PAGDAGUSAN

Iti Griego, daytoy ket pan·do·kheiʹon, literal a kaipapananna ti “lugar a pakaawatan wenno pagsangbayan ti amin,” kayatna a sawen, mabalin nga agdagus sadiay dagiti managdaliasat agraman dagiti animalda. Nalabit a dagidi kadaanan a pagdagusan iti Makintengnga a Daya ket umarngi kadagiti naibangon sadiay iti nabiit pay a tiempo. Gagangay a dagitoy ket napaderan a lugar nga addaan iti maymaysa a pagserkan. Iti denna dagiti paderna, adda nakadsaaran a silsiled nga awanan kadagiti alikamen a sadiay ti pagsalinongan dagiti managdaliasat agraman ti gargaretda. Manipud makin-uneg a paraangan ti sumrekan kadagita a siled. Maibati dagiti animal iti nalawa a paraanganna, a masansan nga adda bubon iti tengngana. Dagiti agay-aywan iti pagdagusan idi nagkauna a tiempo ipaayda ti sumagmamano a masapsapul dagiti managdaliasat ken taripatuenda dagiti tattao a naipaaywan kadakuada, ket matangdananda gapu iti serbisioda.​—Lu 10:33-35.