Dagiti Saludsod Manipud Kadagiti Managbasa
Ania a kababalin ti rumbeng nga iparangarang kadagiti Nakristianuan a bautismo?
Makapainteres dayta a saludsod, agsipud ta uray adu kadagiti managbasatayo ti nabautisaranen, mairamanda, a kas met kadagidiay agpabautisar. Komentuantay pay nga umuna dagidiay mabautisaran, a maitaneb a naan-anay. Aniat’ rumbeng a kababalinda koma?
Iti Mateo 28:19, 20, imbaga ni Jesus kadagiti pasurotna a mapan ken agaramidda iti ad-adalan kadagiti tattao, nga isuro ken bautisaran ida. Saanna nga imparang ti bautismo kas maysa nga emosional unay a kapadasan, maysa a tignay nga agtaud iti apagkanito a gagar. Maysa daytoy a serioso nga addang, kas makitatayo iti ulidan ni Jesus. Kuna ti Lucas 3:21: “Ni Jesus nabautisaran met ket, bayat nga agkarkararag, naluktan ti langit.” Wen, minatmatan ti Ulidantayo ti bautismo a buyogen ti kinaserioso ken panagkararag. Saantay a mailadawan isuna nga, apaman a makasang-at iti danum, mangaramid iti senias ti panagballigi, agikkis gaput’ rag-o, wenno mangiwagayway kadagiti imana, nupay iti nabiit kasta ti inaramid ti dadduma. Saan, gapu ta ni laeng Juan Bautista ti adda [sadiay], immadani ni Jesus ken ni Amana iti kararag.
Nupay kasta, saan nga ipasimudaag ti Biblia a ti bautismo ket rumbeng nga agbalin a maysa a naliday wenno nakalkaldaang a pasamak, nga agkasapulan kadagiti naisangsangayan a postura wenno ritual, a kas ti kalkalikaguman ita ti sumagmamano nga iglesia iti Kakristianuan. Panunotenyo ti aldaw ti Pentecostes, idi a rinibu a Judio ken proselita ti naipasidong iti Nakristianuan a bautismo. Ammoda idin ti Linteg ti Dios ken simrekdan iti maysa a pannakirelasion kenkuana. Isu a kasapulanda laengen a maammuan ken awaten ti Mesias, a ni Jesus. No maaramidanda daytoy, mabalindan a mabautisaran.
Kuna ti Aramid 2:41: “Dagidiay naimpusuan a nangabrasa iti saona nabautisaranda.” Kastoy ti mabasa iti bersion ti Biblia ni Weymouth: “Ngarud, dagidiay siraragsak a nangabrasa ti saona nabautisaranda.” Nagrag-oanda ti makaparagsak a damag maipapan iti Mesias, ket awan duadua a dayta a naimpusuan a rag-o ket dimmanon iti bautismo a mismo, maysa a bautismo iti imatang ti ginasgasut a nararagsak nga agbuybuya. Uray dagiti anghel idiay langit agbuybuya ken agragrag-oda met. Laglagipenyo dagiti sasao ni Jesus: “Ibagak kadakayo, adda panagrag-o kadagiti anghel ti Dios gapu iti maysa a managbasol nga agbabawi.”—Lucas 15:10.
Adda nadumaduma a pamay-an a maipakita ti tunggal maysa kadatayo agpadpada ti kinaserioso ken rag-o iti bautismo. Iti sumagmamano nga iglesia, agkawes dagiti mabautisaran iti puraw wenno nangisit. Awan Nainkasuratan a pagibatayan para iti kasta a pagannurotan. Kaskasdi, dagiti pagan-anay a pagdigos a narasay wenno nakipet ket saan a mayanatup, kadagiti lallaki man wenno babbai. Ken kas iti nadakamat, apaman a makasang-at iti danum, saan a rumbeng a mangaramid ti kabbaro a Kristiano iti naisangsangayan a senias wenno agtignay a kasla ket tay gimmun-od iti dakkel a panagballigi. Maragsakan ti dadduma pay a Kristiano a kakabsat ta ti kabbaro ket nabautisaranen. Rumbeng a mariknana a daytoy a panangiparangarang ti pammati ket pangrugian laeng ti naunday a dana ti kinatarnaw tapno magun-odan ti anamong ti Dios.—Mateo 16:24.
Datayo, kas agbuybuya iti maysa a publiko a bautismo, ket makipagrag-o iti okasion, nangruna no ti maysa a mabautisaran ket maysa a kabagian wenno inyadalantay ti Biblia. Nupay kasta, tapno makiraman a naan-anay, rumbeng a dumngegtayo iti intero a palawag a kadua dagiti kandidato, denggen ti publiko a panangsungbatda kadagiti saludsod a maidatag kadakuada, ken makipagkararag. Ti panangaramid iti daytoy tulongannatayo a maaddaan iti umiso a panangmatmat iti bautismo; maadda kadatayo ti panangmatmat ti Dios iti daytoy. Kalpasan ti panagbautisar, saan a kalikaguman ti rag-otayo ti panagrambak, sabsabong, wenno maysa a padayá kas pammadayaw iti nabautisaran. Ngem mabalintay nga asitgan ti baro a kabsattayo tapno yebkas ti ragsak iti napateg nga addang nga inaramidna ken tapno idanon ti nabara unay a panangabrasa iti Nakristianuan a panagkakabsattayo.
Ngarud, iti pakagupgopanna, amintayo, agraman dagidiay agpaitaneb iti danum, rumbeng a matmatantay ti bautismo a buyogen ti maitutop a kinaserioso. Saan dayta a maysa a panawen para iti naariwawa a panangyebkas ti rikrikna, panagpadayá, wenno panagraragsak. Ngem saan met dayta a maysa a naliday wenno nakalkaldaang a panawen. Siuumiso laeng a maragsakantayo ta timmipon dagiti kabbaro kadatayo iti dana nga agturong iti biag nga agnanayon. Ken mabalintay a sirarag-o nga abrasaen dagiti kabbaro a kakabsattayo.
[Ladawan iti panid 31]