Kasanom a Tratuen Dagiti Sabsabali?
“DIMO aramiden kadagiti sabsabali ti dimo kayat nga aramidenda kenka.” Isu dayta ti prinsipio ti nalatak a Tsino a mannursuro ken pilosopo a ni Confucius. Ita, agarup 2,500 a tawenen ti napalabas, adu latta ti agkuna a maibilang a nalinteg ti maysa a tao basta saan nga agar-aramid iti dakes kadagiti sabsabali.
Siempre, adda pagimbagan daytoy a prinsipio ni Confucius. Ngem ti Biblia ipamatmatna ti sabali a kita ti kababalin ken pannakilangen ti tao. Malaksid iti basol gapu iti panagaramid iti dakes maibusor iti pada a tao, ti Biblia saritaenna ti basol gapu iti saan a panangaramid iti maysa a banag. Insurat ti Kristiano nga adalan a ni Santiago: “No ti maysa ammona ti agaramid iti umiso ket kaskasdi a saanna nga aramiden dayta, basol dayta kenkuana.” (Santiago 4:17) Imbes a bilinenna dagiti Kristiano a dida laeng agaramid iti dakes, imbalakad pay ni Jesu-Kristo: “Amin a bambanag . . . a kayatyo nga aramiden kadakayo dagiti tattao, masapul a kasta met ti aramidenyo kadakuada.”—Mateo 7:12.
Ti orihinal a panggep ti Dios ket amin a tattao tratuenda ti maysa ken maysa a kas iti kayatda a pannakatrato. Impasdekna ti kasayaatan nga ulidan iti panangyebkas iti pannakaseknan iti pagimbagan ti sabsabali. Impakitana dayta iti wagas a panangparsuana kadagiti tattao: “Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.” (Genesis 1:27) Kaipapananna dayta a ti Dios siaayat nga impaayanna dagiti tattao iti konsiensia, a no siuumiso a masanay, dayta ti mangiwanwan kadakuada a mangtrato kadagiti sabsabali iti pamay-an a kayatda a pannakatrato.
Adu ita ti agsagsagaba iti kinaawan ti namnama ken gaway gapu kadagiti di maseknan ken managimbubukodan a tattao. Nalawag a saan laeng a kasapulan a liklikan ti dakes ken makadangran nga aramid no di ket nasken nga agaramid iti naimbag ken makatulong kadagiti sabsabali. Gapu iti daytoy, dagiti Saksi ni Jehova boluntario a mangaramidda iti positibo a tignay tapno matulonganda dagiti sabsabali a mangammo iti naisangsangayan a namnama a masarakan iti Sao ti Dios. No idanonda kadagiti kaarrubada ti naimbag a damag manipud iti Biblia, aramidenda dayta buyogen ti espiritu ti ayat, nga aramidenda kadagiti sabsabali ti kayatda a maaramid kadakuada.