SUPOT A LALAT

Ti Griego a sao nga a·skosʹ ket tumukoy iti maysa a supot wenno botelia a naaramid iti sibubukel a lalat ti animal. Kinuna ni Jesu-Kristo: “Saan met a mangikabil dagiti tattao iti baro nga arak kadagiti daan a supot a lalat; ngem no aramidenda, iti kasta dagiti supot a lalat bumtak ket ti arak maibelleng ket dagiti supot a lalat madadael. No di ket mangikabil dagiti tattao iti baro nga arak kadagiti baro a supot a lalat, ket agpada a mataginayon dagita.” (Mt 9:17; Mr 2:22; Lu 5:37, 38) Bayat nga umalsem ti baro nga arak, mangparnuay dayta iti gas a carbon dioxide a mangpataud iti puersa iti uneg dagiti lalat a botelia. Agyatyat dagiti baro a lalat; dagiti daanen ken saanen nga agbennat a lalat bumtakda gapu iti dayta a puersa.

Daytoy a pangngarig ket paset ti sungbat ni Jesus no apay a saan nga inannurot dagiti adalanna ti amin a daan a kaugalian ken ar-aramid dagiti Fariseo. Nabatad nga impasimudaag ni Jesus a ti kinapudno iti Nakristianuan a pammati ket addaan iti kasta unay a bileg ken puersa a saan a kabaelan a taginayonen ti daan a sistema ti Judaismo, nga awanan kadagiti kualidad a kas iti kinalagda ken kinalaka nga agbennat, ken napartak nga aglabas. (Mt 9:14-16) Maipaay iti pannakaibinsabinsa dagiti lalat a botelia ken dagiti usarda, kitaenyo ti BOTELIA.