Ti Biag ken Ministerio ni Jesus

Panangisuro a Buyogen dagiti Ilustrasion

KAAWATAN a ni Jesus adda idiay Capernaum idi a tinubngarna dagiti Pariseo. Iti dayta met laeng nga aldaw pinanawanna ti balay ket nagna idiay asideg met laeng a Baybay ti Galilea, a nakaurnongan dagiti tattao. Sadiay limmugan iti maysa a barangay, immadayo bassit, ket rinugianna nga insursuro dagiti tattao nga adda iti igid ti baybay maipapan ti Pagarian dagiti langlangit. Inaramidna daytoy babaen kadagiti agsasaruno a pangngarig, wenno ilustrasion, a tunggal maysa addaan kadagiti kasasaad a pagaammo dagiti tattao.

Umuna, sinalaysay ni Jesus ti maipapan iti agmulmula ti bin-i. Dadduma kadagiti bin-i ti nagtinnag iti igid ti dalan ket tinuktok dagiti tumatayab. Dadduma a bin-i nagtinnag iti daga nga adda iti bato iti babaenna. Agsipud ta dagiti ramut ket saanda a makauneg, dagiti baro a mula nalpesda gapu iti napalalo a pudot ti init. Kaskasdi dadduma a bin-i nagtinnagda kadagiti kasisiitan, a nangleppes met kadagiti mulmula idi a timmuboda. Kamaudiananna, dadduma a bin-i nagtinnag iti naimbag a daga ket nangpataud ti bunga a ginasut, dadduma innem a pulo, ken dadduma saggatlo pulo.

Iti sabali a pangngarig, kinuna ni Jesus a ti Pagarian ti langit ket kas iti maysa a tao a nagmula ti bin-i. Bayat ti panaglabas dagiti aldaw, idi a ti lalaki ti matmaturog ket idi isu ti nagriing, timmubon dagiti bin-i. Ti tao dina ammo no kasano. Dagita ti timmubo a bukbukodda ket nagbungada. Idi naluomen ti binukel, inani ti lalaki dayta.

Sinalaysay ni Jesus ti maikatlo nga ilustrasion maipapan ti maysa a tao a nagmula ti umiso a kita ti bin-i, ngem idi isut’ matmaturog, immay ti maysa a kabusor ket nagmula kadagiti zizania iti nagbabaetan dagiti trigo. Insaludsod dagiti ad-adipen ti lalaki no mapanda paruten dagiti zizania. Ngem insungbatna: ‘Saan, di la ket ta maparutyo ti dadduma kadagiti trigo. Bay-anyo ida a dumakkelda amin agingga iti panagani. Kalpasanna ibagakto kadagiti agani nga ilasinda dagiti zizania sadanto puoran ida ket ikabil ti trigo idiay kamalig.’

Iti panangitultuloyna ti palawagna kadagidiay umariwekwek nga adda idiay igid ti baybay, nangted pay ni Jesus ti dua nga ilustrasion. Inlawlawagna a “ti pagarian dagiti langlangit” ket kas iti mustasa nga immula ti maysa a tao. Nupay dayta ti kabassitan kadagiti isuamin a bin-i, kunana, daytat’ dimmakkel a kadadakkelan kadagiti isuamin a mula. Nagbalin dayta a maysa a kayo nga umayan dagiti tumatayab, ket maaddaanda iti pagapunan kadagiti sangsangana.

Dadduma itatta suppiatenda nga adda pay babbabassit a bin-i ngem iti mustasa. Ngem ni Jesus saan a mangmangted ditoy iti maysa a leksion iti botania. Kadagiti bin-i a pagaammo dagiti taga Galilea idi kaaldawanna, ti mustasa ket pudpudno nga isu ti kabassitan. Gapuna apresiarenda unay ti maipapan iti aglaplapusanan a panagdakkel nga inyilustrar ni Jesus.

Kamaudiananna, inyarig ni Jesus “ti pagarian ti langlangit” iti lebadura nga innala ti maysa a babai ket inlaokna dayta iti tallo a dadakkel a palanggana nga arina. Idi agangay, kinunana, daytat’ nangramaram iti amin a paset ti masa.

Kalpasan ti panangtedna kadagitoy lima nga ilustrasion, pinagawiden ni Jesus dagiti umariwekwek ket nagsubli metten idiay balay a paggigiananna. Di nagbayag dagiti 12 nga apostolesna ken dagiti dadduma immayda kenkuana sadiay. Mateo 13:1-9, 24-36; Marcos 4:1-9, 26-32; Lucas 8:1-8.

◆ Kaano ken sadino ti nakisawan ni Jesus kadagiti umariwekwek babaen kadagiti ilustrasion?

◆ Ania dagiti lima nga ilustrasion nga insalaysay ni Jesus kadagiti umariwekwek?

◆ Apay nga imbaga ni Jesus a ti mustasa isu ti kababassitan kadagiti amin a bin-i?