SILOAM

[manipud Heb., kaipapananna ti “Naibaon; Naipatulod”].

Ban-aw idiay Jerusalem, a sadiay pinagdiram-os ni Jesu-Kristo ti maysa a bulsek a lalaki tapno makakita. (Jn 9:6, 7, 11; LADAWAN, Tomo 2, p. 950) Kadagiti nabiit pay a panagkabakab, nakita ti maysa a ban-aw idi umuna a siglo a ti danumna ket aggapgapu iti ubbog ti Gihon a masarakan agarup 100 m (330 pie) iti abagatan a daya ti Birket Silwan (maawagan met iti Ban-aw ti Siloam). Patien dagiti arkeologo nga isu daytoy ti ban-aw. Trapezoid ti sukogna, ken adda agdan iti di kumurang a tallo a sikiganna. Ti maysa a sikiganna ket 70 m (225 pie) ti kaatiddogna, ngem saan pay a nakabakab nga interamente ti ban-aw.

Maipapan iti kitikit iti Siloam, kitaenyo ti EZEKIAS; kasta met ti LADAWAN, Tomo 1, p. 960.

Idi kaaldawan ti ministerio ni Jesus ditoy daga, nabatad a ti kaaduan pagaammoda a narpuog ti “torre ti Siloam,” a nangpapatay iti 18 a tattao. Naisingasing a daytoy a torre adda iti Pantok ti Ofel, ngem saan nga ammo ti aktual nga ayanna idiay Jerusalem.​—Lu 13:4.