SUPOT TI KUARTA

Maysa a supot nga us-usaren dagiti lallaki ken babbai a pagkargaan iti balitok, pirak, gambang, sinsilio, wenno dadduma pay a banag. No dadduma, nagaramat dagiti babbai iti pagarkos a supot, wenno bassit a supot, a mabalin nga immarantiddog ken nagbukel. (Isa 3:16, 22; 46:6; Mt 10:9) Dagiti nagkauna a supot ti kuarta ket naaramid iti lalat, nalaga a tanutubo, wenno lanilia. Yantangay kasla bag ti pormada, mapunggos ti wangawanganda sa magalutan iti lalat a paraut wenno dadduma pay a tali.​—Kitaenyo ti SUPOT.

Maar-aramat met idi ti supot a barikes (iti literal, ‘barikes’; Gr., zoʹne; Mt 10:9; Mr 6:8), nalabit maysa a kita ti sinturon a pagkargaan iti kuarta. Mabalin nga addaan daytoy a barikes iti nauneg a paset a pakaikabilan ti kuarta; ngem no lupot dayta a barikes, maisuot a sikukupin ken maisuksok ti kuarta kadagiti kupinna.

Idi imbaon ni Jesus ti 70 nga adalanna tapno mangasabada, nabatad nga idiay Judea, imbagana kadakuada a saanda a mangitugot kadagiti supot ti kuarta, a mangipasimudaag nga ipaay ni Jehova a Dios dagiti kasapulanda babaen kadagiti padada nga Israelita gapu ta kaugalianda idi ti agpadagus. (Lu 10:1, 4, 7) Nupay kasta, sakbay unay ti ipapatayna, binalakadan ni Jesus dagiti apostolna a mangawitda kadagiti supot ti kuarta, ta ammona a din agbayag mawarawara ken maidadanesto dagiti adalanna. Gapu iti ibubusor dagiti agtuturay, mabalin a maamak a tumulong kadakuada uray dagiti tattao a pabor iti mensaheda. Kasta met, din agbayag ikasabada metten ti mensahe ti Pagarian iti Gentil a dagdaga. Gapu itoy, masapul nga isagana dagiti pasurot ni Jesus dagiti material a kasapulanda.​—Lu 22:35, 36.

Iti panangitampok ni Jesus nga adayo a napatpateg ti naespirituan a bambanag, indagadagna kadagiti pasurotna a mangaramidda kadagiti bukodda a supot a saan a madadael, a gumun-odda iti nailangitan a gameng.​—Lu 12:33.