PANANGBUGGO ITI IM-IMA
Idi un-unana, masansan a mabugguan ti ima babaen ti pannakaibukbok ti danum kadagita imbes a maitabnaw ti ima iti pagkargaan nga adda danumna. Mataya ti nagbugguan a danum babaen iti pagkargaan wenno palanggana nga adda iti batog ti im-ima.—Idiligyo ti 2Ar 3:11.
Imbilin ti Linteg a sakbay nga agserbi ti papadi iti altar wenno sumrekda iti tolda ti gimong, bugguanda nga umuna ti im-ima ken saksakada iti palanggana a gambang a masarakan iti nagbaetan ti santuario ken ti altar. (Ex 30:18-21) Imbaga pay ti Linteg a no adda masarakan a napapatay ket saan nga ammo no asino ti nangpapatay, dagiti lallakay ti siudad a kaasitgan iti napapatay a tao mangalada iti urbon a baka, daydiay saan pay a pulos napagtrabaho wenno saan pay a pulos nagguyod iti sangol, sa ipanda iti maysa a ginget a pagay-ayusan ti danum ket sadiay rung-uenda ti tengngedna. Kalpasan daytoy, dagiti lallakay bugguanda ti im-imada iti rabaw ti urbon a baka, a mangipasimudaag nga awan basolda iti dayta a pammapatay. (De 21:1-8) Kasta met, sigun iti Linteg, naibilang a narugit ti maysa a tao no masagid ti asinoman nga addaan iti panagpasayasay a saan a nangbuggo kadagiti imana.—Le 15:11.
Tinarigagayan ni David ti nadalus nga im-ima mainaig iti moral tapno mabalinanna ti agdaydayaw iti sanguanan ti altar ni Jehova. (Sal 26:6) Iti sabali a bangir, awan mamaayna a binugguan ni Pilato dagiti imana iti sanguanan dagiti umili tapno pagparangenna nga awan basolna iti dara mainaig iti ipapatay ni Jesus. Ngem agpapan pay iti kastoy nga inaramidna, adda latta sungsungbatanna iti ipapatay ni Jesus, yantangay isu ti makin-autoridad iti pannakaipataw iti dusa, imbes a dagiti nagulo a managderraaw.—Mt 27:24.
Ti panangbuggo iti im-ima ket nakapatpateg unay kadagiti eskriba ken Fariseo idi umuna a siglo K.P., ket nakisupiatda ken Jesu-Kristo ta sinalungasing dagiti adalanna dagiti nagkauna a tradision ti tattao gapu ta saanda a bugguan ti im-imada no manganda. Daytoy ket saan laeng a basta panangbuggo ti ima tapno nadalus no di ket nainaig dayta iti ritual a seremonia. “Dagiti Fariseo ken amin dagiti Judio saanda a mangan malaksid no bugguanda dagiti imada agingga iti siko.” (Mr 7:2-5; Mt 15:2) Sigun iti Talmud ti Babilonia (Sotah 4b), agpada ti kasasaad daydiay mangmangan a di nabugguan ti im-imana ken daydiay nakirelasion iti maysa a balangkantis, ket naikuna a daydiay mangtagtagilag-an iti panangbuggo iti ima “maparutto iti lubong.”—Kitaenyo ti PANAGDIGUS, PANAGBUGGO.