Gapuna, maitunos iti dawatda​—ken ayatna a mangpennek kadagiti adu a tattao a nangnangruna ngem ti panangaramidna ti ammona a nalinteg​—inibbatan ni Pilato ni Barrabas kadakuada. Innalana ni Jesus ket linabusanna sana pinasaplit. Saan a gagangay daytoy a panangbaot. Dineskribir ti The Journal of the American Medical Association ti ugali dagiti Romano a panangsaplit:

“Ti kadawyan nga instrumento ket maysa nga ababa a baot (flagrum wenno flagellum) nga addaan sumagmamano a saggaysa wenno sinallapid a lalat a barbarayubay a nagduduma ti kaatiddogda, nga adda babassit a bola a landok wenno natatadem a babassit a tultulang ti karnero a naigalut iti nagbabaetanda. . . . Bayat ti maulit-ulit a panangibaot dagiti Romano a soldado iti bukot ti biktima a sipipigsa, dagiti bola a landok pataudenda dagiti nauuneg a bukol, ket dagiti barbaruybay a lalat ken tultulang ti karnero sugatenda ti kudil ken dagiti tisyu iti uneg ti kudil. Ket, bayat nga agtultuloy ti panangbabaot, dagiti panangsugat dumanonda kadagiti makin-uneg a laslasag ti rurog ket mangpataud kadagiti agpigpigerger a naiw-iwa nga agdardara a lasag.”

Nupay nadundunor ken namalmalo, adtoy a sitatakder ti naisalsalumina unay a pigura iti amin a historia, ti pudpudno a katan-okan a tao a nagbiag pay laeng! Wen, impakita ni Jesus ti naulimek a dignidad ken kinakalma a mangiyeb-ebkas ti kinatan-ok nga uray mismo ni Pilato masapul a bigbigenna, ta dagiti sasaona kaawatan a panaglaok agpadpada iti panagraem ken panangngaasi. Juan 18:39–19:5; Mateo 27:15-17, 20-30; Marcos 15: 6-19; Lucas 23:18-25.