SEALTIEL
[Nagimtuod (Immuman) iti Dios].
Maysa a kaputotan ni Ari David ken inapo ni Jesus iti tribu ni Juda. Ni Sealtiel ket naawagan nga anak ni Jehoiaquin (Jeconias) ken anak ni Neri. Agpada a ni Sealtiel ken ti kabsatna a ni Pedaias ket naawagan kas ama ni Gobernador Zorobabel, kalpasan ti pannakaidestiero idiay Babilonia.
No maipapan iti ama ni Sealtiel: ni Sealtiel ti umuna a nailanad kadagiti annak a naipasngay ken Jehoiaquin bayat ti pannakaidestierona. (1Cr 3:17; Mt 1:12) No inasawa ni Sealtiel ti di nainaganan nga anak ni Neri a dayta ti nangtuntonan ni Lucas ti listaan ti kapuonan ni Jesus, ni Lucas mabalinna a tukoyen ni Sealtiel kas “anak ni Neri” gapu ta isu ket manugang ni Neri. Umasping met daytoy iti panangtukoy ni Lucas ken Jose, a nangasawa ken Maria (nalawag nga anak ni Heli), kas “anak ni Heli.”—Lu 3:23, 27.
No maipapan iti ama ni Zorobabel: naminsan a natukoy ni Pedaias kas ama ni Zorobabel (1Cr 3:19), ngem ni Sealtiel a kabsat ni Pedaias (1Cr 3:17, 18) ti nadakamat nga amana iti amin a dadduma pay a pagparanganna. (Esd 3:2, 8; 5:2; Ne 12:1; Hag 1:1, 12, 14; 2:2, 23; Mt 1:12; Lu 3:27) No natay ni Pedaias idi ubing pay ti anakna a ni Zorobabel, ni Sealtiel a kalakayan a kabsat ni Pedaias ti mabalin a nangpadakkel ken Zorobabel kas bukodna nga anak. Wenno, no natay ni Sealtiel nga awanan anak ket intungpal ni Pedaias ti rebbengenna a panangasawa iti ipagna, ti anak ni Pedaias iti asawa ni Sealtiel ti nagbalin a legal nga agtawid iti kalintegan ni Sealtiel.