IGGES, SUR-IT

[Heb., rim·mahʹ, toh·le·ʽahʹ wenno toh·laʹʽath; Gr., skoʹlex].

Ti larva a kasasaad ti maysa nga insekto kalpasan nga agpessa. Ti termino nga “igges” wenno “sur-it” ket kangrunaanna a tumukoy iti larva ti ngilaw a masarakan iti malunglungsot a nateng wenno iti agruprupsa a bangkay ti animal ken kadagiti sibibiag a tisyu. Ti sibibiag wenno agruprupsa a banag ti mangipaay iti pudot a mangpessa kadagiti itlog ken dayta met ti agpaay a taraonda. No dadduma, ti matuktukoy nga igges ket mangmangan iti natnateng ken mulmula.​—De 28:39; Jon 4:7.

Narapis ken nabennebenneg ti bagi ti sur-it wenno igges, ngem awan ti sakana ken kasla awan ulona. Nupay kasta, kuna ti The Smithsonian Series (Tomo 5, p. 343) maipapan iti ulo ti sur-it: “Ti ulona ket isu ti nagkimos nga ungto ti bagina, ngem ti pudpudno nga ulona ket interamente a nailumlom iti bagina. Manipud lungog a limnekan ti ulona (nga agpaay kas ngiwatna), agdawadaw ti dua a kawit a sinankuko a dagitoy ti agserbi a sangi ken paggammatna.”

Ipakita ti Kasuratan a dagiti natay nga organiko a banag ti agpaay a taraon dagiti igges wenno sur-it. (Job 7:5; 17:14; 21:26; 24:20; Isa 14:11) No idulin idi dagiti Israelita ti namilagruan a manna agingga iti bigat, bumangsit dayta ken adda dagiti tumaud nga igges wenno sur-it, malaksid no maidulin dayta iti maikanem nga aldaw agpaay iti Sabbath. (Ex 16:20, 24) Idi dinakamat ni Jesus ti “igges” mainaig iti Gehenna, nabatad a tuktukoyenna ti pagibellengan iti ruar ti siudad ti Jerusalem a sadiay a mapuoran ti basura nga adda dagiti sibibiag nga igges wenno sur-it kadagiti agruprupsa a banag iti asideg ti apuy, ngem saan nga iti mismo nga apuy.​—Mr 9:48; idiligyo ti Isa 66:24; kitaenyo ti GEHENNA.

Ti termino nga “igges” ket maar-aramat met a pangiladawan iti maysa a kasasaad. Tinagibassit ni Bildad ti tao idi tinukoyna dayta kas maysa nga igges (Job 25:6), ket naipadto a maibilang ti Mesias kas maum-umsi ken makapasimron, kas iti maysa nga igges. (Sal 22:6) Ni Jehova a Dios tinukoyna ti Israel kas maysa nga igges, nanumo ken awan gawgawayna a parsua, a mabalin a payatan lattan ti asinoman a lumabas. Ngem impanamnama ni Jehova a tulonganna dagiti Israelita ket pinaregtana ida a saanda nga agbuteng.​—Isa 41:14.