Ti Panangmatmat ti Biblia

Asino ti Mapan Idiay Langit?

MAYSA a bomba ti terorista ti nanglasanglasang iti maysa a tumaytayab nga eroplano, a nakatayan dagiti amin a nakalugan. Naibaga kadagiti kabagian ken gagayyem dagiti biktima a dagiti inay-ayatda addadan idiay langit, a kasla gunggona ti di naintiempuan ken naranggas nga ipapatayda.

Maysa a nalatak a musiko ti natay ket naibaga nga ‘agtoktokaren a kadua dagiti anghel idiay langit.’

Rabsuten ti sakit, bisin, wenno aksidente kadagiti maladaga ti naan-anay a biag, ket kunaen dagiti klero a tagtagiragsakendan ti nailangitan a bendision, nalabit kas kadagiti anghel!

Korkorehiren kadi ti Dios ti kinaawan kinahustisia kadagiti agtutubo ken nataengan babaen ti panangalana kadagita amin nga agpaay kenkuana iti nailangitan a talna? Ti kadi laeng pannakaawat a mapan idiay langit ti pamay-an ti Dios a mangitalimeng kadagiti amin a naimbag ken maikari iti dayaw iti sangatauan? Ania ti panangmatmat ti Biblia?

Dagidiay Saan a Mapan Idiay Langit

Nalawag ti sasao ti Biblia: “Ania! Dikay aya ammo a dagiti nakillo a tattao didanto tawiden ti pagarian ti Dios?” (1 Corinto 6:9) Nupay kasta, saritaen met ti Biblia dagiti adu a nalinteg ken dagiti biktima ti kinaranggas a saan nga agtawid iti langit.

Kinuna a mismo ni Jesus maipapan iti mabiit-idin a mapapatay a ni Juan a Mammautisar: “Pudno kunak kadakayo, Kadagidiay naiyanak kadagiti babbai awan ti naibangon a dakdakkel ngem ni Juan a Mammautisar; ngem ti maysa a nanumnumo iti pagarian ti langlangit dakdakkel ngem isu.” (Mateo 11:11) Amin dagiti ubbing a lallaki nga agtawen iti dua ken ub-ubing pay idiay Betlehem ken dagiti distritona ti awanan-asi a pinapatay ni nadangkes nga Ari Herodes iti panangikagumaanna a mangdadael iti ubing a ni Jesus. (Mateo 2:16) Kaskasdi, kinuna ni Jesus: “Mainayon pay, awan ti tao [wenno babai wenno ubing] nga immuli sadi langit no di ti bimmaba manipud langit, ti Anak ti tao [ni Jesus].” (Juan 3:13) Apay a saan a sinarita ni Jesus a dagitoy a biktima ti kinaranggas ket addada idiay langit?

Linuktan ni Jesus ti Dalan

Inawagan ni Jesus ti bagina a “ti dalan ken ti kinapudno ken ti biag” ken tinukoy ni apostol Pablo kas “ti umuna a bungbunga kadagidiay nakaturog ken patay.” (Juan 14:6; 1 Corinto 15:20) Ngarud, awan ti immun-una kenkuana sadi langit. Ngem idi immulin ni Jesus sadi langit agarup 40 nga aldaw kalpasan ti panagungarna, isu kadit’ sinurot dagiti maikari a lallaki iti pammati a natayen? Agarup sangapulo nga aldaw kalpasanna, kinuna ni apostol Pedro maipapan ken Ari David nga “agpadpada a pimmusay ken naitabon ket ti tanemna adda kadatayo agingga ita nga aldaw. . . . Iti kinaagpaysuanna ni David saan nga immuli iti langlangit.”​—Aramid 2:29, 34.

Gapuna, ti maawat a mapan idiay langit ramanenna saan laeng a ti gunggona gapu iti sinagaba a kinaranggas wenno gunggona iti personal a kinamatalek. Imbes ketdi, mangipaay dayta iti pannakaporma ti adda sadi langit a bagi dagiti agtuturay a buklen iti mangibagi a bilang dagiti tattao iti sidong ti panangiturong ni Kristo, a pinulotan ti nasantuan nga espiritu.​—Roma 8:15-17; Apocalipsis 14:1-3.

Maysa a Nailangitan a Pagarian

Tinukoy ni Jesus daytoy a panangituray, wenno gobierno, kas “ti pagarian ti langlangit” wenno “ti pagarian ti Dios.” (Mateo 5:3, 20; Lucas 7:28) Saan a nairanta a mairaman ti adu iti sangatauan itoy nga administratibo a bagi. Gapuna, tinukoy ni Jesus dayta kas maysa a “bassit nga ipastoran.” (Lucas 12:32) Iti orihinal a pagsasao a nausar itoy a paset ti Biblia, ti sao a “bassit” (mi·krosʹ) ket kasupadi ti dakkel (meʹgas), ket ti pannakausarna idiay Lucas 12:32 tuktukoyenna ti kaadu wenno kabassit ti bilang. Gapuna, ti pannakimiembro “iti pagarian ti langlangit” dina ipalubos ti di malimitaran a bilang. Tapno yilustrar: No madawat a mangibukbokka iti bassit a danum iti baso, masapul a siguraduem a saan nga aglippias. Kasta met, ti “bassit nga ipastoran” saan a mabalin a buklen ti aglaplapusanan a bilang ti tattao. Ti Pagarian ti Dios addaan naikeddeng (a “bassit”) a bilang dagiti kadua ni Kristo nga agturay.

Ti eksakto a bilang dagitoy nga agtuturay, 144,000, ket naipalgak ken apostol Juan. (Apocalipsis 14:1, 4) Nasaksakbay pay idiay Apocalipsis, dagitoy met laeng ti naikuna a ‘manipud iti tunggal tribo ken pagsasao ken ili ken nasion, ket pinagbalinna ida a kas pagarian ken papadi iti Diostayo,’ ket agturaydanto a kas ar-ari iti daga manipud sadi langit. (Apocalipsis 5:9, 10) Daytoy nga administratibo a bagi a kakadua ni Jesu-Kristo isu ti Pagarian nga insurona nga ikararag dagiti pasurotna. Isu met dayta ti ahensia a mangipatingganto iti di umiso a panangituray ditoy daga, iti kasta isublinanto ti kinahustisia ken talna iti pagtaengan ti tao, ti daga, agraman ti agnanayon a kinasaranta dagiti agindeg iti dayta.​—Salmo 37:29; Mateo 6:9, 10.

Maysa a Napili a Bagi Dagiti Agtuturay

Yantangay napnapno ti kinakunniber dagiti natauan a panangituray a sukatanto ti Pagarian, ditay kadi makita no apay a dagidiay a nairaman iti dayta a nailangitan a gobierno masapul a siaannad a pinili ken sinubok ti Dios? Ti agdama a kasasaad ti sangatauan mabalin nga ipadis iti ginasut a pasahero a nakalugan iti dinadael ti dakes a panniempo a jetliner. Iti kasta a nakapegpeggad a kasasaad, kayatyo kadi ti maysa a grupo ti tripolante a mangipatayab a buklen dagiti agtutubo, awan kapadasanna a tattao? Talaga a saan! Ti kasasaad sapulenna ti grupo ti tripolante a naannad a napili sigun iti nainget a kualipikasion.

No maipapan kadagidiay nga agserbinto idiay langit a kadua ni Kristo Jesus, mabang-arantay a makaammo a “ti Dios insaadna dagiti kamkameng iti bagi, tunggal maysa kadakuada, kas iti kinayatna.” (1 Corinto 12:18) Saan a ti personal a tarigagay wenno ambision maipaay iti saad iti Pagarian ti mangikeddeng. (Mateo 20:20-23) Impasdeken ti Dios dagiti espesipiko a pagalagadan iti pammati ken kababalin tapno malapdan dagiti di maikari a sumrek. (Juan 6:44; Efeso 5:5) Ipakita dagiti panglukat a sasao ti Sermon ni Jesus idiay Bantay a dagiti makipagturay ken Kristo masapul a mapaneknekan a sipapanunot iti naespirituan, naalumamay ti kaririknada, managayat iti kinalinteg, naasi, nasin-aw ti pusoda, ken mannakikappia.​—Mateo 5:3-9; kitaenyo met ti Apocalipsis 2:10.

Siraragsak, nupay ti kaaduan iti sangatauan ket saan a pinili ti Dios a mairaman iti daytoy a mangibagi iti nailangitan a bagi dagiti agtuturay, saanda a nabaybay-an nga awanan namnama. Agindegdanto ditoy napintas a daga ket tagiragsakendanto dagiti gunggona ti nadibinuan a panangiturayna. Dagiti biktima ti napalabas a kinaranggas a nabayagen a natay maisublidanto iti biag tapno agbiag a kadua dagidiay a makalasat a makakita iti “yaay” ti naan-anay a kaipapanan ti Pagarian ti Dios. Masalimetmetanto ti kari: “Ti nalinteg agtalinaedto ditoy daga, ket ti napnuan-imbag agtaengto kenkuana.”​—Mateo 6:9, 10; Proverbio 2:21; Aramid 24:15.