Naitimpuyogkayo Aya Idi iti Organisasion ni Jehova?

MABABAINAN ti agtutubo a lalaki ken maladingitan unay. Dagiti kawesna, a rutayrutay ken pisangpisang, ket addaanda kadagiti pagilasinan a naminsan daytat’ maysa a moda a pagan-anay. Dayta ipakitada nga awan duadua nga isut’ natnag iti rigat ti panagbiag. Idi nagsubli ti isipna iti nakaad-adayo a pagtaenganna, nangrugi a nariknana ti napalalo a pananggura iti nagdakes a panagbiag nga ayanna ken ti panangbuslonna iti tawid nga impapilitna a maited kenkuana a nakasapsapa. Ti agsaraaw a tianna ti nangnayon pay iti ladingitna, ket isu ti mailiw unayen. Ta, uray pay dagiti ad-adipen ni amana idiay balayda ket nasaysayaat ti kasasaadda ngem isu! Ay, anian ti panagayatna nga isu koma ti adda iti kasasaadda!

Ngem ania a kita ti panangawat ti namnamaenna manipud ken amana no isu ti agsubli itan? Narigatna a namnamaen ti nabara a pannakakablaawna wenno ti pannakapalubosna pay iti uneg iti balay kalpasan ti nakababain a panangabusona iti kinamanangngaasi ni amana. Nupay kasta, maysa a napasnek a rikna ti nangdominar iti isip ken pusona: Masapul nga isu ti agawid.

Anian a nagbassit ti pannakaawat daytoy nga agtutubo a lalaki kadagiti rikrikna ni amana kenkuana! Anian a pannakakellaat ti agur-uray kenkuana idi isut’ umas-asidegen idi daan a balayna! Kinapudnona, “idi adayo pay laeng, nakita ni amana ket simnek ti kaasina ket, timmaray ket inappungolanna ti tengngedna ket inag-agkanna.”​—Lucas 15:20.

Kas iti anak a naiyaw-awan, pinanawanyo aya ti pagtaenganyo? Simminakayo aya ken Amayo, ni Jehova, ken ti organisasionna? Tarigagayanyo met aya ita ti ‘agawid’?

Iti kaaduan a kaso, dagidiay a simmina manipud organisasion ni Jehova ket saan met nga eksakto a kas ti anak a naiyaw-awan. Kadagiti kaaduan, daytat’ maysa a nagin-inut, ngangngani di narikrikna a pannakaiyanud​—kas ti maysa a bassit a bilog, a maiyan-anud ken agin-inut a tumtumpaw nga umadayo nga umadayo manipud iti daga. Dadduma ti madagsenan unay iti pinansial a pakarigatan wenno parikut iti pamilia, iti sakit wenno uray pay iti “iyaasenso” iti lubong, a gapu itoy nasallin dagiti naespirituan a bambanag. Dadduma pinalubosanda ti bagbagida a maitibkolda babaen kadagiti tattao a naitimpuyog iti kongregasion Kristiano wenno pimmanawda gapu ta suppiatenda ti dadduma a pannakaawat nga adda iti organisasion ni Jehova gapu iti maysa a Nainkasuratan a punto. Kaskasdi dadduma pinalubosanda dagiti bagbagida a maupay ket simmardengda idi daytoy agdama a sistema dagiti bambanag saan a nagpatingga iti panawen a ninamnamada.

No maysakayo kadagiti saanen nga aktibo a makitimtimpuyog iti organisasion ni Jehova, nalabit maysa wenno ad-adu pay kadagitoy a rason ti maibagay iti kasasaadyo. Ngem aniaman ti makagapu, saan kadi a tiempo itan nga usigen ti panagsubliyo?​—Mateo 18:12-14.

Naitibkolkayo Aya?

No pampanunoten no kasano kaadayon ti nakatnagan ti sangatauan manipud kinaperpekto, namnamaen ti maysa a dagiti panagtupa ti personalidad ket mapasamak sagpaminsan. Daytoy ti nakaiturong ti nakaitibkolan ti dadduma. Dadduma ket naitibkolda idi daydiay tao a pagraraemanda unay ket giddato a nagtignay iti maysa a kinadarasudos wenno di nakristianuan a pamay-an wenno nairamanda iti kinadakes.

Napasamak aya daytoyen kadakayo? Aniaman ti nakaitibkol kadakayo, nalawag a saan a ni Jehova ti nangitibkol. (Idiligyo iti Galacia 5:7, 8.) No kasta adda aya aniaman a punto iti panangdadaelyo iti pannakirelasionyo kenkuana gapu iti naaramidan laeng ti sabali? Imbes ketdi, di aya rebbeng nga agtultuloy ti panagserbitayo a simamatalek kenkuana, a simamatalek nga ammo ni Jehova ti adda a mapaspasamak ket makilangento a siayat kadatayo?​—Colosas 3:23-25.

Iti panaglabas ti tiempo, nakita dagiti dadduma a daydiay immuna a nakaitibkolanda saanen a nakadakdakkel wenno mabalin pay ketdi nga awan itan. Wenno iti natanang a panangusig iti banag mabalin a maipatoda pay ketdi itan nga isuda iti kinapudnona ti nagkamali. Masansan a pudno daytoy no ti maysa a tao ket di umanamong ken naitibkol gapu iti maysa a balakad wenno disiplina a naipaay kenkuana. No tumaliaw iti nalikudan, mabalin a mabigbigna a dayta a disiplina ket naited kenkuana iti pudno nga ayat ken agpaay iti pagimbaganna. (Hebreo 12:5-11) Ngarud, anian a maiyanatup, nga agtignay sigun iti balakad ni apostol Pablo! Insuratna: “Patibkerenyo dagiti nalpay nga im-imayo ken agkutkutukot a tumtumengyo, ket salimetmetan a di agalla-alla dagiti panagaddangyo. Iti kasta ti kimmapuy a pasetyo dinto maikkat iti nakaisuopanna, no di ket mapasublina manen dagiti dati a pannakabalinna.”​—Hebreo 12:12, 13, The New English Bible.

Sinuppiatyo Aya ti Maysa a Pannursuro?

Nalabit pimmanawkayo iti organisasion ni Jehova agsipud ta addaankayo iti naiduma a pannakaawat kadagiti dadduma a punto ti Kasuratan. Kas kadagiti Israelita a naisalakan manipud Egipto “nalipatanda iti apagbiit dagiti aramid [ti Dios]” maipaay kadakuada ken “saanda a nagpannuray iti pammatigmaanna,” nalabit sidadaras nga impatoyo a yantangay ti organisasion saanna nga awaten ti panangmatmat nga impagarupyo nga umiso, ngarud gupdenyon ti pannakisinggalutyo iti dayta. (Salmo 106:13) Nalabit ti punto ket nalawlawaganen nanipud idi, nalabit babaen iti pannakabalbaliwna wenno naipasdek babaen ti kanayonan pay a Nainkasuratan a panagsirarak iti panangiwanwan ti espiritu ti Dios. Saan aya a nasaysayaat ti panagtalinaedyo koma iti organisasion, a naguraytayo ken ni Jehova?

Nasayaat a laglagipen a ni Jehova ti kanayon nga agtigtignay babaen iti maymaysa nga organisasion laeng. Iti kaaldawantayo, “ti matalek ken naannad nga adipen” ti mangipapaay iti naespirituan a taraon “iti umiso a tiempona.” Ammuenyo a daytoy nga adipen ti ‘masarakanto a mangar-aramid iti kasta inton umay ni Apona.’ (Mateo 24:45-47) Kinapudnona, asino itatta ti nakailasin a ti Apo ket dimtengen? Ken asino ti sireregta iti trabaho a naipamatmat? Dagidiay laeng naitimpuyog iti organisasion dagiti Kristiano a sasaksi ni Jehova!

Idi dadduma pinanawanda ni Jesus, kinuna ni apostol Pedro: “Apo, asinonto ti papananmi? Sika addaanka kadagiti sasao ti biag nga agnanayon.” Ammo ni Pedro nga awan duadua a ni Jesus isu ti Mesias. Gapuna idi nakita dagiti adu nga adalan a dagiti sasao ni Jesus ket makapakellaat kadakuada, nailasin ni Pedro a di nainsiriban a panawan ti gubuayan dagiti “sasao ti biag nga agnanayon.” Iti agangay aniaman a panagduadua wenno di pannakaawat ti malawlawagan. (Juan 6:51-68; idiligyo iti Lucas 24:27, 32.) Kaskasdi nga isu pay met laeng daytoy ti kaso itatta, bayat a progresibo nga iwanwan ni Jehova dagiti ad-adipenna iti dalan ti kinapudno.​—Proverbio 4:18.

Agsubli Itan

“Sukimaten ken imatangantayo koma dagiti dalantayo, ket agsublitayo manen ken Jehova,” impakpakaasi ni mammadto Jeremias. (Un-unnoy 3:40) Kaskasdi, mabalin a dagiti dadduma agkedkedda, a nalabit pagbutnganda ti nakapuy a panangabrasa dagidiay adda iti kongregasion. Ngem ania ti rikna idi nagsubli ti anak a naiyaw-awan idiay balayda? “Masapul . . . panagragragsak,” inlawlawag ti ama, “ta daytoy kabsatmo natay ket nagungar, ken napukaw ket nasarakan.” (Lucas 15:32) Ti umas-asping a nabara a panangabrasa ti agur-uray kadagidiay ‘agsubli ken Jehova’ nga addaan napasnek a tarigagay nga agaramid iti pagayatanna.​—Idiligyo iti Lucas 15:7.

Ngem ti kongregasion Kristiano ket saan a basta agtugtugaw laeng ken agur-uray laeng kadagiti kakasta no ken inton maikeddengda ti ‘agsubli.’ Iti ilustrasion ni Jesus, timmaray ti ama a mangabrasa iti anakna “idi adayo pay laeng.” Kasta met, ibilang dagiti Saksi ni Jehova a personal nga obligasion a sapulen dagidiay naminsan naitimpuyog ket tulonganda ida nga agsubli iti organisasion ni Jehova.

Ngem kasano no ti maysa ket nagbasol iti serioso a kababalin bayat a naisina iti organisasion ni Jehova? Wenno kasano no ti maysa masapul a maikkat manipud pannakitimpuyogna iti ili ti Dios gapu iti serioso a kinadakes ngem nanipud idin sinardengannan ti panagar-aramid iti di nakristianuan a kababalin? Maammuanto dagiti panglakayen no kasano ti panangtulong kenkuana iti naasi ken naayat a pamay-an tapno mapalinteg dagiti bambanag ken ni Jehova. Gapuna asino man ita nga agtarigagay nga agsubli ken agbiag a maitunos iti pagayatan ti Dios ipakaammoda koma daytoy a tarigagayda kadagiti panglakayen. “‘Umaykayo ita, ket agsusurottayo koma,’ kuna ni Jehova. ‘Uray no dagiti basbasolyo kasda la koma iti eskarlata, mapapudawdanto a kasla niebe.’”​—Isaias 1:18.

Anian a naasi, nabara, ken naayat ti nailangitan nga Amatayo! Ken anian ti kinaanusna ken interesado iti tunggal maysa kadatayo a personal! Nalawag, a dina kayat a madadaeltayo a kadua daytoy dakes a sistema dagiti bambanag. (2 Pedro 3:9) Ni Jehova ti nangidagadag ti kadaanan nga ilina: “Agsublikayo kaniak, ket siak agsubliakto kadakayo.” Dayta met laeng a panangawis ket isu pay met laeng itatta.​—Malakias 3:7.

Ti tiempo maib-ibusen, gapuna dikay agtaktak. Kadua ti ili ni Jehova, tagiragsakenyo manen ti ‘aglaplapusanan a talna nga adda kadagidiay agayat iti linteg ti Dios.’ “Ket awan kadakuada ti pakaitibkolanda,” kuna ti salmista. (Salmo 119:165) Iti kaunggan ti pusoyo, ayatenyo met laeng aya ti linteg ni Jehova? No dedikadokayo nga adipen ti Dios, daytoy ti rason no apay nga indedikaryo ti biagyo kenkuana. Awanen​—wen, pulos nga awanen​—ti ad-adda a nakapatpateg ngem ti panangisubliyo ti pannakirelasionyo ken ni Jehova. Isu koma ti saanyo a taltallikudan. Panunotenyo a naimbag ken sikakararag dayta a banag. No il-iliwenyo ti panagkaykaysa ken panagayat iti ili ni Jehova, saan pay a naladaw unay nga agsublikayo iti organisasion ni Jehova. Aramidenyo dayta a di agtaktak.