“Ay-ayatek ti Ama”

1, 2. Ania ti impalgak ni apostol Juan maipapan iti daydi maudi a rabii a kadua ni Jesus dagiti apostolna?

ADU ti immapay iti panunot ti maysa a lakay bayat nga idendennetna ti plumana iti tinta. Juan ti naganna ken isu laeng idin ti natda kadagiti apostol ni Jesu-Kristo. Agarup 100 ti tawenen ni Juan idi immapay kenkuana daydi nakallalagip unay a maudi a rabii a panagkakaduada ken ni Jesus ken dagiti padana nga apostol sakbay ti ipapatay ni Jesus. Iti panangiturong ti nasantuan nga espiritu ti Dios, nabaelan ni Juan a lagipen ken isurat a detalyado dagiti pasamak.

² Iti daydi a rabii, sibabatad nga imbaga ni Jesus nga umad-adanin ti pannakapapatayna. Ni laeng Juan ti nangipalgak no apay a kinuna ni Jesus nga isu ket aglak-am iti nasaem nga ipapatay. “Tapno maammuan ti lubong nga ay-ayatek ti Ama, no kasano a ti Ama inikkannak iti bilin nga aramiden, kasta ti ar-aramidek. Tumakderkayo, pumanawtay ditoy.”​—Juan 14:31.

3. Kasano nga impakita ni Jesus ti panagayatna iti Amana?

³ “Ay-ayatek ti Ama.” Awanen ti napatpateg pay ken ni Jesus ngem iti dayta. Dina kayat a sawen a sangkaibagana nga ay-ayatenna ti Ama. Kinapudnona, iti laeng Juan 14:31 ti pakabasaantayo iti Biblia iti direkta a panangyebkas ni Jesus iti ayatna ken Amana. Ngem saan laeng a basta inyebkas ni Jesus ti ayatna ken ni Jehova no di ket imparangarangna dayta iti inaldaw a panagbiagna. Ti kinatured, kinatulnog, ken panagibtur ni Jesus ket bin-ig a pammaneknek ti ayatna iti Dios. Daytoy nga ayat ti nangtignay kenkuana a mangitungpal iti ministeriona.

4, 5. Ania a kita ti ayat ti itantandudo ti Biblia, ket ania ti makunatayo maipapan iti ayat ni Jesus ken Jehova?

⁴ Iti kaaldawantayo, mabalin nga ipagarup dagiti dadduma a nalap-it ti rikna dagiti tattao a mangipakpakita iti ayat. Mabalin nga adda iti panunotda dagiti daniw ken kanta maipapan iti ayat, nalabit uray ti kinamaag a mainaig no dadduma iti romantiko nga ayat. Nadakamat iti Biblia ti romantiko nga ayat, nupay iti nadaydayaw a wagas ngem iti kadawyan a pannakailadawanna ita. (Proverbio 5:15-21) Ngem ad-adu nga amang ti mabasatayo iti Sao ti Dios maipapan iti sabali a kita ti ayat. Daytoy nga ayat ket saan a basta nasged a pammateg wenno apagkanito a rikna. Saan met daytoy a maysa laeng a teoria wenno intelektual a pilosopia. Nainaig iti dayta ti puso ken panunot. Agubbog ti kasta nga ayat iti kaunggan ti maysa a tao, iturturong ken maitunos kadagiti natan-ok a prinsipio, ken mabuyogan iti maitutop nga aramid. Nabatad a saan a kinamaag daytoy. “Ti ayat saan a pulos aggibus,” kuna ti Sao ti Dios.​—1 Corinto 13:8.

⁵ Kadagiti amin a tao a nagbiag ditoy daga, ni Jesus ti kangrunaan a mangay-ayat ken ni Jehova. Awan ti makaartap ken ni Jesus no iti panagbiag a maitunos iti imbagana a mismo a kapatgan kadagiti amin a bilin ti Dios: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo ken buyogen ti intero a pigsam.” (Marcos 12:30) Kasano a napatanor ni Jesus ti kasta nga ayat? Kasano a nataginayonna a nasged ti ayatna iti Dios idi adda ditoy daga? Ken kasano a matuladtayo?

Ti Kabayagan ken Kalagdaan a Singgalut ti Ayat

6, 7. Kasanotay nga ammo a ti Proverbio 8:22-31 iladladawanna ti Anak ti Dios, saan laeng a basta sirib?

⁶ Napadasam kadin ti nakipagtrabaho iti gayyemmo ket gapu iti dayta simmayaat ken simminged ti panaggayyemyo? Ti kasta a makaay-ayo a kapadasan matulongannaka a mangtarus iti ayat a timmanor iti nagbaetan ni Jehova ken ti bugbugtong nga Anakna. Masansan a madakamat ti Proverbio 8:30, ngem usigentayo a naimbag dayta a bersikulo sigun iti kontekstona. Mabasatayo iti bersikulo 22 agingga iti 31 ti naipaltiing a pannakailadawan ti sirib. Kasanotay nga ammo nga agaplikar dagitoy a sasao iti Anak ti Dios?

⁷ Iti bersikulo 22, kuna ti sirib: “Ni met laeng Jehova pinataudnak kas ti punganay ti dalanna, ti kauunaan kadagiti gapuananna iti nabayagen a tiempo.” Nalawag a saan laeng a basta sirib ti tuktukoyen daytoy, ta pulos a saan a ‘napataud’ ti sirib. Awan ti nangrugian ti sirib ta addan a sigud ni Jehova ken kanayon a masirib. (Salmo 90:2) Ngem ti Anak ti Dios “ti inauna iti isuamin a parsua.” Isu ket napataud, wenno naparsua; isu ti immuna kadagiti amin a gapuanan ni Jehova. (Colosas 1:15) Addan ti Anak sakbay a naparsua ti daga ken langit, kas nadakamat iti Proverbio. Ken kas ti Sao, wenno Pannakangiwat ti Dios, isu ti perpekto nga ebkas ti sirib ni Jehova.​—Juan 1:1.

8. Ania ti akem ti Anak sakbay a nagbalin a tao, ket ania ti nalabit mapanunottayo no pagsiddaawantayo ti aniaman a parsua?

⁸ Ania ti akem ti Anak iti las-ud ti naunday a tiempo sakbay nga immay ditoy daga? Kuna kadatayo ti bersikulo 30 nga adda ti Anak iti sibay ti Dios kas “nasigo a managobra.” Ania ti kayat a sawen dayta? Ilawlawag ti Colosas 1:16: “Babaen kenkuana, amin a sabsabali pay a bambanag naparsuada iti langlangit ken iti rabaw ti daga . . . Amin a sabsabali pay a bambanag naparsuada babaen kenkuana ken maipaay kenkuana.” No kasta, ni Jehova a Namarsua inusarna ti Anakna, ti Nasigo a Managobra, a nangpaadda iti amin a dadduma pay a parsua​—a pakairamanan dagiti espiritu a parsua idiay langit, ti nakalawlawa a pisikal nga uniberso, ti daga agraman dagiti nadumaduma a kita ti mula ken animal nga adda iti dayta, ken ti kasayaatan a parsua ditoy daga: ti tao. Mabalintay nga iyarig daytoy a panagtinnulong ti Ama ken ti Anak iti panagbinnulig ti arkitekto ken ti kontratista. Ti arkitekto ti mangdisenio iti pasdek ket ti kontratista ti mangsierto iti pannakaibangon dayta a pasdek. No pagsiddaawantayo ti aniaman a parsua, iti kinapudnona ti Naindaklan nga Arkitekto ti maidaydayaw. (Salmo 19:1) Nupay kasta, mabalin a malagiptayo met ti napaut ken naragsak a panagtinnulong ti Namarsua ken ti ‘nasigo a managobrana.’

9, 10. (a) Ania ti nangpalagda iti relasion ni Jehova ken ti Anakna? (b) Ania ti mangpalagda iti relasionmo iti nailangitan nga Amam?

⁹ No adda pagtinnulongan nga aramiden ti dua nga imperpekto a tao, saanda nga agkatunosan no dadduma. Ngem saan a kasta ni Jehova ken ti Anakna! Saan a mabilang ti panawen a pannakipagtrabaho ti Anak iti Amana ken ‘maragragsakan idi iti sanguananna iti isuamin a tiempo.’ (Proverbio 8:30) Wen, naayatan iti kaaddana iti sibay ni Amana, ket kasta met ti rikna ti Ama. Natural laeng nga ad-adda a nagbalin ti Anak a kas iti Amana, a nasursurona a tuladen dagiti galad ti Dios. Di ngarud pakasdaawan a nasinged unay ti Ama ken ti Anak iti maysa ken maysa! Maitutop a kunaen a dayta ti kabayagan ken kalagdaan a singgalut ti ayat iti intero nga uniberso.

¹⁰ Ngem ania ti mabalin a kaipapanan dayta kadatayo? Nalabit nga iti panagriknam, pulos a saanka a makapatanor iti kasta a relasion ken ni Jehova. Pudno, awan kadatayo ti kas iti Anak a natan-ok ti saadna. Nupay kasta, addaantayo iti nagsayaat a gundaway. Laglagipem, ad-adda a simminged ni Jesus iti Amana babaen ti pannakipagtrabahona Kenkuana. Siaayat nga ididiaya kadatayo ni Jehova ti gundaway nga agbalin a ‘katrabahuanna.’ (1 Corinto 3:9) Bayat a tultuladentayo ti ulidan ni Jesus iti ministerio, laglagipentayo a katrabahuannatayo ti Dios. Gapuna, ad-adda a lumagda ti singgalut ti ayat a namagkaykaysa kadatayo ken ni Jehova. Adda pay kadi nasaysayaat a pribilehio ngem iti dayta?

No Kasano a Tinaginayon ni Jesus ti Nasged nga Ayatna ken ni Jehova

11-13. (a) Apay a makatulong no ibilangtayo ti ayat kas maysa a sibibiag a banag, ken kasano a tinaginayon ni Jesus ti nasged nga ayatna ken ni Jehova idi ubing pay? (b) Kasano nga impakita ti Anak ti Dios ti interesna nga agsursuro ken ni Jehova, sakbay nga immay ditoy daga ken idi nagbalin a tao?

¹¹ Iti adu a pamay-an, makatulong no ibilangtayo ti ayat nga adda iti pusotayo kas maysa a sibibiag a banag. Kas iti napintas a mula, nasken a mataraonan ken mataripato ti ayat tapno dumakkel ken rumangpaya. No mabaybay-an ken saan a mataraonan, kumapsut ken matay. Saan a tinagtagilag-an ni Jesus ti ayatna ken ni Jehova. Tinaginayonna dayta a nasged ken narayray bayat ti kaaddana ditoy daga. Kitaentayo no kasano.

¹² Maminsan pay, panunotem daydi pannakisarita ni agtutubo a Jesus kadagiti mannursuro idiay templo sadi Jerusalem. Lagipem ti imbagana kadagiti madandanagan a dadakkelna: “Apay a kasapulan a sapulendak? Saanyo aya nga ammo a masapul nga addaak iti balay ni Amak?” (Lucas 2:49) Kas maysa nga ubing, nabatad nga awan pay idi ti aniaman a malagip ni Jesus maipapan iti biagna sakbay a nagbalin a tao. Nupay kasta, ay-ayatenna unay ni Jehova nga Amana. Ammona a natural a mayebkas ti kasta nga ayat babaen ti panagdayaw. Isu nga awan ti sabali a disso ditoy daga a makaay-ayo ken ni Jesus no di ti balay nga agpaay iti nasin-aw a panagdayaw. Il-iliwenna ti kaaddana sadiay ken dina kayat ti pumanaw. Maysa pay, saan laeng a basta adda sadiay. Magagaran nga agsursuro maipapan ken ni Jehova ken mangisarsarita iti ammona. Saan nga idi laeng 12 ti tawenna a timmanor ti kasta a riknana ken saan a nagkupas dayta idi nataenganen.

¹³ Idi adda idiay langit sakbay a nagbalin a tao, sigagagar ti Anak a nagsursuro ken Amana. Ipalgak ti padto a nailanad iti Isaias 50:4-6 a naisangsangayan ti panangisuro ni Jehova iti Anakna maipapan iti akemna kas Mesias. Sigagagar ti Anak a nagsursuro uray no naipakpakauna kenkuana nga adu a rigat ti sagabaen ti Pinulotan ni Jehova. Idi immay ni Jesus ditoy daga ken nagmataengan, pagragsakanna ti mapan iti balay ni Amana ken makipaset iti panagdayaw ken panagsursuro a kayat ni Jehova a maaramid sadiay. Gapuna, nailanad iti Biblia ti maipapan iti regular nga itatabuno ni Jesus iti templo ken iti sinagoga. (Lucas 4:16; 19:47) No kayattayo nga agtalinaed a nabiag ken narayray ti ayattayo ken ni Jehova, nasken a kanayon a tumabunotayo kadagiti Nakristianuan a gimong tapno agdaydayaw ken ni Jehova ken umuneg ti pannakaammotayo ken rumayray ti panangipategtayo kenkuana.

14, 15. (a) Apay a nangsapul ni Jesus iti gundaway a makapagmaymaysa? (b) Kasano nga impalgak dagiti kararag ni Jesus nga isu ket nasinged ken dakkel ti panagraemna iti Amana?

¹⁴ Tinaginayon met ni Jesus a nasged ti ayatna ken ni Jehova babaen ti regular a panagkararag. Nupay mannakigayyem ken mannakilangen ni Jesus, makapainteres ta impategna dagiti kanito nga isu ket agmaymaysa. Kas pagarigan, kuna ti Lucas 5:16: “Nagtultuloy a nagpakni kadagiti desierto ken nagkarkararag.” Kasta met, kuna ti Mateo 14:23: “Iti kamaudiananna, idi napapanawnan dagiti bunggoy, simmang-at a maymaysa idiay bantay tapno agkararag. Nupay rimmabiin, adda idi sadiay nga agmaymaysa.” Pinili ni Jesus ti agmaymaysa kadagitoy ken iti dadduma pay a gundaway, saan a gapu ta lumikliklik wenno dina kayat ti makilangen kadagiti tattao, no di ket kayatna ti maaddaan iti gundaway a makapagmaymaysa tapno nawaya a makapagkararag ken ni Jehova nga Amana.

¹⁵ No agkararag, “Abba, Ama” ti awag no dadduma ni Jesus ken ni Jehova. (Marcos 14:36) Idi kaaldawan ni Jesus, ti “Abba” ket nasinged nga awag ti maysa nga anak iti amana. Masansan a dayta ti maysa kadagiti sao a damo a masursuro ti ubing. Ngem nadayaw dayta. Nupay ipasimudaag dayta a sao ti kinadekket ti Anak a makisasao iti ipatpategna nga Ama, ipamatmat met dayta ti nauneg a panagraemna iti autoridad ni Jehova kas ama. Kadagiti nailanad a kararag ni Jesus, masarakantayo ti kasta a kombinasion ti kinasinged ken panagraem. Kas pagarigan, iti Juan kapitulo 17, inlanad ni apostol Juan ti atiddog ken naimpusuan a kararag ni Jesus iti daydi maudi a rabiina. Pudno a makatukay iti rikna ti panangadal iti dayta a kararag ken nasken a tuladentayo dayta​—saan a babaen ti panangulit-ulit iti sasao ni Jesus no di ket babaen ti masansan a naimpusuan a pannakisao iti nailangitan nga Amatayo. No aramidentayo dayta, agtalinaed a nabiag ken nasged ti ayattayo kenkuana.

16, 17. (a) Kasano nga inyebkas ni Jesus ti ayatna iti Amana? (b) Kasano nga inladawan ni Jesus ti kinaparabur ni Amana?

¹⁶ Kas nadakamaten, saan a dinagdagullit ni Jesus ti sasao nga “Ay-ayatek ti Ama.” Nupay kasta, namin-ano nga inyebkasna ti ayatna iti Amana. Kasano? Kinuna a mismo ni Jesus: “Idaydayawka iti publiko, Ama, Apo ti langit ken daga.” (Mateo 11:25) Iti panangadaltayo iti Benneg 2 daytoy a libro, nakitatayo a kaay-ayo ni Jesus nga idaydayaw ti Amana babaen ti panangtulongna kadagiti tattao a mangam-ammo Kenkuana. Kas pagarigan, inyarigna ni Jehova iti maysa nga ama a mangpadpadaan iti panagsubli ti nasukir nga anakna ken sisasagana a mangpakawan kenkuana. Nagbabawi ti anak ket inkeddengna ti agsubli iti amana. Adayo pay laeng iti balayda idi makita ni amana. Timmaray ti ama a simmabat kenkuana sana inapungol. (Lucas 15:20) Saan kadi a makatukay iti rikna ti panangiladawan ni Jesus iti ayat ken pammakawan ni Jehova?

¹⁷ Masansan nga indaydayaw ni Jesus ti Amana gapu iti kinaparaburna. Inusarna a pagarigan dagiti imperpekto a nagannak tapno ipakitana a manamnamatayo nga ited ni Jehova kadatayo ti amin a nasantuan nga espiritu a kasapulantayo. (Lucas 11:13) Insarsarita met ni Jesus ti maipapan iti namnama a sipaparabur unay nga impaay ni Amana. Sigagagar a dinakamat ni Jesus ti mismo a namnamana a maisubli iti saadna iti sibay ni Amana idiay langit. (Juan 14:28; 17:5) Imbagana kadagiti pasurotna ti maipapan iti namnama nga impaay ni Jehova iti “bassit nga ipastoran”​—ti panagnaedda idiay langit ken ti pannakipagturayda iti Mesianiko nga Ari. (Lucas 12:32; Juan 14:2) Ken liniwliwana ti maysa a matmatay a managdakdakes babaen ti panangipanamnamana kenkuana iti biag idiay Paraiso. (Lucas 23:43) Dagiti kastoy a panangisarsaritana iti kinaparabur ni Amana ket sigurado a nakatulong ken ni Jesus a mangtaginayon a nasged ti ayatna ken ni Jehova. Adu kadagiti pasurot ni Kristo ti nakatakuat nga awanen ti nasaysayaat pay a mangparayray iti ayatda ken ni Jehova wenno mangpabileg iti pammatida kenkuana ngem ti panangisarsarita iti maipapan ken ni Jehova ken ti namnama nga ipapaayna kadagidiay mangay-ayat kenkuana.

Tuladem Kadi ti Ayat ni Jesus ken Jehova?

18. Kadagiti rumbeng a tuladentayo ken ni Jesus, ania ti kapatgan, ken apay?

¹⁸ Kadagiti amin a rumbeng a tuladentayo ken ni Jesus, awanen ti napatpateg pay ngem iti daytoy: Masapul nga ayatentayo ni Jehova iti amin a puso, kararua, panunot, ken pigsatayo. (Lucas 10:27) Marukod ti kasta nga ayat saan laeng nga iti kinapasnek ti riknatayo no di pay ket kadagiti aramidtayo. Saan nga umdas ken ni Jesus ti basta pannakarikna iti ayat iti Amana wenno ti basta panangikuna iti, “Ay-ayatek ti Ama.” Kinunana: “Tapno maammuan ti lubong nga ay-ayatek ti Ama, no kasano a ti Ama inikkannak iti bilin nga aramiden, kasta ti ar-aramidek.” (Juan 14:31) Inkarit ni Satanas nga awan ti tao nga agserbi ken ni Jehova gapu iti awan panagimbubukodna nga ayat. (Job 2:4, 5) Tapno maipaay ni Jesus ti kasayaatan a sungbat iti nagdakes a pammardaya ni Satanas, awanan buteng nga impakitana iti lubong babaen kadagiti aramidna no kasano kadakkel ti panagayatna iti Amana. Nagtulnog agingga ken patay. Tuladem kadi ni Jesus? Ipakitam kadi iti lubong a pudno nga ay-ayatem ni Jehova a Dios?

19, 20. (a) Ania dagiti napateg a rason a kayattayo ti tumabuno a regular kadagiti Nakristianuan a gimong? (b) Ti personal a panagadal, panagutob, ken panagkararag ket mabalintay nga ibilang kas ania?

¹⁹ Dakkel ti naespirituan a panagkasapulantayo a mangipakita iti kasta nga ayat. Dayta ti gapuna nga inyurnos ni Jehova ti panagdayawtayo iti wagas a mataraonan ken rumayray ti ayattayo iti Ama. No addaka kadagiti Nakristianuan a gimong, laglagipem nga addaka sadiay tapno agdaydayaw iti Dios. Paset dayta a panagdayaw ti pannakiraman iti naimpusuan a kararag, panangkanta kadagiti kanta a pagdaydayaw, panagimdeng a naimbag, ken pannakipartisipar no adda gundaway. Kadagita a gimong addaanka met iti gundaway a mangparegta kadagiti padam a Kristiano. (Hebreo 10:24, 25) Ti regular a panagdaydayaw ken ni Jehova kadagiti Nakristianuan a gimong tulongannaka a mangparayray iti ayatmo iti Dios.

²⁰ Rumayray met ti ayattayo iti Dios babaen ti personal a panagadal, panagutob, ken panagkararag. Ibilangmo dagitoy kas gundaway a duduakayo laeng ken ni Jehova. Bayat nga ad-adalen ken ut-utobem ti naisurat a Sao ti Dios, ipakpakaammo ni Jehova kenka ti pampanunotna. Bayat nga agkarkararagka, iyeb-ebkasmo kenkuana ti linaon ti pusom. Laglagipem a saan laeng a panagdawat ti kaipapanan ti panagkararag iti Dios. Ti kararag ikkannaka met iti gundaway a mangyebkas iti panagyamanmo ken ni Jehova gapu kadagiti bendision a maaw-awatmo ken mangidaydayaw kenkuana gapu kadagiti nakaskasdaaw nga aramidna. (Salmo 146:1) Maysa pay, ti sirarag-o ken sigagagar a panangidaydayaw ken ni Jehova iti publiko ti kasayaatan a wagas a mayebkasmo ti panagyamanmo ken ni Jehova ken maipakitam ti ayatmo kenkuana.

21. Kasano kapateg ti panagayat ken ni Jehova, ket ania ti mausig kadagiti sumarsaruno a kapitulo?

²¹ Ti panagayat iti Dios ti kapatgan tapno masagrapmo ti agnanayon a ragsak. Dayta laeng ti kasapulan idi da Adan ken Eva tapno agbiagda iti agnanayon​—ngem saanda a pinatanor ti kasta nga ayat. Dayta ti kangrunaan a kasapulam tapno mapagballigiam ti aniaman a pakasuotan ti pammati, mapagkedkedam ti aniaman a sulisog, ken maibturam ti aniaman a pannubok. Dayta ti kapatgan iti panagbalin a pasurot ni Jesus. Siempre, adda pakainaiganna ti panagayat iti Dios iti panagayat iti padatayo a tao. (1 Juan 4:20) Kadagiti sumarsaruno a kapitulo, usigentayo no kasano nga impakita ni Jesus ti ayatna kadagiti tattao. Iti sumaganad a kapitulo, kitaentayo no apay a kaay-ayo dagiti adu ti makilangen ken ni Jesus.