Dagiti Saludsod Manipud Kadagiti Managbasa

Ni kadi Zacarias, ti ama ni Juan a Mammautisar, nagbalin a tuleng ken umel pay, a kasla ipabigbig ti Lucas 1:62?

Daddumat’ nangipaton a ni Zacarias ket nagbalin met a tuleng. Mabasatayo iti salaysay ti Biblia: “Panagananda koma [ti ubing] iti nagan ni amana, a Zacarias. Ngem simmungbat ni inana ket kunana: ‘Saan, la ketdi! no di ket managanto ti Juan.’ Ket kinunada kenkuana: ‘Awan ti uray asino kadagiti kakabagiam a managan ti kastoy a nagan.’ Ket sininiasanda ni amana no ania ti kayatna nga ipanagan. Ket dimmawat iti tabla a pagsuratan ket insuratna: ‘Juan ti naganna.’”​—Lucas 1:59-63.

Awan, nupay kasta, iti daytoy a salaysay ti espesipiko a mangibagbaga a ni Zacarias ket di nakangngeg iti maysa a periodo ti panawen.

Immun-una impakaammo ni anghel Gabriel ken Zacarias ti um-umay a pannakaipasngay ti maysa nga anak a lalaki a maawaganto ti Juan. Nasarakan ni lakayen a Zacarias a daytat’ narigat a patien. Simmungbat ti anghel: “Adtoy! agumelkanto ket dikanto makapagsao agingga iti aldaw a pannakaaramid dagitoy, agsipud ta dika pinati dagiti saok isuda a matungpalto inton tiempona.” (Lucas 1:13, 18-20) Kuna ti anghel a ti panagsao ni Zacarias, saan a ti panagdengngegna, ti maapektaran.

Itultuloy a kunaen ti salaysay: “Idi rimmuar [manipud santuario] dina nabalin ti nakisao kadagiti [tattao nga agur-uray], ket naammuanda nga isu nakakita ti datdatlag idiay santuario; ket isu sininsiniasanna ida, ngem nagtalinaed nga umel.” (Lucas 1:22) Ti Griego a sao ditoy a naipaulog nga “umel” awitenna ti kapanunotan ti panagbalin a nangelngel, iti panagsao, panagdengngeg, wenno agpada. (Lucas 7:22) Ania ngay maipapan ken Zacarias? Bueno, usigenyo no aniat’ napasamak idi isut’ naagasan. “Giddato a nanglukat manen ti ngiwatna ket naluk-atan ti dilana ket nangrugi nga agsao, a beninditona ti Dios.” (Lucas 1:64) Nainrasonan a mangiturong daytoy iti panangmatmat a ti laeng abilidad ni Zacarias nga agsao ti nadadael.

Apay, ngarud a dagiti sabsabali sinaludsodanda ni Zacarias “babaen kadagiti sinias no ania ti kayatna a pannakaawag [ti ubing]”? Dadduma a managipatarus ipaulogda pay daytoy nga “iti lenguahe a panagsinias” wenno “nga inusarda ti lenguahe ti panagsinias.”

Ni Zacarias, a nagbalin nga umel sipud panangipakammo ti anghel, ket masansan a napilit nga agusar kadagiti panagkumpas, maysa a kita ti lenguahe ti panagsinias, tapno iyebkasna ti bagina. Kas pangarigan, isu ti “nagtultuloy a nagsinias” kadagidiay adda idiay templo. (Lucas 1:21, 22) Idi nga isut’ dimmawat iti tabla, nagusar la ketdi kadagiti sinias wenno panagkumpas. (Lucas 1:63) Posible, ngarud, a dagidiay adda iti aglawlawna kabayatan daytoy a tiempo ti kinaumel ket naawisda met nga agusar kadagiti panagkumpas.

Adda, nupay kasta, iti nasaysayaat a panangilawlawag kadagiti sinias a nadakamat idiay Lucas 1:62. Kaiyeb-ebkas laeng ni Elizabet iti bagina maipapan iti nagan ti anakna. Gapuna, iti dina isusupiat kenkuana, mabalin nga innalada laeng ti sumaganad ken umiso nga addang iti panangalada iti pangngeddeng ni lakayna. Mabalinda nga aramiden dayta babaen iti maysa laeng a panagtung-ed wenno panagsinias. Ti kinapudno a dida insurat ti saludsodda tapno basaen ni Zacarias ket mabalin pay a pammaneknek a nangngegna dagiti sasao ni baketna. Ngarud, ti maysa laeng a panagtung-ed wenno bassit a panagsinias kenkuana ket maawatannan a, ‘Bueno, amintayo (agraman kenka, Zacarias) ti nakangngeg iti singasingna, ngem aniat’ maudi a pangngeddengmo maipapan iti nagan ti ubing?’

Ken dagdagus kalpasanna sabali pay a milagro ti napasamak, a nangballikug iti kasasaad. “Naigiddato a nanglukat manen ti ngiwatna ken naluk-atan ti dilana ket nangrugi nga agsao.” (Lucas 1:64) Awanen kasapulan a panangdakamat maipapan iti panagdengngegna no daytat’ naapektaran met.