YERBABUENA

[Gr., he·dyʹo·smon].

Napalalo ti banglona a yerba, a ti kakaisuna a pannakadakamatna iti Kasuratan ket mainaig iti nakaing-inget a panangannurot dagiti eskriba ken Fariseo iti panangted iti apagkapullo ti yerbabuena, idinto ta saanda nga ikankano ti nadagdagsen a bambanag iti Linteg. (Mt 23:23; Lu 11:42) Adu a kita ti yerbabuena ti masarakan idiay Palestina ken Siria, ngem ti monarda (Mentha longifolia) ti kaaduanna nga adda sadiay. Mabalin a ti Griego a sao a he·dyʹo·smon (iti literal, nabanglo) saan laeng a maysa nga espesipiko a kita ti tuktukoyenna no di ket saklawenna ti adu a nadumaduma a pagaammon a kita ti yerbabuena.

Kuadrado ti ungkay dagiti mula a yerbabuena, a sagdudua ti panagrusing dagiti bulongda, maysa iti tunggal sikigan ti ungkay. Ti babassit, umasul wenno dumerosas a puraw a sabsabong ket nagririmmuokda, a mangbukelda iti agsisina a rip-ong a kasla alipuspos ti langana wenno tirtirad iti murdong. Sipud pay kadaanan a tiempo, maus-usaren ti yerbabuena kas pagagas ken kas pagrekado iti taraon; daytoy ket gapu iti nabanglo a lana nga adda kadagiti bulong ken ungkay ti mula.