Ti Biag ken Ministerio ni Jesus

Ti Dalan nga Agturong iti Biag

TI DALAN nga agturong iti biag ket isut’ panangsalimetmet kadagiti pannursuro ni Jesus. Ngem saan a nalaka nga aramiden daytoy. Dagiti Pariseo, kas pangarigan, ti adda pagannayasanda a mangukom kadagiti dadduma a siuuyong, ket mabalin nga adu dagiti mangtulad kadakuada. Gapuna bayat ti panangitultuloy ni Jesus iti Sermonna idiay Bantay, isut’ namalakad: “Dikay agipato tapno dikayo maipato; ta iti panangipato nga aramidenyo, kasta met ti pannakaipatoyonto.”

Nakapegpeggad ti panangsurot iti panangidaulo dagiti nalabes panangipatoda a Pariseo. Sigun iti salaysay ni Lucas, inyilustrarna daytoy a peggad babaen iti panagkunana: “Mabalin ngata ti bulsek nga idalan ti padana a bulsek? Didanto ngata matnag nga agpadpada iti abut?”

Ti nalabes ti panangbabalawna kadagiti dadduma, a padpadakkelen dagiti biddutda, ket maysa a nadagsen a basol. Gapuna insaludsod ni Jesus: “Kasano ti panagkunamto ken kabsatmo, ‘Agurayka, ikkatek ita matam ti puling’; ket adtoy! ti maysa a pasanggir iti matam? Managinsisingpet! Umuna pay nga ikkatem ti pasanggir iti matam, ket iti kasta makakitakanto a nalawag iti panangikkatmo ti puling iti mata ni kabsatmo.”

Dina kaipapanan daytoy a dagiti adalan ni Jesus ket saanda nga agusar iti pannakaawat maipapan kadagiti dadduma a tattao, ta kunana: “Saanyo nga ited ti nasantuan kadagiti aso, ket saanyo met nga idisso dagiti perlasyo iti sanguanan dagiti baboy.” Dagiti kinapudno manipud Sao ti Dios nasantuanda. Naiyarigda kadagiti piguratibo a perlas. Ngem no dadduma a tattao, a kasla aso wenno baboy, awan ipakitada a panangipateg kadagiti nasudi a kinapudno, rebbeng a panawan dagiti adalan ni Jesus dagidiay a tattao ket birukenda dagiti lapayag nga ad-adda nga umawat.

Numan pay sinalaysay ni Jesus ti kararag a nasapsapa iti sermonna, ita ipagpaganetgetna ti pannakasapul ti panagbalin a naganetget iti dayta. “Itultuloyyo ti dumawat,” ingunamgunamna, “ket maikkankayto.” Tapno maiyilustrar ti kinasagana ti Dios a sumungbat kadagiti kararag, insaludsod ni Jesus: “Asino ti tao nga adda kadakayo a no ti anakna dumawatto koma ti tinapay​—isu ikkannanto aya ti maysa a bato? . . . Ngarud, no dakayo, idinto a dakeskayo, ammoyo ti mangted kadagiti nasayaat a sagsagut kadagiti annakyo, saan aya a nangnangruna pay ni Amayo nga adda sadi langit a mangtedto kadagiti nasayaat a bambanag kadagiti agdawat kenkuana?”

Sumaganad nangipaay ni Jesus ti nagbalin a nalatak a pagalagadan ti kababalin, a gagangay a maaw-awagan ti Nabalitokan a Pagalagadan (Golden Rule). Kunana: “Gapuna, amin dagiti bambanag, a kayatyonto a dagiti tattao aramidenda koma kadakayo, kasta met ti aramidenyo kadakuada.” Ti panagbiag a maitunos iti daytoy a pagalagadan ramanenna ti positibo a panagtignay iti panagaramid ti naimbag kadagiti dadduma, a tratuen ida kas iti kayatyo met a pannakatrato.

A ti dalan nga agturong iti biag ket saan a nalaka impanayag ti bilin ni Jesus: “Sumrekkayo iti ruangan a nailet; ta akaba ti ruangan ken nalawa ti dalan a mangiturong iti pakadadaelan, ket adu dagiti sumrek kenkuana; ta nailet ti ruangan ken akikid ti dalan a mangiturong iti biag, ket natakkon dagiti makasarak kenkuana.”

Ti peggad iti pannakaiyaw-awan ti dakkel unay, gapuna namakdaar ni Jesus: “Agaluadkayo kadagiti naulbod a mammadto nga umayda kadakayo a nakakawes a kasla karnero, ngem iti unegda loboda a narawet.” No kasano a ti nasayaat a kaykayo ken dakes a kaykayo mailasinda babaen kadagiti bungbungada, kuna ni Jesus, mailasin met dagiti ulbod a mammadto babaen kadagiti kababalin ken sursuroda.

Iti panagtultuloyda, inlawlawag ni Jesus a saan laeng a no ania ti kunaen ti maysa a tao ti mamagbalin kenkuana kas adalanna no di ket ti ar-aramidenna. Dadduma a tattao kunaenda a ni Jesus isu ti Apoda, ngem no saanda nga ar-aramiden ti pagayatan ni Amana, kunana: “Ket siak ipalgakkonto kadakuada: “Uray kaano dikayo naam-ammo! Umadayokayo kaniak, dakayo nga agar-aramid ti dakes.”

Kamaudiananna, inted ni Jesus ti nakalaglagip a panangserra ti sermonna. Kunana: “Siasinoman ngarud a dumngeg kadagitoy a saok ket aramidenna ida maipadisto iti maysa a tao a manakem, a binangonna ti balayna iti rabaw ti bato. Ket nagtinnag ti tudo ket immay dagiti laylayus ket nagangin ket nagdissuoranda daydi a balay, ket saan a natuang, ta nabangon iti rabaw ti bato.”

Iti kasumbangirna, kuna ni Jesus: “Ket amin a makangngeg kadagitoy a saok ket saanna ida nga aramiden maipadisto iti maysa a tao a maag, a binangonna ti balayna iti rabaw ti darat. Ket nagtinnag ti tudo ket immay dagiti laylayus ket nagangin ket nagdissuoranda daydi a balay ket natuang, ket dakkel ti pannakarbana.”

Idi a nalpasen ni Jesus ti sermonna, nagsiddaaw dagiti umariwekwek iti panangisursurona, ta isursurona ida kas maysa a tao nga addaan ti autoridad ket saan a kas kadagiti narelihiusuan a papanguloda. Mateo 7:1-29; Lucas 6:27-49.

◆ Aniat’ kuna ni Jesus maipapan ti panangipato kadagiti dadduma; ngem kasano ti panangipakitana a dagiti adalanna kasapulan ti panangusarda ti pannakaawat maipapan kadagiti tattao?

◆ Ania pay ti kinuna ni Jesus maipapan ti kararag, ket ania a pagalagadan ti impaayna?

◆ Kasanot’ panangipakita ni Jesus a ti dalan ti biag ket saan a nalaka ken adda iti peggad ti pannakaiyaw-awan?

◆ Kasano a sinerraan ni Jesus ti sermonna, ket ania ti epekto dayta?