti aglabas a nagpintas dayta a balay. Mabalintay met kadi a tuladen ti panangmatmat dayta a tao? Imbes a dagiti nakadidillaw a pakapilawan dagiti kakabsat ti ad-adda a kitaentayo, makitatayo kadi dagiti nasayaat a galadda ken ti potensialda a rumang-ay iti naespirituan? No aramidentayo dayta, kas ken Jehova, maipategtayo met dagiti kakabsattayo gapu kadagiti naespirituan a kinapintasda.—Basaem ti Hebreo 6:10.
10. Kasano a makatulong kadatayo ti balakad iti Filipos 2:3, 4?
10 Adda imbalakad ni apostol Pablo a makatulong kadatayo a mangpasayaat iti relasiontayo iti amin a kapammatiantayo. Indagadagna kadagiti Kristiano: “Awan ti aniaman nga aramidenyo gapu iti rinnupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangyo a ti dadduma nangatngatoda ngem dakayo, nga itultuloyyo a kitaen, saan a ti personal a panaginteres iti laeng bukodyo a bambanag, no di ket kasta met ti personal a panaginteres iti bambanag ti sabsabali.” (Fil. 2:3, 4) Ti kinapakumbaba tulongannatayo a maaddaan iti umiso a panangmatmat iti sabsabali. Makatulong ti panangipakita iti personal nga interes kadagiti sabsabali ken ti panangkita kadagiti nasayaat a galadda tapno matuladtayo ti panangmatmat ni Jehova kadakuada.
11. Ania dagiti napasamak a panagbalbaliw ken ania ti resultana iti dadduma a kongregasion?
11 Iti nabiit pay, adu a tattao ti immakar gapu kadagiti panagbalbaliw iti intero a lubong. Naggapuda iti adu a nadumaduma a lugar ket agnanaedda itan iti dadduma a siudad. Dadduma kadagiti immakar iti lugartayo ti naginteres iti kinapudno nga isursuro ti Biblia, ket kaduatayo idan nga agdaydayaw ken Jehova. Naggapu dagitoy “manipud kadagiti amin a nasion ken kadagiti tribu ken kadagiti ili ken kadagiti pagsasao.” (Apoc. 7:9) Kas resultana, adu kadagiti kongregasiontayo ti buklen itan dagiti tattao a naggapu iti nadumaduma a paset ti lubong.
12. Ania a panangmatmat iti maysa ken maysa ti nasken a taginayonentayo, ken apay a narigat dayta no dadduma?
12 Iti kongregasiontayo, mabalin a nasken nga ad-adda nga ipamaysatayo ti panangtaginayon iti umiso a panangmatmattayo iti maysa ken maysa. Ipalagip kadatayo dayta ti balakad ni apostol Pedro nga iparangarangtayo ti “di managinsisingpet a nainkabsatan a panagayat” ken ‘ayatentayo ti maysa ken maysa a nasged unay manipud iti puso.’ (1 Ped. 1:22) Mabalin a narigrigat nga iparangarang dayta iti kongregasion a dagiti kamengna ket naggapu iti nadumaduma a pagilian. Mabalin a naidumatayo unay kadagiti kapammatiantayo no iti kultura, edukasion, pinansial a kasasaad, ken puli. Marigatanka kadi a mangtarus iti panagpampanunot wenno reaksion ti dadduma a kapammatiam a sabali ti pulida? Mabalin a kasta met ti marikriknada kenka. Kaskasdi, maisursuro kadatayo amin a ‘maaddaantayo iti ayat iti intero a timpuyog dagiti kakabsat.’—1 Ped. 2:17.
13. Ania a panagbalbaliw iti panagpampanunottayo ti nalabit nasken nga aramidentayo?
13 Mabalin a nasken a balbaliwantayo ti panagpampanunottayo tapno lumawa ti panagayattayo iti amin a kakabsattayo. (Basaem ti 2 Corinto 6:12, 13.) No dadduma, mabalin kadi a maibagbagatayo ti “Awan met ketdi ti idumdumak, ngem . . . ” satayo dakamaten ti dadduma a negatibo a kababalin a matmatantayo a kadawyan kadagiti kameng ti maysa a puli? Mabalin nga ipalgak dagiti kasta a komento a nasken a parutentayo ti panangidumduma a mabalin a nairamut pay laeng kadatayo. Mabalin nga iyimtuodtayo iti bagbagitayo, ‘Kanayon kadi nga ikagkagumaak nga am-ammuen dagiti tattao a naiduma ti kulturada?’ Ti kasta a panangusig iti bagi ti mabalin a makatulong kadatayo tapno ad-adda a maakseptar ken maipategtayo ti sangalubongan a panagkakabsattayo.
14, 15. (a) Mangted kadagiti pagarigan dagidiay nangbalbaliw iti panangmatmatda iti sabsabali. (b) Kasanotayo a matulad ida?
14 Dakamaten ti Biblia dagiti nagsayaat nga ulidan dagidiay nangbalbaliw iti panangmatmatda. Ni apostol Pedro ti maysa kadakuada. Kas maysa a Judio, liniklikan ni Pedro ti sumrek iti pagtaengan ti maysa a Gentil. Panunotem laengen ti nariknana idi nakiddaw a sarungkaranna ti pagtaengan ni Cornelio, a maysa a di nakugit a Gentil! Binalbaliwan ni Pedro ti panangmatmatna, gapu ta naawatanna a pagayatan ti Dios a dagiti tattao ti amin a nasion ket agbalin a paset ti kongregasion Kristiano. (Ara. 10:9-35) Ni Saulo, a nagbalin idi agangay kas apostol Pablo, ket kasapulan met a mangaramid iti panagbalbaliw tapno maiwaksina ti panangidumdumana. Inaminna a napalalo ti pananggurana idi kadagiti Kristiano ‘agingga iti punto nga indadanesna ti kongregasion ti Dios ken dinadaelna dayta.’ Ngem idi kinorehir ni Apo Jesus, naisangsangayan ti panagbalbaliw ni Pablo ken nagpaiwanwan pay ketdin kadagiti dati nga idaddadanesna.—Gal. 1:13-20.
15 Awan duadua a kabaelantayo met a balbaliwan ti panangmatmattayo babaen ti tulong ti espiritu ni Jehova. No maamiristayo nga addaantayo pay laeng iti panangidumduma, ikagumaantayo a paruten dayta ken “salimetmetan[tayo] ti panagmaymaysa ti espiritu iti mamagkaykaysa a singgalut ti talna.” (Efe. 4:3-6) Iparparegta kadatayo ti Biblia a ‘kawesantayo ti bagbagitayo iti ayat, ta dayta ket naan-anay a singgalut ti panagkaykaysa.’—Col. 3:14.
Tuladentayo ni Jehova iti Ministeriotayo
16. Ania ti pagayatan ti Dios maipapan kadagiti tattao?
16 “Awan ti panangidumduma iti Dios,” insurat ni apostol Pablo. (Roma 2:11) Panggep ni Jehova a dagiti tattao iti amin a nasion makipasetda iti urnos a panagdayaw kenkuana. (Basaem ti 1 Timoteo 2:3, 4.) Tapno matungpal dayta, inyurnosna a ti “agnanayon a naimbag a damag” ket maiwaragawag “iti tunggal nasion ken tribu ken pagsasao ken ili.” (Apoc. 14:6) Kinuna ni Jesus: “Ti talon isu ti lubong.” (Mat. 13:38) Kasano kapateg dayta kenka ken iti mismo a pamiliam?
17. Kasanotayo a matulongan dagiti amin a kita ti tattao?
17 Saan a kabaelan ti dadduma kadatayo ti mapan kadagiti adayo a paset ti lubong tapno ikasaba ti mensahe ti Pagarian. Nupay kasta, mabalin a kabaelantayo nga iranud dayta a mensahe kadagiti tattao nga agnanaed iti lugartayo a naggapu iti nadumaduma a pagilian. Alistotayo kadi a mangaprobetsar iti tunggal gundaway tapno makasabaantayo ti amin a kita ti tattao, saan laeng a dagidiay nabayagen a kaskasabaantayo? Apay a diyo aramiden a kalat ti panangdanon kadagiti saan pay unay a naan-anay a nakasabaan?—Roma 15:20, 21.
18. Ania a pannakaseknan ti imparangarang ni Jesus kadagiti tattao?
18 Narikna ni Jesus a nasken a tulonganna ti amin a tattao. Saan laeng a maymaysa a lugar ti nangasabaanna. Sigun iti salaysay ti Biblia, “napan nagsursor kadagiti amin a siudad ken purpurok.” Ket “idi makitana dagiti bunggoy simnek ti asina kadakuada” ken imbagana a nasken a tulonganna ida.—Mat. 9:35-37.
19, 20. Ania ti dadduma a pamay-an a matuladtayo ti pannakaseknan ni Jehova ken ni Jesus iti amin a kita ti tattao?
19 Ania ti dadduma a pamay-an a maiparangarangmo ti kasta a kababalin? Dadduma ti nangikagumaan a mangasaba kadagiti paset ti teritoriada a saan a kanayon a mawanas. Mabalin nga iraman dagitoy dagiti lugar ti negosio, parke, terminal dagiti lugan, wenno kadagiti pagnaedan a pasdek a nainget ti seguridadda. Adda met dagidiay nagregget nga agadal iti baro a lenguahe tapno makasabaanda dagiti etniko a grupo nga agnanaed itan iti lugarda wenno dagiti grupo a manmano a makasabaan iti napalpalabas. Mabalin a makatulong unay ti panangadal no kasano a kablaawan dagitoy a tattao iti nakayanakanda a pagsasao tapno maipakitam a talaga a maseknanka iti pagimbaganda. No saantayo a kabaelan ti agadal iti sabali a lenguahe, mabalintay kadi a paregtaen dagidiay makabael a mangaramid iti dayta? Sigurado a ditay kayat nga upayen wenno kuestionaran dagidiay mangikagkagumaan a mangasaba kadagiti tattao a naggapu iti sabali a pagilian. Matmatan ti Dios a napateg ti amin a biag ket kayattayo a tuladen ti panangmatmatna.—Col. 3:10, 11.
20 Ti panangtulad iti panangmatmat ti Dios kaipapananna met ti panangasabatayo iti amin, aniaman ti kasasaadda. Mabalin a ti dadduma ket awanan iti pagtaengan, narugit ti langada, wenno agparang nga imoral ti panagbiagda. No adda dagiti saan a nasayaat ti panangtratoda kadatayo, saan koma nga agbalin a negatibo ti panangmatmattayo iti nasionalidadda wenno pulida. Adda dagidiay siuulpit a nangmaltrato ken Pablo, ngem dina impalubos a dayta ti mangpasardeng kenkuana a mangasaba kadagiti kasta a kita ti tattao. (Ara. 14:5-7, 19-22) Nanginanama nga addanto met laeng dagiti mangipateg iti mensahena.
21. Kasano a makatulong kenka ti panangtuladmo iti panangmatmat ni Jehova iti sabsabali?
21 Nalawlawag itan kadatayo no apay a nasken ti panangpatanor iti umiso a panangmatmat—ti panangmatmat ni Jehova—iti pannakilangentayo kadagiti kakabsat iti lugartayo, iti sangalubongan a panagkakabsat, ken kadagiti tattao iti tay-ak ti pangasabaan. No ad-adda nga iparangarangtayo ti panangmatmat ni Jehova, ad-adda nga agbalintayo a nabileg nga impluensia agpaay iti talna ken panagkaykaysa. Iti kasta, ad-adda a matulongantayo ti sabsabali a mangapresiar ken Jehova, ti Dios a “saan a nangipakita iti panangidumduma” no di ket mangipakpakita iti naayat a pannakaseknan iti amin, “ta isuda amin aramid dagiti imana.”—Job 34:19.
Masungbatam Kadi?
• Ania a panangmatmat kadagiti kapammatiantayo ti rumbeng nga ikagumaantayo nga iwaksi?
• Kasanotay a matulad ti panangmatmat ni Jehova kadagiti kakabsattayo?
• Ania dagiti nasursurom maipapan iti panangmatmattayo iti sangalubongan a panagkakabsattayo?
• Kasanotay a matulad ti panangmatmat ni Jehova kadagiti tattao no addatayo iti pangasabaan?
[Ladawan iti panid 26]
Kasanom a maam-ammo dagiti tattao a naiduma kenka ti kulturada?
[Dagiti Ladawan iti panid 28]
Kadagiti ania a pamay-an a maikasabam ti naimbag a damag iti ad-adu a tattao?