Dagiti Saludsod Manipud Kadagiti Agbasbasa

Naragsakantayo a nangadal iti pangngarig ni Jesus maipapan kadagiti karnero ken kalding. No anagentayo ti baro a pannakaawat a naidatag iti “Pagwanawanan” nga Oktubre 15, 1995, maikunatay pay kadi a makiramraman dagiti Saksi ni Jehova ita iti trabaho a panamaglalasin?

Wen! Nakaaawat, adu ti mangpampanunot iti daytoy agsipud ta kuna ti Mateo 25:31, 32: “Inton ti Anak ti tao dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket isuamin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding.” Ti Pagwanawanan nga Oktubre 15, 1995, impakitana no apay nga agaplikar dagitoy a bersikulo kalpasan a mangrugi ti dakkel a rigat. Umayto ni Jesus iti dayagna a kuyogen dagiti anghelna ket agtugawto iti trono a pangukomanna. Kalpasanna, paglalasinenna dagiti tattao. Iti ania nga anag? Iyetnagnanto ti pangngeddengna maibatay iti inaramid wenno di inaramid dagiti tattao sakbay dayta a tiempo.

Mayarigtay daytoy iti agsasaganad nga addang iti legal a proseso nga agturong iti kaso iti korte. Maurnong ti ebidensia iti panaglabas dagiti aldaw sakbay nga iyetnag ti korte ti pangngeddeng ken sentensia. Nabayagen a maur-urnong ti ebidensia no dagiti tattao a sibibiag ita mapaneknekandanto a karnero wenno kalding. Ket manaynayonan pay ti ebidensia. Ngem inton agtugaw ni Jesus iti tronona, nalpaston ti kaso. Nakasagananton a mangukom. Mapaglalasinto dagiti tattao nga agturong iti agnanayon a pannakagessat wenno iti biag nga agnanayon.

Nupay kasta, ti kinapudno a maaramidto pay laeng iti masanguanan ti panamaglalasin kadagiti tattao nga agturong iti biag wenno patay a nadakamat iti Mateo 25:32 dina kayat a sawen nga awan panamaglalasin, wenno panamagsisina, a maaramid sakbay dayta. Iti Mateo kapitulo 13, dakamaten ti Biblia ti maysa a panamaglalasin nga umun-una a maaramid. Makapainteres, ti libro a Nagkaykaysa iti Panagdayaw iti Maymaysa a Pudno a Dios, panid 179-80, salaysayenna daytoy iti babaen ti subtitulo a “Pananglasinlasin Kadagiti Tattao”.a Kuna ti libro: “Addada met dadduma pay a nasken a paspasamak a sitatan-ok nga innaig ni Jesus iti panungpalan ti sistema dagiti bambanag. Maysa kadagitoy isu ti panamaglalasin ‘kadagiti annak ti pagarian’ manipud ‘kadagiti annak ti managdakdakes.’ Dinakamat daytoy ni Jesus iti pangngarigna maipapan iti talon ti trigo a minulaan met ti kabusor kadagiti sisania.”

Tuktukoyen ti libro ti ilustrasion ni Jesus a nailanad iti Mateo 13:24-30 ken nailawlawag iti bersikulo 36-43. Imutektekanyo ta iti bersikulo 38 dagiti nasayaat a bin-i ti trigo itakderanda dagiti annak ti Pagarian, ngem dagiti dakes a ruot itakderanda dagiti annak ti managdakdakes. Ipakita ti bersikulo 39 ken 40 nga iti ‘panungpalan ti sistema ti bambanag’​—ti tiempo a pagbibiagantayon​—maurnong dagiti dakes a ruot. Mailasin dagitoy sa mapuoran, madadael.

Ti ilustrasion adda pakainaiganna kadagiti napulotan a Kristiano (nga iti pangngarig maipapan kadagiti karnero ken kalding naawaganda a kakabsat ni Jesus). Kaskasdi, nabatad nga adda napateg a panamaglalasin a maaramid iti tiempotayo, ti pannakailasin dagiti napulotan kadagidiay agkunkuna a Kristiano ngem pampaneknekanda nga “annak [ida] ti managdakdakes.”

Nangted ni Jesus iti dadduma pay nga ehemplo maipapan iti panamagsisina, wenno panamaglalasin kadagiti tattao. Lagipenyo a kinunana maipapan iti nalawa a dalan nga agturong iti pakadadaelan: “Adu dagidiay sumrek iti dayta.” (Mateo 7:13) Dayta ket saan a maipapan laeng iti ultimo a pagtungpalan. Maipapan daytoy iti agtultuloy a pasamak, no kasano nga adda sumagmamano ita a makasarsarak iti nailet a dalan nga agturong iti biag. Lagipenyo met nga idi imbaonna dagiti apostolna, kinuna ni Jesus a makasarakdanto iti sumagmamano a maikari. Saan a maikari dagiti dadduma, ket dagiti apostol pampagenda ti tapok kadagiti sakada “a maipaay a pangsaksi a maibusor” kadagita a tattao. (Lucas 9:5) Saan kadi a mapaspasamak met ti kasta iti publiko a panangaskasaba dagiti Kristiano ita? Adda dagiti dumngeg, idinto ta di ikankano dagiti dadduma ti nadibinuan a mensahe nga idandanontayo.

Kastoy ti kinuna dagiti artikulo iti Pagwanawanan maipapan kadagiti karnero ken kalding: “Nupay maaramidto pay laeng iti asideg a masanguanan ti panangukom a nailadawan iti pangngarig, uray ita adda nagpateg a maar-aramid. Datayo a Kristiano makiramramantay iti makaispal-biag a trabaho, nga isu ti panangiwaragawag iti mensahe a mamaglalasin kadagiti tattao. (Mateo 10:32-39).” Kadagita a bersikulo iti Mateo kapitulo 10, mabasatayo a kinuna ni Jesus a ti panangsurot kenkuana agbanag iti panagsisina​—ti ama maibusor iti anak a lalaki, ti anak a babai maibusor iti ina.

Kamaudiananna, idadaulo dagiti napulotan a kakabsat ni Kristo ti sangalubongan a panangikasaba iti mensahe ti Pagarian. Bayat a mangngegan dayta dagiti tattao, ipangagda man wenno saan, ipakpakitada no aniada a kita ti tattao. Datayo a tattao ditay maibaga, ken di rumbeng nga ibagatayo a, ‘Karnero daytoy a tao; kalding dayta a tao,’ sigun iti anag ti Mateo kapitulo 25. Nupay kasta, ti panangipakaammotayo iti naimbag a damag kadagiti tattao ikkanna ida iti gundaway a mangipakita no sadino ti pagtakderanda​—no aniada ken no kasano ti panangtratoda kadagiti kakabsat ni Jesus. No kasta, kas iti umad-adu nga ebidensia iti maysa a kaso iti korte, lumawlawag ti pannakailasin dagidiay mangsupsuporta kadagiti kakabsat ni Jesus kadagidiay agkedked a mangsuporta kadakuada. (Malakias 3:18) Kas impakita ti Pagwanawanan, din agbayag agtugawto ni Jesus iti tronona ket ipatawna ti sentensia, nga iti kamaudiananna ukomenna a paglalasinen dagiti tattao nga agturong iti biag wenno iti pannakagessat.

[Footnote]