Dagiti Saludsod Manipud Kadagiti Agbasbasa
Tallo kadagiti Ebanghelio ti nangisalaysay iti reklamo maipapan iti pannakaisapsapo ti nangina a lana ken Jesus. Adu kadi nga apostol ti nagreklamo, wenno ni Judas ti kangrunaan a nagreklamo?
Naisalaysay daytoy a pasamak iti Ebanghelio da Mateo, Marcos, ken Juan. Agparang a ni Judas ti kangrunaan a nagreklamo, ket inayonan ti dadduma kadagiti apostol. Iyilustrar daytoy a pasamak no apay nga agyamantayo ta adda kadatayo ti uppat nga Ebanghelio. Umiso ti inlanad ti tunggal mannurat, ngem saan a parepareho dagiti detalye nga insuratda. No pagdidiligentayo dagiti agpapada a salaysay, ad-adda a maawatantayo ken ad-adu a detalye ti maammuantayo maipapan iti adu a pasamak.
Iti salaysay ti Mateo 26:6-13, nadakamat no sadino a napasamak dayta—iti balay ni Simon nga agkukutel, idiay Betania—ngem dina innaganan ti babai a nangibukbok iti napabanglo a lana iti ulo ni Jesus. Kinuna ni Mateo: “Idi makitada daytoy nagrurod dagiti adalan” ket inreklamoda a nailako koma ti lana sa naited ti naglakuan kadagiti napanglaw.
Nairaman iti salaysay ni Marcos ti kaaduan kadagita a detalye. Ngem innayonna a linuktan ti babai ti praskita. Napno dayta iti napabanglo a lana a “pudpudno a nardo,” kas iti daydiay nalabit naggapu idiay India. No maipapan iti reklamo, impadamag ni Marcos nga “adda idi sumagmamano a mangyeb-ebkas iti rurod,” ket “nagrurodda kenkuana iti napalalo.” (Marcos 14:3-9) Ipakita ngarud dagiti dua a salaysay a saan la a maymaysa nga apostol ti nagreklamo. Ngem kasano a nangrugi dayta?
Adda dagiti mainaig a detalye nga innayon ni Juan, a nakaimatang iti dayta a pasamak. Innagananna ti babai—ni Maria a kabsat da Marta ken Lazaro. Inraman met ni Juan daytoy a detalye, a maikunatayo a mangkomplemento imbes a kumontra: “Sinapsapuanna dagiti saka ni Jesus ket pinunasanna a pinamagaan dagiti sakana babaen iti buokna.” No pagtitiponentayo dagiti salaysay, maawatantayo nga imbukbok la ketdi ni Maria iti ulo ken kadagiti saka ni Jesus ti lana, a “pudpudno a nardo” kas pinasingkedan ni Juan. Nakasingsinged ni Juan ken Jesus, isut’ gapuna a makapungtot no adda manginsulto ken Jesus. Mabasatayo: “Ni Judas Iscariote, a maysa kadagiti adalanna, isu a dandanin mangliput kenkuana, kinunana: ‘Apay a daytoy napabanglo a lana di nailako iti tallo gasut a denario ket naited kadagiti napanglaw a tattao?’”—Juan 12:2-8.
Siempre, ni Judas ket “maysa kadagiti adalanna,” ngem matarusanyo no apay a nagrurod ni Juan iti banag a maysa kadagiti adalan ti agpangpanggep a mangliput ken Jesus. Maipapan iti Juan 12:4, kinuna ni Dr. C. Howard Matheny, maysa a managipatarus: “Ti sao a ‘dandanin’ ken ‘dandanin mangliput’ agpada nga iyebkasda ti agtultuloy a tignay. Ipamatmat daytoy a ti panangliput ni Judas ken Jesus ket saan nga apagkanito ken di napakpakadaan a tignay agsipud ta pinampanunot ken implanona dayta iti adu nga aldaw.” Kinuna pay ni Juan a nagreklamo ni Judas “saan a gapu ta maseknan kadagiti napanglaw, no di ket gapu ta isu maysa a mannanakaw ken adda kenkuana ti kahon ti kuarta ket al-alaenna dagiti kuarta a naikabil iti dayta.”
Agparang a nainkalintegan ngarud a ni mannanakaw a Judas ti nangirugi iti panagreklamo agsipud ta ad-adu ti matakawna no mailako ti nangina a lana ket maikabil ti kuarta iti kahon nga ay-aywananna. Idi nagreklamo ni Judas, mabalin a nagdayengdeng met ti dadduma kadagiti apostol gapu iti kasla nainkalintegan a rason. Ngem ni Judas ti kangrunaan a nangisungsong iti panagreklamo.