Naimbagan ti Sangapulo nga Agkukutel—Maysa ti Nagyaman

Tapno saan a matuloy ti panangpapatay ti Sanhedrin ken Jesus, nagdaliasat a napan iti siudad ti Efraim, nga adda iti amianan a daya ti Jerusalem. Kaduana sadiay dagiti adalanna, nga adayo kadagiti kabusorna. (Juan 11:54) Dandani idin ti Paskua ti 33 C.E., isu a pumanawto manen ni Jesus. Nagdaliasat a nagpaamianan a limmabas iti Samaria ken mapan iti Galilea. Dayta ti maudi nga ibibisitana iti daytoy a lugar sakbay ti ipapatayna.

Bayat ti panagdaliasatna, napan ni Jesus kadagiti nagduduma a purok ket adda sangapulo nga agkukutel a nasabetna. Nagduduma ti kasasaad daytoy a sakit. Mabalin nga in-inut a marunot dagiti tisyu wenno lasag ti bagi, kas iti ramay ti ima ken saka, wenno lapayag. (Numeros 12:​10-12) Sigun iti Linteg ti Dios, masapul nga ipukkaw ti maysa nga agkukutel ti “Narugitak, narugitak!” ken masapul a maisina ti pagyananna.​—Levitico 13:​45, 46.

Gapuna, adayo dagiti sangapulo nga agkukutel ken Jesus. Ngem impukkawda: “Jesus, Mannursuro, kaasiannakami!” Idi nakitana dagiti agkukutel, imbagana kadakuada: “Inkay agpakita kadagiti papadi.” (Lucas 17:​13, 14) Impakita ngarud ni Jesus ti panagraemna iti Linteg ti Dios, a nangted kadagiti papadi iti karbengan a mangibaga a naimbagen dagiti agkukutel. Iti kasta, mabalinda manen ti makipagnaed kadagiti nasalun-at nga umili.​—Levitico 13:​9-17.

Mamati dagiti sangapulo nga agkukutel a kabaelan ni Jesus ti mangpaimbag babaen ti milagro. Napanda kadagiti padi, uray sakbay pay a maimbaganda. Idi mapmapandan, nagunggonaan ti pammatida ken Jesus. Nakitada ken nariknada a nasalun-atdan!

Siam kadagiti naimbagan nga agkukutel ti nagtultuloy iti papananda. Ngem saan a nagtultuloy ti maysa kadakuada. Nagsubli daytoy a lalaki, a maysa a Samaritano, tapno birokenna ni Jesus. Apay? Agyaman unay ken Jesus iti napasamak kenkuana. Ti dati nga agkukutel “indaydayawna ti Dios iti napigsa a timek,” ta mabigbigna a ti Dios ti talaga a nangpaimbag kenkuana. (Lucas 17:15) Idi nakitana ni Jesus, nagparintumeng iti sanguananna ket nagyaman kenkuana.

Kinuna ni Jesus kadagiti kakaduana: “Saan kadi a 10 amin ti immimbag? Ayan ngaruden ti 9? Awan kadin ti sabali a nagsubli tapno idaydayawna ti Dios malaksid iti daytoy naggapu iti sabali a nasion?” Imbaga ni Jesus iti Samaritano: “Tumakderka ket inkan. Pinaimbagnaka ti pammatim.”​—Lucas 17:​17-19.

Babaen ti panangpaimbagna kadagiti sangapulo nga agkukutel, impakita ni Jesus nga isu ket tultulongan ni Jehova. Ti maysa kadagiti sangapulo ket saan laeng a pinaimbag ni Jesus no di ket mabalin a maaddaan iti agnanayon a biag. Saantayo nga agbibiag iti panawen nga us-usaren ti Dios ni Jesus tapno agaramid iti kasta a panangpaimbag. Nupay kasta, babaen iti panamati ken Jesus, mabalin nga addatayo met iti dalan nga agturong iti biag nga agnanayon. Agyamantayo kadi a kas iti lalaki a Samaritano?